MUC

Print Friendly and PDF

Sunday, December 27, 2015

Sabbath School Lesson 10 | Paul Le Amah Alangpangte


             LESSON 10     FEB. 27 – MARCH 4   PAUL LE AMAH A LANGPANGTE

SABBATH NITAK: TU KAAL SUNG SIM DING: Rom 5: 12- 21; 1Kor. 3: 12- 17; 12: 14 – 26; 15: 12- 18; Eph. 6: 11 – 17.
KAMNGAH: Tua bangin hih a muatthei pumpi in muattheihlohna silh a, hih a sithei pumpi in sihtheihlohna a silh ciangin, “Zawhna sungah sihna a kivalhtum zo
hi.” 1Kor. 15:54.

Paul in Satan le Sataan nasep om takpi ahihlam hong hilh hi. Satan hong khemna, vanglianin mit tawh kimu thei lo dawi-te hong khemnate hong hilh khol hi (2Kor. 11: 14; Eph. 6: 11; 2Thess. 2:9). Ahi zongin tuate sangin Khrih vangliatna a gualzawhna hong hilh zaw hi. Bangbangin Satan in gualzo kisa taleh, a tawpkhakna-ah Satan le a pawlte khempeuh kisia mang ding uh hi. Khrih hong tatkhiatna umin, Ama thu a zui mi khempeuh in Khrih zawhna ngah ding uh hi. Khrih gualzawhna in Satan kisiatna taktak hong tung ding hi, cih thu pulaak hi (Heb. 2: 14).

Tu kaal sungin thu-um mite nunzia ding Paul in gentehna le lim tuamtuam tawh a hong hilh thute i sin ding hi.



SUNDAY FEB. 28.

ADAM LE JESUH


Paul’ hong hilh Lungdamna Thu in: “Mawhnei i hih laitak mahin ei aa dingin Khrih hong si hi. Tu-in a hong kihonkhia zo hi. Bang hang hiam cihleh eite tangin Khrih in sihna thuak a, sihna pan thokik hi. Mawhna thukhenna tawh i kipelh thei ta hi. Pa Pasian tawh kizom kik thei i hih manin i nuam hi.Khrih tung tawnin upna tawh dikna ngah (Rom 5:1); Pa Pasian tawh kizopna i nei hi. Gimna in hong lungkhamsak nawnlo ding hi.


Roman 5: 12 – 21 sim in. Koi bangin Satan in Khrih a do-zia pulaak hiam?

____________________________________________

Eden huan sung a Adam hangin siatna khempeuh bei ding lampi bawl masak lohin a tawntung nuntak nading lamet om lo hi. Tua lo-in a tawntungin Satan gualzo ding hi. Adam hangin siatna hong tung hi (Rom 5: 12) Thukham Sawm in sihna zo zo lo hi. Siatna beisak lo thei lo hi. Mawhna i cih in bang hi, cih thu Thukham Sawm in hong hilh hi. Jesuh kipiakna bek mahin mawhna le mawhna thaman sihna hemkhia thei bek hi. Ama nunna mahmah tawh mawhna thaman leiba hong piaksak hi (Rom 5: 15, 16).

Adam mawhna hangin sihna hong tun hangin, tu-in a kicing hehpihna, a hong kipia khong dikna i ngah thei hi. Bang hang hiam cihleh Jesuh in a a kamciam pel ngei lo hi (Rom 5: 17). Adam hangin eite in gim thuak, ama deihtel khialh manin mi khempeuh si cih mawk cih pen thu langkai hi, ci-in ngaihsun kha leng, nuntak tawntungna i ngah ding zong thulangkai mah hong suak ding hi. Tu ma kum 2000 lai-a Khrih’ thuakna tawh bang mah i kisai-na om keei lo pi! (Rom 5: 18 – 21). Adam masa in sihna hong tun a, Adam nihna in nuntakna le Pasian tawh hong kizom kiksak hi.


“Mimawh i hih laitak mahin eite tanga Khazih hong sihna tawh Pasian in eite hong itna hong kilangsak hi.” Rom 5:8. Na ngah ding lametna na phawk hiam?


MONDAY FEB. 29

BIAKINN


Khrih’ pawlpi in thanemin, kicinna nei kei taleh, Pasian in pawlpi sangin thupi a sak zawk leitungah bang mah om lo hi.” Ellen G. White, In Heavenly Places, 284.

Korin pawlpi tungah Paul laikhak in zong tua mah pulaak hi. Paul in tua pawlpi pen ankung tawh genteh hi (1Kor. 3). Mi khat in tua ankung suanin mi dang khat in tui pia hi. Ankung a khangkhia sak in Pasian hi (1Kor. 3: 4-9).

Paul in pawlpi le inn genteh hi. Mi khat in inn khuampi bawl a, mi dang khat tua tungah innlam hi (1Kor. 3: 10). Tua inn khuam bulpi in Khrih hi (1Kor. 3: 11). Innlam nadingin kizang ding vante hoih tak ettel kul hi. Pasian’ thukhen Ni ciangin hoih takin innlam mi le a gina lo innlamte in thaman ngah ding uh hi (1Kor. 3: 12 – 15).


