MUC

Print Friendly and PDF

Sunday, December 27, 2015

Sabbath School Lesson 13 | Tatkhiatna


LESSON 13.    MARCH 19 – 25   TATKHIATNA



SABBATH NITAK: TU KAAL SUNG SIM DING:  Mang. 20: 1 – 15; Jer. 4:

23 – 26; 1Kor. 4: 5; Phil. 2: 9 – 11; 2Pet. 3: 10.

KAMNGAH: Pasian in amaute’ mit panin khitui khempeuh nulsak ding hi. Thu luisate maimang khinta ahih manin sihna, dahna le na sa-a kahna cihte om nawn lo ding hi,”

a ci hi.Mangmuhna 21: 4.

Mi tampi in “bang hangin Eden huan panin mawhna hong kipan hiam? ci-in dong uh hi. Bang hanga mawhna om hiam cih leh deihteel theihna a om man ahi hi. Mihing in deihteel theihna nei-in a hoih lo nate teel hi. Tua ahih leh, mawhna om kipatin, a dangte a lawhma-in bang hangin Pasian in mawhna beimangsak pah lo hiam? Tua hi leh, hih zahin siatna om lo ding hi, ci uh hi.


Topa Pasian in mihingte suakta takin nungtasak hi. Pasian’ nasepzia mihing in a teel zawh dingin thuk lua hi. A bawlna khempeuh in Topa Pasian’ hoihna, a thumanna, a itna, le a pia khia Pasian ahihna a muh theih nading a hi hi. Mihing in hih thu a tel nading kum za tampi sawt hi. Khrih in hih leitungah a hong pai kik ciangin tatkhiat mite in Amah tawh a tawntung mangkhawm ding a, Khrih le tatkhiat mite in mawhneite thukhen ding uh hi.


SUNDAYMARCH 20
SATAN IN KIHENNA THUAK DING


Mang. 20: 1-3 sim in. Bang thupiang ding a, lamet ding bang pulaak hiam?

_____________________________________________________________

_____________________________________________________________

Lai Siangtho in ‘kihen’ cih kammal mun tampi ah pulaak hi. Thongkia mite kihen hi. Jesuh in Satan’ hencip mite khahkhia hi. Pawlpi in Satan’ vangliatna a hencip zo ding vangliatna ngah hi; thukhen theihna limcing hi. Mithat, guta cihte kihen hi. Ahi zongin Lai Siangtho in a gen a kihen mite pen mithat, guta cih hi pah sam lo hi. Tuiphum John zong kihen hi. Bang hang hiam cih leh, kumpipa’ gamtat hoih lo a pulaak manin kihenna thuak hi (Matt. 14: 3, 4). Jesuh in kihenna thuak hi (John 18: 12). Paul le Peter zong kihenna thuak hi (Sawl. 12: 6; 21: 33). Khrih in dawivei-in a kihencip a thuak mite honkhia hi (Mark 5: 3, 4).

Khrih in honkhia kei leh kuamah in dawi’ hencip mite honkhia zo lo hi. Khrih in sawt veipi eelkul nupi nu damsak hi (Lk. 13: 11, 12, 16). Lazarus zong sihna pan thokiksakin, a kisialpih puan suahkhia dingin thupia hi (Jn. 11: 43, 44). Tua banah Barabbas kikhah khia-in, ama tangin Khrih in sihna thuak hi (Mk. 15: 7 – 15). Hihte in Satan’kolbulh thuak hi-in Satan’ kol panin suakta uh hi.

Satan’ hencip thuak leitung a suahtak nadingin Khrih in sihna hong thuak hi. A tawpkhakna-ah Satan kihencipin khuamial sungah kikoih ding hi (Mang. 20: 1- 3). Satan ‘ hencip mite khahkhia dingin Khrih in Ama nungzuite vangliatna hong pia hi. Satan in hencipna thuak ding hi ( Mt. 12: 26 – 29). Satan in Khrih’ nungzuite bangmah cihthei nawn lo hi. Bang hang hiam cih leh Satan’hencipna pan kihonkhia khin hi. Paul in, “Pasian’ thu ahih leh sikkhau kikhih thei kei hi” ci hi (2Tim. 2:9). Khrih in Lai Siangtho zangin Satan hencip ding hi (Matt. 4: 4, 7, 10). Eite in zong tua zawhna i ngah thei hi.

