MUC

Print Friendly and PDF

Tuesday, September 15, 2015

LESSON 7 NOV. 7 – 13 BUAI-NA KIZOM SUAKLAI

LESSON 7     NOV. 7 – 13

BUAI-NA KIZOM SUAKLAI



SABBATH NITAK: TU KAAL SUNG SIM DING: Jer. 9; 10: 1- 5; 26; Rom.1: 25; Sawl. 17: 30; 5: 34- 41.


KAMNGAH: “A kisatheite in, keimah, leitungah migitna, thuman le thutang a zang ka hihna le tuate sungah nuam a sapa ka hihna thu hong theihna uhah kisathei uh hen. Topa in hih thu kong gen khin hi,” a ci hi (Jeremiah 9: 24).

Jeremiah in gimna le langpanna tawh kipelh ngei lo hi. Jeremiah Pasian in itna tawh a mite thuhilh manin mite’ bawlsiatna thuak den hi. Jeremiah’ vauhilhnate ngai uh hi leh, bang a ci zentam uh! Kisikin Topa kiang zuan uh hi leh, gimna tawh kipelh ding uh hi ven. Kisik hun kipia lo lah hi lo! Milim tuamtuam a biak khit uh hangin hehpihna kongkhak a mai uah honsa-in kikoih a, va lutziau ding bek hi tang hial! Tua nangawn ut lo lai uh, nial lailai zen ve uh aw! Tu-in amau’ nunzia i ngaihsut ciang, hawmthawhin mawhsak kha pial mai thei ni . Hi phial taleh, “ leitung beikuan hun sungah a om eite’ aa dingin hih thupiangte i etteh ding thu hi a, eite hilhkholh nadingin lai sungah a kiciamteh ahi hi”(1Kor. 10: 11). Eite aa ding kigelh hi-a, amaute’ tuah thute panin bang thu na nuntakpih diam?

SUNDAY  NOV. 8

A KISATHEI MI IN ……. KISAKPIH  TA HEN


Jeremiah 9 sungah Judah mite le a leitang in a thuak ding gimnate’ hangin Jeremiah’ dahna kipulaak masa pen hi. Topa in Jerusalem khuapi kisiat ding a genkholh mah bangin, tangtung takpi a, khuahun zui-a siatna mawkmawk hi lo-in, amaute’ lungkhuahna hangin Topa’ thukhenna thuak takpi uh hi. Jerusalem khuapi le a mite’ thuak gimna hangin Jeremiah in dahna tawh kidim hi. Siatna hangin Pasian’ lungtang a sukha themno khat Jeremiah aa dingin lungsim kitapkhapna lianpi suak hi. Bang zahin mawhna in Pasian’ lungsim nasak Singlamteh in pulaak hi. Thuman lampi pan lampialin, gitloh gamtatna a kipan Pasian’ hong sapna bangin a nungta lo nunna in Pasian’ lungsim nasak hi. Judah mite in Pasian tawh kigamlat uh ciangin gimna tuak zel uh a, galte’ khelbawlna, simmawhna, sihna cihte tuak uh hi. Topa in amaute a muh ciangin hehpihin khasiat hi. Topa in Israel’ gimthuakna a thuakzo nawn kei hi. Topa in Ama itna le a hehpihna tawh amaute honkhia a, Amah in a beisa hun khempeuhah amaute hoihtakin a kem hi (Thk. 10: 16; Isa. 63: 9). Ellen G. White, Education, 263.

Jer. 9 sim in. Aneu 23, 24 sunga thute Jeremiah’dahnate ciamteh in. Bang hangin tuhun dong tua thute in mannei hiam?

_____________________________________________________________

_______________________________________________________________________

Sihna ah mihingte in kulh nei lo khuapi tawh kibang hi. Pilna, vangliatna, hatna cihte in hun le mun tawh kizui-in mannei mah taleh, sihna tawh kipelhsak thei lo hi. Hehpihna nei ding, thuman ding le Pasian’ dikna zuan ding ahi hi. Leitung nate in lametna hong pia thei lo ahih leh, Topa’ hong thuhilhte simloh belhtaak cing bang om nawn diam?


Singlamteh in Pasian’ dikna, a thumanna le hehpih itna bangci pulaak hiam?


MONDAY  NOV. 9




PIANSAKNATE MAW PIANGSAKPA?







Namdangte in piansak nate bia-in a man lo thute zui uh hi. Pasian’ mite in ahih leh, tua bangin a nungzui lo dingin sapna ngah mite ahi uh hi. Judah mite in namdangte' biakna a zuih pih loh nadingun Moses in zong limtakin hilhkhol khin hi. Israel mite in namdangte' tungah Piangsakpa le Honpa a kilangsak dingin sapna ngah mite ahi uh hi. Ahi zongin Topa’ lamlah bangin kalsuan nuam lo uh hi.

Jer. 10: 1- 5 sim in. Topa in a mite' tungah bang gen hiam? Tua bangin tu hunin pulaak hi lehang, koi bangin a kipulaak diam?

