MUC

Print Friendly and PDF

Sunday, December 27, 2015

Sabbath School Lesson 6 | Sehnel Gamlak Panin Gualzawhna

LESSON 6  JAN. 30 – FEB. 5  SEHNEL GAMLAK PANIN GUALZAWHNA

SABBATH NITAK: TU KAAL SUNG SIM DING: Thkn. 34: 1- 4; Matt. 1: 20 – 23; 3:7 – 12; Jn. 9: 39;Mang. 21: 10

KAMNGAH: Bang hang hiam cihleh a mangthangte a zong ding le a honkhia dingin Mihing Tapa a hong pai ahi hi,” a ci hi. Luke 19: 10.

Satan in amah le numei kikal, ama suan le numei suan kikalah kilangneihna om ding hi, cih a theih a kipan mihing khempeuh suksiat ding bek ngaihsun hi. Hotkhiat nasem dingin Khrih in leitungah hong pai, Satan in ama nungzui van mite tawh Pasian Tapa dinmun suankhia dingin ngaihsun hi. Satan in ama geelna khempeuh a tangtung dingin ngaihsun a, Khrih in mihingin hih leitungah hong pai-in, Khrih susia-in, tua hi leh, mihingte hotkhiatna thu kisia ding hi, ci-in ngaihsun hi. Ellen G. White, Patriachs and Prophets, 66.


Khrih le Satan kido-in Satan in hih leitung khempeuh ama khut hi, ci-in pulaak khia a, ahi zongin Khrih in Satan vangliatna susia dingin hih leitungah mihingin hong piang hi. Satan in mihingin hong piang naungek Khrih nunna a laksak theih loh ciangin hotkhiatna lampi suksiat nading lampi khat geel kik hi. Gam sungah om Khrih zawh theih nading vaihawm kik hi.


SUNDAY  JAN. 31


IMMANUEL IN HONKHIA DINGIN HONG PAI

Matt. 1: 20 – 23 sim in. Jesuh min dingin ‘Immanuel’ min in bang thupitna nei hiam? Bang hangin Khrih in hih leitungah eite tawh hong om dingin hong pai hiam?

____________________________________________________________________

____________________________________________________________________

Amasa-in, Adam tungah kipia ukna mihing in a ngah kik nadingin Khrih in leitungah hong pai hi (Rom. 5: 12, 15). Jesuh kumpi hi, ci-in mi 5000 bangin kumpi lukhu lusak un, ci hi. Naupangte in hosanna ci-in awng uh hi. Hosanna cih thu in galte tungah gualzawhna hangin minphatna kammal hi. Piansak nate khempeuh Ama ukna nuai-ah om hi. Mittaw-te khua musak hi. Huihpi nung laitak daisak hi. Tuihualte daisak hi.

Nihna-ah: Khrih in leitung thukhen dingin hong pai hi. Dawi nasepna khempeuh susia dingin hong pai hi (Jn. 9: 39; 1Jn. 3:8). Bang hangin siatna bawlbawl mite daupai hiam?ci-in na ngaihsun thei kha zelzel hiam? Thumanlohna khempeuh beimang ding hi, ci-in Khrih in lungmuanna hong pia hi. Dawite tungah Khrih in vangliatna nei hi, ci-in dawite in zong theitel uh hi. Khrih, Amah le Amah a kipulaakma-in dawite in Khrih in kua hi, ci-in pulaak uh hi. Khrih in dawi hencip mite khahkhia-in, lau-na tawh a nungta mite zong honkhia hi.

Thumna-ah: Jesuh in a mangthang mite zongin honkhia dingin hih leitungah hong pai hi (Luke 19: 10); amau mawhna zong maisak hi (John 1: 29). Eite Siampi Lian hi ding le Pa Pasian tawh i kizop kik nadingin ei mah bangin Khrih in mihingin hong piang hi (Heb. 2: 17). “Khrih nunna in Pa Pasian in mihing tawh thuciam tangtung sak hi. Tua manin mawhna vangliatna susia-in, mawhna pan mihingte honkhia-in, hehpihna hong pia-in, mawhmaisak a, midik hong hisak banah sih nawnloh nunna i ngah nading lampi hong bawlsak zo hi.

