LESSON 9 NOV. 21 – 27
JEREMIAH’ HAKKOL
SABBATH NITAK: TU KAAL SUNG SIM DING: Jer. 16: 1 – 13; 27: 1- 18;28: Hos. 1: 1 – 3; Daniel 4: 25; 2Tim. 4: 3, 4
KAMNGAH: “Tua ciangin Jesuh in a nungzuite le mi khempeuh kiangah, “Mi khat peuh in kei hong zuihnop leh ama deihna bangin gamta nawn lo-in nisimin a singlamteh pua-in hong
zui ding hi” ( Luke 9: 23)
Pasian’ kamsangte in thuhilh bek hi lo-in amau gamtat le na tuamtuamte tungtawnin thuhilh uh hi. Mite' tungah a tung ding gimnate amau gamtatna tawh pulaak khia uh hi. Jeremiah zong tua bangin a gamta dingin kisawl hi. Amasa-in singhakkol khat kisuan dingin kisawl hi. “ Topa in kei tungah, savun khau tawh a kithuah hakkol bawl inla, na ngawngah thuah in” ( Jer. 27: 2). Hamsa het lo ding a bat hangin vangik mahmah khat kisuan dingin sawlna ngah hi. Tua sang a hamsa zaw lai-ah kamsang zuau-te in Jeremiah’ gen thute langpan uh hi. Mite dah hun ciangin Jeremiah zong a dah ding, mite a lungdam uh ciang, a lungdam dingin kisawl hi. Topa in Judah mite a theihsaknop thu in: amaute’ mawhna hangin a thuak ding gimna lianpite hong tung ding a, ahi zongin mawhna kisik a, Topa’ thu a man nak uh a thuak ding uh gimna phadawm zaw deuh ding hi.
SUNDAY NOV. 22
KHAT GUAK NUNTAKNA
Jeremiah nunna in nopna tawh kidim hi het lo hi. I theih sangin a thuakna tam zaw mahmah kha ding hi.
Jer. 16: 1- 13 sim in. Topa in Jeremiah tungah bang thupia hiam? Nuamhuai thu ahih loh hangin Jeremia aa dingin bang thupha kigen hiam? Hos. 1: 1- 3 zong sim in.
_________________________________________________________________________
______________________________________________________
Israelte le Topa' kizopna limcing dingin Topa in Hosea kiangah numei kizuak khat tenpih dingin thupia hi. Jeremiah kiangah ahih leh, zi nei lo ding, tanu tapa nei lo dingin thu pia hi. Tua hun lai-in zi nei lo mi muh hamsa mahmah hi. Amau ngeina tawh kilehbulh hi. Israel tangval khat aa dingin zi nei-in innkuan kikhuasak ding a thupi mahmah khatin a ngaihsut khat uh ahi hi. Beh le phung kizoppaisuakna in zong a thupi mahmah khatin ngaihsun uh hi. Bang hangin Pasian in Jeremiah zi nei dingin khaam hi mawk ding hiam? Jeremiah bek tangh om ding cih pen Topa in Jeremiah’ nunzia tungtawnin Judah mite a thuhilhna, amau thuak ding gimna limcingkholsak hi.
A dah a kap inn sungah zong a lut lo dingin thu pia hi. Topa Pasian in Judahte a kisik ding le kipuahphat ding hilh hilh taleh, a thu don lohna uh limcing ahi hi. Tua bang mahin pawibawlna, gualnopna munte ah zong a pai lo dingin kikhaam hi. Judahte’ nopsakna khempeuh a bei mang ding limcing khol ahi hi. Jeremiah in kuamah tawh kizopna nei lo ding, nuamna hi taleh, dahna hi ta leh, a nial dingin thukipia hi. Ama nunzia tungtawnin Topa in a mite a thuhilhna ahi hi.
