LESSON 9 AUG. 22 - 28
PETER LE GENTILE MITE
SABBATH NITAK: TU KAAL SUNG SIM DING: Sawl. 2: 5 – 21; 10: 1- 8, 23 – 48; 10: 9 – 22; 11: 1- 10; 15: 1- 35; Rom. 2: 14 – 16.
KAMNGAH: Tua ciangin Peter in amaute’ kiangah, “ Na mawhna uh kisik unla, na mawhna uh hong kimaisak theih nadingin Jesuh Khrih min tawh tui kiphum ciat un. Tua hileh, Pasian’ piakkhong Kha Siangtho na ngah ding uh hi. Bang hang hiam cihleh Pasian in Ama kamciamna pen note tung, na suan na khakte uh tung le gamlapi-a om mi khempeuh, i Topa Pasian in a sap mi khempeuh tungah a hong bawl ahi hi,” ci-in a dawng hi. Sawl. 2: 38, 39.
Peter in Gentile-te lakah thuhilh masa penpen nungzuipa hi. Paul in Gentile-te lakah a
thuhilh khit, kum tampi sung bang Peter in pawlpi makaih hi. Peter le Paul in Jew mite lakah
pawlpi koihin, makaih a, Khrih thupiak bangin mi khempeuh tungah lungdamna thu hilh
uh hi. Peter in Gentile thu-um mite kipumkhatsakin Jew ngeina hanga khat le khat
kitelkhialnate a ven nadingin pawlpi makaih hi. Sawltak dangte bang mahin Peter in
thuman thutak le ngeina thute khentel hi. Peter in Jerusalem pawlpi’ buainate lemtuah hi.
Pasian in Gentile mite le Jew mite deidan lo-in, a kibangin mu hi. Bang hang hiam cihleh,
Gentile mite in a lungsim uh kisiansuah khin uh hi (Sawl. 15:9).
SUNDAY AUG. 23
PENTECOST NI-A PETER
Khrih in van a kah madeuh a nungzuite tungah a hilh thu in: “ note in Jerusalem panin Judea gam, Samaria gam le leitung mun khempeuhah keima teci na hi ding uh hi, ci-in vaikhak hi (Sawl. 1:8). Leitung mun khempeuh kizel ding thupuak i nei hi. Pentecost khit ni 50 ciangin Peter tungtawnin hih thu tangtung takpi hi.
Sawl. 2: 5 – 21 sim in. Koi bangin thupiangte in mun khempeuhah lungdamna thu kizelh ding huh hiam? Jew mite in bang dinmun nei uh hiam?
_____________________________________________________
________________________________________________________________________________________________________________________________
Pentecost ni-in Khrih’thupiak Lungdamna Thu puak ding (Sawlna Lianpi ) tangtungmasakna hi. Lungdamna thu mun khempeuh kizelh nadingin Kha Siangtho kibua hi. Pentecost ni khit a piang ding thute a hilhkholhna hi-in, Pasian nasepna tangzai zaw semsem ding hi.
Tuhun aa dingin Peter’ thugen in manpha hi. Kamsangte’ genkholhna khempeuh Khrih nuntakna ah tangtung hi (Sawl. 2: 17
– 21). Khrih’ sihna le a thawhkikna in lungdamna thu kizelh nadingin vanglian mahmah hi. Na lamdang tuamtuamte tawh kopin, lungdamna thu kitangko hi. Khrih in pahtawi-na ngahin, tu-in Pa Pasian’ ziatlamah tu-in, na khempeuhte’ Topa hi. A mawhna kisik a, mawhmai ding thumin, tuikiphum mi in mawhmaina ngah ding hi, ci-in Peter in kiciantakin tangko hi. Jesuh in, pawlpi makai dingin, Peter sawl hi. Paul bangin na a sep theihloh hangin Pentecost ni-a Peter’thugen in gam 15 ah Lungdamna Thu kizelh nading lampi honsak suak hi. Tua bangin Middle East gamte ah Lungdamna Thu kizel hi.
I nuntakna ah Kha Siangtho i kitangsapzia Pentecost ni-a thupiang in hong hilh hi lo hiam? Kha Siangtho in a hong makaih theih nadingin nang le kei in bangte a tel thei dingin khensatna nei thei i hiam?
MONDAY AUG. 24.
CORNELIUS KIKHELNA: KHEN MASA
Sawl. 10: 1 – 8; 23 – 48 sim in. Hih Jesuh’ nungzui Gentile mipa in, hotkhiatna le Topa aa ding teci tawh kisai bang hong hilh hiam?
