MUC

Print Friendly and PDF

Tuesday, September 1, 2015

Lamka a Ih Mipihte ading Thungetna ah Phawkciatni




Lamka buaina ahangte
Tutung Lamka ah sanggam mimal li te in hongsih lawh na uh pen hih anuai aa thuteng hang ahi hi.
1. The Protection of Manipur People Bill, 2015
2. The Manipur Land Revenue and Land Reforms (7th Amendment) Bill, 2015
3. The Manipur Shop and Establishment (2nd Amendment) Bill, 2015
Hih atung ateng thumin Zosuan te India ah mikhual suaksak in Inner Line Permit aneih kei uhleh Manipur ah om theilo ding cihciabg tungsak hi. Hih tawh kisai in amau pen mikhual suak uh aa agam aten man vanzuak theih man piak kul ding cihna hi.


Lamka buaina hanga Mual Liam teng hi


Manipur State ah MLA 60 om aa Tribals MLA 20 om hi, tualak ah athu neikha pen Phungzathang Tonsing, Health Minister, T Manga Vaiphei, Chairman Hill Area Committee kihel hi. Ahi zongin kuamah in adal loh uh ciangin mipi lungso te kiphin aa ZSF, ATSUM, KSO te in makaih hi. Tua bangteng tawh thu ong sosang gawp ahih manin Lamka ah mipi hehteng in MLA teng inn hal uh ci hi. Tuapen kumpi lampan order pia uh aa Assan Rifle leh Commando te in kap uh aa tuciang li si ta hi.
Thusau pi suak thei ding ong hi ahih manin Manipur a om Zosuan teng aki pumkhat nading uh leh thu hoih ongsuah nading thu ngetsak tek ni.
.........................
Zogam, Zomite omna pupa luahsa leitang te tungah buaina, dipkuatna, dongtuahna hong om kawikawi hi. Kawlgam sungah guahtam mencim, khuahun bawl dongtuahna(natural disaster) hangin i mipihte innlelo kisia in belh ding neilo in dongtuak in om uhi. India gam ei Zomite phualpi ahi Lamka ah zong mihing hang a ong piang dongtuahna (man made disaster) hangin patau in dahin ki om hi. Bang kisam aa, bang thute hangin hibangte tuak mangkhin se ihi diam? A Video in pawlkhat aen nuam ta ding ( Videos )
xxxxxxxx
by.Pau Khan Sing
Foto: phualvatimes





Dear … zahtak, muan leh suan,

Zomi Innkuan kipawlna Makaite, Tangmite, Tanute aw,



Tu sungteng a Zogam Lamka khuapi a thupiang tawh kisai Zomi Innkuan USA kipawlna dinmun thu tawm khat hong kopak nuam ingh.

A thu in, Manipur State sung ah Singtangmi kici Zomi/Paite, Kuki, Hmar a kipan Naga minamte leh zang a teng Meiteite atengkhawm hi a, Manipur gam in India tawh a kizopma in Singtang gam teng pen Chin Hill Regulation Acts ih cih, Mangkangte hong khunsak, leitang neihna leh hausa za ngahna (Chin State lam ah ukpi za ngahna) thukhun tawh suahtakna neu (Semi-Independent) anei ahi hi. Tua thukhun pen kisuasialo a, tuni dongmah, puahtoto in, kimangsuak hi.

Manipur State Assembly ah tu Term a kipan Meitei mite makaihna tawh Congress Party in Absolute Majority angah uhteh, Singtangmi MLA teng zong thusim kul nawnlo in, adeih bangun thu khun theihna dinmun hong nei uhhi. Nung kaal sung in State Assembly ah anuai a thusunna (Bill) thum hong sung uh a, Assembly ah Congress Party MLA atampen ahih ban ah, Singtangmite a kipan, ei lam a Pu Phungzathang cihte pen Congress Party vive ahih manun, thu anial zongin thu nei zolomai uhhi. Party thu tawh thu a kisung hi a, kuamah in nial zolo/nial theilo cih ding hi.

Tua thusun (Bills) teng pen anuai a bang hi.
(1) Protection of Manipur Peoples Bill, 2015
(2) Manipur Land Revenue & Land Reforms (Seventh Amendment) Bill, 2015
(3) Manipur Shops & Establishments (Second Amendment) Bill, 2015

Bill #1 pen Inner Line Permit (ILP) kici in, hih thusun kikipsak hileh Manipur State sung ah Meitei simloh lut theilo ding, alut nopleh Permit ngen ding cih hi a, Singtang mite pen gamdang mi dinmun suak ding cih lam in sang uh ahih manin a lungkimlo uh ahi hi.

