MUC

Print Friendly and PDF

Sunday, December 27, 2015

Sabbath School Lesson 9 | Kidona Lian leh pawlpi Masate





LESSON 9    FEB. 20 – 26     KIDO-NA LIANPI LE PAWLPI MASATE

TU KAAL SUNG SIM DING: Sawl. 1: 6 – 8; 2: 5 – 12; 4: 1- 30; 7: 54; 10: 12 – 29; Pian. 11: 1 – 9.
KAMNGAH: Uliante in Peter le Johan a han’mahmahna thu le amaute pilna sang a nei lo mi mawkmawk ahihna thu a theih uh ciangin lamdang a sa mahmah uh hi. Tua ciangin Jesuh

tawh a kikhawl khin ngeite ahihna uh a phawk kik uh hi. Sawltak 4: 13.

Nungzuite’ ngaihsut bangin Khrih gamtang lo hi. Tua in Khrih tawh a kizopna uh dongtangh sak mah mah hi. Amau ngaihsutna bangin Khrih a gamtat loh ciangin Khrih nasep khempeuh Nungzuite in telthei lo uh hi. Khrih van a kah khit dongin Nungzuite in Roman kumpi ukna panin Israel mite in hotkhiatna ngah ding hi, ci-in ngaihsun uh hi. Nungzuite in ni 10 sung bang thungen khawm uh a, tua ciangin Khrih gen thute theitel thei pan uh hi. Tua bangin a ngaihsutna uh kikhelin Penticost Ni ciangin hotkhiatna thu tangko khia thei uh hi.


Thu-um mite in biakna makaite’ langpanna bawlsiatna thuak uh hi. Tu kaal sung i sin ding thute in Satan in thuman khaktan nuamin a nasep zia, thuman a selcip taktak pen mihing lungsim ngaihsutna hi, cihte zong i sin ding hi.

SUNDAY FEB. 21

NUNTAKNA THAK KIPAN


Sihna pan a thawh khit ciangin Nungzuite upna a kip nadingin Khrih in ni 40 sung bang Vantung Gam thu hilh lai hi (Sawl. 1: 3; 1Kor. 15: 4 – 7). Khrih van a kah laitak nangawnin Khrih in Roman kumpi a zo takpi mah ding hiam cih bek mah lunghimawh uh hi (Sawl. 1:6).

Amau ngaihsutna bang bekin nate piang dingin lamen lua uh ahih manin Khrih hilh thute za thei mahmah lo uh hi. Khrih tawh kum thum le a lang bang, sang khempeuhte SANG, sia khempeuhte SIA tawh kikhawl uh hi mah taleh, a sin ding uh tampi om hi.

Sawl. 1: 6-8 sim in. Bangci bangin Khrih in amau theihloh thute hilh hiam?

_________________________________________________________

__________________________________________________________

Khrih in Nungzuite mawhsakna dingin a hun mawk bei sak lo-in a theih ding uh kilawm thuman thute hilh zaw hi. Leitung kumpite vangliatna sangin Kha Siangtho vangliatna lian zaw hi. Nungzuite in vantung a kahto Khrih et laitakun, a gei vuah a ding puankangsilh mi nih mu uh hi. Tua mi nihte in Khrih in vantung ah a kahtoh na muh bangun khat vei hong pai kik ding hi. Tua hun ciangin Nungzuite lamet bangin a Vanglian Kumpi-in hong pai ding a, Israel gam kip tawntung ding a, vangliatna tawh kidim Gam hi ta ding hi. Israel kumpi bek hi nawn lo ding a, mi nam khempeuhte Kumpi, na khempeuh a Piangsak Pa ci-in mi nam khempeuh in a min phat ding uh hi.

Nungzuite in Olive mual panin Jerusalem zuanin ciah kik uh hi. Khrih hilh thute lam tawntungah ngaihsun sun uh hi. A theih ding uh thu tampi om lai hi. Khrih in amaute vaikhak a, Kha Siangtho ngakin Jerusalem a omin, tua khit ciangin, vangliatna tawh kidim, Khrih ngeiloh nate sem dingin thupia hi.

