MUC

Print Friendly and PDF

Sunday, December 27, 2015

Sabbath School Lesson 12 | A Kuankhia Pawlpi





LESSON 12  MARCH 12 – 18  A KUANKHIA PAWLPI

SABBATH NITAK: TU KAAL SUNG SIM DING: Mang. 2: 1 - 3:6, 14 - 22; Hos. 2: 13; Isa. 60: 14.

KAMNGAH: “Kongkhakah dingin kong ka hong kiu hi. Ka aw za-in kong hong honte kiangah lutin an ka nekhawm ding uh hi.” Mangmuhna 3: 20.


Nungzui sawm le nihte lak pan John in kithahna thuak nunung pen Nungzuipa hi. Lungdamna Thu John le John Masa, Nihna, Thumna le Mangmuhna zong ama gelh ahi hi. Tua thute Kidona Lianpi hong theitelsak hi. Ama gelhte lak pan tu kaal sungin pawlpi sagihte tungah laikhakte i sin ding hi. Tua pawlpite in kisapna a tuamciat nei uh hi. Amau kisapna ciat picin nading Khrih in amaute hilh hi. Tuhun mah bangin hih pawlpite in zong ze-etna thuak uh hi. Khrih nungzui-in kingaihsun uh a, ahih zongin a nuntakna uh in Khrih nial hi. Pawlpi masate pukhak bangin hun nunung a om pawlpi in zong bawlsiatna thuak hi.

SUNDAYMARCH 13                     EPHESUSA PAWLPI


Ephesus pawlpi tungah laikhak sungah Khrih in aksi sagih tawi-in meivak kimkotah pai kawikawi hi, (Mang. 2:1) kipulaak hi. Hih limcinnate in khiatna nei ciat hi. Meivak sagihte in pawlpi limcing hi. Aksi sagihte in pawlpi a kem vantungmite limcing hi (Mang. 1: 20). A hong hilh thu in: pawlpi sagihte le Pasian tokhom in kizopna nei hi. Kidona Lianpi sungah pawlpi in maban lian mahmah nei hi.

Mang. 2: 1- 7 sim in. Kidona Lianpi thu bang hong hilh hiam?

____________________________________________

____________________________________________

Ephesus pawlpi laikhak thupatna ah Ephesus pawlpi nunzia kipulaak masa hi. Jesuh in Ephesus pawlpi upna le a thanemnate theitel mahmah hi. A lungduai-na uh, zuau thuhilh siate a langpanna uh cihte hangin minphatna ngah uh hi (Mang. 2: 2, 3,6). Pasian thuman tawh kiphut Ephesus pawlpi in Satan a langpan ding uh kihilh phapha hi. Pawlpi makai deacon a sem ngei Nicolas min nei zuau sawltakte langpan ding kihilh hi (Sawl. 6:5). Khrih in amaute zuau thuhilh langpan hi (Mang. 2:6).

Ephesus pawlpi in a neih masak itna nusia hi (Mang. 2:4). Tua mite in Israelte mah bangin pasian dangte bia-in amaute nung a zui mite tawh kibang uh hi. Hosea in hih bang thu limgen mahmah hi (Hosea 2: 13). Amaute in lamet bei hi mah taleh, Khrih in lametna guan hi. A lampial khiatna uh kiphawkin, a neih masak uh itna nusia ahih manin, tua itna a nei kik dingin kithuhilh hi (Mang. 2:5). Nunlui nunzia lakkik ding hi lo-in, a tuahkhak thute hangin, a nunzia uh kikhelin a nungta dingin kithuhilh hi.

“Na neih masak itna nusia” (Mang. 2:4). Bang hangin itna nusia ding hamsa lo hiam? Mimal hi taleh, pawlpi in hi taleh, bang thu in itna kiamsak hiam? Bang in Pasian hong it theisakin, ni khat khit ni khat thuman deihna hong nei theisak hiam?

