MUC

Print Friendly and PDF

Tuesday, September 15, 2015

LESSON 11. DEC. 5 – 11 “THUCIAM”

LESSON 11. DEC. 5 – 11 

“THUCIAM”


SABBTH NITAK: TU KAAL SUNG SIM DING: Pian. 9: 1 – 17; 12: 1 – 3;Gal. 3: 6 – 9, 15 – 18; Pai. 24; Jer. 31: 31 – 34; 1Kor. 11: 24 – 26.

KAMNGAH: En un, Topa in kong cihin-ah, Israel minamte le Judah minamte tawh                              thuciamna thak khat ka bawl ni hun hong tung ding hi.” Jeremiah 31:   31.

Thuciam cih kammal kizatna tuamtuam a om hang (Rom 9: 4; Gal. 4: 24) thuciam in hehpihna thuciam khat bek mah siksan uh hi. Hehpihna thuciam i cih in Pasian in mawhnei mite a hong hotkhiatna, upna tawh tua a hong hotkhiatna i ngah hi, cih pulaak hi. A mun le a hun tawh kizui-in Pasian in tua hotkhiatna pulaak hi. Tua hangin thuciamte ci-in a kipulaak ahi hi. Adam tawh thuciam (Pian. 3: 15), Abraham tawh thuciamna (Pian. 12: 1-3; Gal. 3: 6 – 9), Sinai thuciam (Pai. 20: 2), David thuciam (Eze. 37: 24 – 27) le thuciam thak (Jer. 31: 31 – 33), a vekin kibang hi. Piak dinga kilawmlopi mah Pasian in hotkhiatna hong piakkhong hi; ngah dingin zong i kilawm beek kei hi. Tua hi-in mihing in tua hotkhiatna tungah cihtakna, thumanna kisam hi.

Thuciam Thak cih kammal Jeremiah in pulaak masa pen hi. Judah mite saltang uh hi mah taleh, Topa kiang zuat kik theih nading, lametna le kiciinna om thei lai veve hi, cih Topa in pulaak hi.Saltanna pan ciah kikin Pasian' thupha piak mite hi.

SUNDAY        DEC. 6



MI KHEMPEUH TAWH PASIAN IN A THUCIAM




Leitung pen kisia mahmah hi. Tua pipi mah Topa Pasian in nusia lo hi. Noah tuiciin tun lai-in, leitung in tui tawh suksiat dongin siatna tawh kidim ahihzia hong phawksak hi. Pasian in nuntakna a kem dingin thukham koih a, tua thukham kipalsat manin siatna, mawhna hong om hi. Mihing in gitlohna awlmawh lo hi. Thuman diktatna kituancil hi. Kinengniamna vive cihte tawh leitung kidim hi. Mihing’siatna in vantung dong tungto hi. Ellen G. White, Patriachs and Prophets, 91.

Pian. 9: 1 – 17 sim in. Pasian le mihing kikaalah bang thuciam om hiam? Koi bangin Pasian in a bawlsa nate a hehpihzia kilangsak hiam?

____________________________________________________

__________________________________________________________________

Pasian in Noah tawh a bawl thuciam in minam khempeuh bek hi lo, ganhing, singkung lopate le a kipiangsak na khempeuhte tawh a thuciam ahi hi (Pian. 9: 12). Hih thuciam in mihing' tungah kinga lo hi. Mihing' tung pan a hong khal cih zong om lo hi. Tuiciin in leitung susia nawn lo ding hi, cih thuciam hi ziau hi. Thuciam dangte tawh kibang lo-in, mihing tavuan bang mah om lo hi. Tuiciin in leitung susia nawn lo ding hi. Tuiciin om kik hi leh, sakhituihup i mu nawn kei ding hi. Leitung in siatna tawh kidim mah taleh, Pasian in leitung itin hehpih veve hi, ci-in sakhituihup in pulaak hi. Sakhituihup in etlawm mahmah taleh, tua in lametna hong pia hi lo-in, Pasian' kiang pan hong pai thute le a kisia leitung a hong itna hangin lametna nei ihi zaw hi.


Sakhituihup a hoihzia ngaihsun in. Lai Siangtho’ hong hilh bang mahin, leitung nate hong piak theih loh, bang thute in Pasian kiang hong tunpih hiam?

MONDAY                      DEC. 7
ABRAHAM TAWH THUKIMNA


Pian. 12: 1- 3; 15: 1- 5; 17: 1- 14 sim in. Topa in Abraham tawh a thuciam tungtawnin bang sepkhiat ding nei hiam?

_________________________________________________________________________

_________________________________________________________________________

Abraham tawh thuciam in hehpihna thu hi-in, hotkhiatna thu tawh kikhenkhia thei lo a thugil mahmah khat ahi hi. Tua hang mahin Paul in, “tua hotkhiat ding kamciam Jesuh Khrih in tangtung sak hi,” ci hi.

Gal. 3: 6 – 9, 15 – 18 sim in. “Upna tawh Pasian’ hong hotkhiatna kingah hi,” cih thu in Abraham le Pasian a thuciam in koi bangin kizom hiam, ci-in Paul in hilh hiam?

