MUC

Print Friendly and PDF

Tuesday, September 15, 2015

LESSON 10 NOV. 28 – DEC. 4 JERUSALEM KISIATNA

LESSON 10          NOV. 28 – DEC. 4

                JERUSALEM KISIATNA


SABBATH NITAK: TU KAAL SUNG SIM DING: Eze. 8; Rom. 1: 22 – 25; Jer. 37: 1- 10; 38: 1- 6; 29: 1- 14; Dan. 9: 2.


KAMNGAH: “Note salin kong koihna khuapi’ phattuamna ding bawl unla, tua khuapi a dingin Topa’ tungah thu ngetsak un. Bang hang hiam cihleh tua khuapi in phattuamna ngah leh no zong phattuamna a ngah mah na hi uh hi.” Jeremiah 29: 7.

A sawt lo-in Babylon mite zangin Pasian in Judah mite tungah a hehna tungsak ding hi. Nebuchadnezzar ‘ galkapte in Jerusalem khuapi vil thapaai-in umcih ding uh hi. Galkap a za a za-in kuan masa uh a, tua khit ciang, tul za lomin kuan uh hi. Shinar gam dongah Jerusalem khua mite salin kai uh hi. Jehoiakim, Jehoiachin, Zedekiah kumpite in Babylon’salin om uh a, amau mah in Babylon kumpite a langdo ding amaute mah hi. Topa a langdo mite in siatna thuak semsem ding uh a, kibawlpha thei nawnlo-in kisia maimang ding uh hi. Jerusalem le Solomon in a lamh biakinnpi kisia-in vut le vai suak ding hi. Ellen G. White, Prophets and Kings, 422, 423.


Judah mite’ thuak gimnate in amaute tungah kigenkhol lo hi lo hi. Jeremiah a kipan kamsangte in a mawhna uh kisikin Topa kiang zuan ding pulaak tawntung uh hi napi, amaute kikhel nuamlo-in, kamsangte langpan den uh ahih manin kisia uh ahi hi. Amau bangin i khialh khak loh dingin amaute kisiatna tungtawnin pilna i ngah thei hi.

SUNDAY          NOV. 29
TAMMUZ AA DINGIN KAHNA


Jeremiah in thuman aa ding a nungta amah kia bek a kisak hun om hi. Ahi zongin amah kia bek hi lo hi. Topa Pasian in Ezekiel sawl hi. Ezekiel zong saltang khat hi-in, a lungkia mite lametna guan ding, Jeremiah tungtawnin Topa’ gen thute mah a pulaak dingin kisawl hi. Babylon saltanna tawlno khat sung bek hi ding hi, ci-in a gen kamsang zuaute’ genkholhna man lote a pholak dingin kisawl hi. Ezekiel in zong limciinna tuamtuam zangin, kihilh hi mah taleh thumang lo mite’ thuak ding gimna le Jerusalem kisiat ding mah hilhkhol hi.

Ezekiel 8 sim in. Bang kilak hiam? Bangzahin ngei-na in hong huzaapin, upna kisiasak thei hiam?

_______________________________________________________________________

_______________________________________________________________________

Moses a kipan kamsangte in milim le pasian tuamtuamte biak lo-in a nungta tawntung Topa Pasian bek mah biak ding hi, ci-in hilh tawntung uh hi mahta leh, Topa’ mite in amah nungngatin taisan veve uh hi. “Tammuz aa ding taamlawhna” cih pen Mesopotamian pasian tungah dahkawma biakpiakna-in kisa la ahi hi. Hih thu hang mahin “a makai siampite le mi khempeuh zong tua bangmahin citak lo mahmah uh a, minam dangte’ kihhuainate a zui uh hi.” (2Khang. 36: 14).