_____________________________________________________

____________________________________________________________________

Jeremiah in a mipihte' theih ding a kilawm thute pulaak hi. Namdangte’ pasian in bangmah man lo hi; mihingte’ bawltawm pasian hi. Jeremiah nung kum zalom tampi khit a nasem Paul in zong hih thute mah pulaak hi. “ Amaute in a man Pasian’ thu um nuam lo uh a, a tawntungin phat dingin a kilawm a Piangsakpa bia lo-in, Pasian’ bawlsa nate bia-in a zui uh hi” (Rom. 1: 25). Paul in piansak nate le nate a Piangsakpa kibat lohzia pulaak hi. Jeremiah in zong hih mah gen hi. Bawltawm pasian sangin a man Pasian tehtheih ding hi lo hi. Tua bang pasiante belhtak a cin lohzia kamsangpa in a mite hilh tawntung hi. Nate Piangsak Pasian in nate bawl hi bek lo-in Ama vangliatna tawh na khempeuh cingin kem hi (Heb. 1: 3).

Nate bia dingin zia-etna sungah i lut khak loh ding kidop huai hi. Thukhen ni ciangin siatna pan hong honkhia thei lo nate muanna le suanin kinei kha baih mahmah hi.

Bangci bangin muan loh dingpi i muan khak loh nadingin kikem thei ding i hiam?



TUESDAY       NOV. 10
KISIK DINGIN SAPNA AW

Jer. 26: 1- 6 sim in. Topa in mite tungah bang lametna guan hiam?

____________________________________________________________

____________________________________________________________

Judahte' tungah a piak lametna mah mi khempeuh tungah a kipia hi. Hih thumah Lai Siangtho’ gen thubulpi hi. Mawhna kisikin a, Topa' kiang zuanin a hong hotkhiatna muan ding ahi hi.

Eze. 14:6; 2Khang. 6: 37 – 39; Matt. 3: 2 Lk. 24: 47; Sawl. 17: 30 sim in. Bang thupuak pulaak uh hiam?

____________________________________________________________

_________________________________________________________________

Judah mite in Topa’ maipha ngah ding kilawm lo hi mah taleh, Topa in amaute nungngat ngei lo hi. Pasian in namdangte' lakah Ama khuavak dingin Judah mite mah sawl veve hi. Pasian’ zia le tong nei lo mah taleh, Topa’ vangliatna in amaute taisan lo hi. Topa' kiang zuan dingin Topa in a kamsangte khat khit khat sawl a, “na mawhna panin kihei-in siatna nusia un,” ci-in hilh den uh hi (Jer. 25:5). “ Note khempeuh kong suksiat khak loh nadingin ka min ka ngaihsutna tawh ka hehna diahin, keimah hong kiphatna ka ngaihsutna-in note' tungah ka ki-ip hi. Keimah ka kikhualna, keimah ka kingaihsutna-in hih bangin kong hih hi. Bang hang hiam cihleh ka min a siat ding kilawm ahi hiam? Midang khat tungah keima minthanna ka pia kei ding hi,” ci-in Topa in pulaak hi (Jer. 48: 9, 11). Ellen G. White, Prophets and Kings, 319.

Lai Siangtho in mi khempeuh mawhnei mi hi, ci hi. Mawhnei mi i hih manin mawhna’ daan thuak ding i hi hi. Ahi zongin Khrih in Singlamteh tung a hong sih manin Pa Pasian in mawhna’ daan pan suahtakna lampi hong sialsak hi. Mawhna tawh kidim i hihlam phawk ding kisam hi. Kilawm lo pimahin upna tawh Khrih’ dikna i ngah thei hi. Mawh i hih manin kisik kul hi. Kisikna man in mawhna nusia-in Pasian hehpihna sungah a khangto nuntakna ahi hi.


Bang bang siatna tawh a nungta hi mah ta lecin na mawhnate kisik-in mawhmai-na na ngah thei hi. Lungdamna Thu in lampi hong honsak khin hi. Tu-in bang mawhna kisik ding nei lai na hiam?

WEDNESDAY            NOV. 11



SINNA DINGIN SAPNA AW


Mihingte lungkhauhin, Topa' thupiakte nuntakpih nuam lo hi. Judahte' tungah Jeremiah’ thupuakte in lametna tawh kidim hi. Kisik hi le-uh, Topa tawh a thuciamna tungtawnun a tung ding gimnate tawh kipelh thei ding uh hi. Topa’ thu mang hi le-uh Topa’ciamsa bangin thupha ngah ding uh hi. Pasian in amaute' mawhna maisakin, amaute’ natna damsak ding a, a gam a leitang uh cidamin a gam uh kibawlpha ding hi. Tua bang mahin Khrih’ sihna hangin mawhmai-na le kipuahphatna i ngah thei hi. Bangzahin lametna tawh kidim hiam? Koi bangin Jeremiah’ thuhilh kidawng kik hiam? Jer. 26: 10, 11.

