MUC

Print Friendly and PDF

Sunday, December 27, 2015

Sabbath School Lesson 7 | Jesuh in a hilh Kidona Lianpi

 LESSON 7       FEB. 6 – 12   JESUH IN A HILH KIDO-NA LIANPI



SABBATH NITAK: TU KAAL SUNG SIM DING:Matt. 11: 29; 13: 3

– 8, 18 – 23; 7: 21 – 27; 7: 1- 5; Rom. 4: 1 – 6; James 2: 17.
KAMNGAH: “Vangik pua a gim mite khempeuh aw, ka kiangah hong pai ta un; tawlgamna kong pia ding hi” Matt. 11: 28.

Kidona Lianpi, tatkhiatna thu i gen ciangin nate kipiansak a kipan, mawhna kipatna le a bei nading cihte huam hi. Jesuh le Satan kido-na in na khempeuh sukha hi. Nisim i nuntakna ah, mi tawh kizopna a kipan, i hihna khempeuhah hih Kidona Lianpi i tuak kha den hi. Hih kidona tawh kipelh kuamah om lo hi. Kidona Lianpi in gamsung buai-na, gamtat khuasakzia tampi sukha hi.


Kidona Lianpi hangin mihing in Pasian i theihtel zah ding i thei kei hi. Tu kaal sungin, Kidona Lianpi tawh kisai-in Khrih’ hong hilh thute i sin ding hi.


SUNDAY FEB.  7

TAWLNGAKNA NAMNIHTE

“Keima hakkol kisuan unla kei kiangah kisin ta un. Ahang in, keimah lungsim nem le lungsim kiniamkhiat mi ka hi hi, na hinna un tawldamna a ngah ding hi” (Matt. 11: 29). Koi bangin ‘hakkol’ in tawldamna hong pia hiam?

Jesuh in galpa’ khut sung pan a hong suaktasak dingin nasem hi. Jesuh in Jeremaih pulaak thute mah siksanin a hong hilh ahi hi. Jeremaih in namdang pasian bia lo-in a nungta tawntung Pasian biakna in tawldamna hi, ci-in pulaak hi (Jer. 6: 16).

Lai Siangtho in tawldamna cih thu limgen mahmah hi. Tawldamna a pan khia Pasian mah hi. Pasian in na khempeuh a bawl khit ciangin tawlnga hi (Pian. 2:2). Nipi kaal khat a cinsimin Pasian a tawlngak mah bangin eite zong a tawlnga i hi hi. Kumsialin zong tawlngakna pawi om hi (Siam. 16: 31) Kum sagih a cinsimin, (Pai. 23: 11), kum 50 a cinsim in tawlngakna omin, sila-te kikhahkhia-in leibate kimaisak hi (Siam. 25: 10). Pasian in a mite tawh omin, gal kido-na, siatna cihte om lo-in, tua hun in tawlngak hun hi (Pai. 33: 14; 1Kum. 5: 4; Thkna. 25: 19).

Judahte in saltanna pan a hong ciah kik uh ciangin a gam uh in tawlngak hun nei hi (Pai. 5: 4, 5; Kahla 1: 3). Mi gilote in tawlngak hun nei lo hi (Isa. 57: 20) Mi gilote ahih leh sihna le hankhuk in amau’ tawlngakna hi ding hi ( Job 3: 11, 13, 16 – 18). John in zong Jesuh a nial khempeuhte’ tawlngakna mun ding hong hilh hi (Mang. 14: 11).

Jesuh in a khawnkhongin tawlngakna hong pia hi. Sabbath letsong in Piangsakpa’ tawlngakna hong ngahsak hi. I manthanna pan a hong phuahpha kik dingin Jesuh in tawldamna hong pia hi. Jesuh kiang pan i paikhiat khak hangin Ama kiang tawldam ngah dingin lampi hong koihsak hi.

Koi bangin Sabbath ni-in Pasian’ hong piak tawldamna na ngah hiam? Bangci bangin Jesuh sungah tawldamna na ngah hiam? Rom. 4: 1-6.


MONDAY FEB. 8

KHAICI TUH LE ANLAK HUN

Khaici vawhpa thugentehna in Kido-na Lianpi om hi, cih hong lak hi. Mi hoih le mi sia bek hi lo, tatkhiatna thu tawh kisai mihing in lungsim puakzia nam li bang kimu hi. Lungdamna Thu a sang nai lote tungah Khrih hong tatkhiatna hoihtak ngaihsun a va gen ding hong hilh hi.

Matt. 13: 3 – 8 le 13: 18 – 23 sim in. Koi bangin Kido-na Lianpi pulaak hiam?

_________________________________________________

__________________________________________________

Lamgei-ah a kia khaici in a gah theih loh mah bangin Satan in tatkhiatna tawh i kigamlat nadingin lampi tuamtuam tawh nasem hi. Tatkhiatna thu kipulaakna munte ah Satan le a pawite in takpi-in nasem hi. Tua bang munte mahah thuman a kitheih nadingin vantung mite in zong nasem uh hi. Satan le a pawlte in mite’ lungsim panin thuman la khia nuam hi. Satan le a pawlte in Pasian’ kammal kitelkhia dingin nasem uh hi. Khrih kiang a zuan mi kiang panin Satan le a pawlte kihemkhia uh hi” Ellen G. White, Christ’s Object Lessons, 44.