Jeremiah’ nunzia panin mite tawh kizopna, mi khat ii hong huhna, mite i va huhna cihte a manphatzia koi bangin na mu hiam? Kihuh, kipanpih diamdiamna thupi mahmahta zongin, Topa Pasian’ panpihna simloh a hoih zaw bang om hiam?
MONDAY NOV. 23.
JEREMIAH’ HAKKOL
Jer. 27: 1- 18 sim in. Topa in mite' tungah bang thupuak nei hiam? Bang hangin tua thu a za mite in langpan uh hiam?
____________________________________________________________________
____________________________________________________________________
Hakkol in kinengniamna limcing hi (Thkna. 28: 48; 1Kum. 12: 4) Jeremiah in hakkol pua dingin kisuan hi. Tua in Judah gamin a thuak ding Babylon mite’ simmawhna limcing hi. Tua singhakkol in a sau-na pi li le a lang bang pha hi. A sahna pen letmat 3 bang sah hi. Judah mite in Babylon mite a langdo uh leh, Topa Pasian a langdo mah tawh kibang ding hi, ci-in amaute' tungah kigen hi. A thuhkik uh leh, a thuhkik manun gimna thuak zaw ding uh hi. Jeremiah in ama aa ding banah namdang palaai-te aa dingin zong hakkol bawl hi. Babylon mite in khat vei teitei Topa’ thukhenna thuak ding uh hi, cih limla khol hi. Babylon mite in Judahte do leh, amau zong do lo-in om lo ding uh hi. Ahi zongin Jeremiah in Babylon mite do lo dingin gen ahih manin, mite in a thugen sang zo lo hi.
Jer. 27: 5 ah a thupi mahmah bang thupuak om hiam?
__________________________________________________________________________
__________________________________________________________________________
Topa Pasian in na khempeuh a uk Pasian hi. Topa’ mite in kinenniamna thuakin, gentheihna a thuak uh hangin, Topa Pasian sangin a vanglian zaw kuamah om lo hi. Hih thu in Ama tungah a citak mite aa dingin lametna hi.
I nuntakna ah hakkol tuamtuam i pua kha ngei ding hi. A man lopi-in mite’ nenniamna na thuak kha ngei hiam? Ahih kei leh, mite a nengniam na hi zaw hiam? Na hih khak leh, tu mahmahin tuate na hemkhia ding hiam?
TUESDAY NOV. 24
KAMSANGTE’ GALDO
Jeremiah in Judah mite tungah a pulaak thute mite’ zaknoploh thu ahih hangin a thuak ding uh thute hi. “Jeremiah in Topa’ deihna pulaak taleh, Judah mite in tua thuhilhna mang nuam lo uh hi. Topa’ thupiak langpan tawntung uh hi.” Ellen G. White, Prophets and Kings, 444.
Jer. 28: 1- 9 sim in. Judah mi bangin kingaihsun inla, Jerusalem aa thupiangte ngaihsun in. Kua na um diam? Kuate in na thugen um leh na ut hiam? Bang thu siksanin Jeremiah’ thugen sangin Hannaniah’ thugen um zaw ding na hiam?
____________________________________________________________
________________________________________________________________________
Pasian’ min suangin Jeremiah le Hannaniah in thugen hi. Anih tuakun bel hi thei lo ding hi. Jeremiah in Topa’ thukhenna le amaute thuak ding gimna lianpi pulaakkhol hi (Jer. 28: 8, 9). Jeremiah in Topa’ sawl bang mahin Babylonte' tungah ki-ap dingin kumpite le siampite' mai-ah pulaak tawntung hi. Jeremiah in Hosea, Habakkuk, Jephaniah cihte a kipan kamsangte’ vauthuhilhnate mah gen ahi hi. Pasian in a genkholh bangin tangtungsak takpi hi, ci-in hilh hilh taleh, mite in um tuan lo uh hi. Kisik takpi lo uh ahih manun gimthuak pelmawh ding uh hi. Pasian in a mite a theihsak nop thute, Ama sep ding thute kamsangte tungtawnin pulaak khol hi. Ellen G. White, Prophets and Kings, 445.