MONDAY MARCH 14

SMYRMA LE PERGAMUM

Jesuh in Smyrna pawlpi kiangah bang kici pulak hiam cih leh “Kei in a patna le a tawpna, sihna thuakin a thokik” kici hi (Mang. 1: 18; 2:8). Pergamum pawlpi ah Jesuh in langnih nei temta a kam tawh pet hi, ci-in kipulaak hi (Mang. 1:16; 2:12). Hih limcinna nihte in a thupi bang pulaak hiam?

Mang. 2: 8 – 17 sim in. Smyrna pawlpi a om thu-um mite in a citak mite hi, ci-in kiciamteh hi. Ahi zongin a kisak theih pih ding uh hi lo hi. Smyrna khua ah Satan biakinn khat om hi. Hih in amaute nunzia siasak hi. Kidona Lianpi omzia kimu thei hi. Smyrna pawlpi in a tuah ding hamsatnate, thongkhiatna, kihilh khol hi (Mang. 2:10). Pergamum ah upna thu hangin thahna thuak om khin hi (Mang. 2: 13). Hamsatna, bawlsiatna in hun tawmno khat sung bek hi ding hi. Siatna a bei hun hong om ding hi.

Smyrma pawlpi in tatkhialh nei lua lo hi (Mang. 2: 14- 16). Ahi zongin amaute lakah Balaam upna le Nicholaitan upna nei om hi. Balaam le Nicholaitan min in a kibang hi. Nicholas cih min in “mite tungah a gualzo” cih a khiatna nei hi. Balaam cih min in ‘mite kisiatna’ cih khiatna nei hi. Langpanna panin a khawl kei uh leh Pasian thukhenna thuak ding uh hi. Khrih in tua bang mite sittel ding hi. Pasian thukhenna a thuak ding uh hangin lametna kipia veve hi.



Mang. 2: 14, 15 sim in. Bang hangin upna thute thupi hiam?


TUESDAY MARCH 15

THYATIRA LE SARDIS


Mang. 2: 18 – 3:6 sim in. Hih pawlpi nihte sungah bang thute kipulaak hiam? Koi bangin tua thute mimalin hi taleh, pawlpi in tuak kha thei hiam? Koi bangin Kidona Lianpi pulaak hiam?
_____________________________________________

_____________________________________________

Thratira pawlpi tungah Khrih a kipulaak zia in Pasian mite aa dingin hun haksa ahih lam pulaak hi. A lauhuai mahmah mit le khe cihte Daniel 10 sungah zong kipulaak hi. “ A maitang, khuaphialep bangin tang a, a mittangte mei bangin a kuang zalzal hi.” (Dan. 10:6). Hih in Persia kumpi limcing hi (Dan. 10: 13, 20). Pasian mite in gimna a thuak uh ciangin Khrih mahmah kilangin, gam uk makaite zangin amaute honkhia hi (Mang. 1; Dan. 10).

Khrih in Sardis pawlpi tungah Kha Siangtho le aksi sagih tawh kipulaak hi (Mang. 3:1; 5:6). Pasian pawlpi a kip tawntung theih nadingin Khrih mahmah in Ama vangliatna tawh a pawlpi kemcing hi. Thyatira pawlpi in khangto hi napi Jezebel hun lai-a Israel mite bangin pasian tuamtuam bia uh hi. Sardis pawlpi in a si pawlpi hi (Mang. 3:1). Hih bang kawmkaal lak pan mahin Khrih in a pawlpi thaguan hi. Thyatira pawlpi sunga thu-um mite in Satan ukna sungah om lo-in, Khrih a hong pai kik dong a upna uh a nusia lo uh hi (Mang. 2: 24, 25).

Sardis pawlpi in nuntak siangtho tawh nungta hi. Khrih in amaute a tuam vilvelin thupha pia hi. Khrih in amaute tungah ‘zingsol’ pia dingin kamciam hi (Mang.2: 28). Tua zingsol in Khrih hi ( Mang. 22: 16). Tua banah tawntung gamah a nungta ding le Pa le vantungmi khempeuhte mai-ah pahtawi-na ngah ding uh hi, ci-in kamciam hi.

