Leipi thu. Lei pen mihingte in kum tul aa sim in ih zang khin hi. Lei in ih pai theihlohna mun tampi olno takin hong tungsak ziau hi. Tuni-in leitung ah Leipi lian leh hoih tampi om-a tuate lak ah tuitung aa ki khung paisuak Leipi saupen 10 te thu tom-kim-cing ki hawm sawn pakni.
Vasco da Gama Bridge. (a saupen 10 na)
Portugal khuapi Lisbon ah om in Pi 56,381 (10.7 miles) sau-a Europe gambup ah a sau pen leipi a hihi. Nai khat in tai 155 hat-a nung huihpi a nang zo ding aa ki bawl hi in, kum 120 sungbang lungmuang tak-in kizang thei ding ci hi.
Incheon Bridge. (a saupen 9 na)
Incheon Vanleng tualpi leh Seoul khuapi kikal aa om hih leipi pen pi 60,315 sau hi. Kumli sungbang, $ 1.4 billion bei in, ki lam-a October kha 2009 in ki hong hi.
6th October Bridge. (a saupen 8 na)
1973 October kha-a piang galpi min ki vawh hih leipi pen pi 67,300 (12.7 miles) sau in kum 30 dektak ki lamkhop hi. Hih leipi in Nile gunpi nihvei kankha himah leh a tamzaw mun ah lei(land) maitang tung-a ki khangto leipi a hihi.
Chesapeake Bay Bridge-Tunnel. (a saupen 7 na)
Pi 79,200 (23 miles) a sau hih leipi leh pumlawngpi(Tunnel) ki gawm hang in Norfolk pan Delaware ciangpi (valley) paina ah Tai 95 bang lampi tomtuam sak a hihman in hun nuamtuam mahmah hi. A ki honhun 1964 pan tu-ni ciang a tawmpen Mawtaw Million 100 peuhmah in tawn khin hamtang ding hi ki ci hi.
Atchafalaya Basin Bridge. (a saupen 6 na)
US gambup ah a lianpen cik nawngpi (Swamp) a hi Atchafalaya Basin tung-a ki dawh hi leipi pen 20 mile bridge zong ki ci in US gam Leipi khempeuh lakpan a sau pen nihna a hihi. PI 96,100 sau aa a tung-ah mawtaw hawl leng leipi tung-a pai tawh ki bangloin Leilam geina aa a paipai tawh ki banglel hi ci hi.
Donghai Bridge. (a saupen 5 na)
Leitung aa om tuipi kantan aa ki dawh a saupen Leipi te lak ah khat a hi Donghai Bridge pen pi 106,600 (20.2-mile) sau in Shanghai khuapi pan South China Sea aa om Yangshan dongah ki khungsuk hi. A lamdang ah tourist te hih leipi tung ah mawtaw hawlding ki phallo in taxi bek tawh ki kansak hi.
Runyang Bridge. (a saupen 4 na)
Beijing- Shanghai Expressway tung ah om in a ki muh nop mahmah a et lawm Yangze River tung ah ki dawh hi. Pi 116,990 sau-a a ki zawh lain kum (2005) in leitung ah Suspension Bridge kici khau(cable) tawh ki dom(supported) Leipite khempeuh lakpan a saupen thumna a hihi.
Hangzhou Bay Bridge. (a saupen 3 na)
Pi 117,037 aa sau hih Leipi pen China gam Hangzhou khua ah ki dawh in experts mi 600 val bang in kum 10 sung a buaipih uh a hihi.
Manchac Swamp Bridge. (a saupen 2 na)
Louisiana state a kantan interstate 55 ii sehthum suah sehkhat pen Manchac Swamp Bridge tung a hihi. Pi 120,440 (22.80 mi) sau aa a ki lam na-ah taikhat sial-in (each mile) Dollar million 7 kiimta bei hi ci hi.
Lake Pontchartrain Causeway. (Leitung-ah a sau penpen)
Leitung na lamdangte a ciamteh Guinness Book te teptehna ah Lake Pontchartrain Causeway pen tuitung ah a ki dawh paisuak leipi te lak ah a sau pen Leipi a hihi.Leipi pen pi 126,122 (24 miles) in sau aa, sau lua mahmah a hih mah in Leipi ii a laizang sehthum suah sehkhat a hi tai 8 sung kawngpan, koilam-koilam (any direction), khuadak leng leitang(land) leh mual peuhmah muh theih ding om vetlo hi ci hi.
ADK.
