MUC

Print Friendly and PDF

Tuesday, September 15, 2015

LESSON 8 NOV. 14 – 20 JOSIAH’ PUAHPHATNATE

LESSON 8    NOV. 14 – 20

            JOSIAH’ PUAHPHATNATE


SABBATH NITAK: TU KAAL SUNG SIM DING: 2Khang. 33; Hab. 1: 2 – 4; 2Kum. 22; 23: 1 – 28; Phil. 2: 3 – 8; 1Kor. 5: 7. 

KAMNGAH: “ Josiah nung le ama hun ma-in, amah tawh a kibang, Moses thukham kituakin a lungsim khempeuh, a hinna khempeuh le a hatna khempeuh tawh na a sem kumpi dang khat beek a om kei hi (2Kumpite 23: 25).


Tate khangcingin amau’ khensat bangbangin a om manun nu le pa’ lungsim nasak kha zel uh hi. Nu le pa beek hi lo, beh le phung, lawm le gualte dongah buai-na om kha thei hi. Khat veivei mihing in ama deihtel theihna zangkhial kha zel hi. A hoih lo na khat peuh i sep khak ciangin, deihtel theihna nei ihihlam kilang hi. Khial kha ngei lo cih pen deihteltheihna nei lo cihna hi ding hi. Kikhial pahpah ahih manin i khialh khak loh nadingin Pa Pasian in i zuih ding lampi hong lak tawntung hi.Tua mah bangin Jeremiah’ thubulpi zong Topa Pasian mah teel zawk ding hilh tawntung hi. Topa’ teelsa mite in lampialin pasian tuamtuam bia a om phial zongun, Topa Pasian mah teel zaw-in Topa a zui tinten kumpi pawl khatte’ thu tu kaal sungin i sin ding hi.


SUNDAY        NOV. 15
 MANASSEH LE AMON’ KUMPI SEP SUNG


Thuman thutak in mihing tungah kinga lo hi. “Thuman hi hen” i va cih manin thuman hi lo hi. Amah le amahin thuman a omsa ahi hi. Mihing in ahih leh thuman i nei kei hi. Lamet bei mihing i hi hi. Mihing i hih manin thuman i tel zah ding i tel zo kei hi. Bang hang hiam cihleh mawhnei mi i hi hi. Mawhna tawh kidim ngaihsutna ahih manin thuman ahi bangin i mu thei kei hi. Tuate lakah i etpak dingin, Judah kumpi Mannaseh ( BC 686 – 643) pen hun khat lai-in a siat gamtatte Judah gam sungah lutpihin, mawhna-in mu lo hi.

2Khang. 33 sim in. Kumpi Mannaseh’ siatzia bang pulaak hiam? Tua

sang a thupi zaw in, Pasian in mawhna a maisaknopzia na mu thei hiam?

_________________________________________________________________

_________________________________________________________________

A nakvangah sikkhau nakpheh kivawh banah kol kibulhsa-in Babylon ah salin a kikaih lai hunte phawkkik kha ngel ding hi. Mannaseh in a gamtatnasate kisik takpi hi. Kumpi tokhom tung a tut kik takteh a suksiat na khempeuh puahpha hi. “Ahi zongin a upmawh sangin a siatzawklam amah le amah kiphawk kik hi. Mannaseh a kisik hangin a gamtatna in tampi susia khin ahih manin Judah gam sungah milim biakna tampi kizelkhin hi. Mi tampi in kipuahphat theih nawn loh zah dongin kisia mangkhin uh hi.” Ellen G. White, Prophets and Kings, 383.

Mannaseh in Topa a langpanna lian lua mahmah ahih manin a tapa Amon dong lawhsuk hi. A pa sih khit ciangin Amon in Topa’ mai-ah a sia gamta hi. A pa’ siatna khekhapteng mah zui veve hi (2Khang. 33: 22). A pa sangin suksia zaw lai hi. A pa in a gamtatna kisik a, Amon ahih leh kisik lo hi.