Bill #2 pen atung a ka gen, Singtang gamteng pen Singtangmite bek in nei thei cih hinapi, tua thusun kikipsak hileh, Meiteite in Singtang gamteng suakta takin neithei, leitheita ding cihna hi. Hih thusun lianpen suksia kisa mahmah a, Vaigam Meitei gam sung ah Singtangmite, eilam ah Zomite in Zogam leiteng a kineih sinsenna dinmun a kitaan ding suak hi. Chin State nangawn State a kicih hangin ih leitang pen Kawl kumpi neihsa hilai hi. Hih thu kikipsak hileh Zogam leitang a kikhahsuah hi ci in Sangnaupangte in sang uh a, tua hangin lungphona leh kiphinna a kibawl ahi hi.

Bill #3 pen Lamka khuapi sung leh Singtang gam teng ah sumlei sumzuakna thuneihna tawh kisai hi a, Malaysia gam bangmah in eima leitang tung ah Business ih bawl ding ciang a leitang nei minamte kihel ding cihna pan, suakta takin bawl thei cihlam in a thusun kisang ahih manin, kilungkimlo cih ding ahi hi.

Hih Zogam Lamka khuapi a thupiang tawh kisai in, ZIUSA kipawlna President-pu a kipan, PAC Chairman-pu hita leh, EC panmunlen tengzong kilung himawh mahmah a, a sun a zan phialmawk in Viber panin thu kiza in, thu ka kikum uhhi. Zogam a thupiangte mat leh zetin ka encik uh a, Zomi buppi sung ah CSO kipawlna amuan huaipen ih cihtheih, ZIUSA kipawlna in UN a ih dinmun pan bang semkul, ih liangko tung bang van hong kisuan cih thu limtak ka khinkhai uhhi.

Zogam saklam ah minam makaipi ZRO President-pu tawh ahi zongin, khanglam Zogam a om minam Makaite tawh ahi zongin thu ka na  kiza uhhi. Tuaban ah, ih sanggam, Kuki Innpi makaite tawhzong holimna ka nanei thei uhhi.
Thu khat ah, Kukin Innpi makaite in Kuki Innpi min tawh White House ah lungphona vanei dingin hong zawn uh a, ZIUSA kipawlna pen minam vai ah Zomi hihna a siksan kipawlna picing ahihna, CSO kician khat ahihna siksan in tua vaihawmna tawh kisai a thu pha akisak hangin dinmun kibanglo ahih manin kikalsuan nailo hi.

Tu laitak in, Zogam leitang taanna dingbek hilo, mipi lungphona hong lian semsem a, Manipur kumpi leh India kumpi in mipi thu hong mangin Singtangmite hamphatna a picing zaw dinmun, ahihkei leh, nidang pek a kingenden, thuneihna a sang zaw apiakloh phamawh zahdong in thu hong pai hi leh, Zomi-te inzong Zogam leitang tung ah thuneihna kicing neih zawhna ding hanciamna ah ahi thei zahin pankhop ding kisam ding hi cihciang kigalmuh thei hi. Tuabang in pankhopna a omkei leh, gam abuai laitak in minam dangte in ih gam ih lei hong hawmsak ding uhhi cihzong lung hihmawhna anei ki-om hi.

Tua hi a, hih thu tawh kisai in, kongzing ah thu kizaza napi, ZIUSA kipawlna Makaite in khua phawklo ahi hiam, bangmah vaihawmlo uh ahi hiam cih lung hihmawhna a omlohna dingin, President theihpihna tawh hiteng ahong ko hi ing. Hih thute kongzing ah thaanggen dingin kilawmlo ahih manin, tangpi leh Social Media ah (hehpihna tawh) ih khaksawnloh ding hong theisak nuam ing.

Zing leh thai a, ZIUSA kipawlna in UN sung a CSO kician khat ahihna, US kumpi nuai ah NGO kician a hihnate siksan in, Zogam leitang leh Zomi-te thuneihna tawh kisai kalsuan ding a om a leh, ZIUSA EC pawlpen ahi thei zahin ma apang dingin kigingsa in ki-um hi cih hong kobeh ning ei.
Tutung hizah cining.

Dam in kithuza ni.
Lungdam.

GSKhup
General Secretary
Zomi Innkuan USA
Tulsa, OK

September 01, 2014

-- 

To get the latest update of me and my works

>> <<