Satan in a hong hencip nading lampi panin na suahtak nading kamciam bang hong kipia hiam?


MONDAY      MARCH 21
“BANG HANG HIAM”


A kipatcilin leitung in lim le mel nei lo-in a awngthawlpi hi (Pian. 1:2). Jeremiah sunga kigen gimna nam sagihte le Khrih hong pai kik hun ciang leitung omzia ding a pulaakzia kibang hi (Jer. 4: 26). Tua hun ciangin leitungah a nungta khat zong om lo ding hi (Jer. 4: 25). John in Satan kia beek hih leitungah om ding hi, ci-in pulaak hi (Mang. 20:3). Jesuh hong pai ciangin na khempeuh omzia ding hong kihilh khol hi. Khrih in vantung nusia-in eite la dingin hong pai kik ding hi, cih kamciam hong pia hi (Jn. 14: 1 – 3). Paul in Khrih hong pai ciangin a nungta lai mite le a si khin a hong thokikte’ omzia ding hong hilh hi (1Thess. 4: 16, 17). Kum tul khat vantungah misiangthote a om khit uh ciangin hih leitungah hong kumsuk ding uh a, tua khit ciangin thawhkikna masa sunga kihel lo khempeuh hong tho ding uh hi (Mang. 20: 5).

Mang. 20: 4 sim in. Bang thu pulaak hiam?
____________________________________________
____________________________________________

Satan le migilote tungah Pasian le a misiangthote in thukhen ding uh hi. Tua hun ciangin mihing in i tel zawh loh thu tampi kitel ding hi. “Misiangthote in Khrih tawh kikopin migilote thukhen ding uh hi. Amau gamtatna le Lai Siangtho siksanin thu kikhen ding hi. Tawntung sihna laibu sungah min kigelh khempeuh amau gamtatna bangbangin thukhenna thuak ding uh hi.” Ellen G. White, The Great Controvery, 661.

Pasian in hehpihna, itna tawh kidim ahihna mi khempeuh in a theih hun hong tung ding hi. Pasian in lungduai takin mawhna kisik ding lampi honsak taleh, mi tampi in sihna lampi teel zaw uh ahihlam kidawk ding hi. Pasian in a hong hopihna aw a za thei lo dingin bang in hong dal hiam? Lungduai takin hong ngak hi. Nuntakna teel zaw lo ding maw?

1Kor. 4: 5 sim in. Khrih hong pai kik ding tawh kisai bang kamciam om hiam? Telzawh loh thute na phut khak ciang, koi bangin tua kamciamte na muang ding hiam?


TUESDAYMARCH 22
A NUNUNG PEN THUKHENNA


Nidanglai-in thukhenna mun nih nei uh hi. Khuapi kongkhakah upa-te in thu lian lo thute thukhen uh hi. Thuliante bel kumpi innah thukhen uh hi. Kumpipa’ thukhenna kuamah in khel thei lo hi. Tua bang mahin Lai Siangtho in zong Topa Pasian pen na khempeuh a uk Kumpi hi-in, Ama thukhenna in vanglian mahmah hi (Mang. 20: 11 – 15).
Mang. 20: 7 – 15 sim in.  Koi bangin na tel thei hiam?
_________________________________________________
_________________________________________________

Mang. 20 sungah kum tul khat thu kigen hi. Hih hun sungin thukhenna om hi, cih hong hilh hi. Mang. 20: 4 in tokhom tampi om hi, ci-in gen a, ahi zongin aneu 11 in a gen pen a tuam phadiak Kumpi tokhom khat hong hilh hi. Kum tul kipat hunin Satan le a pawlte kisusia nai lo phot a, kum tul khat a cin khit ciangin Satan le a pawlte khempeuh in siatna thuak ding uh hi. Pasian’ tokhom in Jerusalem khuapi tungah mi khempeuh muh dingin hong kilang ding hi. Tua hun ciangin mi khempeuh khennih kisuah ding a, Khrih tawh a nungta ding mite in Jerusalem khuapi sungah om ding uh a, Satan le a nungzui khempeuh in Jerusalem khua pua-ah om ding hi. Bang hanga tua bangin khennih hi thei cih thu amaute in theitel ding uh hi (Matt. 7: 22, 23). Tua hun ciangin mi khempeuh in Topa mai-ah kun ding uh hi. Mi khempeuh in Zeisu in Topa hi, ci ciat ding uh hi (Phil. 2: 9 – 11).

