LESSON 7. AUG. 8 – 14
JESUH: NASEP MAKAIPA
TU KAAL SUNG SIM DING: 2Tim. 1: 8, 9; Isa. 42: 1- 9; Dan. 9: 24 – 27; Lk. 2: 8 – 14; Matt. 10: 5, 6; Sawl. 1: 1- 14.
KAMNGAH: Tua ciangin Jesuh in amaute kiangah “Note in nopna ngah ta un. Pa in kei a hong sawl bangin note zong ka hong sawl hi,” ci-in a vaikhak leuleu hi. Jn. 20: 21.
Pa, Tapa le Kha Siangtho’ nasep in hotkhiat nasep ahi hi. Mihing a hong kitat nadingin Thum Gawm Pasian in nasem khawm uh hi. Mawhna kipat a kipan tua hotkhiat kipan hi-in hun bei dong kizom to suak ding ahi hi. Hih leitung in Pasian’deihna
tawh a kidim dongin Pa, Tapa le Kha Siangtho in nasem hi. Khrih in tua hotkhiat nasep a hong sem dingin mihingin leitungah hong nungta hi. A piang na khempeuh tua hotkhiatna sungah kihel hi. Mihing’ manneihna, mihing hihna a manphatzia, mihing’ kitangsap penpen a kicingsak dingin Pasian in hotkhiat nasep hong sem hi.
SUNDAY AUG. 9
THUCIAM LUI SUNGA JESUH
Tua ahih manin i Topa’ thu gen nading thu-ah ahi a, Ama thu hangin thong a kia keima thu-ah ahi zongin maizum kei in. Pasian in nangma tungah thahatna hong pia ahih mah bangin Lungdamna Thu hangin thuakna-ah zong a thuaknuam hi zaw in. Eite’ sepzawhna hang hi lo-in ama ngimnasa bang leh a dikna hangin Pasian in eite hong honkhia-in ama mi dingin a hong sam hi. Pasian in leitung a pianma pekin Khrih Jesuh tungtawnin tua dikna a hong pia hi (2Tim. 1: 8, 9). Gamtatna tawh dikna, hotna ngah ding lametna in a mawknapi hi. Hotkhiat kipatna cihte hong hilh hi.
Isa. 61:1; 7: 14; 9: 6; 42: 1-9; Dan. 9: 24 – 27 sim inla, bangci-in Khrih pulaak uh hiam? Khrih Messiah ahihna bang gen hiam?
____________________________________________________________
____________________________________________________________
Kamsang Isaiah in hih bangin gen hi: “Hih lai-ah ka letkip, ka lungkimna, ka telsa ka nasempa om hi. Ama tungah ka Kha ka koih ding a, amah in minamte’ tungah thutang a puak ding hi. Keimah Topa in thumaanna tawh nang kong sam khin hi; na khut ka lenkip ding hi. Nang hong kemin mite’ aa dingin thukhun, Gentile-te’ aa dingin khuavak kong suaksak ding hi.Mittawte mite honsak ding, thong sung pan le thong hawmpi sunga khuamial laka tute a khakkhia ding na hi hi (Isa. 42: 1, 6, 7).
Na khempeuh Piangsak Pa in mihingin hong piang a, hong si hi. Hih thu hangin lamet nei hi lo na hiam?
MONDAY AUG. 10
MI KHEMPEUHTE’ DEIH
Jesuh Khrih in na khempeuh le mi khempeuhte’ Topa hi; ukna khempeuh nei pa hi. Thuciam Lui mite’lametna bangin tangtung banah, mi nam khempeuh hon dingin hong pai kik ding hi. Khrih, mihingin hong piang a, mihingin nungta-in, hong si-in, sihna pan a thawhkikna thu in Jew le Gentile kideidanna beimangsak hi. Tawlkhat hun sung Jerusalem khuapi panin tua hotkhiatna thu kitangko hi. Ahi zongin Herod’ biakinnpi panin Khrih hong hotkhiatna kitangko nawn lo ding a, a kikhel Jew mi, Pasian’ tenna biakinn i pumpi in tua lungdamna tangkona mun hong suak hi. Tua hi-in Khristian Jew mite in a cian lai Israel mite ahi uh hi.
A hong suah a kipan a naupanlai le tuikiphumin zong Khrih in leitung’ Honpa ahihna kipulaak hi. Khrih in leitung mi khempeuh aa ding Honpa ahihna koi bangin kimu thei hiam?