1Kor. 3: 12- 15 le Matt. 7: 24 – 27 enkak in. Satan’ mi maw, Khrih’ mi, koi ah om cih bang thu in pulaak hiam?

_____________________________________________

_____________________________________________

“Note in Pasian’ biakinn na hi uh a, note sungah Pasian Kha a teen lam thei lo na hi uh hiam? Mi khatpeuh in Pasian biakinnpi a nitsak leh Pasian in tua mi a susia ding hi. Bang hang hiam cihleh Pasian in biakinnpi siangtho a, note in tua biakinnpi na hi uh hi (1Kor. 3: 16 – 17). Hih thu in thunih hong hilh hi. Biakinn le tua biakinn kilamzia: cidamna a gen masa hi lo hi. Ama pumpi a susiate Pasian in susia hi lo-in amah le amah kisusia hi lel hi. Gamtat zia le tong le Kha Siangtho tenna inn in kizopna nei hi (1Kor. 6: 15 – 20). Nihna ah: Mi mal khat tungah a gen hi lo-in mihon (pawlpi) tungah a genna kammal hi. Pawlpi a susia mi peuhmah in gim thuak ding hi. Pasian in pawlpi a susia pumpi koihkhong lo ding hi.

Koi bangin na sep, na bawl na khempeuh in pawlpi a susia hi lo-in a khuatuah hi zaw hiam?


TUESDAY MARCH 1 

“PAWLPI IN PUMPI BANG HI-IN”

Pawlpi nasep le pawlpi dinmun 1Kor. 12 sungah limtakin kigelh hi. I pumpi nate mah bangin thu-um mite in nasem khawmin , kipum khat ding i hi hi (1Kor. 12: 12).

1Kor. 12: 14 – 26 sim in.  Bang thulaigil pulaak hiam?

__________________________________________________

__________________________________________________

Khut in mit kisam keng, ci leh? Pumpi in mit le bil bek hi leh ee? (1Kor. 12: 17). Hih bangin a pian loh mah bangin, pawlpi zong tua bang mah hi. Mimal khat ciat tungah Kha Siangtho in letsong hong pia hi. Pawl khat in thukhen siam pilna nei a, pawl khat in mite etteh tak cing upna nei-in, pawl khat in damsakna cih bangin letsong ngah uh hi. Ahi zongin pumpi nate mah bangin nasem khawm dingin hong deih hi. Pawlpi kipum khat sakin, pawlpi nasepna mazangsak dingin Kha Siangtho in kisap a sak bangin a hong piak hi-a, eima thuthu-in tua letsongte zat ding hi lo hi (1Kor. 12: 11 – 13, 18).

A thupi mahmah thu in pumpi nate in a tuam ciat ahih uh hangin pumpi khat bek hi. Khat le khat a kizom bilbial vive hi. Tua nate in manpha ciat uh hi. Amah kia-in man nei lo hi (1Kor. 12: 20 – 24). Tua bangin khat le khat kizopna panin pumpi in nasem thei bek hi. Pumpi nate khat in na a sak leh, pumpi bupin nasa pah hi. Khat in nuam a sak leh pumpi bupin nuamsa hi pah hi (1Kor. 12: 26).

Pumpi tunga nate pawl khat a dangte sangin natna do zaw uh hi. Pawl khatte natna nang zo lo hi. Koi bangin i pumpi nate nasep zia in Khrih sunga om thu-um mite nunzia ding hong laak hiam?


WEDNESDAY          MARCH 2    PASIAN GALVAN




Thu-um mite in Kha gilote tawh kido taktak a hihzia leitung galkapte tawh gentehna Ephesian 6 sungah kimu thei hi.

Eph. 6: 11- 17 sim in. Koi bangin mimal in galdo ding hong hilh hiam?

_____________________________________________

_____________________________________________

Galvan khempeuh a nei mi in Topa thukhen Ni ciangin mawhsakna tawh kipelh ding hi (Late 1:5). Galvan neite in galzo ding hi. Kawnggak in thuman thutak limcing hi (Eph. 6: 14). Tua in lauhuai-na tuamtuam panin hong dal ding hi. Jesuh mahmah in “ kei mah in thuman ka hi hi,” ci hi (John 1: 14, 17; 4: 24; 8: 32; 14: 6). Awmdal in dikna limcing hi. Jesuh in dikna thu mah hong hilh hi (Matt. 5:6, 10; 6: 33). Kamsangte hun lai-in dikna cih pen a manin thukhenna ahi hi. Khedap in hotkhiatna hangin kingah nuamna limcing hi (Isa. 6: 15). Saltanna panin a suakta Jerusalem kipuahpha-in Israel mite in nopna a ngah mah bangun, Khrih hotkhiatna hangin i ngah lungnopna limcing hi. Siatna a do den i hih hangin Pasian in siatna khempeuh zo khin ahih manin lungdam ding ahi hi. Tua zawhna hangin mihing in Pasian tawh kilemna, khat le khat kilemna, lungnopna hong ngahsak hi.