Bang thute ah kiptakin dingin, na kisik ding mawhna bang a om lai hiam? Kiptakin cih thu le mawhna kisik cihte koi bangin kizom hiam?


WEDNESDAY MARCH 16 PHILADELPHIA PAWLPI


Mang. 3:7 sim in. Bangci bangin Philadelphia pawlpi tungah Khrih kipulaak hiam? Ama omzia bang pulaak hiam?
____________________________________________

____________________________________________

Hamsatna thuak mah ta leng, Khrih’ thupiak bangin a nungta dingin kihilh hi (Mang. 3:8). Satan le a pawlte in Philadelphia pawlpi’ ukna nuai-ah hong om ding uh hi, ci-in kigen hi (Mang. 3:9). Isaiah in zong tua bang pulaak hi (Isa. 60: 14). Pasian’ mite a bawlsiatsiat uh bang nawnlo-in Pasian’ mite mai-ah amaute hong kun ding uh hi. Satan le a pawlte hangin Pasian’ mite in gentheih hamsatna tampi tuak uh hi. Satan nasepna hangin pawlpi masate in thuman lo tampi tuakkha uh a, tampi in thuman panin lampial uh hi. Tua bangin thuman lo thute panin Philadelphia pawlpi in thuman thutak lenkip uh hi.

Mangmuhna 3: 10 sim in. Koi bangin Philadelphia thuakzawhna na mu hiam? Bangci bangin Khrih in amau’ thuakna a sawt lo-in bei ding hi, ci-in pulaak hiam? Nang le kei bang hong hilh hiam?

____________________________________________

Ama mai-a pawlpite mah bangin Philadelphia in zong Satan’langpanna thuak hi. Ahi zongin Philadelphia in tuampha deuh hi. Philadelphia thanem ta leh, pawlpi dangte a gen bangin Khrih in a pulaakna om lo hi. Amau upna uh le Pasian tawh kopna a nasepkhopnate kipulaak hi. A gualzo mite in vantung kamciamte ngah ding uh a, Pasian’ sutpi-in om ding uh hi. Topa biakbuk panin pai khia nawn lo ding uh hi (Mang. 3:12). Pasian’ tate taktak hi, cih pulaak min thak amaute kipia ding hi. Bang hang hiam cihleh amaute in Pa Pasian tawh pum khat hi khin uh hi.

Tu laitakin vantung Pasian tokhomah a om ding hi lecin, na nunzia in koi bang hi hiam?



THURSDAY MARCH 17
LAODICEA A OM PAWLPI


Laodicea in Khrih’ nunzia hih bangin pulaak hi: “A muanhuai le a Thuman Teci, Pasian piansak khempeuh a Pankhiapa, Amen” (Mang. 3:14) ci-in kipulaak hi. Hih kammalte in Khrih in Pasian ahihna pulaak hi. “Amen” in Isaiah 65: 16 sunga kipulaak a thuman Pasian siksan hi; Topa in a mite tawh a thuciam tawh kizomto hi. Khrih in a thuciam a kipsak Pasian hi, hotkhiat a geel a tangtungsak banah eite hong puahpha hi. Khrih in Thuman Teci hi. Mi khempeuh in Pa Pasian a hihna bangbang i theih nadingin hong lak Khrih mah hi (Mang. 1:5; 22: 16; John 1:18; 14: 8 – 10). Amah in Piangsakpa hi (Kol. 1:16, 17).

Mang. 3: 14 – 22 sim in. Khrih in Laodecia pawlpi in a sep ding bang pulaak hiam? Nang le kei bang hong hilh hiam?