______________________________________________________________
______________________________________________________________
Roman galkapbu, hih Gentile mipa’ kikhelna pen Gentile Pentecost (Gentile mite kikhelna lianpi) suak hi. Jewte in hotkhiat ngah nadingin Jew minam suahna kisam masa pen hi, ci uh a, ahi zongin, Jew minam suak masa ta kei leh, Gentile mi hihna panin zong hotkhiat ngah hi, ci-in a pulaak masa penpen Cornelius hi. Caesarea khuapi in Roman galkapte’ phualpi khat hi. Cornelius pen galkap 600 a uk makai lian mahmah 6 lakah amah zong kihel hi. Ama khanggui pen Roman galkap minthang mahmahte’ suan le khak hi. A pu a pate in Hannibal ulianpite a na zogawp mang makaite ahi hi. Tuate sangin a thupizaw in: Cornelius in Pasian kihta hi. A innkuanpite tawh biakna pia khawm den uh hi. Manmanin thungen hi. Cimawh genthei mite huh tawntung hi. Pasian in a thunget dawng hi. Pasian in vantungmite khat Cornelius kiangah sawlin a sep ding hilh hi.
Pasian in leitung, vantung na khempeuh Piangsak Pa ci-in um hi. Amah in nuntakna ukpa, vangliatna khempeuh nei hi, ci-in theitel hi. Cornelius in inn sung hitaleh na khat peuhah citak hi. Pasian’ maipha ngah hih Gentile mipa in thuman thutak theitel banah, a theih beh ding thuman tampite theihbeh toto hi.
Cornelius’ nunzia tungtawnin i sin ding bang thu na phawk hiam?
TUESDAY AUG. 25
CORNELIUS’ KIKHELNA: KHENNIHNA
“Tua ciangin Peter thugen kipan a, “ Pasian in angvan tuam nei lo-in minam khempeuh panin amah kihta-a, a dik a gamta mite khempeuh a sanna thu, a maan a hihna teltakin ka thei ta hi (Sawl. 10: 34, 35). Peter’ thuhilh in amaute lakah mawh kisikna lianpi piangsak hi.
Peter in koi panin hong pai hi-a, amah a bangci mi cih pen thupi hi. Peter in thu pawl khat buaipih tawntung hi (Gal. 2: 11 – 16). Cornelius’kikhelna tungtawnin Peter in mawhna kimu phawk thei a, Pasian in leitung mi khempeuh aa ding a hong geelsak thute tel semsem hi.
Sawl. 10: 33 sim in. Cornelius in Peter kiangah pulaak thu in: mawhneipi mah Pasian’ sawl bangbang a nungta nuam ahihzia bang pulaak hiam?
______________________________________________________________
______________________________________________________________
Koi bangin Rom. 2: 14 – 16 in Cornelius’ nunzia hong telsak hiam?
_________________________________________________________
___________________________________________________________
I gensa bangmahin Cornelius in Pasian a zahtak Gentile mi khat hi (Sawl. 10: 2). Antangin a thungetna, a neih a lamhte cihmawh huhin a zatnate i muh ciangin a ki-ap mi, thu-um takpi khat mah hi, ci-in i thei hi. Tua hi-in a hun a tun ciangin Pasian in a lamdangtakin Cornelius nuntakna ah sem hi. Peter tawh kimu dingin vantungmi in Cornelius sawl hi napi, vantungmi in Cornelius tungah lungdamna thu pulaak lo hi. Peter tawh kimuh theih nading lampi sialsak zaw hi (Sawl. 10: 34 – 44). Hih thu tungtawnin Pasian in a sawltakte a zatzia kimu thei hi.
WEDNESDAY AUG. 26
PETER’ MANGMAT
Peter in Cornelius tawh a kimuh ciangin, nidanga a lungsimpuak bang nawnlo-in Gentile mite a muhzia kikhel hi (Sawl. 10: 44, 45). Bang in Peter khel hiam?
____________________________________________________________
______________________________________________________________
Sawl. 10: 9 – 22; 11: 1- 10 sim in. I ngaihsutnate khat veivei khial thei ahihzia bang pulaak hiam?
______________________________________________________________________________________________________________________________________________
______________________________________________________________
Cornelius kikhelzia le Peter’ nasepzia in tuhun aa ding zong manpha hi. Vantungmi in Cornelius kiangah a kilak laitak mahin, tua thu mah Peter’ mangsungah kihilh hi. Peter in Joppa khua ah savun bawl nasem mi khat tawh om hi (Sawl. 9: 43; 10: 6, 32). Jew mite in savun bawl mite kih uh hi. Bang hang hiam cih leh, savun ngah nadingin ganhing sisa khempeuh tawh kipelh thei lo mite hi. Savun bawlte khua sungah kitengsak lo hi. Tua hi-in Simon zong tuipi gei mun khatah teng hi (Sawl. 10: 6).
Jew mite’ nawl khin mite tawh a kikholhkhop ding Peter in phamawh sa nawn lo hi. A mang tungtawnin Pasian’ thuhilhna tel hi. Nidangin a ngaihsutnate man lo ahihlam phawk thei hi. Peter le Cornelius kizopna in bang hong hilh hiam cih leh, hotkhiat nasepna khat peuhah khat le khat kilamdannate kantan ding mi khempeuh Pasian’ tate hi, cih hong hilh hi. Cornelius kiangah Peter’ teci panna en lehang, Pasian in kuamah deidan neilo-in Ama hotkhiatna hong pia hi mah taleh, biakna kici khempeuh Pasian in sang lo hi, cih kimu hi. Cornelius pen biakna mi mahmah khat hi. Galkapbu ahihna tawh Mithra pasian bia hi. Emperor (gam makaipi) biakna a zui mi khat hi. Ahi zongin tua biaknate Pasian tawh kituak lo hi. Khristian biakna le biakna dang khat peuh kibang hi, ci-in a um mite in hih thu a tel ding uh kisam hi. Tua bang ngaihsutna in Khristian’manneihna susia hi.
