LESSON 8 AUG. 15 – 21
MINAMTE’ KIANGAH NASEPNA
SABBATH NITAK: TU KAAL SUNG SIM DING: Jn. 4: 4 – 30; Matt. 8: 5 – 13; 15: 21 – 28; Mk. 5: 1- 20; Lk. 17: 11- 19; Jn. 12: 20 – 32.
KAMNGAH: Ka it ka lung hong kimsak, ka teel ka nasempa hih lai-ah om hi; ama tungah ka Kha ka koih dinga, minamte’ tungah thutang a tangko ding hi (Matt. 12: 18).
Khrih in Galilee gamah a hun tamzat pen hi; Gentile-te omna (Matt. 4: 15) namdangte’ huzaapna gam khat ahi hi. Khrih in nasep kipatma-in Nazareth khua ah om hi. Nazareth khua in Roman mite’ khualzinna lampi-a om khua ahih manin, Khrih in Jew mi hi lote tawh kizopna nei mahmah hi, cih kimu thei hi.
Nazareth khua panin hawlkhiatna a thuak ciangin, (Lk. 4: 16 – 31), Khrih in Galilee gam Capernaum khua bulphuhin nasep kipan hi. A kithuahpih Gentile mite in Khrih’ nasepzia le a nunzia huzaap hi. Kum thum sung nasepna sungah, a tuikiphum le vankahtoh kikal, Khrih in 6 vei bang namdangte’ kiangah thuhilh hi. Jew mite’ aa ding bekin nasem hi lo-in mi khempeuh aa ding nasem ahihna kilang hi.
SUNDAY AUG. 16
SAMARITAN NUMEI
Khrih hunlai-in Israel gam in khen thumin kikhen hi: Galilee, Samaria le Judea gam hi. Samaria in Galilee le Judea kikalah om hi. Samaritan mite in Israel mite’biak Pasian bia kawm mahin, namdangte’ pasian tuamtuamte zong bia uh hi. Samaria in Israel gam tawh kinai pen gam suak ahih manin sawltakte in Samaria gamah masak nasem masa uh hi.
Jn. 4: 4 – 30 sim in. Khrih in Jew mi hi lote’ kiangah a nasepzia tungtawnin bang thumanpha na mu hiam? Bangci bangin Khrih in Jew mite’ngeina kantanin nasem hiam?
_____________________________________________________
_____________________________________________________________
Samaritan numei’ lungsim thaksuak hi. A zak thu in lawpsak hi. A pu a pate’ thu a thei mahmah numei khat ahih manin pil thudot siam mahmah hi. Thudotna tawh kamho kipan hi. Jesuh in numei’ dotnate tungtawnin nuntakna thu hilh hi. Tua numei in pasal tampi nei khin ngei a, tua laitakin pasal nei lo-in a om lamtak Khrih in thei kawmsa mahin, numei kiangah na pasal va sam in, ci-in a sawl lianleh, a kihona uh kilamdang hi. Khrih in numei a theihsak nop thu a hilh nop manin tua bangin thu dong ahihlam tak, numei in phawk lo hi. Samaritan numei’ omzia kilangkhia ahih manin, tua bangin Khrih in a sawl manin nuamsa lo hi.
Nungzuite hong tung kik uh a, (Jn. 4: 27) Jesuh in Jew mite’ palsat loh ding thukham palsat ahih manin nungzuite in lamdangsa uh hi. Khrih in Jew ngeina pawl khat palsat hi: numei tung pan dawn ding tui ngen (2). Numei khat kia tawh kiho: innkuanpih khat ahih kei ngal leh, Jew mite in numei khat tawh tua bangin kiho ding kiphallo hi. Jesuh in Israel gamah a om lai-in Jew ngeina zui hi. Ahi zongin Samaria gamah a om takciang, Jew ngeina sungah om nawn lo hi. Khrih in mihingte’ bawl tawm thukhun le Pasian’ thukhamte kibatlohna hilh hi.
Midangte’ tungah hotkhiatna thu pulaak dingin bangci ciangin na ki-ap,na kipia khia hiam? Koi bang ciang ki-ap, kipiak kul hiam?