A tawpna ah, a kipiangsak khempeuh in Pasian zia le tong a muh tel nadingun Khrih in leitungah hong pai hi (John 14: 9).

Koi bangin Khrih hong pai kik ding thu in Topa tawh na kizopna le na nunna hong puahpha thei ding hiam?


MONDAY FEB. 1

JESUH KITUIPHUMNA

Tuiphum John thupuak in tua hun lai-a mite lungsim phongkhia hi. Ama melpuak in kamsang Elijah tawh kisuun mahmah hi (Matt. 3:4; 2Kum 1:8). Kamsang a om loh zawh kum 400 khit bang ciang, Pasian kamsang masa hong suak kik hi. Tua ma-in hih bangin Pasian in bang mah a pulaak loh sawt ngei lo hi. Tu-in tuiphum John in Pasian kamsang nasep a sem hong suak hi. A lamdang mahmah thu khat hong tung ding hi, cih mite in thei uh hi.

Matt. 3: 7 – 12 sim in. Pasian hehna hong tung ta a, a gah lo kungte puk nading hei kikoih khin hi (aneu 10); mei in kangtum mang khin ding hi (Aneu 12). Bang hangin John in Messiah thu a tangko-na ah thukhenna tangko hi ding hiam? ( aneu 7).

_____________________________________________________________

_________________________________________________________________

John hun lai-a mite in amau hun sung mahin leitung hun bei ding hi, ci-in ngaihsun uh hi. John in sehnel gam sung pan hong pai hi, ci-in mite in thei uh a, Jordan gun sungah tui kiphum dingin amaute hanthawn hi. Mite in bang lamen uh hiam cih leh, Moses hun lai mah bangin, Jordan kantanin, khapsa gam Canaan gam lut ding kiginkholh mah bangun, Roman kumpi zo gawpin kamsangte genkholh tawntung Pasian Gam hong tung dingin lamen uh hi.

Ahi zongin tua bangin John le Khrih in mite lamet bangin sem lo uh hi. Mawhna pan suahtak, hotkhiat nasep sem uh hi zaw hi. Isaiah gen thu – Pasian in saltang mite a saltanna panun Khapsa Gam ciah ding lampi te John in pulaak kik hi, ci-in Luke in gen hi (Luke 3: 3-6). Jeremiah in tua lampi kisam hi, cih thu pulaak hi. Khua mu lo, khebai, naupaai, nupa le naungekte le Khapsa Gam zuan nuam mi khempeuh in tua Gam a tun theih nading uh ahi hi (Jer. 31: 7 -9). John kiangah a honhonin mipi pai uh a, amau lamet Topa Ni lianpi hong tung ding hi ta hi, ci-in lamen uh hi. Ahi zongin amau lamet bangin leitung kumpite bangin Khrih in nasem lo hi. Khrih ii nasep zia ding kigen khol lo hi lo zaw-in, kamsangte genkholh thute telthei lo uh hi zaw hi (Luke 24: 25 – 27).

Pasian thu-um mi citak kim khat in Khrih a hong pai masakna thu telkhial uh hi. Tua bang mahin thuman mi tampi in zong Khrih nih vei-na hong pai zia ding telkhial ding uh hi.

TUESDAY FEB. 2

“HIH SUANGTE AN SUAKSAK IN”


Matt. 4: 1-3 sim in. Bang thu piang om hiam? Bang hang hiam? Koi bangin Khrih le Satan kilangpanna kidawk hiam?

______________________________________________________

______________________________________________________

Khrih in gam sungah ze-etna thuak dingin Kha Siangtho in paipih hi. Khrih in ze-etna tuak dingin gam sung vazuan hi lo hi. Pa Pasian tungah ki-apin thungen dingin a va pai hi zaw hi. A tot ding lampi-in sihna lampi ahih manin a masuan a sep zawh nadingin anngawlin thungen hi. Hih hun in suksiatna dingin hun hoih pen hi, ci Satan in susia nuamin hih hun lianmahin ze-et pah hi. Ellen G. White, The Desire of Ages, 114.