Pasian in a theihbeh nop, a kan beh nop om a thukhen hi lo hi. Pasian in a theih loh khat beek om lo hi. Bang hangin Pasian in thukhen hiam cih leh mi khempeuh in Pasian kikhenna man a theihtel nading uh hi zaw hi. Mi khempeuh le vantung mi khempeuh in Pasian’ thukhenna in thuman hi, ci ciat ding uh hi (Mang. 16:5). Mi khempeuh in Pasian’ dikna le a thumanna a muhtel theih nading hi zaw hi.

Nuntakna Laibu sungah min kigelh mite in sihna le hell tawh kipelh ding uh hi (Mang. 1: 18). Hih mite nuntak nading thu om nawn lo hi. A tawntungin mangthang ta ding uh hi.

WEDNESDAY MARCH 23

VAN THAK LE LEI THAK

Kuamah in sihna le langpanna deih lo hi. Sihna le langpanna in siatna tampi piangsak hi. Ahi zongin siatna a piangsak thei vangliatna kisusia khin hi. Na khempeuh a thakin kibawl pha kik ding hi. Tua hun mateng Kido-na Lianpi veeng lo ding hi.

Mang. 21: 1, 2, 9 ; 10: 22 – 1 – 3 sim in. John in bang thute pulaak hiam? Bang deihna nei uh hiam?

__________________________________________________

__________________________________________________

Peter’ pulaak khiatte mah John in zong genkhia hi: Topa Ni in zan laitak a hong pai guta bangin hong tung ding hi. Tua ni ciangin vantung nate mangthang ding a, a sunga om nate zong salua-in a tuimang ding hi. Leitung le a sunga om na khempeuh zong a kangtum ding hi (2Pet. 3: 10). Leitung in nasia takin gim thuak ding a tua khit ciangin na khempeuh a thak hong piang kik ding hi. Tua hun ciangin tuipi om lo ding hi (Mang. 21: 1). John in Patmos tuikulh panin a gelh hi a, mundang tawh kizom thei lo dingin tua tuikulh in khaktan hi. Leithakah hong nawngkai-sak cih om nawn lo ding a, tatkhiatsa mite in amau’ deihna munmunah om thei ta ding uh hi.

Jerusalem khuapi in kiu li nei-in etlawm mahmah ding hi. Roman innlam siamte in Jerusalem a lamh uh hi-a, Jerusalem thak ahih leh, Pasian’ bawlsa hi ding hi (Heb. 11: 10). Mihing’ ngaihsutna in hoihna tawh kidim Jerusalem’ omzia pulaak khia thei lo hi. Leithak le Jerusalem ii hoihna kipulaak khia thei lo hi. Tua munah mi khempeuh in omna ngah kim ding hi.

Kiim le paam nate’ hoihna ngaihsun in. Siatna tawh kidim taleh, Pasian’ zia le tong bang na mu thei hiam? Koi bangin i muh nate tungtawnin a kimu thei lo nate na muang thei hiam?


THURSDAY MARCH 24                  KAHNA OM NAWN LO DING


Mang. 21: 3 – 5 sim in. Khitui  in bang pulaak hiam?

________________________________________________________

________________________________________________________

Dahna kapna tawh i kipelh thei kei hi. Nu in a ta’ khitui nulsak hun, lawm le gual khat ii khitui i nulsak hun om hi. Khat veivei teh lah i mai a hong lawn ding i phal loh hun om hi. Eite hong piangsak Topa Pasian in khitui hong nulsak cih thu in bang pulaak hiam? Leitung ah sihna, dahna, kahna om lo mun a om zen diam? Om lo ding hi. Natna, gimna, kahna, sihna cihte mawhna a om a kipan i tuah khak vive hi (Pian. 3: 16 – 19). Hi mah taleh, Pasian in a tawntungin a gim ding, a dah ding, a si dingin hong koih hi lo hi. Ni khat ni ciangin Topa Pasian tawh a nungta khawm thei dingin lampi hong kibawlsak khin zo hi.