____________________________________________________________________

___________________________________________________________________

Laodecia pawlpi tunga kigen thu in Khrih in kua hi, cih hong hilh hi. Tua banah hih pawlpi ii dinmun le a nunzia zong pulaak hi. Khrih i theihtel masak lohin ei le ei zong a kitheitel lo ding i hi hi. Laodecia in ama dinmun kitel lo-in, amau kingaihsutna le amau hihna taktak kilehbulh hi (Mang. 3:17). Khrih in amau le amau a kimuh teltheih nadingin a kisam thute hilh hi. A kikhel nadingun amau le amau a kimuhtel masak uh kul hi (Mang. 3:18). Khrih’ thuhilh bangin a kipuahpha lo mi in hepkhiat thuak ding hi (Mang. 3:16).

Khrih in eite tawh anne khawm nuam hi (Mang. 3:20). Khrih tawh kikholhkhopna ngah ding uh hi. Vantung tokhom tungah Amah tawh tukhawm ding uh hi (Mang. 3: 21).

Pawlpi sagihte in Pasian’ mite nunzia pulaak ciat uh hi. Pasian kiang pan lampial uh ahihzia zong pulaak hi. Bangci bangin Topa tawh kigamla uh hiam? Satan kizo khin hi mah taleh, khuamial gamtatna sungah a nungta mi tampi om hi. Pawlpi sagihte’ nunzia in Satan in Khrih a dozia pulaak hi. Khrih nih vei a hong pai kik mateng hih Kidona Lianpi om ding hi.

FRIDAY MARCH 18

SINBEH DING: Bang hangin Khrih in Pasian hi, cih thu up ding thupi mahmah hiam? “ Pasian siangtho hi. A thupiakte zong siangtho hi. Mawhna neilo Pasian tawh kiza kim Khrih bek mahin mawhnei mite honkhia hi. Khrih bek mahin Thukham’ samsiatna panin hong honkhia hi. Pasian’ mai-ah mawhna in siahuai lua mahmah hi. Pa le Tapa khenkham zo phial dingin vanglian hi. Ahi zongin Khrih in mawhna zo hi; mawhna pan eite hong tankhia hi. Khrih in tawntung siatna panin hong honkhia hi.” Ellen G. White, God’s Amazing Grace, 42.

Pasian a siantho bangin thukham zong siangtho hi. Tua hi-in siantho-na tawh kidim Khrih bek mahin mawhnei mite Pasian tawh hong kizom kik sak hi. Vantung mite in mawhna nei lo uh hi. Ahi zongin Pasian a siantho bangin amaute siangtho lo uh hi. Khrih in Pasian hi. Mawhnei mite aa ding a hong sihna thu in bang siksan hiam cih leh Pasian’ siantho bangin a siangtho thukham ahi hi. Pasian’ thukham palsat ihih manin tua mawhna pan tatkhiat kisam i hi hi. Khrih a hong sihna in mawhna a siathuai zia pulaak hi. Hih thu mah in thukham a siantho-na hong hilh hi. Thukham siangtho-in Pasian mahmah in gimthuak lawh ahih leh, eite in bang zahin thukham’ manphatna pulaak huai zaw lo hiam?


KIKUP DING DOTNATE:

1.     Na lawmte tawh Wednesday ni-a dotna tawh kisai kikup in.

2.     Khrih a hong kiniamkhiat bangin a kiniamkhiat muhhak mahmah kha ding hi. Mi tampi in Khrih hong pai kik ding ngaklah mahmah napi, leitung nunzia bangin nungta uh hi. Lawp mahmah napi a lawpna uh mit pahpah hi. Tua bang mite Laodicia pawlpi a kithuhilhnate phawk uh hen. Ellen G. White, The Review and Herald, June, 10, 1852.Hih kammalte tuma kum za lai-a kigelh ahih hangin, nang le kei in nuntakpih ding thumanpha om hi lo hiam? Pawlpi masate amau le amau kicin a kisakna uh bang pulaak hiam? 

To get the latest update of me and my works

>> <<