MUC

Print Friendly and PDF

Sunday, December 27, 2015

Sabbath School Lesson 11 | Peter in Kidona Lianpi A Muhzia

LESSON 11  MARCH 5 – 11  PETER IN KIDO-NA LIANPI A MUHZIA



SABBATH NITAK: TU KAAL SUNG SIM DING:1Pet. 2: 9, 10; 4: 1-7; 2Pet. 1: 16 – 21; 3: 3 – 14; Thkna. 14: 2;Dan. 2: 34, 35.
KAMNGAH: Ahi zongin note pen Pasian in a hong teelkhiat minam, Kumpi siampi pawl, a siangtho minam, Pasian’mite na hi uh a, khuamial sung panin a lamdang mahmah ama khuavak sungah a hong samkhin pa’ nasepna a lamdangte a genkhia dingin Pasian in a hong teel mite na hi uh

hi. 1Peter 2: 9.

Peter in Kido-na Lianpi tawh kisai a gen thute: Satan khemna sungah ki-awk baih mahmah hi; kiging kikem siam un. Na gal uh Dawimangpa in kua na ne ding hiam ci-in a vak kawikawi humpinelkai tawh kibang hi, ci-in genteh hi (1Pet. 5:8). Satan in Pasian i muan loh theihtheih nading vaihawm den hi. Mi kim khat in Khrih hong pai kik nawn lo ding hi, ci-in ngaihsun uh hi. Tua bangin Dawimangpa in mi zo mahmah hi. Khrih hong pai kik ding lametna nei nawn kei lehang, bang dang lametna nei i hiam? Peter in a upna nial-in thu-um lo mite bangin va kineihkhem ngei ahih manin tua bang gamtat i pelh ding hong hilh hi. A kikhel khit ciangin a nuntakna in Topa nunzia kilangsak hi. Tua dingin eite zong hong hanthawn hi.


SUNDAY MARCH 6


KHUAMIAL PAN KHUAVAK AH


1Pet. 2:9, 10 sim in. Koi bangin Satan in Khrih a do-zia hong lak hiam?

_____________________________________________

Peter in Pai. 19: 6 siksanin a gen thu in: thu-um mite in siampi, kumpi minam, a siangtho minam, Pasian aa dingin a kiteel minam ci hi. Hih in Pasian in Moses tungah a pulaak kammalte ahi hi (Thkna. 14: 2). Saltangin a om laitak mahun hih bang kammalte kipia hi. Saltanna pan Khapsa Gam zuanin a pai-un zong hihte mah kigen kikkik hi. Tu hunin zong hih kammalte mah i gengen lai hi. Peter’ kammalte in vantung gam nuam manawhin a pai mite nunzia hong hilh hi. Pasian in Ama nasem dingin a hong sehsa i hi hi. Satan ukna sung pan hong honkhia ahih manin Pasian min a thangsak dingte i hi hi ( Phil. 3: 12). Khrih’ dikna i kisam a, Khrih in hehpihna nei-in hong honkhia ahih manin Ama kiang a zuan i hi hi (Titus 3:5).

Satan in na mawhna pulaakin lamet bei mi, ci-in na kingaihsut khak ciangin Khrih in nang hong honkhia dingin leitungah hong pai ahihlam pulaak in. Nang le nangin siatna zo thei lo na hihlam phawk inla Topa vangliatna na kisap lam pulaak in. Nang le nang kimuanna hemkhia inla Calvary singlemteh en tawntung in. “Khut guakin kong pai, na Singlamteh bek mah ka lamet hi, Topa aw,” ci in. Ellen G. White, The Desire of Ages, 317.

Khuamial lak pan khuavakna munah om dingin sapkhiat mi i hi hi (1Pet. 2:9). Khrih bek mah i belh i suan ahi hi. Bang hang hiam cih leh Amah in eite hong diksak, hong siantho-sak le hong honkhia hi (1Kor. 1: 30).

Na nunzia ki-en kik lecin na lungkia ngei hiam? Ahih kei leh, na lung hong nuamsak hiam? Koi bangin Khrih na upna khang semsem sak thei ding na hiam?