Kidalna lum in upna limcing hi (Eph. 6: 16). Satan hong kapna thaltangte dal nading ahi hi. Hotkhiatna siklukhu in Khrih hong piak Ama lukhu hi (Mang. 1:6; 2: 10). Kha Siangtho temta in Lai Siangtho limcing hi. Ze-etna khempeuh zawhzawh nading galhiam hi (Matt. 4:4, 7, 10).

Tua galvante in Pasian tungah kinga-in zawhna bangci pulaak hiam? Koi bangin kigalging tawntung ding na hiam?


THURSDAY MARCH 3

A NUNUNG PEN I GAL


Korin khua thu-um mite in thawhkikna thu telkhial uh hi. Thawhkikna thu lo-in Lungdamna Thu in mannei lo hi (1Kor. 15: 1-4). Korin khua mi kimkhat in a si mite in Khrih dawn kha lo ding hi, ci-in ngaihsun uh hi. Tua bang upna nei Thessalonia pawlpi ah zong om hi (1Thess. 4: 13 – 17).

1Kor. 15: 12- 18 sim in. A si mite thokik ding hi, cih thu in bang pulaak hiam?

_____________________________________________

_____________________________________________

Paul in hih bangin gen hi: thawhkik lamet nei lo hi leng, tua sangin hehpihhuai zaw mi om lo ding hi (1Kor. 15: 19). Ahi zongin Khrih in sihna pan thokik a, eite aa dingin a thokik mite lak pan a masa penpen hong suak hi (1Kor. 15: 20). Adam in sihna hong tun a, Khrih in nunna hong pia hi. Khrih hong pai kik ciang a si mite thokik ding uh hi. Adam masa in leivui tawh kibawl hi. A masa Adam leivui tawh kibawl hi-in, a nihna Adam ahih leh, vantung pan hong pai Mihing Tapa hi. Ni khat ni ciang Amah i bang ding hi (1Kor. 15: 45 - 49). Khrih nih vei-na a hong pai kik hun ciang “pengkul kimut ding a, Khrih sungah a si mite in a si nawnlo dingin tho ding uh hi. A si thei pum in sih theih nawnlohna puan bangin silh ding hi (1Kor. 15: 52, 53).

A masa Adam kipiansakin a nungta tawntung dingin kipiangsak hi napi, tawl khat sung bek nungta hi. A tawntungin nungta dingin hong kipiangsak ahih manin tua ding mahin a nuntak hun hong tung ding hi.

1Kor. 15: 23 – 26 sim in. Tu laitakin siatna sihna le siatna in leitung ukcip lai mah taleh, tuate khempeuh a bei dingzia bangci pulaak hiam? Koi bangin mit tawh kimu thei lo thute muangin Topa’ kamciamte nuntakpih ding na hiam?

FRIDAY MARCH  4

SINBEH DING: Mawhna in mihing banah leitang mahmah ukcip hi. Tua hi-in mihing le leitang mahmah kipuahpha ding hi. Leitung piancil in na khempeuh Adam ukna nuai-ah kikoih hi. Mawhna hong tun ciangin Adam in tua ukna sumh hi. Adam in Satan ze-etna a zuih manin tua ukna khempeuh Satan in ngah hi. Tua hi-in Satan in hih leitung kumpi hong suak hi. Adam tungah kipia ukna Satan aa hong suak hi. Ahi zongin Khrih in mihingte bek hong tankhia hi lo-in, tua ukna i ngah kik theih nadingin zong hong tankhia hi. A masa Adam in a sup thupha khempeuh Adam nihna tungtawnin i ngah kik ding hi. Ellen G. White, The Signs of the Times, Nov. 4, 1908.

Kim le paam en lehang Satan in guallel ding hi, cih i mangngilh kha zel hi (Mang. 12: 12). Siatna, sihna le gimna cihte i thuah ngitnget hangin Khrih thuakna hangin tuate khempeuh a beisiang hun hong tung ding hi ta hi. Pasian bek mahin hih leitung puahpha thei hi. Leitung buainate ei le ei-in hong siangsak thei kei hi. Pasian in hih leitung kemcing lo hi leh, nate khat beek om nawn lo ding hi.

KIKUP DING DOTNATE:

1.    Pawlpi in gina lo-in thanem ta leh, Pasian in leitungah pawlpi sangin a kinzawk bangmah om lo hi. Mihingte lungtang tungah Ama hehpihna hong koih a, Pasian in mihingte a hong khelzia vantungmite in a muh tak ciangin lamdangsa mahmah uh-in, Pasian min phat uh hi. Ellen G. White, The Signal of Advance, The Advent Review and Sabbath Herald, Jan. 20, 1903. I kikhel nadingin Khrih in i sungah nasem hiam?

2.    Koi bangin tual pawlpi hi taleh a huampi-in hi taleh, Kidona Lianpi kilangsak hiam? Bang thu in thu-um mite hong thanemsakin hong khenkham hiam? Koi bangin pawlpi cidamin, kipum khat ding hiam?

To get the latest update of me and my works

>> <<