Mawhna a om a kipan mawhneite hon dingin Honpa kipulaak pah a (Pian. 3: 15) biakbuk in tua kamciam hong phawksak hi (Pai. 25: 8). Honpa in mihingin hong piangin ei tawh hong nungta hi (Jn. 1: 14). Ama vangliatna in eite tawh a tawntungin hong omkhawm hi (Mang. 21: 3).

Lai Siangtho in hih thu kammal tuamtuam tawh pulaak hi: “Amaute’ Pasian ka hi ding hi,” “note in keima mi na hi ding uh hi,” “ Note tawh kong nungta ding hi.” “Amaute lakah ka teng ding a, keimah in amaute’ Pasian ka hi dinga, amaute in ka mite hi ding uh hi” (2Kor. 6: 16).

Mihing in Topa Pasian tawh kizopna sutat a, Pasian tawh kizom kik dingin Khrih in leitungah hong pai hi. Jeremiah in tua thu hih bangin pulaak hi: “ Bang hangin na sa-in kapkap na hi uh hiam? Na natna uh a dam thei ding hi lo hi. Na khialhnate uh lian lua-in na mawhnate uh nasia lua ahih manin hih bangin note ka hong thuaksak hi.” (Jer. 30: 15). Jesuh in a hong tatkhiatna thu hangin bang zahin lungdam huai hiam?

Mang. 21: 3 in na khempeuh lak pan a thupi pen hong lak hi. Tawntung sihna thuakte hangin a luangkhia khitui khempeuh Topa Pasian in hong nulkhiatsak ding hi. Dahna, natna khempeuh beimangta ding hi. Topa Pasian tawh nuamtakin i nungta khawm ding hi. Vantung i tun nai loh hangin hih leitungah Topa Pasian tawh nuamtakin i nungta khawm thei hi. Koi bangin nisimin Topa Pasian tawh a nungta na hiam?

FRIDAY MARCH 25

SINBEH DING: Kum tul khat thu ngaihsun dih in. Hih tawh kisai LaiSiangtho in a hong hilh loh hangin i theih ding thu pawl khat Lai Siangtho in hong hilh hi. Kum tul khat hun in sihna nihna ma hi ding hi. Hih kum tul khat hun sungin tatkhiat mite in vantungah om ding uh, thukhen nasep sem ding uh hi. Midikte in leitung thukhen dinglam phawk lo na hi uh hiam? ( 1Kor. 6: 2). Vantung mite tungah thukhen ding hi lo i hiam? (1Kor. 6: 3). Tatkhiat mite in thukhen dingin thu kipia hi (Mang. 20: 4). Kum tul khat bei mateng mawhnei mite hong thokik nai lo ding uh hi. Bang thu hangin amaute in tawntung sihna thuak ding uh hiam, cih kipulaak ding hi. Mi khempeuh in Pasian’ thukhenzia in man mahmah hi, ci ding uh hi. Mimal khat ciat in a thaman ciat uh tawh lungkim ding uh hi. Pasian’ thukhenzia in thuman hi, ci ding uh hi. Tawntung sihna thuak dingte in zong Pasian’ thukhenna man hi; tawntung sihna ka thuak mah ding uh hi, ci thei ciat ding uh hi. “ Topa Pasian aw nang in na dik hi” ci ding uh hi (Mang. 16:5).

KIKUP DING DOTNATE:

1.    I telzawh loh thute i pukha zongin, koi bangin Kido-na Lianpi in tu-a i thuak gimna tuamtuamte hong theitelsak hiam?

2.    Mi khat in “ Koi bangin Topa Pasian tawh kinai thei ding ka hiam” ci-in hong dong leh, koi bangin na dawng diam?

3.    Lungdaman Thu siksanin koi bangin Khrih hong pai ding hi ta ahih manin kiging in cih thu na tel thei hiam?

4.    Pasian kiang pan bang thute na thei nuam hiam? Na theitel mateng gimna, natnate lakah, koi bangin Topa’ hoihna, a dikna na muan ding hiam? 

To get the latest update of me and my works

>> <<