MONDAY AUG. 17
ROMAN GALKAP MANGPI KHAT
Matt. 8: 5 – 13; Lk. 7: 1- 10 sim in. Ngeina pawl khat in Lungdamna thu kizelh nading dongkholh sak hiam?
___________________________________________________________
___________________________________________________________
Capernaum a galkap za khat a uk galkapbu khat in Jesuh kiangah huhna ngen hi. Jew mite in, Rome mite’ ukna nuai-ah om uh ahih manun Rome mite ning mahmah uh hi. Roman mite in zong Jew mite hua uh hi. Tua bang kawmkalah Jew mi khat le Rome mi khat kizopna hoih om thei veve hi.
Luke in a pulaak in: Galkapbu pa in Jew upate kiangah pai-in Jesuh tawh kimuh ding vaikhak hi, ci-in gen hi (Lk. 7: 3). Amau gen bang tekmahin Khrih zong hong pai pah hi. Hih Jew upate kua hi ding hiam? Luke in gen tuan lo hi. Makai dangte tawh kibang lo-in, Khrih tawh kizopna nei makai upate hi kha ding hi.
Galkapbu pa in upna nei mi khat hi. “ Khrih in thupia peuh leh, ka cina sila dam ding hi” cih kammal in upna taktak pulaak hi (Matt. 8:8). Galkapbu in Jewte in Khrih, Messiahin a san ding hun ngak lo hi. Khuavak in mun khempeuh a tan mah bangin Tapa’ vangliatna in galkapbu nuntakna vaksak hi. Ellen G. White, The Desire of Ages, 317.
Galkapbu-pa in Jew mite’ ngeina le biaknate zahtakin thupi ngaihsut hi. Jew mi khat in Gentile mi khat innah lut lo ding hi, cih zong thei hi. Tua hi-in, Khrih in a kam tawh thupia dingin ngen lel hi. Khrih in galkapbu’ upna siksanin hun nunung a hotkhiatna ngah mi namcinte in Messiah Honpa dawnin tawntung nopsakna ngah ding uh hi, ci-in pulaak hi.
Galkapbupa tungah kibawl nalamdang in Jew le Roman mite ci-in kideidan lo hi, cih pulaak hi. Kibang lo ngeina tuamtuamte in mi khempeuh tungah hotkhiatna thu kizelh nadingin a dongkhak ahih loh ding thupi hi lo hiam?
TUESDAY AUG. 18
DAWITE THUHILHNA
Mk. 5: 1 – 20; Matt. 15: 21 – 28 sim in. Koi bangin Khrih in nam dangte kiangah a nasepzia pulaak hiam? Koi bangin Canaan numei tungah Khrih’ kammalte na tel hiam? Thuciam sungah kihel kha lo mite’ tungah Jesuh nasepzia i theih ding bang thu om hiam?
___________________________________________________________
______________________________________________________________
Gadarenes mun Galilee tuipi pan nisuahna lamah om hi. Nidangin tua munah Greece mite teng masa uh, tua khit ciang, Roman mite teng uh hi. Gadara mun a mipa in dawivei mi khat hi. Pasian’ damsakna kisam mahmah mi khat hi. Damna ngah takpi hi.
Jew mite’ ukna pan suahtakna ngah uh ahih lam kitel mahmah hi. Bang hang hiam cihleh hih munah vok kilim khawi mahmah hi. Tu-in hih vokte si mangkhin ahih manun, vokkhawite in supna lianpi thuak ding uh hi.Tua hangin tua khua mite in Jesuh a pai khia dingin kun uh hi. Jesuh in damna ngah mipa a om suak dingin thupia hi. Damna ngah mipa in a mipihte’ tungah Jesuh aa ding teci hi dingin sawlna ngah hi. Ama nunna kikhel takpi-in, a thugente sangin a gamtat in ama kikhelna kilangsak zaw hi.
Sidon khua a naupangno’ damna: dawivei natna pen siahuai mahmah hi (Matt. 15: 22). A nu pen Canaan mi hi. Cannan in nam tuamtuam kigawmkhopna mun khat hi. Amah pen Joshua in gal zo-in a om suak Canaan’ suan le khakte khat hi ngel ding hi. Khrih in Canann numei kammal khauh tawh hopih hi. Canaan mite ui tawh genteh hi. Khrih in a upna sittelnuam ahih manin tua bangin hopih hi. Khrih in numei’ lungsim tawng pholhkhia nuam hi. Tua mah bangin numei in kiniamkhiatin huhna ngen hi.
