MUC

Print Friendly and PDF

Sunday, December 27, 2015

Sabbath School Lesson 8 | Hamsat Hun Ciang Honghuh


LESSON 8   FEB. 13 – 19     HAMSAT HUN CIANG HONG HUH

TU KAAL SUNG SIM DING: Luke 5: 6 -8; Mark 3: 14; 4: 35 – 41; Matt. 8: 23 – 27; 20: 20 – 28.

KAMNGAH: “Amaute gel in “ Lampi-ah i paikawmin Lai Siangtho khiatna hong gen laitakin i lungsim hong lawpsak mahmah hi mah lo ahi hiam? a kici uh hi. Luke 24: 32.

Khrih in nasep a kipat a kipanin amah kia-in nasem ngei lo hi. Thuhilh ding, thugen ding le Amah a huh dingin mi pawl khat teelkhia hi. Lai Siangtho in Khrih nunzia, si-in sihna pan a thawh kikna, Amah tawh nasem khawm a Nungzuite’ thu hong hilh hi. Mawhnei mite a hong tatkhiat nadingin a sep khempeuh zong tua mah siksan hi. Singlamteh tung pan “A zo zo hi” ci-in a ot na thu zong tua thu mah ahi hi. Satan in Khrih tungah zawhna nei thei lo ding hi, cih thu Satan mahmah in thei hi. Ahi zongin Khrih a zawh loh hangin Khrih nungzui mite ka zo veve ding hi, cih ngimna tawh Pasian mite hong do tawntung hi. Siatna in Satan zia le tong pulaak hi. Kiphatsakna, muanlahna, lungkhauhna, ei le ei hi kisakna cihte in Satan kiang hong tun hi. Khrih phawk lo-in mihing hoihsak thu khat zuihna in siatna lianpi piangsak hi.

SUNDAY FEB. 14

PETER A KISAP KHIATNA

Khrih in Amah tawh hotkhiat nasem khawm dingin a kicing lo mite mah sam hi. Khrih in Galilee Gunpi gei-ah a pai lai-in mihonpi in zui uh hi. Tua laitakin a lawhcinglo zan tawntung ngabeng mi nih tawh kimu hi. Hih mi nihte in Khrih thu le kikhopna innte ah a lamdang Ama thuhilhte za ngei khin uh hi (Luke 4: 31, 32). Dawi vei mite in damna ngahin, Peter sungh nu banah mi dang tampite natna damsak hi, cih thute zong za khin uh hi (Lk. 4: 33 – 41). Tua bangin mihonpi in Khrih nungzui-in a pai ngeingai laitak mahun Khrih in Peter’ gunkuang tungah tuangin tui tungah tawm khat a paiphei khit ciangin, mi honpite zakin thuhilh hi (Luke 5:3). A thugen a man khit ciangin Khrih in Peter kiangah tuithukna lamah a ngeen paai dingin sawl hi. Tua bangin a kisawl hangin Peter in ngasa khat beekbeek kiman lo ding hi, ci-in ngaihsun hi. Ahi zongin Khrih a zahtakna tawh Khrih sawl bangin sem hi.

Luke 5: 6 – 8 sim in. Peter in Khrih a dawnkikna ngaihsun lecin, bang hangin Khrih in gitnatna nei lopi mah Peter teel veve hi ding hiam?

_______________________________________________________________

_________________________________________________________________

Jacob in Pasian ompihna a phawk mah bangin Peter in zong Vanglian Pasian tawh kimu ahih lam phawk a, kicing ahih lohlam kiphawk thei hi (Pian. 32: 24 – 30). Peter in mawhna tawh kidim ahih lam kiphawk phasaan hi. Bang hang hiam cih leh Topa kiangah amah om hi. Peter in Khrih kiangah “Nang in Pasian Tapa na hi hi” ci-in pulaak hi. Hih thu in mawhnei mi ahih lam kiphawk ding kimlai, “Khrih in mawhnei mi hi,” a ci zawsop Peter gei-a a om biakna makaite thuhilhna lianpi suak hi (Jn. 9: 24).