Mawhmai-na ngah taleng, i vawh bangin ki-at veve hi lo hiam? Siatna tungah gualzawh nadingin kamciam bang hong kipia hiam? Mawhna’ guu na thuak ma-in bang hangin tua kamciamte sang lo ding na hiam?

MONDAY                    NOV. 16




KUMPI THAK KHAT


“Thu i nget ciangin bang thute ngen cih kidop huai hi.” I nget ngah khempeuh hong kipia hi leh i kisik om kenteh kici thei lo hi. Israel mite in namdangte bangin kumpi khat deih uh hi. Topa' kiangah kumpi ngen uh a, Topa in kumpi khat pia takpi hi. A kipia kumpi in amau lampialpihin minam bupin siatlawh uh hi. Ahi zongin kumpi khempeuh kisia hi lo hi. Josiah bang kumpi hoih mahmah khat hi.


Kumpi khat in kumpi tokhomah a tut ciangin bang thute kimu thei hiam? 2Khang. 33:25.

_____________________________________________________

_____________________________________________________________________

Democracy ki-ukna ah mipi’ thuneihna thupi mahmah hi. Ahi zongin a taktak ciang tua bang hi pah khol lo hi. Gam sung buai laitakin Amon, kumpi dingin kikoih a, Pasian langpanna, gitlohna pung mahmah hi. Tua bang hun laitakin Topa' tung a citak mi pawl khat in Israel mite' tungah Pasian’ kamciam tangtung takpi mah ding hiam ci-in patau uh hi. “Mihing’ muhna panin Pasian’ kamciamte a mawkna tawh kibat hun om hi.” Ellen G.White Prophets and Kings, 384.

Thuman mi tawmno khatte’ pulaak thute Habbakuk 1: 2- 4 ah kimu thei hi. Kamsangpa in bang gen hiam?

_____________________________________________________

________________________________________________________________________

Pasian in a' mite a thuhilh nadingin Babylonte zang hi. Amaute in Babylon mite’ gitlohna, tatsiatna, ngongtatna, thukham neihlohna cihte thuak uh hi. Tua bangin a thuak ding uh hi masa lo hi. Ahi zongin a kihilh thute nialin kisik lo uh ahih manin, amau’ mawhna mah a thuak uh ahi hi.

Koi bangin mihing’ muhna pan Pasian’ geelnate a tangtung zo lo dingin mu kha zel i hiam? Hih thu in i tel zawh loh thute upna tawh kalsuan ding hong hilh hi lo hiam?

TUESDAY                  NOV. 17



 KUMPI JOSIAH





“Josiah in uk ding a kipatin kum giat pha a, amah in Jerusalem-ah kum sawmthum le khat sung uk hi. Ama nu’ min Jedidah hi a, Bozkath khuami Adaih’ tanu ahi hi. Topa’ mitah amah a manin gamta-in, a pu David’ khekhap khempeuh zui cinten a, themkhat zong pial lo hi ( 2Kum. 21: 1, 2). Hih kammal in Josiah kumpi a suah tawh kisai-in bang pulaak hiam? Lai Siangtho in hih thu tawh kisai tampi hong hilh lo hi. A pu a pate tawh kibang lo-in, Josiah in thuman lampi zuih ding tel zaw ahih manin, Topa in ama kumpi gam kipsak hi.

2Kum. 22 sungah biakinn tawh kisai Josiah’ puahphatna kimu thei hi. Solomon khita kumpite in biakinnpi puah om lo hi. BC 622 ciangin Josiah in biakinnpi a muh ciangin Topa biakna dingin kilawm nawnsa lo ahih manin puah ding kipan pah hi.

Biakinnpi puah dingin ettak ciang, Josiah in bang mu hiam? 2Kum. 22: 3 -7.