Canaan numei’ upna hangin Khrih lungkim mahmah hi. Khrih in numei kiangah Israel mite’ nawlkhin ahih nawnlohna, Pasian’ teltuam mite lakah khatin kihel ahihna pulaak hi. Pasian’ tanu khatin kihel khin ahih manin, Pa’ kiang pan a ngah letsong midangte’ tungah hawmsawn dingin mavuan nei ahihlam phawksak hi. Khrih in numei’ ngetna bangin pia takpi a, nungzuite tungah a thuhilh hialbawl phot hi. Ellen G. White, The Desire of Ages, 401. Nungzuite’ ngaihsutna bang lo-in hotkhiatna in Jew mite bek huamkha lo-in namdangte zong huamkha hi, ci-in theita uh hi.
WEDNESDAY AUG. 19
MIPHAK SAWMTE
Lk. 17: 11 – 19 sim in. Kua kua hi taleh, thumanpha bang hong hilh hiam?
____________________________________________________
_______________________________________________________
Gimna tuak mite in Khrih a theihtelna uh phawk masa in. Amaute in Khrih a minin samin, natna damsak dingin huhna ngen uh hi. Tua munsanlianah damna ngahpah lo uh hi. Amau ngeina bangin (Siam. 14: 2) pai-in siampite kiangah kilak dingin kisawl hi. Miphak sawmte in Khrih’thupiak le Ama kammal umin, dam takpi uh hi.
Amaute lakah Samaritan khat kihel hi. Siampite kiang a tunma-un dam uh hi. Damna ngah Samaritan mipa lungdam mahmah ahih manin Jesuh kiangah a lungdamna pulaak dingin Khrih kiang hong pai kik hi. A dang kuate in siampite kiangah vakilak ding mangngilh lo napi uh, Khrih tungah lungdamkoh ding phawk nawn lo uh hi. A dang kuate in Jew mi hi, ci-in a kigelh loh hangin, a mun tawh kizui-in Jew mi mah hi ding hi. Tham lo-in Luke in Samaritan mi khat citektek hi. Jesuh in ‘khual mi’ ci hi (Lk. 17: 18). Natna in bang mah deidan lo hi. Hamsatna, thuahsiatna in kilangneihna, kilamdangnate hemkhia hi. A vekun siangthona, damna kisam uh hi. Tua hang mahin Jesuh kiang zuan uh hi.
Bang bang hi leh, Khrih in Samaritan le khualmite aa dingin nasem masa lo hi. “ A mangthang Israel mite lakah hong kisawl hi,” ci-in gen hi (Matt. 15: 24). Jew mite lakah kibusa phot ding ngimna nei hi. Ahi zongin a nasepnate in mi khempeuh huamkha hi. Hih thu, sihna pan a thawh khitin, kilang zaw kan hi.
Upna tawh miphak sawmte in damna ngahin amaute a damsakpa Jesuh tungah lungdam ko ciat uh hi. Bang hangin Pasian’ min phatna le lungdamkohna in upna thu ah thupi mahmah hiam? Bang thute hangin lungdam ding na hiam? Bangci bangin Topa’ tungah lungdam thei zaw semsem ding na hiam?
THURSDAY AUG. 20
GREEK MITE LE JESUH
Pasian bia ding a pai mite lakah Greek-te pawl khat a om uh hi. Amaute Galilee gama Bethsaida a teng Philip kiangah pai uh a, sia aw, Jesuh ka mu nuam uh hi, ci-in thum uh hi. Phillip in Andrew ko-a Andrew le Phillip in Jesuh ko sawn hi. Mihing Tapa a minthan hun a hong tung zo hi, ci hi (Jn. 12: 20- 23). Koi bangin hih thupiang in mite’ kitangsap hotkhiatna thu hong hilh hiam? Jesuh sung bekah lametna, na khempeuh kicinna om hi lo hiam?