Bang hangin khaici vawhpa in lampi-ah khaici kia lo dingin kidawm lo hiam? Suanglakah a kia khaicite hoih tak kidon lo hiam? Bang hangin kiakte kibotkhia lo hiam? Khaici bangin Lungdamna Thu a kitangko-na munte ah mihing’ septheih in ciangtan nei hi. Mun khempeuhah khaici vawh ding ama septheih hi. Ankungte lakah kiakpo-te ahih leh, mihing’khaam theih hi lo hi. Tua kiakpo-te a bok khia ding Topa bek hi. Eite’ sep theih ahih leh, Topa muangin Ama tungah ki-ap ding hi.

Koi bangin khaici vawh thugentehna na tel hiam? Bang hangin tuikiphum tung phet mahin a nungkik om hiam? Upna kip nei lo maw? Koi bangin upna kip nei ding?

TUESDAY FEB. 9

SUANG TUNGAH KILAM INN

Suangtunga kilam inn thugentehna in mimal nunzia ding hong hilh hi. Matt. 7: 21 – 27 sim in. Hih thugentehna in bang thu hong hilh hiam?
_________________________________________________________

_________________________________________________________


Suangtunga kilam inn thugenteh na zak ciang, bang na ngaihsun hiam? Suang koi ah om? Sehnel ee? Mi kimkhat in sehnel pen tuipi gei bekah om dingin ngaihsun uh hi. Ahi zongin hih thugentehna in tuipi gei, cih pulaak lo hi. Hih thugentehna in mualtung ahih kei leh zangkuam hi kha ding hi.

Jesuh in a kibang lo inn nih pulaak hi. Inn khat pen mun kip lo tungah kilam hi. Inn khat pen munkip tungah kilam hi. A pua pan tua innte’ kilamdanna kimu lo hi (Luke 6: 48). Ahi zongin guahzu, huihpi nungin, a kilamdanna uh hong dawk hi. Mun kip lo tungah kilam inn kisia pah hi. Mun kip tungah kilam inn ahih leh kisia lo hi. Mihing in ama tha kia bekin kip zo lo hi. Vantung’ huhna kisam hi. Tua lo-in upna ah kip zo lo hi, cih hong hilh hi. Siatna a zo zo dingin Jesuh, Suangpi tungah thu-um mite a kingak ding hong hilh hi. Suangpi Jesuh tungah kinga-te bekin siatna zozo ding hi. Ama’ deihna bangin a nungta mite in Topa Suangpi tungah innlamte ahi uh hi: “Tua hi-in hih ka thute za-a, a zuipahte peuhmah suangpi tunga inn lam mipilpa tawh kibang hi” (Matt. 7: 24). Upna thupitzia! Zuihna om lo upna in a si upna hi (James 2: 17, 20, 26).

Matt. 7: 22, 23 sim in. Jesuh’min suangin dawite hawlkhia, mailam thu ding genkholhnate, upna thu mah pulaak uh hi. Ahi zongin tua bang mite’ tunna ding ngaihsun in. Na omna mun kip a hi hiam? Koi bangin nang le nang kitel ding na hiam?

WEDNESDAY FEB. 10

“AMAUTE TUNGAH THUKHEN KEN!”


Jesuh in nasep a kipat cilin Mualtung pan a thuhilhte in siatna langpan thuhilhna vive hi. Nawlkhiin thuak mite in Pasian’ mai-ah mi manpha hi; note in in leitung mite a’ dingin ci na hi uh hi (Matt. 5: 13); khuavak na hi uh hi (Matt. 5: 14 – 16),ci-in hilh hi. Pasian’ thukham kinawlkhiin thei lo, mannei ahihzia pulaak hi (Matt. 5: 17 – 19). Ahi zongin tua thukham hangin kisialh ding hi lo hi, cih zong hilh hi (Mat. 5: 20). Gamtat khuakhek kidop ding kisam hi. Tua bek hi lo, Pasian’ deih gamtat zia le tongin gamtat bek hi lo, lungsim ngaihsutna zong hi, ci-in hilh hi (Matt. 5: 21 – 28). Tua thuhilhnate in i nunzia ding vive hong hilh hi (Matt. 5 – 7: 27).
Matt. 7: 1-5 sim in. Koi bangin Kido-na Lianpi pulaak hiam? A sia

le a pha, thuman le zuau kidawk hiam?

_________________________________________________________

__________________________________________________________

Midangte sangin mi hoih zaw-in kingaihsun tawm kei inla, “mi tungah thukhen kei un. Mite tungah na thukhen mah bangun note tungah zong thu hong kikhen ding hi. Bang hang hiam cih leh mihing’ lungsim na nei kei hi. Tua bangin mite tungah thukhen na hih leh, Satan tawh kipawl na hi hi. Upna kip na nei hiam? nang le nang kisittel in. Tua in nangma sep ding hi” Ellen G. White, The Desire of Ages, 314.