Sawl. 1: 14 sim in.Nungzuite in Kha Siangtho a kidimma uh le Kha Siangtho tawh a kidim khit nunzia uh, koi bangin kilamdang hiam? Matt. 20: 20 – 24. Koi bang lungsim puak a nei dingin hong hilh hiam? Kha Siangtho tawh a kidim ahi thei dingin na nunzia pan bangte hemkhia ding na hiam?



MONDAY FEB. 22

PENTECOST

Nungzuite in ni 10 sung thungen uh hi. Amau tuah khak thute Lai Siangtho siksanin sittel uh hi. Kiniamkhiatin nungta uh hi. Kha Siangtho kimakaihsak uh hi. Piansakma-in Kha Siangtho in leitung a tuamcip mah bangin Nungzuite zong Kha Siangtho tawh kidim uh hi. Meikuang bangin Kha Siangtho vangliatna hong tungin, pau nam tuamtuam kigawm khawm ahih hangin, khat le khat kiho thei uh hi (Sawl. 2:2) A thak kipatna khat suak hi.
Sawl. 2: 5- 12 sim in. Bang thuman pha kigelh hiam? Pian. 11: 1-

9 tawh enkak in.

________________________________________________________

_________________________________________________________

Tuiciin tun zawh tawl khat khit ciang mite in vantung ban ding tausang mahmah khat lam kipan uh hi (Pian. 11: 1- 9). Pasian in hih ngimna hoih lo susia dingin pau nam khat panin pau nam tuamtuamin kikhensak hi. Tua panin mun tuamtuamah kikhenthang uh hi (Pian. 11: 5, 6). Pentecost Ni-in pau nam tuamtuamte pau nam khat bek a pau tawh kibangin kiho thei uh hi. Tausang lam dingin kikaikhawm hi lo-in, hotkhiatna thu tangko dingin kikhawmtuah uh a hi hi. Mun tuamtuam pan mi namcinte Jerusalem ah va kikhawmtuah uh hi (Sawl. 2:5). Babel tausang panin mun khempeuh ah mi kithehthang tawh en kak in. Nungzuite in thu a gen uh ciangin minam tuamtuamte in amau pau ciatin za uh hi (Sawl. 2: 6 – 11). Peter in hih thupiang siksanin mi namte tungah thuhilh hi. A thugen a za mite in Kha Siangtho tawh kidimin a nunzia uh kikhel ding deih hi (Sawl. 2: 17

– 21). Messiah nasep pulaak banah Honpa na that lum uh hi, ci-in amau mawhna pulaak hi (Sawl. 2: 23). Kisikin, tua ni-in tui kiphum mi 3000 bang pha hi. Tua mite in sawltakte tawh nasem khawm uh hi.

Satan in khut zatin a neih mite Kha Siangtho makaihna tawh kikhel uh hi.Pasian vangliatna in mawhmaisak banah suang bangin a sak lungsim neemsak thei hi.



TUESDAY  FEB. 23

SADDUCESS MITE TAWH KINIALNA


Sawl. 4: 1- 30 sim in. Koi bangin Satan in Khrih a do zia kilang hiam? Koi bangin tua thu kilang tawntung hiam? Satan nasep bang pulaak hiam? Khrih nasep bang pulaak hiam?

____________________________________________________________________

_____________________________________________________________________

Siampite le makaite in Khrih in amaute sangin vanglian zaw hi, cih mu uh hi. Sadducees mite in thawhkikna thu um lo uh hi. Nungzuite in Khrih in sihna panin thokik hi, ci-in gen kawikawi uh a, mite in thawhkikna thu um leh, Sadducees upna bei mang ding patau uh hi. Ellen G. White, The Acts of the Apostles, 78.