Jesuh’thuak ze-etna le Israelte in gamlakah a thuak uh ze-etnate in kibatpih tampi nei hi. Khrih a kituiphum zawh ni 40 ciangin gam sungah om hi. Israel mite in San Tuipi kantanin nek ding om lohna sehnel gamah kum 40 sung om uh hi. “ Topa note Pasian in Ama thupiakte na zui uh hiam, na zui kei uh hiam cih note lungsim hong sittel nop manin, note hong niamkhiat a kum sawmli sung sehnel gam lampi ah hong bangci makaih ahi hiam, cih phawk gigen un. Amah in note hong niamkhiatin hong gilkialsak a, tua ciangin note gen loh na pate un zong a theih nailoh manna in hong vaka, mite anlum bek tawh nungta lo-in Topa kam pana hong pusuak thu khempeuh tawh a nungta ahihlam hong hilh hi” (Thkna. 8: 2, 3).

Jesuh zong ni sawmli khit ciang a gilkial hi (Matt. 4:2).Tua laitakin Job’ lawmte bangin mi hehpih kineihkhem khat hong kilangh hi. Satan in hih bangin mi hehpih kineih a masa pen hi lo hi. Jerusalem biakinnpi kilam lai-in siampi Zechariah kiangah zong mite a mawhsak tawntung Satan kilangh hi. Satan in Jesuh kiangah “Pasian Tapa takpi na hih leh hih suangte an suaksak in,”(Matt. 4: 3) ci se hi. Vantung mite in Khrih in Pasian ahihna theitel uh hi. Khrih in Lai Siangtho mah siaksanin Satan’ ze-etna langpan hi.

Ze-etna sungah na puk ding thupi bek tham lo-in midang khat peuh a puksak na hih loh ding thupi zaw kan lai hi lo hiam?


WEDNESDAY  FEB. 3

ZE-ETNA KHAT KHIT KHAT

Israel mite in sehnel gama a thuak uh ze-etna in Eden huan panin hong kipan mawhna tawh kizom to suak ahi hi. Adam in Pasian tungah a citak zawk ding sangin ama deihna a zui ahih manin Pasian tawh kizopna kitat hi. Khrih in ahih leh Ama deihna sangin Pa Pasian tungah citak zaw ahih manin Eden huan a ngah kik thei ding i hi hi. Eden huan i ngah kik nadingin Khrih in ze-etna thuak hi. Satan in biakinn khumah Jesuh paipihto hi. Inndawn panin “nang in Pasian Tapa taktak na hih leh hih lai panin tuak suk lecin, vantung mite in hong dom ding uh hi,” ci-in Satan in ze-et leuleu hi.

Satan in bang deihna nei hiam? Jesuh in bakinn khum pan tuak takpi hi leh, Pasian Tapa taktak ahihna kilatna a suak pah diam?Matt.4: 5 – 7.
_______________________________________________________

________________________________________________________

Jesuh in mite’ pahtak dingin nasem lo hi. Pa Pasian’ deihna bang bekin nasem hi. Tapa in vantung liatna khempeuh nusia-in mihingin a hong piangin, bawlsiatna, mawhsiatna, a man lopi-in thukhenna le sihna a hong thuakna in Pa Pasian muang hi, cih hong hilh hi (Phil. 2: 5 – 8). Tua ding mahin kigingsa-in mi-in hong piang hi. Adam le mihingte in i taan tawntung nuntakna i ngah kik theih nadingin tua bangin Khrih in hong thuak ahi hi. Pasian le mihing kikaalah kamciam khempeuh Khrih in tangtungsak hi. Tua hangin hotkhiatna ngah thei i hi hi.

Jesuh in “ Lai Siangtho in ci hi,” cih thu siksan hi. Ama thuakna Israel mite’ thuakna pulaak hi. Massah ah Topa na ze-et bangun Topa Pasian ze-et kei un (Thkna. 6: 16) ci hi. Massah ah tui omloh manin Israel mite in Topa tungah phun uh hi. Tua munah Moses in suangpi pangin tuipia hi. Tua munah Israel mite in eite tawhTopa hong om mah ahi hiam? ci-in Topa’ ompihna muanglo uh hi (Pai. 17:7). Dawimangpa in Lai Siangtho ah a kigelh mah bangin ci-in Jesuh va ze-et hi (Matt. 4: 4, 6).