Peter le John in a neihsa khempeuh nusia-in Khrih nungzui uh hi (Lk. 5: 11). Gunkuang dim a om ngasa nusia-in Khrih nungzui uh hi. Nang le kei bang hong hilh uh hiam?


MONDAY.  FEB. 15

“KHRIH TAWH MIMAL KIZOPNA”

Galilee Gun dung panin Nungzui dingin sapna ngah Peter le John in dawi gilote tungah Khrih’ vangliatna mu uh hi (Luke 4: 34 – 36). Natna namcin a damsak Vangliatna (Lk. 4: 38 – 41); na khempeuh tungah vangliatna nei pa ahih lam zong mu uh hi (Lk. 5: 4 – 6); amau mawhna pulaak khia-in lau kei un, cih thu za khin uh hi (Lk. 5: 10). Khrih in zan tawntung thu a nget khiteh mi honpi lak panin Ama Nungzui dingin mi 12 teelkhia-in “Nungzui” ci-in minpia hi (Lk. 6: 12). A khiatna in ‘ a kisawlkhia mite’ cihna hi. Amaute a sawlkhiatma-in thu vaikhak masa phot hi (Lk. 9: 1- 5). Tua thuvaikhakte sawltak 70 tungah zong vaikhak hi (Lk. 10: 1 – 16).

Mark 3: 14 sim in. Nungzuite a sawlkhiatma-in bang thu kisam masa hi, ci-in pulaak hiam? Nang le kei aa dingin bang thupha hong hilh hiam?

_____________________________________________

_____________________________________________

Khrih tawh mimal kizopna nei lopi-in Ama nasem dingin a kuankhia mi tampi om hi. Ahi zongin tua bang mite in Khrih tawh mimal kizopna kisam mahmah hi. Khrih’ thu gengen sam napi, Khrih mah mah a mangngilh om kha thei hi. Hotkhiatna thu in mihing hong honkhia hi, ci-in kingaihsun kha a, Khrih bek mah Honpa in hong honkhia hi, cih kimangngilh hi.

Biakna makai lian pipite amau nuntakna mahmah tawh Khrih theihtelna nei lo, Amah tawh nungta lo, nunzia kikhel taktak lo uh hi. Tua bang mite mah in hotkhiatna a theihtel ding uh kisam hi. Tua hi kei leh, Satan in tua bang mite mah khut zatpi-in nei hi. Hih bang thu om ahih manin Khrih tawh mimal kizopna lo-in Khrih in kuamah sawlkhia lo hi. Ama thu i theihtel nadingin Amah mah tawh nungta phot ding kisam hi.


TUESDAY FEB. 16

NATE TUNGAH KHRIH VANGLIATNA


Matt. 8: 23 – 27; Mk. 4: 35 – 41; Lk. 8: 22 – 25 sim in. Koi bangin Satan in Khrih a do zia pulaak hiam?

_______________________________________________________________________

_______________________________________________________________________

Koi bangin Satan in piansak nate tungah ukna nei cih i tel loh hangin, Job thuakna tungtawnin nate tungah Satan’ vangliatna kimu thei hi (Job 1:18, 19). Satan in mihing nunna a ngah nading tu-in zong leitungah a lauhuai tuiciin, huihpi cihte tungsak hi (Ellen G. White, In Heavenly Places, 348). Mun tuamtuam a piang siatna khempeuh in Satan thuneihna kilangsak hi.

Khrih in sun tawntung thuhilh a, nitum kuan manawhta ahih manin a Nungzuite tawh gun gal lam zuan dingin paikhia uh hi. Gun laizang a tun laitakun huihpi nung hi. Tuihualte in gunkuang nawkpaai dekdek hi (Mk. 4: 37). Jesuh ahih leh tawl lua mahmah ahih manin gunkuang sungah ihmu hithiat hi. Nungzuite in Jesuh ihmut lam phawk kha lo-in tuihualte hangin cihna ding thei lo uh hi. Nungzuite in Khrih phong uh hi. Khrih in Nungzuite paupihse lo-in, a lupna mun pan dingto-in, a khut lamto-in “ huih aw, dai in!” ci-in thu a piak ziau leh, tha khat thu-in huihpi nung dai pah hi. Nungzuite in hih thu a muh tak uh ciangin lamdangsa mahmah uh hi. Lau kawmkawmsa-in, ‘Hih MIPA in bangci MI hiam? Tuipi le huihte in Ama’ aw ngai zen uh aa!,(Mk. 4: 41). Nate tungah Khrih vangliatna banah bangbang piang taleh, Khrih bek mah i muan ngeungau ding hong hilh hi.