A piangkhinsa thute ngaihsunin, a pu a pate’ khialhnate a pelh theihna ding kisam hi. Jeremiah’ nasep in hamsa hi. Bang hang hiam cihleh, Pasian’ thupiakte nialin a lungkhauh mite banah Hannaniah’ thugente a man lohzia pulaak hi.
Hannaniah a khiatna in ‘ Pasian in hong hehpih hi” cih khiatna nei hi. Ama min tawh kizui-in hehpihna, mawhmai-na, hotkhiatna thu gen ngelngel ding hi. Hi mah taleh, kamsang zuau Hannaniah’ thupuak in bang hong hilh hiam?
WEDNESDAY NOV. 25
SIIK HAKKOL
Kamsang man le kamsang zuaute a kampau uh le gamtat kilangdo hi. Pasian’ thupiak bangin Jeremiah in hakkol bawl pah hi. Tua bang hakkol in thuhilhna khat ahi hi. Hannaniah’ gamtat in bang limciinna nei hiam? Jer. 28: 1- 11 sim in.
______________________________________________________________________
______________________________________________________________________
Khrih in thei-kung khat hamsiat hi ( Mark 11: 13, 19 – 21). Hih in limciin khat nei hi. Tua hun lai mite le hun nunungte mite limcing hi. Tua thei-kung a mu khat in botkhia henla, tua mun mahah kung hoih khat suan kik hi leh, Khrih’ gennop thu a langpan suak ding hi. Tua mah bangin Hannaniah in Jeremiah’ gen khempeuh langpanin thugen hi. Tua bangin kilangpannate Jeremiah in a thuhkikzia ngaihsun in. Tua hakkol kitan khit zawh Jeremiah in bangmah gen lo hi. Paikhiatsan ziau hi. Tua tawh a khawlsuak hi leh, Jeremiah’ nasep tangtung zo lo suak ding hi.
Jer. 28: 12 – 14 sim in. Bang kigen hiam? Jeremiah in bang
thuthak gen hiam?
____________________________________________________________
______________________________________________________________________
Jeremiah in “ Nang kong bawl bangin kong thukkik hi” ci-in pulaak lo hi. Topa’ thupiak thak a pulaak hi bek hi. Sing-hakkol hi nawn lo-in sik-hakkol bawl dingin kisawl hi. Sing-hakkol kikuaitan zo ahih leh, kua in sik-hakkol sutan zo ding hiam? Topa’ thupiakte mangnuam lo-in langdo teitei uh a, a thuak gimnate sangin a lian zaw gimna thuak zaw lai ding uh hi. Sing-hakkol hawmthawh na hih uh leh, sik-hakkol kisin dih un, a ci hi gige hi.
Thumanloh manin gim thuak kha lo, ahoihlo thute ah lungkhauhna hangin buai-na tuak lo kua om hiam? Topa' tungah ki-apin, eima deihna sangin Ama deih bangin gamta zaw lehang bang hangin hoih zaw hamtang hiam?
THURSDAY NOV. 26
ZUAU THUTE MUANNA
“Tua ciangin kei zong kamsang Hannaniah’ kiangah, “Na ngai in, Hannaniah! Topa in nang hong sawl lohpi, hih mite zuauthu na umsak hi” (Jer. 28: 15).