___________________________________________________________________________

___________________________________________________________________________


Josiah in sumkempipa' kiangah siampipa tawh kimu ding sawl a, biakinn puah nading van kisam bangbang kaikawm dingin thupia hi. Sum a kipan van kizang khempeuhah amaute in ngeltel takin zeek uh a, muanna tawh vaipuak kipia ahih mah bangin, amaute in thuman citakin nasem pah uh hi.

Biakinnpi puahpha mah na ven, ahih hangin a taktakin amau nunzia kipuahphatna le thaksuahna thupi penpen hi lo hiam? Phil. 2: 3, 8.


WEDNESDAY         NOV. 18            
THUKHAM LAIBU

Biakinnpi puahphatna pen thupi naven, ahi zongin a kisam penpen hi lo hi. Biakinnpi a hoih theithei-in lamin puahin, etlawm hoihsak mahmahin, tuate tungtawnin Pasian in a mite thupha hong pia hi peuh mah lo hi. Biakinn hoih mahmah sungah Pasian bia napi, biakna a piak khit ciang biakinn pualam ah nunlui teng mah tawh nungta kikkik cih thu in, biakinnpi hoih mahmah in hong khel zo lo bek tham lo-in, biakinn hoih sunga a muh thute bangin nunta uh hi kha mai ven cia, cihnop huai phial hi.

Josiah in biakinnpi a puah laitakin bang thu piang hiam? Tua thupiangte Josiah’ muhzia a thupi pen in bang thu hiam? 2Kum. 22: 8 – 11.

__________________________________________________________________________

Biakinnkawm kisia-te lak pan a hi kha tam maw, Moses’ Thukham kigelhna laizial pawl khat niin bulomte lak pan mukhia uh hi.

2Kum. 22: 12 – 20 sim in. Huldah in mite tungah bang thupuak nei hiam? Eite bang hong hilh hiam?

______________________________________________________________________

Huldah in a gen thute Jeremiah in zong tam veipi mah genkhin zo hi. Jerusalem mite in Topa taisanin a sawtlo-in amaute thuak ding gimna le sihna lam manawh uh hi. Topa in Huldah tungtawnin Josiah tungah Jerusalem vut le vai suakin kisia pelmawh ding hi, ci-in genkhol khin hi. Huldah’ thugenna hangin a mawhna uh a kisik hangin, a gamtatna uh thaman tawh kipelh thei tuan lo ding hi. A sep bang bangun ngah kik hamtang ding hi. A gamtatnate khempeuh uh siatna bekbek hi khin ahih manin, Topa in gim a piak hangin, a sawtlo-in a gamtat ngei-na mah uh zui kik veve ding uh hi. “Tua ciangin amaute kiangah “ Israel Pasian, Topa in hih bangin ci hi. “Kei kiangah note hongs awl mipa kiangah gen un. Topa in hih bangci hi: En un, hih lai mun le a tungah a tengte tungah Judah kumpipa in laibu sung a a sim siatna thute khempeuh ka tungsak ding hi. Bang hang hiam cihleh amaute in kei hong nusia-in pasian dangte tungah paknamtui hal uh a, amau khut tawh a bawl milimte tawh kei hong hehsak uh ahih manin hih mun tungah ka hehna so ding a, ka hehna dai lo ding hi (2Kum. 22: 15 – 17).

THURSDAY                 NOV. 19
 JOSIAH’ BAWL KIPUAHPHATNATE


Topa in Jerusalem’ thuak ding gimnate genkhol hi. Josiah in Topa’ muhna ah a hoihnate sem dingin a lungsim khensat hi. Gimna tawh kipelh thei lo ding uh hita zongin, Topa Pasian in Jerusalem khua mite a kisik ding uh ngak keeikaai lai hi. Gimna thuak ding uh hi mah taleh Pasian in hehpihna tawh kidimin, mawhmaisak Pasian hi, ci-in Josiah gen tawntung hi. Ellen G. White, Prophets and Kings, 400.