Ezek. 8: 12 ngaihsun kawmin sim in. ‘ Inn’ cihna munah lungsim a cihna hi zaw ding hi. Inn dim a milim om cih sangin, a lungsim khempeuh uh milim, pasiante' tungah ki-ap cihna hi zaw hi. Pasian in amau’ gamtatnate a mu lo bangin kingaihsun uh hi; Topa in amaute taisan hi, ci-in gen uh hi. Bangbangin i gamta zongin Pasian in phamawhsa se lo hi; thupi lo hi, ci-in ngaihsun uh hi. Topa’ biakinnpi sung mahah tua milimte koihin bia uh hi. A sia zaw lai-ah, tua bangin a biakpiaknate khial kisa lo thuman mah hi, ci-in ngaihsun sawnsawn uh hi. Nate a Piangsak Pa bia lo-in a kipiangsak nate bia uh hi, ci-in Paul in zong pulaak hi (Rom 1: 22 – 25).

MONDAY         NOV. 30
A NUAMLO KUMPI ZEDEKIAH’ UKSUNG


Zedekiah a khiatna in “Yahweh’ dikna” hi. Amah pen Judah kumpi nunung pen, Babylonte in Judah a suksiatma (BC 586) kumpipa hi. Kumpi a sep cilin Jeremiah’ thugen mangin Babylon mite' tungah ki-ap hi. Ahi zongin tawl khat khit ciang lampial pah hi.

Jer. 37: 1- 10 sim in.  Jeremiah in kumpi Zedekiah tungah bang

vauhilh hiam?

__________________________________________________________________________

__________________________________________________________________________


Zedekiah in a khut nuai mite’holhthawhna zui-in Jeremiah’ vauhilhna nial hi. Babylon kumpite’ do dingin kigingkhol Egypt mite’ panpihna va gen hi (Eze. 17: 15 – 18). A lamet bang lo-in Egypt in gallel hi.

Jer. 38: 1 – 6 sim in. Topa’ kammal mite' tungah a pulaak manin

Jeremiah in bang tuak hiam?

____________________________________________________________

____________________________________________________________________

"Kamsang khat pen, ama khua, ama behte, le ama innsung longal-ah kizahtakin pahtawina a ngah hi,” (Mark 6: 4). Tua mah bangin Jeremiah in zong a mipihte’ hehna thuak hi. Namdangte' tungah a hilhkholh mah bangin a mipihte zong hilh khol hi. Thuman thutak lenkipin Topa a zuih laisiah zia-etna thuak hamtang ding uh hi. Judah gam kisiatna pen Jeremiah ngawh uh ahih manun, Jeremiah’ gimna lian mahmah hi. Jeremiah’ gensa bang mahin galte in a neh tak ciangin, Judah mite in a do uh hangin zo zo lo uh hi. Topa’ gen thute um lo-in lungkhauh veve uh hi. Thuman thutak pen zuau thu bangin ngaihsun uh hi.

A mipihte’ nopsakna ding thu hi lo, kisiatna ding thu gen Jeremiah’ thuakzia ding ngaihsun in. Mi khat ii hoih nading na deihsak laitakin a sia-lamin hong kingaihsun kha ngei hiam?

TUESDAY                  DEC. 1



JERUSALEM A KISIATNA


January kha BC 588 kum a kipan galte in Jerusalem umcihin BC 586 kumin galte’ khut sung tung hi. Kum nih sung bang Babylonte in Jerusalem lakzia ding geelgeel phot uh a, Jerusalem khuapi umna susia-in tua bangin khuapi la zo thei uh hi. Khuapi sung kialpi tungin cimawhin galte do zo lo uh hi. Kumpi Zedekiah le a innkuanpite taikhiat sawm uh a, ahi zongin suakta zo lo uh hi. Kimanin Nebuchadnezzar kiangah kipuakin, a zi le a tate’ muhna ah kithat hi (Jer. 39: 1 – 10).

Jer. 40: 1 – 6 sim in. Nebuchadnezzar in Jeremiah kiangah a gen thu in bang thupitna nei hiam?