_______________________________________________________________________

_______________________________________________________________________

Israel mite hun lai-in a tamzaw thukhente’ thukhenna tawh thukhen zum bek in sihdaan pia thei hi. Siampite le kamsang dangte in Jeremiah sihdaan piak dingin thu bawl uh hi. Migilo pa, kumpi langpang pa hi, ci-in a man lopi-in mawhsak uh hi. Koi bangin Jeremiah in tua bang kimawhsaknate dawng kik hiam? Jer. 26: 13 – 15.

____________________________________________________________________

____________________________________________________________________

A nuntakna bei lawh ding ciang dong langpanna a thuak ciangin Jeremiah zong patau veve sam ding hi. Ahi zongin a gen ding thute khiamtuan lo hi. Topa’ sawl bangbangin sit nei lo-in pulaak ngiatngiat hi (Jer. 26:2). Hingim kisa-in a suah ni a samsiat khak hangin Topa muangin, Topa’ thupiak bangin thuman thutak aa dingin nungta hi.

Na nuntakna lauhuai zah dongin Jesuh Khrih sungah na thuman ngei hiam? Tua bangin a thuman lo khat na hih khak leh, bang kisam lai na hiam?


THURSDAY   NOV. 12



JEREMIAH’ SUAHTAKNA






Bangbang lau-na, dipkuatna a phut khak hangin Topa a' dingin Jeremiah in kiptakin nungta veve hi. Kumpite, uliante in gimna tawh kipelh nadingin, mawhkisik un, ci-in Jeremiah in hangtakin hilh ngam hi (Jer. 26: 15). Jeremiah in thahna thuak takpi leh, mawhnei lopa' sihna amau' tungah kingen ding hi.

Jer. 26: 16 – 24 sim in. Koi bangin Jeremiah in sihna pan suahta thei hiam?

_____________________________________________________

__________________________________________________________________

Siampite, upa makaite in mi gilote a thuhilh ding, thuman lote a thuman dingin a makaih ding le a hilh ding uh sangsikin, thuman pulaak Jeremiah langpan zaw sop uh hi. Jeremiah ma-a nasem Micah hun lai-a mite in kisikin kikhel thei uh ahih manin siatna tawh kipelh uh hi. Ahi zongin mite in a gam uh a hutnopna-un Jeremiah thah ding sawm uh hi. Siampite, makaite in bangbangin Jeremiah a mawhsak uh hangin, Jeremiah khial lo hi. Amaute’ hehna khang semsem a, Jeremiah sih nading bek vaihawmta uh hi. Dum sung pan a kihotkhiat hangin lungnuamin om hithiat cih bang ngah thei tuan tuan lo hi.

Kamsangte’ tuah thute' tungtawnin mi kim khat in kipuahpha thei uh a, pawl khatte ahih leh, kilamdanna-in nei tuan lo uh hi. Khrih’ gen thute nialin, Pharisee Gamaliel le biakna makaite in Thu-um mite bawlsia uh hi.

Sawl. 5: 34 – 41 sim in. Jeremiah’ thuakna tawh kibang bang thu pulaak hiam? Mite’ phutkhak thute' tung panin bang na nuntakpih diam? Khat ii khialh khak thute panin pilna ngahin na khialh khak loh ding thupi mahmah lo hiam?

FRIDAY          NOV. 13
 SIMBEH DING: Khrih in a nunna hong pia ahih manin hong it takpi hi, cih i thei hi (1Jn. 3: 16). Singkung lopa, ganhing vasate le piansak na khempeuh, mihing khat le khat kizopzia-te in Pasian’ hong itna pulaak hi. Mawhna in leitung a siatsak khit hangin Pasian’ hoihna i mu thei lai veve hi. Singlamteh tungah Khrih’ sihna sangin Pasian in a hong itna a lahkhiatna ding dang om nawn lo hi. Pasian takpi mihingin hong piandongin kiniamkhiat a, sihna thuak sawnsawn Pasian in sit nei lo-in hong it hi. SDA Bible Commentary, Vol., 7, 924.

Jesuh Pasian in “Ka Pasian, ka Pasian, bang dingin hong taisan na hiam ( Matt. 27: 46), ci-in kiko hi. Hih kiko-na thu in eite a hong kihotkhiat nading a kipiakkhiatna hong lak hi. Mawhna hangin Topa’ thuak gimna le sihna thu hong lak hi. Tua hangin Pasian in eite hong it masa ahih manin eite in zong Amah a it thei i hi hi (1Jn. 4: 19). Huaiham angsung bek zongin a nungta hi mah taleng Pasian' itna i nei thei veve hi. Pasian’ hong itna a khaktan zo om lo hi.

KIKUP DING DOTNATE:

1.     Singkung lopa, ganhing, nate i biak loh hangin Pasian bangin bang nate kibia kha zel hiam?

2.     Mawhna kisika Khrish a um hi hangin, Khristian’ nuntakna ah mawh kisikna in bang dinmun nei hiam?

3.     Singlamteh tunga Khrih’ thuakna hangin Pa, Tapa le Kha Siangtho pumkhat hi kimlai, kikhenthang uh hi, cih thu ngaihsun kik in. Bang zahin mawhna sia hiam? Mawhna hangin bangzah kisuplawh hiam? 


To get the latest update of me and my works

>> <<