MUC

Print Friendly and PDF

Sunday, December 27, 2015

Mission News Jan 30

JANUARY 30.

LUNGNOPNA NGAH:


Michael in a pi tawh omin, a omna uh pen kuahawm khat tawh kibang inn khat hi. Khuavak kingah lo banah a lungsim ngaihsutna zong toi hi. Lungkiat natna nei-in, sangkah cih simloh vai khia ngei lo hi. Michael’ nunzia pen hamsa mahmah hi. A nu in kum 17 a phakin a neih hi-a, a nu in khoi zo lo ahih manin, a pi  
tawh om hi. A pi in biakinn ah kikhoppih zelzel hi. Ahi zongin Michael in biakinn sung nuamsa lo hi. Bengngam lua-sa hi. Thugen, sumpi piak ding cihte a kipan za thei lo hi.

Michael in kum 11 a phak ciangin biakinn pai ding ut nawn lo hi. A innkuanpihte tawh kikhen, a nunzia nuamsa lo hi. Pasian om takpi ahih leh, bang hangin ka innkuan hi ci bangin om hiam? Bang hangin hih zahin genthei ka hiam? ci-in ngaihsun hi.

Sanginn pai cih simloh koi mahmah paikhia lo ahih manin kikholhpih lawm le gual zong nei lo hi. Kum 12 a phak ciangin internet lawng thei ahih manin tua a kipan internet tawh a hun beisak hi.

Tua leh ni khat huihpinung, guahzu-in internet kingah lo hi. Tua leh TV hong hi. TV ah Pasian lasak “ The King’ Herald kici lasa mite lasakna ngai kha hi. Tua a lasak un: “ Lungnopna ka zonga lungnopna ka mu kei. Ahi zongin Pasian in hong phawngkhia-in, itna ka ngah hi” cih la a zak leh, Lai Siangtho sim ding hong kipan thei hi. Nisimin tua la za nuam hi. Ahi zongin tua la kilak nawn lo hi. Thugenna le la kisate in a lungsim lawngkha veve hi. Ni khat niteh a TV et pen Brazil gam pan Adventist Hope TV ahihlam hong thei hi.

Sangkhak cih bang ciangin Michael in ni khatin nai 16 sung bang Adventist Hope TV bekbek en hi. Tua TV panin la tuamtuam, thugenna, cidamna thu cihte kikhahkhia den hi. Sabbath, vantung biakbuk cih thute a zak cilin, hih thute pen Lai Siangtho sungah om lo kha ding hi veh aw, ci-in ngaihsun hi. Bang hang hiam cihleh a pastor un tua bang thute gen ngei mahmah lo hi. Tua hi-in hih bang thute koi pan hong pai-a, Adventist kici mite a bangci mi dan hiam? ci-in kankhiat ding hong sawm hi. Kum khat sung bang Adventist Hope TV bekbek en hi. A lungsim ah Adventist thu-um mi hi khin hi. A pi in lamdangsa hi. Bang hang hiam cihleh Michael in voksa nek ding nialta hi.

Ni khat tua TV pan thugenpa in Pasian aa dingin nungta nuamte in na om omna panin thu na ngen un. Tui kiphum nuam na om uh leh cih bangin a gen ciangin Michael’ lungsim sukha mahmah hi.

Mai kalah zop kik ding!

To get the latest update of me and my works

>> <<