Amah a um nuam lo mi khat in Amah a um dingin nate tungah vangliatna nei Khrih in thatang hatna tawh upsak lo hi. Deihteel theihna letsong bangzahin manpha hiam? Koi bangin tua deihteel theihna na zang hiam?


WED     FEB. 17

KUA IN LIAN PEN HIAM?

Matt. 18: 3 -5; Mk. 9: 33 – 37 sim in. Khrih in Ama nungzui ding le nungzui khempeuh bang thu hilh hiam?

______________________________________________________

_________________________________________________________

Mailama piang ding thute hangin nungzuite khat le khat buai-in kinial uh hi. Khrih in Roman kumpi khut sung panin hong honkhia-in David kumpi gam puahpha ding hi, ci-in lamen uh hi. Tua bang hun a tun ciangin kua in gam makai lian pen hi ding hiam, ci-in lunghimawh uh hi. Tua bang lungsim in Lucifer lungsim hi lo hi leh, kua lungsim puak hi ding hiam? (Isa. 14:14).

Matt. 20: 20 – 28 sim in. Koi bangin Khrih in tua dotna dawng hiam? Bang deihna nei hiam?

________________________________________________________________________

________________________________________________________________________

Khrih in a Nungzuite tawh singlamteh tungah a thuak ding gimna le sihna manawhin Jerusalem manawhin hong pai uh hi. Khirh in a thuak ding zahko-na, bawlsiatna, si-in nit hum khit ciang sihna pan a thawhkikna ding thute a Nungzuite hilh hi (Matt. 20: 18, 19). Hih bang thute a gen khit phet leh, a nungzuite in “ kua lian pen ding hiam” ci-in Khrih dong uh hi. Khrih gen thute Nungzuite bilah lut vet lo hi. Khrih gen thute ngai het lo uh hi. Leitung hamphatna ding bek ngaihsutin nei uh hi. Mimal aituam ding bek ngaihsutin nei uh hi. Khrih thugen a bei ngei lo ding Ama gam omzia ding thei khial uh hi. Khrih in Ama sihna tawh tua gam kipsak ding hi, cih thu ngaihsun lo uh hi.

Thu saumu thei ding mi hamsa hi. Muhna toi lua mahmahte i hi hi. Koi bangin na muhna zaisak ding na hiam?


THURSDAYFEB. 18     KHRIH IN THU SIKSANIN HILH



Khrih a sih zawh ni thum khit ciang dong Nungzuite in Khrih’ gen thute telthei nai lo uh hi. Khrih in Roman kumpi do gawp dingin lamen uh hi. Amau ngaihsut bang lo-in Roman kumpi in Khrih susia hi. Khrih a kithah khit ciangin nungzui hon khat in kimuhkhopna khat nei uh hi. Amaute lak pan numei pawl khat in Sunday zingsang tungin han lam zuanin va pai uh hi. Luke in numei thum ci-in, gen a, ahi zongin Galilee panin Jesuh a zui numei dang zong kihel ding hi (Lk. 23: 55; 24: 1, 10). Khirh kisialna han tungah puankang silh mi nih mu uh a, tua pan hong kileh kik uh hi. Amaute muh thute Nungzui 11 le a dangte tungah gen uh hi (Lk. 24:9).