Topa tung pan ngah ding lamet khat siksanin Topa muanna le bang bang piang taleh Topa muan ngiengeu cihte gel in kilamdanna nei hi. Koi bangin a kilamdanna na mu hiam?

THURSDAYFEB. 4

DAWI BIAKNA


Matthew in nekna tawh kisai ze-etna pulaak masa pen hi. Tua khit teh Pasian’ kamciamte zangkhai ngaihsutna, tua banah Khrih in Pasian takpi hiam, cih le Ama nasep tawh kisia ze-etna cih bangin pulaak hi.

Matt. 4: 8 – 10; Thkna. 34: 1- 4; Mang. 21: 10 sim in. Satan in mualsang tung khat ah Zeisu paipih hi. “Mualsang” in bang pulaak phadiak hiam?

____________________________________________________________

_____________________________________________________________

Mualsang tung panin gamlapi-a om na tampi kimu thei hi. Jesuh in tua bangin na tuamtuam en kawikawi dingin hong pai hi lo hi. Ahi zongin mualsang in khiatna nei hi. A hong tung ding thute limcing khol hi. Moses in mualsangdawn panin Khapsa Gam en hi. John in Jerusalem khua thak galmuh hi. Satan in Khrih tungah “kei hong bia ziau peuh lecin mual pan kimu thei khempeuh kong pia ding hi, ci hi (Matt. 4: 9). Satan in Adam le Eve zong Pasian tawh kisuun ding ci-in khemzo hi. Satan in amah le amah Pasian kineih hi. Na khempeuh ama neihsa bangin ngaihsun a amah a bia khempeuh tungah na khempeuh piaktheihna a nei bangin kigen hi (Luke 4:6; Late 2: 7, 8). Hih in Pasian tungah citakpi mah maw cih ze-etna hi. Kua tungah citak ding kisam hiam? Eden huanah Adam le Eve in gulpi tungah kinga uh hi. Satan tungah ki-ap uh hi. Tua a kipan tu ciang dong siatna hong om hi. Pasian in hotkhiat nasep sem lo hi leh, Satan gualzo ding hi. Tua bangin Satan in vanglian hi leh, na khempeuh kisia mangkhin ding hi. I nungta nawn kei ding hi.

Joseph in Potiphar’ zi kiang pan taikhia hi. Jesuh in Ama kiang pan Satan kihem khia dingin thupia hi. Joseph in tua bangin thupiak theihna nei lo hi. Tua manin amah mah kihemkhia tawm zaw hi (Pian. 39: 11, 12). Eite’etteh ding limhoih hi lo hiam!

Khrih in Satan’ ze-etna khempeuh Lai Siangtho in bangci hiam cih tawh do hi.

Nang le kei in hih tung panin bang mu thei ding i hiam? Ze-etna i tuah ciang, koi bangin Lai Siangtho tawh do zo thei ding i hiam?


FRIDAY FEB. 5
 SINBEH DING: Laigelh minthang tampi in hotkhiatna tawh kisai a gelh uh hangin SDA pawlpi’ pulaak bangin kuamah in thuman tangko lo hi. Satan le Khrih kido takpi hi, cih pen SDA in tangko hi. Hih Kido-na Lianpi hangin leitung in kisia hi. T.S. Eliot in ‘ na khempeuh kikhel, a kikhel thei lo khat om, Sia le Pha kido, kikhel ngei kei, ci hi. Kha Siangtho’ makaihna kihel lo ngaihsutna tua bang hi pah hi.

KIKUP DING DOTNATE:

1.    Koi bangin upmawh thu le Pasian’ kamciam muangtakpi kilamdang hiam? Koi bangin khentel thei ding i hiam?

2.    Ze-etna pen lampi tuamtuam pan hong pai hi. Khat le khat tuahzia zong kibang lo hi. Koi bangte panin ze-etna hong tam pai pen hiam?

3.    Khrih a kize-etzia le a thuak gimnate ngaihsun in. Pa Pasian in Jesuh tawh omkhawm hi. Eite thuak ding khempueh na khempeuh a bawl Pa in eite’ thuak ding tangin thuak cih thu lamdang hi lo hiam?

To get the latest update of me and my works

>> <<