Abeisa Kawlgam galkap kumpi thuneih hun akipan tuni dong Kawlgam mipi tampite khitui naptui le sihna tawh a makaih galkap kumpite' sung pan a lungtang khauh mahmah khat a kigen ahi U Aung Thaung (Kum-74) pen tukha July 8,2015 ni-in a khuak ah sisan lutna a, Nyipyidaw zato ah tawmvei akibawl khit nungah Singapore kipaipih a, July 23,2015 ni-in Singapore zato pan sita cih VOA News in pulak hi.
U Aung Taung pen abeisa galkap kumpi hun lai akipan Ministry of Commerce, Ministry of Livestock and Fisheries, Ministry of Industry cihte ah Vuanzi (Minister) sem hi. Senior General Than Shwe i muan mahmah taklam khut ahih banah Junior General Maung Aye zong tawh sungh le maak akizopna anei khat ahi hi. Tua banah abeisa 2003 kum Depyin ah Daw Aung San Suu Kyi i mortaw kibawlsiatna tungtang ah a makaipi in kiciamteh hi.
Galkap kumpi hun akipan tuni dong kumpi asem USDP sung zongah a khauh mahmah khatin, Kawlgam mi khempeuh in a theih le a kiciamteh ahi hi. Abeisa galkap thuneih hun akipan tuni dong thuneihna sungah kihelkha ahih manin, a tate le a naihuai khempeuh Kawlgam sungah Hotel, Bank, Construction le a dang tuamtuam semin Kawlgam mihaupi teng suak khin uh hi. Kawl kumpite in a Motor hawm dingin Zomite adeih mahmah zah khatin, U Aung Taung Motor hawl zong Tungzang khuami abeisa kum 3 lai a hong nusia sa Pa Thawng Za Khai hi-in, a sihni dong mah hawlsak in, a pu in zong it mahmah ci hi.
USA, EU leh gam thupite in Galkap kumpi deihlohna hang tawh Kawlgam sumzuak, sumbawlna lamah mimal/ mihau pawl khat khaktanna (Sanction) a bawlna sungah U Aung Taung zong kihel hi. U Aung Taung pen tulaitak Parliament MP khat ahihna tawh Kawlgam khuapi thak Nyipyidaw ah Parliament kikhopna hun sungah Minites 2 sung lukun in phawkna bawl uh cih kiza hi. (Source: VOA, BBC)