A sawt lo-in Jeremiah maw, Hannaniah, kua’ thugen man zaw cih mite in mukhia ding hi. Pasian’ kamsang man’ gente a sawt lo-in tangtung takpi ding hi. Tua hun ciangin kamsangzuau kilang khia ding hi. Hannanniah a sih khit hangin ama hangin gam sungah gimna lianpi tung hi. Mite zuau thu umsak hi. Thatang zawh hi lo-in, zuau thu a up nadingun, mite huzaap zo hi. Topa in a sawl lohpi, Topa’ min tawh thugen hi. Topa’ min paulap ahih manin Judah mite in um mahmah uh hi. Tua banah Hannaniah in ‘hehpihna’ ‘suahtakna’ ‘hotkhiatna’ cihte bek pulaak citciat hi. Babylon mite’ gitlohna a thuak ding uh hun naita ahih manin, Hannanah in mite’ zaknop ding thute bek gen hi. Thuhoih a bat tei hangin zuau thu bek gen hi. Jeremiah in Judah mite’ theih ding kilawm thute a pulaak tak ciangin, Jeremiah’ gen thute a up sangun, Hannaniah’ gen thute um zaw uh hi.
Anuai thute in bang gentek uh hiam?
Jer. 28: 15___________________________________________________
2Tim. 4: 3, 4__________________________________________________
2Thess. 2: 10 – 12_____________________________________________
Tuhun in zong Jeremiah’ hun tawh kilamdang tuan lo hi. Thuman le zuau thu i teel ding om tawntung hi. Satan in zuau thu i up nadingin hanciam mahmah hi. Zuau thu in lampi tuamtuam tungtawnin hong pai hi. Ahi zongin Khrih in “ Kei in Lampi ka hi a, Thuman le Nuntakna zong ka hi hi,” ci hi (John 14: 6). Satan in zuau thu ahih nak leh, a pulaak theih bangbangin pulaak ding hi.
Na kiim na paamah zuau bang thute minthang hiam? Jesuh le Ama’ kammal Lai Siangtho in tua bang zuau thu dal nading hoih hi lo hiam?
FRIDAY NOV. 27
SIMBEH DING: Judah mite in Jeremiah’ gen thute sangin Hannaniah’ gen thute um zaw uh hi. Tuhunin zong tua bang mah hi. Mihing in thusia sangin thuhoih za nuam zaw hi. Mi tampi in hih leitung hoih semsem ding, nuam semsem ding hi, ci-in um uh hi. Pasian om kei a ci mite in leitung pen hoih tekteklam manawh hi, ci uh hi. Leitung nuntakzia kikhelin a nidang sangin a nuam zaw, a hoih zawkna a om tei hangin, tuate in lametna, lungnop khamuanna hong pia thei lo hi. Leitung nate sangin a vanglian zaw khat om hi, cih upna kisam hi. Tua in Topa Pasian hi. Pasian in eite lamet hi kei leh, Hannaniah’ thugen a um mite bangin eite zong zuau thu umin, a kisia mang ding ihi hi.
KIKUP DING DOTNATE:
1. Leitung mite’ muhna tungtawnin mailam thu dingte ngaihsun in. Pasian lo-in leitung in lametna nei maw? Pasian lo-in siatna tuak ding maw, hoihna vive mu ding? Pasian lo-in leitung’
om zia ding ngaihsun in. Pulaak ding na nei hiam?
2. Jeremiah’ gen thute le Hannaniah’ gen thute enkak lecin, Jeremiah’ gen thute in a beisa thute ngaihsun a, tua thute tungtawnin thuman lampi zuih ding thuhilhna ahi hi. Ellen G. White in zong hih bangin gen hi: “A beisa huna Topa’ hong makaihnate i mangngilh kei nak leh, hong pai ding hunte ah bang mah lau ding om lo hi,” ci hi. Life Sketch, 196. Bang a cinuam hi ding hiam? Kiginkholh nadingin Pasian in a hong hilh inah, a beisa hunin bang piang hiam?
3. Hannaniah in hehpihna thu tawh kisai zuau thu pulaak hi. Tuhunin zong mailam aa ding thuhoih a bat hangin zuau bang thute nial ding na hiam? Hehpih itna cih pen thuhoih hi napi, koici bangin a man lopi-in kipulaak zel hiam?