______________________________________________________________________

______________________________________________________________________

Abraham‘ suan le khak tampite lak pan Jesuh Khrih tungtawn bekin (Gal. 3: 16) leitung mi khempeuh in hotkhiatna ngah ding hi.Abraham in Pasian umin, ama gamtatna hang hi lo, a upna tungtawnin midik hihna ngah hi (Gal. 3:6). Mi khat peuh in Khrih a upna tawh Abraham’ suan le khak hi; Abraham’ Pasian zong amau Pasian hi ding hi (Gal. 3: 19). Singlamteh tunga guta pa zong Abraham mah bangin midikin kiciamteh lo hi. A tawntungin Pasian’ hehpihna bek mah in midik hih theihna lampi hi. Abraham in a kamciam tangtun hi. A kicin man hi lo, zong kicing bek lo, ahi zongin thumang hi. A thumanna in hotkhiat ding kamciam upna pulaak hi. Ama sepna in dikna ngah nading hi lo hi; diktangsak lo hi. A sepna pen diktang khin ahihlam pulaak hi. Hih in thuciamna’ laigil hi-in, a um mi’ nuntakna ah a kimu thei upna ahi hi (Rom 4: 1- 3).

Upna tungtawn bekin Khrih’hotkhiatna le Ama dikna hong kipia hi, cih thu lian mahmah ngaihsun in. Nang sihtangin hong si Khrih’ hong piak a lian mahmah lametna le nuamna hi lo hiam?



TUESDAY                    DEC. 8
 SINAI-AH THUCIAM


Bangci bangin Sinai mual ah Pasian le Israel mite in thuciam kibawl hiam? (Pai. 24)

__________________________________________________________________

__________________________________________________________________

Moses le makai pawl khat Sinai mual ah kahto uh hi. Makaite lakah siampite’ aitangin Aaron le a tate zong kihel hi. Thukhente, makaite le Israel minam bup aitangin upa 70 kahto uh hi. Moses tawh a paikhawmte in Moses tawh kigamlatna mun khat ah khawl uh hi. Ahi zongin Topa tawh kimu dingin Moses kia bek kahbehto hi. Moses hong kumsuk kikin, minam khempeuh tawh thukimna bawl la phot hi. Pasian in amah a hopihlam mipite hilhcian hi. Tua khit ciangin mipi in “Topa’ gensa thute bangin ka sem ding uh hi” ci uh hi (Pai. 24:3). A beisa hun le tuhunin “Pasian’ thu zui mi mah ka hi,” a ci mi le Topa tungah ki-apin upna tawh a nungta mi om hi. Hehpih ngah nadingin hihte nih’ dinmun kibang lo hi.

Heb. 4:2 sim in. Israel mite’lampialna tawh kisai bang hong hilh hiam? Koi bangin amaute’ khialhna bangin khial kik lo thei ding na diam?

______________________________________________________________________

______________________________________________________________________

Upna bek mah tawh Topa’ hong thuciamte muangin, upna mah in hong thumangsak a, citakin Topa’ thupiak nungtak pihna pen thumang taktak hihna kidawk hi. Tua bangin thumanna pen Moses Thuciam tawh kitukalh lo hi. Paul in amah a langpangte tungah a thuhilh a telkhial mite in Thukham le Moses Thuciam kilangdo-in ngaihsun uh hi. Paul’ langpangte in upna thu-ah thukham le thukham zuihna bulsak uh hi. Paul in Khrih le Khrih’ dikna bulphuh hi.

Topa’thupiak khempeuh ka zui ding hi, ci napi, a zui lo mi, na tuak ngei hiam? Hih bang mite in hehpihna kisam mahmah hi lo hiam? Hehpihna lo-in lamet dang na nei hiam?

WEDNESDAY            DEC.9
THUCIAM THAK: KHEN KHATNA


Jer. 31: 31 – 34 sim in. Jeremiah hun lai hi taleh, tuhun aa dingin bang deihna nei hiam?

____________________________________________________________

_______________________________________________________________________

Babylon mite in Judah mite do ding hi ta, Judah mite salin kai-in a manthan ding nai mahmah laitakin Jeremiah tungah Topa’ thu hong tung hi. Lamet bei-in a om laitak mahin Topa in lametna guan hi. Topa in amaute tawh a Thuciam pulaak kik hi. Saltanna gam panin a ciak kik mite' tungah Topa in a thuciam bangin amaute' tungah tangtungsak ding hi. Sinai mual tunga Topa tawh a thuciamte a palsat manun tu-in saltaang ahih hangun, tua thuciamte phawk kikin Topa zuan kik dingin kamsangte thupia hi (Jer. 31: 32). Sinai muala thukham bang mahin thuciam thak in Topa tawh kizopna thuciam ahi hi. Tua Thuciam Thak pen Thukham Sawm bang mahin suangpek tungah kigelh hi nawn lo ding a, amaute’ lungtang tungah kigelh hi ta ding hi.