Biakna dangte khial mahta leh, bangci bangin na zahtaksak hiam? Koi bangin zahtak le langpanin gensiatsak cihte kilamdang hiam?
THURSDAY AUG. 27
JERUSALEM A KIKUPNA
Gentile mite in hotkhiat ngah nading thu tawh kisai pawlpi masate hunlai-in a buaipih mahmah uh thu khat hi (Rom. 11: 17). Namdangte in Pasian thuzui mite a hong pawptak uh ciang amau lak pan buaina hong kipan hi. Jew Khristiante in Thuciam Lui sunga ngeinate zat dingin gen uh hi. Gentile-te in zong tua ngeinate zang ding uh hi, ci-in sawl uh hi. A buaipih diak uh thu in Jew mi suahna, vun-atna ahi hi. Gentile mi in Khrih Honpa in a san takteh, vunat kul veve lai ding hiam? Judea gam a mite in hotkhiatna ngah nadingin vunat kul hi, ci uh hi.
Hih buaina koi bangin Jerusalem a kikupna in lemtuah hiam? Sawl. 15: 1- 35.
______________________________________________________________
______________________________________________________________
Vunatna bek hi lo-in Jew’ ngeina tuamtuamte hangin pawl sung buai hi. Tua buainate hotkhiatna thu tawh kisai lo buaina hi. Jerusalem a kikupna in Gentile thu-um mite le Jew thu-um mite kizopzia ding pulaak hi (Sawl. 15: 23 – 29). Jew’ ngeina hepkhiatsak lo-in, Gentile mite in zong Jew mi hihna va zat pih lo dingin kithukim uh hi. Jerusalem a khensatna in thuman thutak ahih banah nuntakpih theihpah thukhenna hong suak hi. Pawlpi kikhenthang ma-in buaina khat peuhpeuh tua bangin lemtuah ding kisam pha mahmah hi. Namdang laka nasemte in Khristian’ upna laigil, hotkhiatna thu tel kul a, tua lo ngeina tuamtuamte in, upna laigil a suksiat loh ding kisam hi.
Koi bangin Jerusalem a kikupna in pawlpi sung buaina tuamtuamte hong vengsak thei ding hiam? Kalsuan zia ding etteh takcing bang na mu hiam?
FRIDAY AUG. 28
SIMBEH DING: Cornelius inn a kikhawm mite’ tungah Peter in a mangmat lamdang a sakziate pulaak hi. Peter in tua muna kikhawm Gentile le Jew mite Kha Siangtho in ompih hi, cih theitel hi.Jew mite’ tungah kipia Kha Siangtho mah, Gentile mite’ tungah zong kipia hi, ci-in teci pang hi. Peter in kuamah deidan lo-in nasem dingin Pasian in hilh khin hi. Paul le Barnabas in zong Gentile mite lakah tua bang buaina thuak uh hi. A hong hotkhiatna dingin, Khrih in kilamdanna khempeuh, mawhna kici khempeuh hong hepkhiatsak hi. Tua bangin Peter in thu a gen ciangin pawl sung buainate veengthei hi. Ellen G. White, The Acts of the Apostles, 193, 194.
KIKUP DING DOTNATE:
1. Peter’ mangmat siksanin mi kim khat in sa siang le sa sianglo, nek le dawn tawh kisai thupiakte, bei khin ta hi, ci uh hi. Peter’ mangmat in ngimna nei hi-a, tua ngimna Peter mahmah tungah
kihilh hi. Gentile (mi sianglo) le Jew (mi siang ) ci-in khen kei in, cih thu hi hi (Sawl. 10: 28). Tua hi-in Peter’ mangmat in nek le dawn thu tawh kisai a hilhna hi lo-in, Pasian in pau le ham, minam siksanin kuamah khentuam nei lo hi, ci-in a hong hilhna hi zaw hi. Bang hangin Peter’ mangmat in nek le dawn thu tawh kisai hi, ci uh hi ding hiam? Koi bangin Lai Siangtho simin theihtelsiamna kitangsapzia na phawk hiam?
2. Rom. 2: 14 – 16 limtakin ngaihsun in. Bangci-in pawlpi in hotkhiat nasep sem leh kilawm hiam? I thupuakte nuntak pih kei leng, bang hangin mite tungah va gen kul hiam?
3. Tuhunin kizang thei ding bang thute hong hilh hiam? Gentehna-in: (1) mimal nasep (2) Lungdamna Thu (3). Lai Siangtho (4). I mavuan (5). Jerusalema makaite khat le khat kizopzia uh cihte tawh kisai-in Sawl. 15: 1- 35 sim in. Tuhun aa dingin Jerusalem a kikupna etteh takcing hi.