MONDAY  MARCH  7

LAWM LE GUALTE HONG HUZAAP


1Pet. 4: 1-7 sim in. Bang hangin gamtat zia le tong thupi hiam? Koi bangin zia le tong in Khrih hong pai kik dingin kiginkholhna hong huh hiam?

________________________________________________

Nidangin cilesa nunzia tawh nungta-in siatna tawh nungta hi mah leh, tu-in nun kikhelin midangte nun bangin nungta nawn lo uh hi. Khat le khat tungah zuau kigen nawn lo uh hi (1Pet. 4:4). Tua hangin Satan in Pasian tawh i kizopna susia hi. Peter in tua bangin Satan nasepna hangin lungkia lo ding hong hanthawn hi. “Gentiles” mite in Pasian thukhenna thuak ding uh hi. Amah bek mah leitung Thukhen Mangpi ahih manin, midangte hong mawhsakna, a hong gensiatna, kosiatnate hangin upna pan nungkik ding hi lo hi (1Pet. 4: 5).

Nang upna bangin nungta lo-in, kim le paam mite hong genna hangin na upna thanem kha zel hiam? A diakdiakin khangnote in a lawm a gualte om bangin nungta uh hi. Midangte nun bangin nungta lo-in itna nei ding kisam hi (1Pet. 4: 8, 9). Nuntakpih dingin a kisam mahmah thu hi. Ut le ut loh thu hi lo-in a kisam mahmah thu hi. Hih thu hangin thungen tawntung dingin a hong kihilh a hi hi (1Pet. 4:7). Thu-up pih mite sangin thu-um lo Gentiles mite i thupi bawl, i it bawl zaw kha zel hi. Thungetsak banah lainatna a nei thei dingin Topa Pasian kimakaihsak in. Pasian teel minam i hih manin siatna ki-uk sak lo-in, a hoih nate tawh ki-uksak zaw in. Israel mite in dawibia mite etteh dingin kikoih hi napi, dawibia mite in amaute huzaap zaw mawk hi. Topa Pasian in tua bang dingin hong deih lo hi.


Koi bangin lawm le gual in hong huzaap hiam? Koi bangin na naang hiam? Koi bangin thusia pen thu hoih tawh zo in ( Rom 12: 21) cih thu in hong huh hiam?

TUESDAY MARCH 8

GENKHOLHNA MUANHUAI SEMSEM


2Pet. 1: 16 – 21 sim in. Genkholhna a thupitzia bang gen hiam?

_____________________________________________________________________

___________________________________________________________________

Genkholh thute tangtung takpi ahihzia Peter in ama hun lai-in mu hi. Jesuh kituiphumna ( 2Pet. 1: 17); mualtungah mel kilamdanna (2Pet. 1:18), Jesuh pianzia ding genkholhna khempeuh (2Pet. 1:19). Hih thute in Peter huzaap mahmah hi. Ama tuah ding Jesuh genkholh thute nial kha ngei ahih manin genkholhna thute limtak ngaihsun hi. Khrih in tampi hilhkhol napi, Peter in tua thute awlmawh lo kha hi. Peter in Jesuh a nial ding Jesuh in theikhol a, “thum vei nong nial ding hi,” a cih mah bangin, Peter in Jesuh nial takpi hi. Hih thu in Peter kikhelna piangsak hi. Hih thu hang mahin Jesuh nungzui mi khat in amah le amah a kitel ding thupi hi, ci-in Peter thuhilh hi: “Amah in piak dingin a hong ciam a manpha mahmah nate hih bangzia-in hong pia a, hih Ama hong piak nate hangin leitungah a om siatna a piangsak thei duhluatna le deihluatnate panin na suakta uh a, Pasian’ pianziate na nei uh hi” (2Pet. 1: 4).