Lk. 2: 8 – 14__________________________________________
Lk. 2: 25 – 33 _________________________________________
Lk. 3: 3- 6 ____________________________________________
Jn. 1: 29 _____________________________________________
Khrih in leitung mi khempeuh hon dingin hong pai hi, cih kitel mahmah hi. Hih thu in i nasep ding mavuan tawh kisai-in bang hong hilh hiam?
Gupna thu a thei nailo mite in a theih nading vei-na kisam hi. Hotkhiat nasep nopna lungsim neih tawntung ding kisam hi.Nasem dingin lawpna kisam hi. Pawlpi mimal khat ciat in hih nasepah kihelin, mimal hih theih bangbang tawh mapan ding kisam hi. Sep ding tampi kinusia khin hi. Pasian in Ama nasem dingin nang le kei hong sam hi. Nasem ding mi kisam hi. Sep ding nate in nang hong ngak hi. Ellen G. White, 6T., 29.
TUESDAY AUG. 11.
JEW MITE’ TUNGAH NASEP
“Israel mite’ tung bekah nasem dingin kei hong kisawl hi (Matt. 15: 24). Khrih in nasep a kipata kipan a sih dong, Galeli gam Jew mite lakah hun tamzat pen hi. Israel mite’ tungah kipulaak masa hi. Gentile mite tungah zong Lungdamna thu kipuak hi. Jesuh in tatkhiatna thu tangko ding Jew mite kiteel ahihna thu amaute phawksak hi. Jew mite in leitung mite aa ding teci hi dingin Pasian’ sehkholh ahi hi.
Matt. 10: 5, 6 sim in. Bang hangin Khri in a nasep pulaak hi ding hiam? Hih thu, leitung mi khempeuh aa ding Honpa ahihna tawh kizui-in koi bangin na thei hiam?Matt. 28: 19 enkak in.
______________________________________________________________
______________________________________________________________
Khrih’ nunzia, a nasepte ngaihsun lehang a ngaihsutna, a ngimna, a mungtup cihte kitel mahmah hi. Tuate tangtungsak dingin mainawt hi. Khrih in hih leitungah a hong nuntak lai-in mi khempeuh aa dingin Jew mite’ ngeina bangin hong nungta hi. A sihna le sihna pan a thawhkikna tawh leitung mawhna puakhia hi (Jn. 1: 29).
Hih thu in i nasep ding hong hilh hi. Nasep kipatma-in mun muanhuai, nasepna phualpi kisam hi. Lungdamna thu in tua mun panin mun dangte kizel ding hi.
Na khuatual pawlpi en in. Hotkhiat nasepna phualpi ahi hiam? Pawl sung kitangsapnate hangin pawl pua nasep ding a sem lo pawlpi a hi hiam? Mimal hamphatna, metna bek mungtupi nei-in hotkhiat nasep sem lo-in na om hiam?
WEDNESDAY AUG. 12
GENTILE MITE’ TUNGAH THUPUAK
Khrih in Jew mite lakah nasemin, amau ngeina bangin a khankhiat hangin mi khempeuh a dingin nasem hi zaw hi. Israel mite siksanin Lungdamna thu mun khempeuhah kipuak ding hi. Pasian in Gentile mite in zong hotkhiatna ngah dingin a geelsa hi hi. Khrih in zong tua mah hilh hi.
Koi bangin a nuai-a thute in mi namdangte’ tungah Khrih in a thuhilh na mu thei hiam?
Matt. 5: 13, 14_________________________________________
Mk. 14: 9 Lk. 14: 10 – 24 ________________________________
Matt. 13: 36 – 43 _______________________________________
Khrih in Jew mite’ lakah thuhilh ahih hangin a thuhilhte in mi khempeuh aa ding thuhilh hi. Tui a kiphum a kipan John in hih bangin pulaak hi: A zingsang ciangin ama lam manawh a Jesuh hong pai John in a muh ciangin, “En un, leitung mawhna a puakhia Pasian’ Tuuno! ci-in pulaak hi (Jn. 1: 29). “Leitung” cih kammal (kosmos) Gospel sungah 100 val bang kimu thei hi. Tua kammalte in Jesuh in leitung Honpa hi, cih pulaak hi.
Khrih in hotkhiatna tawh kisai a thugenteh lak pan (Lk. 14: 16
– 24) mi khempeuh in sapna ngah uh hi. Pawl khatte in paulap tuamtuam nei-in pai lo uh hi. Paulap neih huai lo hi. Hih thugentehna in bang thu hong hilh hiam?