Biakna makaite in Peter’ na lamdang bawl a muh tak ciangun heh mahmah uh hi (Sawl. 3: 1- 10). Ahi zongin Sawltakte in biakna makaite gen thute awlmawh lo uh hi. Siampite in pilna, siamna nei lo hih Sawltakte nasep a muh tak ciangun lamdangsa uh hi (Sawl. 4: 13). Kikhopna innte pan kaikhia-in Jesuh min suangin bangmah a gen nawn loh nadingun khaam uh hi. Siampite ngaihsut bang lo-in Sawltak in a nasep uh khawl tuan lo uh hi (Sawl. 4: 18). Khawl lo bek hi lo, thu-um tampi in amaute thugen umin Topa min phat uh hi. Laulo-in thugen uh a, amaute tungtawnin Topa Pasian in na lamdang tampi bawl hi (Sawl. 4: 29, 30). Peter paipai-na lampi ah mihonpi in ngakin, cina khempeuh in Peter’ lim tawh a kisukkhak nak leh, damna ngah uh hi (Sawl. 5: 15). Mun tuamtuam pan mi honpi kikaikhawmin cinate in damna ngah uh hi (Sawl. 15: 16).

Biakna makaite in thuman selcip ding a hanciam uh hangin, khaktan zo lo uh hi. Mite in thuman theihnopna lungsim tawh thungenin Lai Siangtho sim uh hi. Cinate in damna ngahin, pawlpi sungah thu-um mi kibehlap den hi. Bang bangin thuman susia ding hanciam ta leh, thuman in gualzo tawntung hi. Bang hang hiam cih leh Khrih in mi khempeuh aa dingin hong zawhsak khin zo hi.


WEDNESDAY FEB. 24    STEPHEN SUANG TAWH KIDEENLUPNA

Pawlpi masate hun lai-in Sawltakte nasep a nawngkai-sak biakna makaite mah hi. Upna le Kha Siangtho tawh kidim Stephen in na lamdang tampi bawlin biakna makaite mai-ah thusit dingin kipaipih hi (Sawl. 6:8). Ama thugen a langpan mite in zuau genin makaite thusit thuakna thuak hi (Sawl. 6:9- 14).

Stephen langah pangin zuau thu a gen mite, Stephen in a dawnna Sawl. 7: 2 – 53 ah kimu thei hi (Sawl. 2: 37). Stephen in amah a langpang mite thugen a manlohna a pulaak ciangin amaute in dawng kik thei lo uh hi. Stephen in a up thu ah kiptakin omin amah a langpang mite thuman lohna kimu thei hi. Hih thu in Pasian mai-ah kiniamkhiatin Ama tungah ki-ap ding hong hilh hi.

Stephen in amah a kimawhsakna thute a maan lohzia a pulaak manin thahna thuak hi. Stephen sihna in Satan in Pawlpi bawlsiatna thak khat kipatna-in kiciamteh hi. Tua ma-in Nungzuite in thah ding vau-na a tuak kha uh hi bek a, Stephen a hih leh, thahna thuak masa pen suak hi. Biakna makaite in bang lamen uh hiam? Satan in, Jesuh kithat khin zo ahih teh a nungzuite zong khat khit khat thatin beimang ding hi, ci-in ngaihsun ding hi. Mite muhna ah Stephen le Jesuh sihna in Satan gualzawhna tawh kibang hi.

Stephen in thahna thuak khit ciangin Sanhedrin kipawlna-ah Saul zong kiteel hi. Saul in tawl khat sung Satan khutzat-in om hi. Thu-um mite a bawlsia Saul in a sawtlo-in Pawlpi makai le Pasian sawltak khatin hong om hi. A upna hangin thahna thuak Stephen masuan Khrih sisan hangin hotkhiatna le tua Lungdamna thugen a zom dingin Saul in sapna ngah hi. Ellen G. White, The Acts of the Apostles, 102.

Khat veivei ciang thuhoih hi, ci-in i ngaihsut khak khol thu hi mah taleh, hoih hong suak kha thei hi. A hoih mu thei lo-in siatna bekbek a mu mi in bang lametna nei hiam?