Mite thukhen lo ding cih thu in: mi tungah thu i khen ciangin amau sakte’gamtat bangin ei a thukhente zong i gamta hi (Matt. 7: 1, 2). Midangte’ mawhna bek i muhsak a, ei mawhna i mu kei hi. Mite in hong bangci muh cih phawk lo-in, amau’ mawhna bek i phawk hi. I mit sunga om niin golpi lakhia masa lo-in, mi dang mit ah om niin lakkhiat tawh kibang hi, ci-in Khrih in hong hilh hi.

Mi tungah thukhenna le mawhna khat hanga thukhenna na a kibatlohzia ngaihsun in. Bang hangin a kibatlohzia i tel ding thupi hiam?


THURSDAYFEB. 11

“NOTE TAWH KONG OM DEN DING HI”


“Leitung bei dongin note tawh ka hong om tawntung ding hi” cih (Matt. 28: 20) hih kamciam in, koi bangin lungkiatna, hamsatna, guallehna, Pasian in hong nusia hiam, ci-in i ngaihsut khak hun ciang tha hong guan hiam? Matthew in hih kamciamte siksanin laigelh hi. Jesuh suah ding tangko-nate a pulaak khit ciang, vantung mi in Mary le Joseph a hopihna zong Matthew in pulaak hi. Tua a hong suak ding naungek in Immanuel hi. A khiatna in Topa in eite tawh omkhawm hi (Matt. 1: 23).

Topa Pasian in Isaac kiangah “ nang tawh ka om ding hi,” ci hi (Pian. 26: 24); Jacob kiang (Pian. 28: 15); Jeremiah (Jer. 1: 8, 9); Israel mite tungah zong ci hi (Isa. 41: 10; 43: 5). Tua bangin Topa in kamciam a piak laitakin amaute in hamsat, gimna a thuak laitak ahih manin, Topa kammal in amaute aa dingin manpha mahmah hi. “ Note tawh kong om tawntung ding hi, “ cih kamciam tawh kibang mahmah kammal in “Note kong nusia ngei kei ding a, kong nawlkhin ngei kei ding hi,” Topa in ci hi (Heb. 13: 5). Tua banah, Topa Pasian in zanni, tu ni, cikmahin kikhel ngei lo hi,” ci-in hong hilh hi (Heb. 13:8). Tua bangin Topa in khang khat khit khang khat ah kamciam pia hi.

Makai dingin Moses in Joshua a teelkhia-in, Moses a sih khit teh, Topa in Joshua tungah “nang tawh kong om ding hi” “ kong taisan kei ding hi” ci-hi (Thkn. 31: 6, 8; Josuah 1:5). David in a kumpi tokhom Solomon a ap takteh “Topa in nang hong ompih ding hi,” ci-in Solomon tungah gen kik hi (1Khang. 28:20). Jesuh pen a kikhel ngei lo pa hi; eite tawh a hong om khawm den pa hi; siampi, kamsang, sawltakte a ompih den pa hi. Amaute in bawlsiatna a thuak uh ciangin, Topa Pasian in amaute nusia lo-in ompih tawntung hi.

Hun bei kuan Khrih pawlpi aa dingin Topa kamciamte manpha mahmah hi. Jesuh in leitung bei dongin note kong ompih ding hi, a cih mite in mi namkimte kiangah pai-in Khrih thute hilhin, tuiphumin, nungzui suahsak nasemte ahi uh hi. Tua kamciam in tawntung sihna lampi pan kihei-in, tawntung nopna a zui mite ngah ding nopna hong hilh hi.


FRIDAY FEB. 12
 SINBEH DING:Leon Wieseltier in leitungah a hehpihhuai penpen mi pa S.B ci-in tangthu khat gelh hi. S.B pen a suah a kipan khua mu lo hi. Ahi zongin kum 52 a phak ciangin a mit kibawlin khua mu thei hi. A khua muh a kipan leitung siatnate mu ahih manin, a lungkia-in, a khua muh zawh kum thum khit teh S.B si hi. Hih leitung in siatna tawh a kidim kum 6000 val bang pha khin hi. Leitung hoih nading hanciamin a kisep hangin nate in siatna lam bekbek manawh hi. Tua hi-in hotkhiatna, singlamteh tung aa Khrih gualzawhna in, siatna khempeuh panin hong suakta sak thei bek hi.

KIKUP DING DOTNATE:

1.     S.B tung panin bang thumanpha na ngah hiam? “Topa aw, nang mah kong um hi. Kong muang hi. Nangma nasem hi napi ing in, bang hangin thupha hong pia lo na hiam? ci-in a ngaihsun om kha ding hi. Tua bang hun ciangin kua muang i hiam? Kua tungah kinga i hiam? Bang hangin ei le ei kimuang khial kha thei zel i hiam?

2.     Na lawm na gual, na innkuanpihte khat a khialh khak ciang thukhen mawhsak lo-in koi bangin hopih ding na hiam?

To get the latest update of me and my works

>> <<