_________________________________________________________________________

_____________________________________________________________________

Pasian a thei lo hih u lianpa in Judah mite sangin Jerusalem a thupiangte tel zaw hi. A taktakin Nebuchadnezar in Jeremiah le a nasep thei lo hi. A mipih Judah mite le Zedekiah ’ bawl sangin Nebuchadnezar in Jeremiah limbawl zaw hi (Jer. 39: 11, 12). Jerusalem a susia pen Babylon pasiante’ vangliatna hi lo-in, Topa in a mite a thuhilhna hi, ci-in Lai Siangtho in gen lo hi. Ahi zongin tua bang kisiatna lak pan mahin Topa in amah a bia lo mite' tungah Amah le Amah kilaak hi. Saltangte tawh paikhawm ding maw, ahih kei leh Jerusalem ah om suak ding maw, Jeremiah in khat zaw zaw, a teel ding hi ta hi. Jerusalem ah omsuak ding zong ut huai tuan lo hi. Koi koi ah a om zongin Jeremiah in Topa’na sem ding ahi hi. Jeremiah in mizawng, cimawhte tawh Jerusalem ah khawl lai dingin khensat hi (Jer. 40:6, 7).

Bang dinmun bang dinmunah na om zongin mite’ sawltak na hi thei hi. Bang hangin na sep theih bang bang tawh mapang ding thupi hiam?

WEDNESDAY            DEC. 2



"LUNGSIM KHEMPEUH TAWH"


“Note in kei nong zong ding uh a, na lungsim khempeuh uh tawh nong zon uh ciangin nong mu ding uh hi” (Jer. 29: 13). Koi bangin hih kamciam na nuntakpih hiam? Lungsim khempeuh cih kammal in bang pulaak hiam?

_____________________________________________________

___________________________________________________________________

Topa in a theih loh khat beek om lo hi. Jerusalem mite in kamsang zuau-te’ thu umin Babylon mite a do laitak mahun, Topa in a pianglai ding thute hi taleh, Babylon ah salin a om mite' tungah thugen dingin Jeremiah sawl hi. Topa’ sawl bangbang Jeremiah in zong gen hi.

Jer. 29: 1- 14 sim in. Koi bangin Topa’ itna le hehpihna kilang hiam?

_____________________________________________________

_________________________________________________________________

Hehpihna man lo le hehpihna man kilang hi. Topa Pasian' thupiakna om lopi-in, zuau kamsangte in saltan hun ding kum 2 sung bek hi ding hi, ci uh hi. Moses tungah a kipulaaksa om bangin, a tuah mah ding uh ahi hi. Kisik taktak le-uh a gam uah kiciahsak kik ding a, a gam uh puahpha kik ding uh hi.

Thuhilhkikna 30: 1 – 4; 4: 29 sim in. Koi bangin Jeremiah’ gen thute kimu thei hiam?

_____________________________________________________

_____________________________________________________________________


Ellen G. White tungtawnin genkholhna tawh kisai Kha Siangtho’ letsong hong kipia hi. Judah mi kimkhat in Jeremiah a muhkhialh uh bang lo-in koi bangin Ellen G. White’hong hilh thute na um hiam?

THURSDAY                 DEC. 3
KUM SAGIH SUNG

Saltang Judah mite' tungah Jeremiah’ thupuak in kamsang zuaute’ gen thute um lo ding, saltaanna gam Babylon aa ding thungen dingin kisawl hi. Hih thu saltang mite in bang deihna hiam ci-in tel zo lo kha ding uh hi. Jeremiah in cikmah huna amau zak ngeiloh thute pulaak hi. Babylonte in Pasian’ mite bawlsia uh hi. Amau a bawlsia Babylon mite aa ding thungetsak dingin kisawl hi. A zak ngeiloh, a kisawl ngei lo thu hi. Judah ngeina tawh kituak ta kei leh, Thu-um lo Babylon mite (pagan) aa dingin thu a nget uh ciangin Pasian in amau thungetna za ding hi.

Gam sungah buaina, gimna a tun ciangin gitlohna, siatna zong khangin, tua siatnate khempeuh mawhnei lo mite kingawhin kibawlsia hi. Tua hi-in saltanna gam in nuamsa leh, saltangte in zong nuamsa ding hi (Jer. 29:7). Gam sung hoih kei leh khualmite le pemta-te in zong genthei ding uh hi. Saltangte' tungah bang kamciam kipia hiam? Jer. 25: 11, 12; 2Khang. 36: 21; Dan. 9: 2 sim in.