____________________________________________________
______________________________________________________________
Hih Greek mite in biakbuk huang sung lut thei uh ahih manin, Greek biakna panin Jew biakna ah kikhel mite hi kha ding uh hi. Phillip in Jew minam Greek zi nei mi khat hi-in ama kiangah hih Greek mite hong pai uh hi. Khrih nungzui, thu-um mi masate in nam dangte’ kiangah nasemin, amaute’ nasepna tawh mi tampi in thu-um mi hong suak uh hi. Minam kibang lo sangin minam, ngeina kibatpih mite lakah nasep in muibun zaw hi.
Hih Greek thu-um mite in Khrih a sihma deuh a kikhel mite hi. Khrih’ nunzia, a thuak gimnate a kipan si-in, sihna pan a thawhkikna cihte hangin Khrih’ nungzui mi hong suak uh hi. Vantung pan awging in amaute kikhelsak hi kha thei hi. Amaute in Khrih mu nuam hi, cih thu hangin Khrih zong lungdam ding hi. Greek mite kikhelna pen leitung mun khempeuh lungdamna thu kizelh ding kipatna hong suak hi. Pharisee-te in zong hih thu mukhol khin uh hi. Mi khempeuh in ama nungzui uh hi, ci-in pulaak uh hi (Jn. 12: 19).
Jew mi hi lo, namdangte in Khrih mu nuam ding Ama kiang hong pai uh hi. Khrih’ sihna in mi khempeuh aa ding hi, cih hong hilh hi. Hih Greek mite in minam tuamtuam, pau tuamtuamte in Khrih nungzui ding hi, cih a hong hilhkholhna khat ahi hi. Mi namdangte in lungdamna thu za thei ding uh ahihna pulaak khol hi.
Jn. 12: 20 – 32 sim in. A nuntakna a hu mi in a nuntakna suplawh ding, a nunna a pia mi in nunna mah ngah kik ding hi, cih thu in bang hong hilh hiam? Bang hangin Khrih in tua bangin gen hi ding hiam? Koi bangin hih thu na tel hiam?
FRIDAY AUG. 21
SIMBEH DING: “ Ken kong cihinah, nisuahna le nitumna pan mi tampi hong pai-in vantung gam pawipi-ah Abraham, Isaac le Jacob-te tawh a tukhawm ding uh hi. Ahih hangin kumpi-gam mite ahih uh leh, kahna le hagawina a omna mun khuamial lakah kipaai ding hi, a ci hi (Matt. 8: 11, 12). Hih thu a kipulaak hunin deihna nei-in mi pawl khatte’ tungah kigen hi. Hih kammalte’ pulaak thubulpi in tu ni ciang dong kimu thei lai hi. Thuman thutak a thei mite in tavuan lianpi nei hi. Thuman i theih khit nungah thuman nusia mi tampi om hi. Mi kim khat in thuman thutak gen vet lo uh hi. Thuman thutak sungah munkip ding kisam hi. Thuman thei ihih manin a thei nailo mite a theisak ding mavuan i nei hi.
KIKUP DING DOTNATE:
1. Singlamteh in mi khempeuh mimawh ihihlam kilangsak hi. Pasian mai-ah mimawh vive ihi a, hotkhiat ngah ding hehpihna kisam ngentang vive ihi hi. Tua hi mah taleh, mi kim khat in midangte sangin amau le amau dik zaw-in kingaihsun uh hi. Hih pen mi khempeuh tuahkhak thu hi. Koi bangin midangte sangin nang le nang in a kicing mi-in na kingaihsun kha zel hiam? Hih bang ngaihsutna in bang khialhna nei hiam? Koi bangin Singlamteh in hong khel hiam?
2. Jacob tuikhuk a numei in a khuapihte le a mipihte’ kiangah Jesuh’ thu pulaak hi. Mipih, sapihte’ kiangah nasep in namdangte lakah nasep sangin kisam zaw hi, cih thu na ngaihsun hiam?
Greek mite in Jesuh mu nuam uh hi. Ama thu za kha ngei khin hi ngel ding uh hi. Ahih keileh, a bawl nalamdangte va mu kha ngei zong hi kha thei hi. Tu-in Khrih in vantungah om-in, leitungah a pawlpi in amah limcing hi. Hih thu in i nunzia ding le i teci, bang hong hilh hiam?