Siatna a pelh lampi a zuite in upna, hoihna, thutheihna, pumpi deihna khamna, thuakzawhna, Pasian deih bang gamtatna, sanggam bangin kikhualna, itna cihte tawh nungta uh hi (2Pet. 1: 5 -8). Hih thute khat le khat kikhen khia thei hi lo hi; a vekin pum khat hi. Tua hi-in Paul in gah tuamtuamte ci lo-in, pum khat “gah” ci-in pulaak hi (Gal. 5: 22, 23). Thu-um mite in tua gah, gah hi leh, puk lo-in, Pasian sapna ngah taktak ahihna uh kilatna hi, ci-in hong hilh hi ( 2Pet. 1: 10).

Peter’ laikhakte in upna thu-ah a kip khin mite tunga a khak ahi hi. Gamtat hoihna tawh hotkhiat kingah ahih lohzia hong hilh hi. Nunlui nusia-in nunna thak tawh nungta-a, thusia ngaihsun lo-in thuhoih thute ngaihsun ding, ci-in hong hilh hi.


WEDNESDAY MARCH 9       MI ZAHKOTE


2Pet. 3: 3 – 7 sim in. A beisa hun a thupiangte in tuhun le mailam hun tawh kisai bang hong hilh hiam?

__________________________________________________

___________________________________________________

Khrih nungzuite hi taleh siatna bawl mite hi taleh thaman i ngah ciat ding hi. Dawimangpa in a nek ding a zong a vak kaiwkawi humpinelkai tawh kibangin (1Pet. 5:8), upna pan lampial mite tawh kopin thu-um mite langbawl uh hi. Amaute upna zahpih uh hi. Hi bang mite in numei pasal khat le khat kilunggulhna tawh kidim uh hi (2Pet. 3:3; Jude 18). Nisuakin nitumin, a nate a ngei mah bang den, Khrih hong pai kik ding cih kamciam a mawkna hi, ci uh hi. Jesuh in “ Ka hong pai kik ding hi” ci hi (Jn. 14: 1 -3). Ahi zongin siatna bawlbawl mite in “ Jesuh hong pai lo ding hi” ci uh hi (2Pet. 3:4). Hih thu in Eden huan sung thupiang hong phawkkik sak hi. Pasian in Adam le Eve kiangah “huan laizang a singgah na ne kei ding uh hi. Na nek uh leh, na si ding uh hi,” ci-in thupia hi (Pian. 2:17).

Ahi zongin Satan in “na si taktak kei ding uh hi” ci-in zuau phuak hi (Pian. 3:4). Hih laimunah Satan in Pasian’ thupiak tawh kilehbulhin thugen hi. Tua bang mahin Peter in zong genkhol khin a, “Khrih hong pai kik ding hi,” ci-in a kipulaakna munah Satan in tua bangin a um mite zahko gawpgawp hi. Hih bang mite mah in genkholhnate a tangtungsak uh hi pahpah hi.

Siatna hangin tuiciin in hih leitung susia ngei hi mah taleh, a um lo mite in leitungah Tuiciin tung hi, cih nial uh hi. Hih leitung tuitawh a susia Pa Pasian mah in ni khat ni ciang mei tawh hih leitung susia ding hi, cih um lo uh hi. Hih leitung in a ngei mah bang lel ding hi, ci-uh hi (2Pet. 3: 5-7).

Hun hong beibei hi. Koi bangin Khrih hong pai kik ding hi, cih na um hiam? Bang hangin kiptaka up tinten ding kisam hiam?

THURSDAY MARCH 10

TOPA HONG PAI NADINGIN NASEM IN


Pasian mai-ah hun le ni cihte in ciangtan lo hi. Topa mai-ah kum khat in ni khat bang mah hi lel a, ni khat pen kum tul khat mah bang lel hi. Amah pen hun in uk lo hi. Kamsangte gen “Topa Ni,” sawltakte gen Khrih hong kum kik hun nai mahmah hi, ci-in Lai Siangtho in hong hilh hi.

2Pet. 3:8 – 14 sim in. A kip tawntung lametna bang pulaak hiam? Daniel 2: 34, 35, 44 sim in.