____________________________________________________________

____________________________________________________________________

Topa’ genkholhsa bangin tangtung takpi hi. Tua hi-in Topa’ kamciamte muanloh ding om lo hi. Siksan nei muanhuai thu hi (Jer. 29: 10). A saltan hun sawt zah ding bang hang kum 70 sung sawt ding hi, cih i theih loh hang, kum 70 a ciin sialin leitang aa dingin Sababth (tawlngakna) hi ding hi (Siam. 25: 4; 26: 34, 43). Upna le ki-apna tawh zawhna khempeuh a nei Topa’ hotkhiat ding a ngak mite suakta takpi ding uh hi. Mite’ salin om hi mahta le-uh, Topa in amaute nusia paisuak lo ding ahih lam a phawk ding uh kisam hi. Saltangin a om hangun Topa’ mi mah hi veve uh hi.Topa in amau lo-in a gam uh phut lo ding hi. Hotkhiat ngakin a kiging khempeuh in hotkhiatna lampi mu ding uh a, kihonkhia ding hi.

Bang genkholhna in lametna lianpi hong guan hiam? Bang in na upna hong thahatsak hiam? Bang bang piang taleh, bang in Topa a muang thei dingin hong huh hiam?

FRIDAY           DEC. 4

SIMBEH DING: Topa’ hong hotkhiatna Lungdamna Thu tawh a tawnkhawm thei lo ding thute khang semsem hi. Topa’ thuman thutak nuntakpih ding a kilawm, i nuntakpih nai kei hi. I nunzia kikhel huai zong om kha ding hi. Lungsim kikhelna kisam hi a, Topa bek mah in hong khel ding kisam hi. Gamtat zia le tong, lungsimpuak a kipan pumpi taksa a hong khel nadingin Topa’ tha na ngen hiam, a hong hehpihna na kun tawntung hiam? “ Hotkhiat mi ka hih nading bang ka sem ding hiam? ci-in lungsim takpi tawh dot ding ahi hi. Ellen G. White, 1SM. 187, 188.

KIKUP DING DOTNATE:

1.       Jeremiah in Judah mite' tungah “Topa zong un” ci-in sawl hi. Koi bangin Topa na zong hiam? Mi khat in na kiangah, “Topa ka thei nuam hi. Koi bangin ka thei ding hiam? ci-in hong dong leh, koi bangin na dawng diam?

2.        Pasian’ kamsangte kamsang bangin a ngaihsun lo mi, a gen thute a kitelkhial tampi om hi. Tua bang mahin Ellen G. White le ama’ laigelhte zong a telkhial mi tampi om hi. Koi bangin Ellen G. White Pasian’ kamsang takpi mah hi; a laigelhte zong Kha Siangtho’ makaihna tawh a gelh hi, ci-in tel thei ding na hiam? Mite in kamsangte a muhzia tawh kisai-in Khrih’ kammal in “ mihoih a kineihkhem, no Thukham hilh siate le Farisi mite in gimna na thuak ding uh hi. Note in a sisa kamsangte’ han, a hoih mahmahin bawlin, a nuntakna uh a hoih, a sisate’ mualsuangte hoihtakin na zem uh a, i pu i pate’ khan lai-in eite a om hi lehang, kamsangte a thah bangun eite in i that kei ding hi, na ci uh hi. Note pen kamsangte a that mite’ suan le khakte mah na hih manun na zuaupi uh a gen na hi uh hi.” (Matt. 23: 29 – 31).
3.       Thursday ni-a dotnate ngaihsun kik in. Genkholhnate tangtung

khin zo hi. Tuate in koi bangin mailamah a piang lai ding genkholhnate zong tangtung takpi ding hi, ci-in hong umsak hiam? 

To get the latest update of me and my works

>> <<