2Kum. 23: 1 – 28 sim in. Siatna tawh kidim Judah gam puahphat nading Josiah in bang thu genbelin nei hiam? Pasian’teelsa Judah gam a siatzia bang pulaak hiam?

____________________________________________________________

____________________________________________________________________

Topa Pasian tawh thuciam bawl dingin Josiah in Jerusalem ah a mite kaikhawm hi. A kimukhia Moses’ Thukham Bu simkhia uh a, Topa’ thupiak bangin nungta dingin kiciam uh hi. Hih kipuahphatna ah kumpipa kia bek hi lo-in, vaipuak kipia makaite tawh mapangkhawmin nasem hi. Namdangte’ pasiante le nate biak dingin Jerusalem biakinn sungah koih uh hi. Tua banah, guallelh man leh namdang kumpite koihsak zong om hi. Tua nate biakinnpi sungah kikoih ding hi lo ahih manin Josiah in biakinnpi sung panin tua nate khempeuh hemkhia hi. Paisan Pawi a bawl uh ciangin a innkuan ciat ah a bawl ngeina uh hi. Ahi zongin tu-in Josiah in gambupin bawl ding thupia hi. Nun lui khempeuh paisanin nunna thak tawh nungta-in saltanna Egypt gam pan honkhia-in a khapsa gam ah a tunpih Topa Pasian, nisim in amaute a makaih tawntung Topa tung bekah citakin ama’ na bek sem dingin kiciam uh hi.

Gambupin Paisan Pawi a bawlkhop ngeingai-na a thupitna in bang hiam cihleh nunlui khempeuh bei ding hi ta hi, cih pulaak hi. Tuhun aa SDA thu-um mite aa dingin Paisan Pawi in bang manphatna nei hiam? 1Kor. 5:7 sim in.


FRIDAY            NOV. 20
 SIMBEH DING: Josiah’ makaihna tawh kibawl kipuahphatna in bang zahin Judah gam in siatna tawh kidim cih pulaak hi. Bangci bangin tua zahin Judah gamin siatna tawh kidim mawk hiam? Bang hangin siatna tawh kidim uh hiam? Mawhnei mi ahih manun siatna tawh kidim uh hi. 1960 kim pawlin Yale University ah mite’ ngaihsutna bang zahin sia hiam, cih kankhiatna ding kim khat electric shock piak dingin inn sung khatah mi pawl khat tokhom tungah tusak uh hi. A lang khat ah mi pawl khat mah om sak uh hi. Electric shock kipia dingte kiangah tu’n damdamin electric shock kipan ding a, a tha khauh semsem ding hi, ci-in a kizaksak khit uh ciang, lau cih takin lau-in “hong hon un” ‘hong hon un” ci-in, awnggawp uh hi. A taktakin electric shock kipia peuh mah lo napi, ngaihsutna uhah, lectric shock kipia-sa uh ahih manin tua bang awng gawp uh hi zaw hi. Mihing in bang mah lopi khat a lauhuai mahmahin ngaihsun hi. Bang mahin kimang kei, i cih khak mite in siatna lianpipi piangsak thei zel uh hi lo hiam? Bang hang hi ding hiam? Mawhnei mi i hih hang mah hi lo diam?

KIKUP DING DOTNATE:

1. Puahpha pa Josiah tungtawnin Topa Pasian’ kammal, Lai Siangtho in eite nuntak nadingin a manphatzia koi bangin na tel hiam?

2.  Gimna, siatna tawh kipelh tuan lo ding ihih manin, bang hangin kisikna, kipuahphatna le thaksuakna cihte kisam veve hiam? Tuate in bang ngimna nei hiam? Tua bang kipuahphatna in gam bup mi honpi sangin mimal nuntakna hong puahpha zaw hi lo hiam? 

To get the latest update of me and my works

>> <<