THURSDAY FEB. 25        NGAIHSUTNA THAKSUAKSAK


Nungzuite’ lungsimpuak in Khrih hilh thute telthei lo sak hi. Tua banah Israel minam hihna kisak theihpih uh hi. Jewte in Samaritante hopih lo uh hi. Jewte in Samaritante a bawlzia Samaritan numei in tel mahmah ahih manin, Jesuh in ama kiangah tui a nget ciangin numei in lamdangsa hi (Jn. 4:9).

Jew minam a kihi-sak theihpihzia Caesarea mun a om biakna mi mahmah, Pasian a zahtak Rome galkapmangpi Cornelius nunzia tungtawnin kimu thei hi (Sawl. 10:2). Amah pen tua khua mite in zong a zahtak mahmah ulian khat hi (aneu 22).

Peter zong a minam kisaktheihpih ahih manin vantungmi in thuhilh hi. A mang sungah vantung kihongin vantung panin ganhing namkim a mai-ah kikoihsuk hi. Tua ganhing sianglote ne in, ci-in thu a kipiak in bang deihna nei hiam? Sawl. 10: 12- 29.
___________________________________________

___________________________________________

Mi kimkhat in, “Pasian in a thupiak, nek loh dingin a koih sianglote sasiang hi,” ci-in pulaak hi, ci uh hi. Pasian in nek loh ding a cihte kine thei hi, cihnopna hi lo hi (Sawl. 10: 17). Cornelius sawltakte a tun uh ciang, a vapai-na hang uh Peter kiangah a pulaak tak uh ciangin, Peter in a mangmuhna thu theitel pah hi (Sawl. 10: 22, 23). Peter in Cornelius tawh a kimuh tak ciangin, a mang mat in bang deihna nei, thei hi. Khrih in leitung Honpa hi. Gentiles mite zong Pasian tatsa ahih manun manpha hi, ci-in pulaak hi (Sawl. 10: 34 – 48). Khrih sungah kideidanna, kinengniamna, Jew le Gentile om lo hi (Sawl. 10: 35). Lai Siangtho in Khrih a um mi khempeuh in Ama sungah pum khat hi, ci-in hong hilh hi.

Koi bangin kilangneihna, kigal neih cihte om tawntung hiam? Koi bangin hong kipumsak thei lo thute hemkhia-in Khrih sungah kipumkhat thei ding i hiam?


FRIDAY FEB. 26
SINBEH DING: Rusia mi laigelh minthang Fyodor Dostoyevsky in Khrih leitungah hong pai kik ding hi, ci-in gelh hi. Ahi zongin ama gen le Lai Siangtho hong gen kibang lo hi. Khrih in deihtel theihna hong pia a, tua deihna hangin leitung in siatna tawh kidim hi. Mihing in deihtel theihna nei lo hi leh, hih zahin siatna om lo ding hi. Mihing deihtel theihna in deihtel theihna a pia Pa sihna tun hi. Mihing deihtel theihna zahin nate a sia-sak thei vangliatna om lo hi,” ci-in pulaak hi.

Pasian in itna tawh kidim ahih manin deihtel theihna hong guan hi. Siatna, sihna, gimna cihte mihing deihtelna, deihtel theihna zatkhialhna panin i ngah ahi hi. Pasian hong piak khong letsong kizang khial hi. Suahtakna, deihtel theihna cih pen zatsiam kul hi.

KIKUP DING DOTNATE:

1.    Lai Siangtho in Khrih tawh pumkhat hihna thu tampi hong hilh hi. Minam khat le khat kilangneihna, khat le khat kideidan lo-in Khrih sungah pum khat hihna in vanglian mahmah hi. Na kim na paam, pawl sung cihte ah kideidanna hangin siatnate na mu hiam? Koi bangin tua bang thute kidawk thei zel hiam? Bang hangin Lungdamna Thu tawh kituak lo hiam?

2.    Kha Siangtho hong hopihna na za hiam? Koi bangin na dawng hiam? Mihing lungsim ngaihsutna mah thupi lo hi hiam? Kha Siangtho in a hong makaih ciangin khensat bang na nei hiam? 

To get the latest update of me and my works

>> <<