____________________________________________

____________________________________________

Pasian in kamsangte tungtawnin a pulaak thu in: siatna bei ding hun nai ta hi. A sawt lo-in Pasian hehpihna kong kikhak ta ding hi. Na khempeuh kibawlpha ding hi. Hih thute in tu hun i nunzia hong khel kul hi (2Pet. 3: 12). Pa Pasian a langpang mi in thu-um mite zahko mi hi pah hi. Ahi zongin Pa Pasian pen itna, hehpihna tawh kidim Pasian hi, ci-in a um mite ahih leh thuman tawh kidim leithak luah ding uh hi (2Pet. 3: 13).

Peter in lungsim le gamtatzia a hong hilhte: lawp takin nasem ding, paubang lo-in a nungta ding hong hilh hi. Gamtat tawh tatkhiatna kingah hi, ci-in a um khial zong om hi. Peter in tua bangin hong hilh lo hi. Khrih’ thuak gimna hangin hotkhiatna ngah i hi hi. Pasian in Job bangin paubang lo-om a nungta dingin hong lamen hi. Bang hang hiam cih leh Job in Pasian kihta-in siatna pel hi (Job 1:1). Khrih in Pa Pasian mai-ah eite zong paubang lo-in hong koih hi (1Kor. 1:8; Kol. 1:22; 1Thess. 3: 13; 5: 23). Melhemna nei lo ganhing tawh biakna in Khrih a hong sihna limcing hi (Pai. 12:5; Siam. 1:3). Pawlpi zong mawhna nei lo-in hong koih hi (Heb. 9:14; 1Pet. 1:19; Eph. 5: 27).

Bang hangin siatna pel, upna sungah khangto, a siangtho-in nungta, paubaang lo cihte Khrih dikna siksan ding kisam hiam? Khrih tawh kigam la lehang bang piang ding hiam?

FRIDAY  MARCH 11

SINBEH DING: Thu-um lo mite in piansakcil a kipan na khempeuh in kikhelna nei lo hi. Na khempeuh kibang tawntung hi, ci uh hi (2Pet. 3:4). Hih in lamdang lo hi. Tuiciin tun ma mite in zong tua bang mahin um uh hi. Tulai mite mah bangin Noah khanghun lai mite in zong nisuakin, nitumin, nate in bangmah kilamdanna nei mel lo tawh kibang hi. A kikhel bangmah om lo hi. Pasian in zong khel zo lo hi; Pasian sangin zong vanglian zaw hi, ci-in ngaihsun uh hi. Noah in thuman tangko takpi hi leh, mite in ama thugen um ding uh hi. Kuamah in um lo ahih manin Noah in tuiciin tung ding hi, cih thu kuamah in um zo lo hi” Ellen G. White, Patriach and Prophets, 97.

Tuhunin zong leitung pilna in nisuakin khua hong mialin kilamdanng om lo-in a hi ci tawntung ding hi, ci hi. Piansakna thu a um lo mite in hih bangin um uh hi. Noah, Peter hun lai-a mite in zong hih bangin um uh hi, hih bang upna in khial ahih leh, tuhun tua bang upna zong a khial ahi hi. Paul in “Leitung pilna in Pasian mai-ah haina hi,” ci hi (1Kor. 3:19).

KIKUP DING DOTNATE:

1.    Peter in Khrih thu banah genkholhna thute lim gen mahmah hi. Bang hangin genkholhna thupi mahmah hiam? Koi bangin genkholhna in Khrih in Messiah hi, ci-in hong um sak hiam? Bangci bangin genkholhna mah in Khrih a hong pai kik ding hong umsak hiam? Genkholhna om kei leh, lametna le Khrih a hong pai kik ding kamciam i thei ding hiam?

2.    Khangual in hong huzaap mahmah hi. Khangnote banah uham khinte zong khanpihte huzaap tawh kipelh lo hi. Mite huzaap tungtawnin i up thuman i khaksuak loh ding kidawp huai hi lo hiam? I upmawh bang lo-in mite huzaap tawh kinungta kha thei zel hi lo hiam? 

To get the latest update of me and my works

>> <<