Suangpek tungah Thukham Sawm a gelh Kha Siangtho mah in tu-in amaute’ lungtang tungah gelh ding hi. Dikna ngah nading amau le amau hanciamtawm hi nawn lo ding uh a, Khrih’ dikna kipia ding hi. Ama sisan in mawhmaisak hi. Ama thuma’nna ei aa dingin hong kiciaptehsak hi. Tua ciangin lungsim a thaksak Kha Siangtho in i sung panin Kha Siangtho’ gah hong gahkhia-sak ding hi. Khrih’ hehpihna in a thupiakte i lungtang tungah hong gelh ding a, Ama deih bangin i nungta thei ding hi. I sungah Khrih hong nungta ahih manin Ama nunzia bangin hong nungtasak ding hi. Ellen G. White, Patriachs and Prophets, 372.

Thuciam Thak in mawhna khempeuh maisakin, Topa theihtelna tawh nungta ding uh a, Kha Siangtho’ vangliatna tawh Pa Pasian’ thupiak bangin hong nungta-sak hi. Thuciam Lui-in limciinna hi-in, thuciam thak in limciinnate’ tangtunna ahi hi. Thuciam thak in upna tawh hotkhiatna i ngah thei hi, cih hong hilh hi. Kha Siangtho’ gah in tua upna kilangsak hi.

THURSDAY   DEC. 10



THUCIAM THAK: KHAWK NIHNA


Jeremiah’gen thuciam thak in thu nih pulaak hi. Khatna ah, Israel mite saltanna panin Judah gam a ciah kik nading uh, nihna ah, Jesuh’ nasep, Messiah hong sihna hangin mihing in Pasian tawh kizopna thak a kipsakna thu pulaak hi. Thuciam Thak in hotkhiatna kicing hong lak hi. Tua in limciinna khempeuh a tangtunna ahi hi.

Luke 22: 20; 1Kor. 11: 24 – 26 sim in. Koi bangin Jeremiah’ genkholh thute tawh kizom hiam?

_____________________________________________________

___________________________________________________________________________

Khomun in Khrih’ pumpi limcing hi. Paisan Pawi tuuno in Khrih pumpi limcing hi. Lenggahtui in Khrih sisan limcing hi. Jesuh nasep in kamsangte hun pek pan a kipan ahi hi. Nekkhawm in hotkhiatna pulaak hi. Paul in Khrih’ hong sihna i phawk ding bek hong hilh hi kei a, a hong kum kik ding zong pulaak hi. Khrih hong pai kik lo ding hi leh, na khempeuh a mawkna suak ding hi. Khrih nihna veina hong pai kei leh, mihingin a hong pianna a mawkna suak ding hi (1Thess. 4: 16; 1Kor. 15: 12 – 18). Tua manin Khrih in “ Ka pa gam sungah note tawh a thak a ka dawn khawm mateng, tu-a kipan lenggahtui ka dawn nawn kei ding hi” ci hi (Matt. 26: 29). Khrih a hong pai masak le nihvei a hong pai kik ding, hihte gel in kizom mahmah hi. Nihvei a hong pai kik ciang bekin a hong pai masakna kicing ding hi pan hi.

  
Nekkhawmah na kihel ciangin Khrih in Pa Pasian’ gam tung tun mateng a nek nawn kik nawn loh ding kamciam ngaihsun in. Khrih in eite tawh kizopna a lunggulhzia na phawk hiam?

FRIDAY          DEC. 11
 SIMBEH DING: Pasian in “tui tawh leitung ka susia nawn kei ding hi,” ci-in thuciam hi. Sakhituihup in tua thuciam limcing hi. Ni in tuitaakte a kap tak ciang sakhituihup hong piang hi. Sakhituihup sungah proton, quark cihte om hi. Hih nate in Pasian’ thuciam pulaak uh hi gige hi. Koi bangin na piang hiam cih i tel loh hangin piansaknate in i tel loh thupi pulaak uh hi. Pasian in nate a bawlzia mihing’ pilna in kankhia zo lo hi.Mihing in a bat zawh ding hi lo hi. Tua hi mah taleh, nate in Pasian le leitung kikaal a thuciamte pulaak uh hi.

KIKUP DING DOTNATE:

1.      Leitung mipilte (scientists) in a pulaak theih loh Lai Siangtho thuman thutak tampi om a, tuate lak pan bang theihhuai pen nasa hiam? Leitung’ pilna in pulaak thei lo ahih leh, bang in pulaak thei ding hiam?

2.      Hotkhiatna thu tawh kisai-in upna le gamtat ( zuihna) kizopzia ngaihsun in. Upna in bang dinmun nei-a, gamtatna in bang dinmun nei hiam? Koi bangin kizopna nei hiam?

3.      “Lungtang tungah Thukham kigelh” cih thu in bang a cihna hiam? Hih thu in Thuciam Thak, Khrih hong sih khit nungah zong Thukham kip tawntung hi, ci-in koi bangin hong hilh hiam?

To get the latest update of me and my works

>> <<