Sunday zing tungin Nungzui nihte in Jerusalem panin nai 2, nai 3 pai kipai-na a tenna uh Emmaus khua manawh uh hi (Lk. 24: 13). A pai kawmkawmun ni nih, ni thum lai-a thupiangte kikum kum uh a, amau tawh mi khat a pai om lam phawk kha lo uh hi. Bang hangin dah na hi uh hiam, ci-in kihopih kei leh, tua Nungzui nihte in Khrih ahih lam phawk lo ding uh hi (Lk. 24: 17). Khrih in amaute kiangah “bang hangin dah na hi uh hiam” ci-in hopih hi. Cleopa min nei khat in dawng kik pah a, tu sawngteng a thupiang thei kha lo na hiam? ci-in dong kik hi. Bang thu piang om hiam” ci-in tua MIPA in dong hi (Lk. 24: 19).

Lk. 24: 19 – 35 sim in. Koi bangin tua mite in bang mah a tellohzia uh pulaak uh hiam? Koi bangin Khrih in tua thuman hilh hiam?
________________________________________________

________________________________________________

Khrih in Lai Siangtho siksanin amaute thuhilh hi. Satan langdo-na a zawh nadingin Lai Siangtho mah tawh do hi. Lai Siangtho lo-in bangmah hilh lo hi. Genkholhna a om bangin sihna pan a kithosak ahihna zong pulaak hi. Tua bangin a kipulaak khit phet leh, amaute muhna pan mangkhia vingveng hi (Aneu 31). A thu za bek thamlo-in, a mit mahmah uh tawh a muh thute hangun Khrih a upna uh kipzaw semsem hi.

Khrih in Lai Siangtho kimakaihsakin Lai Siangtho mah thunei penin koih hi. Koi bangin na nuntakna ah Lai Siangtho mah thunei pen hisak ding na hiam?


FRIDAY FEB. 19

SINBEH DING: Mihingin hong piang Khrih in dawivei mite damsakin, lamet beite lamet guan hi (Lk. 6: 18; 20 – 23 ). Pasian itna tawh mite it ding zong hilh hi (Lk. 6: 27 – 49). Galkap mangpi silapa’ tapa damsak hi. (Lk. 7: 2 – 10); meigong nu tasi zong hingkiksak hi (Lk. 7: 12 – 16). Huihpi daisak hi (Lk. 8: 22 – 25). Kum 12 tawntung siluang natna nei numei damsak hi (Lk. 8: 43 – 48). Jairus tanu hingsak hi (Lk. 8: 41); a sih zawh ni li cingkhin Lazarus hingkiksak hi (Lk. 11: 39 – 44). Khrih in hih bangin nasem taleh, mi tampi in amah um thei lo uh hi. Ama Nungzui mahmahte in zong um zo lo hi. Khanglui upna, amau ngeina tuamtuamte siksanin Khrih up ding hamsa sa uh hi. Ellen G. White, Manuscript Release, Vol. 18, p. 116.

Upna pen Pasian letsong hi. Mihing in tua letsong nial thei hi. Satan in i up loh theihtheih nadingin nasem hi. Hotkhiatna i cih in Khrih in eite aa dingin a sep khempeuh i upna a hi hi. Tua upna pan i pial nadingin Satan in lampi tuamtuam zang hi. Khrih i belh tawntung a leh, Satan in hong zo lo ding hi.

KIKUP DING DOTNATE:

1.    Pasian in vanglian mahmah ahih leh, Amah a um mite dongtuak uh hiam cih dotna pen i zak mun mahmah dotna khat hi-in, koi bangin na dawng diam? Koi bangin Satan in Khrih a do-zia hong theitelsak hiam?

2.     Bang thute siksanin Khrih umin, Lai Siangtho gen thute um thei i hiam? Bang hangin tua bang siksan neih ding thupi hiam? Tua bangin um thei napi hangin, bang hangin mi kim khat in um thei lo uh hiam? Bang thute in um lo sak hiam? Koi bangin up theihlohna hemkhia thei ding uh hiam?

3.     Tu kaal sungin i sin mah bangin kicinna nei-ta kei leh, Khrih in Ama nasem dingin amaute teel veve hi. Bang bangin thaneem na kisak hangin, Khrih zat mi suak thei veve hi lo na hiam?

To get the latest update of me and my works

>> <<