THURSDAY AUG. 13
SAWLNA LIANPI
Khrih in sihna pan a thawh khit ni 40 ciangin vankah hi. Khrih in hih ni 40 sungtengin a nungzuite’ nasep zia ding le pawlpi a makaihzia ding hilh hi. Khrih’ vankahna thu Matthew in kician takin pulaak hi. Sihna pan a thokik Khrih in hotkhiat thu tangko ding kisapzia amaute theisak hi. Tua bangin Jerusalem ah nih vei, Galilee ah nih vei pulaak hi (Sawl. 1: 1 – 14).
Gospel sungah Khrih in a nungzui khempeuh tungah hong piak thu, i sep ding mavuan nam 6 bang kimu thei hi. Galilee gam mualtungah (Matt. 28: 18 – 20); annekna mun khatah (Mark 16: 15 – 20); Emmaus paina lampi ah (Lk. 24: 13
– 31); innkhan tung nungah (Jn. 20: 19 – 31); tuili gei khatah (Jn. 21: 4 – 25); van a kah madeuhin (Sawl. 1: 1- 11). Hih thute in bang pulaak ciat uh hiam?
_____________________________________________________________
_____________________________________________________________
Nungzuite in Khrih’ sawlna bang mangin, Kha Siangtho kimakaih sak uh ahih manin amaute’ gen thu in mun khempeuh zel hi. Paul in Mediterranean gamah, Phillip in Samaria gamah, Nungzui Matthew in Ethiopia gamah, Thomas in India gam dongah nasem uh hi.
Mi tawmno khat tawh kipankhia-in, langpanna tuamtuam a thuak uh hangin, Pasian’ ompihna tawh mun khempeuah Lungdamna Thu kizel hi. Kicinglo uh ahih hangun, Honpa’ sapna za uh ahih manun, sawltakte le nungzuite in hotkhiatna thu tangko veve uh hi. Nungzuite in Khrih tung pan a sin thute, Khrih kiang pan a ngah thute, midangte kiangah hawpsawn ding hamsa sa lo uh hi. Khstian thu-um mi in tua bangin nasem ding hi lo hiam?
Khrih in bang hong pia hiam? Bangci-in hotkhiat nasep tawh kisai sepzia ding hong hilh hiam?
FRIDAY AUG. 14
SIMBEH DING: Leitung mun khempeuhah hih lungdamna thu kipuak masa phot ding a, tua khit ciangin beina hi ding hi (Mat. 24: 14). Mihing Tapa hong pai hun ding kuamah in thei khol lo hi. Pa bekin thei hi (Matt. 24: 36). Ama hong pai hun ding a ni, a nai, eite theih ding hi lo hi,ci-in Khrih in pulaak hi (Sawl. 1:7)
Nidangin lungdamna thu kigen nai lohna munte ah lungdamna thu kigen khin a, tu-in zong a kitangko laitak hi. Khrih hong pai ding lamenin ngaka a om eite in hunsehna zatloh ding thupi mahmah hi. Pasian in a hong hilh loh thu, Khrih hong pai kik ding a ni, a nai, upmawh thu tawh sehkholh pen khialhna hi. Khrih in a nungzuite’ kiangah ‘ngakin, vil tawntung un,” ci-in vaikhak hi. Khualzin mite’ Makaipipa’ hong hilh bangin ama hong pai ding hun naita ahih manin “ lamen, ngak, vilin, thungenin, nasem dingin hong vaikhak hi. Ellen G. White, The Advent Review and Herald, March 22, 1892.
KIKUP DING DOTNATE:
1. Bang hangin mi kim khatin Khrih hong pai ding a ni, a hun seh hi ding hiam? Sum zonnate ah (fund zonna) maikum July 20 ni ciangin Khrih hong pai ding hi, ci-in gen le-uh, Khrih hong pai ding hita, neih le lamhte in bang khiatna nei hiam, tua hi-in, na sumte pia khia in, cih bangin nasem mi honkhat om hi. Bang hangin tua bangin hunsehkholh lauhuai hiam?
2. Mimalin tawmno khat ahih hangun, hamsatna kawmkalah thu-um mi masate’ nasepzia ngaihsun in. Tu hunin bang hamsatna om hiam? Thu-um mi masate’ lawhcinna in bang hong hilh hiam?
