LESSON 6 AUG. 1- 7
ESTHER LE MORDECAI
SABBATH NITAK: TU KAAL SUNG SIM DING: Esther 1- 10; 1Kor. 9: 19 – 20; Jn. 4: 1- 26; Sawl. 17: 26; Matt. 22:
21; Rom. 1: 18 – 20.
KAMNGAH: Hih bang hunin bangmah hih loin na omcip leh, Jew mite’ suahtakna ding le noptuamna ding thu mundang khat pan hong piang veve ding a, nangmah le na innkuanpihte na simang ding uh hi.Hih kumpi inn na tunna pen hih bang huna mah dinga a tung na hih mel zong kua in thei ahi hiam? a ci hi. Esther 4: 14.
Esther in a lauhuai Persian Ukpi’ khut nuai-ah nasem ulian khat ahi hi. Namneu meigong inn kuan sung pan khangkhia ahih hangin Persia kumpipa’ zi-in hong khangkhia hi. Bangmah lo panin ulian khatin omin, tavuan lian mahmah khat nei hi. Tua tavuan a sep nadingin geelsiamna kisam hi. A geel khialh leh, amah bek tham lo, a minampihte
dongah sihna thuak ding uh hi.
Amah a kem Mordecai le a sanggam khat in Esther panpih hi. Maingal takin Persia kumpipa mai-ah a pulaak thute hangin a minam buppi-un sihna ding panin suahtakna ngah hi. Namneu hihna panin mite’ zahtak minam khat hong suak hi. Esther’ citakna hangin Persia gam sung khempeuh in a man Pasian theihtelna tawh kidim hi. Esther le Mordecai’ nunzia in hotkhiatna thu tawh kisai a hong hilh thute in, lauhuaina tampi om taleh, Persia mite in a nungta Pasian hong thei uh hi.
SUNDAY AUG. 2
PERSIA GAMAH ESTHER’ NUNZIA
Esther 1: 2 – 20 sim in. Bang thu piang hiam? A thu paizia kicingin a kigelh loh kawmkalah, tuhun paizai tawh tua thupiangte telhak hi lo hiam?
______________________________________________________________
______________________________________________________________
Kumpi Ahasuerus in a gamuk makaite aa ding a khengval gualnopna pawi sawtpi sung bawlpih hi. Kidek cih om lo, a duh zahzah uh zu dawnin biakna pawi nei uh hi (Esther 1: 7. 8). Kumpipa le a uliante in zu khamin, amaute mai-ah kumpipa in kumpinu’ hoihna kilangsak nuam ahih manin mite mai-ah kilak dingin a zi thupia hi. Vashti in nupi khat ahihna le kumpipa’ zi khat hihna tawh tua bang gamtat ding kilawmsa lo hi. Tua bangin a ngongtat kumpi le a u liante cihna mangnuam lo-in thuman thutak tungah a cihtakna hangin Vashti in a pasal simmawhna, gawt bawlna tawh kipelh lo hi. Vashti in Pasian kihta lo pasal lakah numei khat ahih hangin Topa aa dingin a vanglian teci dingin nungta ngam hi.
A ut peuhpeuh kumpipa le a uliante mai-ah kilak ding hi lo-in, aana tawh kisawl ahi hi (Esther 2: 3). Tua lakah Esther zong kihel hi. Kumpipa thupiak nial hi leh, kua in Esther tuah ding genthei?
1Kor. 9: 19 – 23 sim in. Bang thupaipite Esther nuntakna sungah kimu thei hiam?
_____________________________________________________________
______________________________________________________________
Vashti a dik manin Esther aa dingin lampi kihong hi. Khat veivei thuhoih kimlai, thusia hong tunpih thei zong om hi. A tawpkhakna ah bang piang ding cih i theikhol kei zongin bang hangin thuman thutak zui cinten ding thupi hiam?
MONDAY AUG. 3
KUMPI’ INN A ESTHER’ NUNZIA
Esther 2: 10, 20 sim in. Minam hihna le a biakna selcipte in bang kituak kha hiam?
______________________________________________________
_____________________________________________________________
Jn. 4: 1 – 26 sim in. Jesuh in ama mipihte’ kiangah Messiah ahihlam kipulaak ngei lo napi, bang hangin numei kiangah Messiah ahihna kiteltakin pulaak hiam? Hih thu in, koi bangin Mordecai in Esther tunga a gen thute hong theitelsak hiam?
______________________________________________________
_____________________________________________________________
Mordecai in Esther kiangah in a minam, a biakna pulaak lo dingin nih vei vaikhak hi. Tangthukan mipilte in buaina om lohna munte ah ama minam hihna selcip pen bang hang hi ding hiam, ci-in tel zo lo uh hi. Milim biate lakah a nungta Pasian bia ahihna pulaak leh, thuman teci suak zaw lo ding hiam? A minam le biakna pulaak leh, Persian kumpi in mukhial-in Esther in a deih ngah kei kha leh, ci-in ngaihsun hi kha thei hi. Bang bang ahi zong, Mordecai in Esther kiangah a lauhuai khat a pianse sangin ama minam le a biakna imcip zaw dingin gen hi.Tua bangin a genna thu Lai Siangtho in a hong hilh loh hangin, na khat peuhpeuh kidopkan om lo hi. Khrih in zong thu khempeuh pholaak ding hoihsa lo hi. Tua hi napi, bang hangin Khrih in ama pihte’ kiangah a ipcih thu, numei nu kiangah pulaak hiam?
Khrih in aa mipihte’ tungah a pulaak loh thu, a nung ciangin a nungzuite in pulaak ding a kiphal lo thu, numei tungah pulaak hi. Numei in Khrih’ hehpihna a theih thute midang tungah a pulaak thu in vanglian hi. Ellen G. White, The Desire of Ages, 190.
Kidawmtakin na upna na pulaak hun a om hiam? Bang na siksan aa? Tu-in na ngaihsut kik ciang, na bawlphatnop a om hiam?
TUESDAY AUG. 4
HIH BANG HUNIN
Mordecai in milim biak ding langpan tawntung hi. Mihing khat hi lel Haman mai-ah Mordecai kun nuam het lo hi. Hih thu hangin Haman heh lua ahih manin Mordecai bawlsiat ding a geelna khempeuh amah mah in lehthuak hi. Mordecai ahih leh, thuman teci pang hi-in, ama hangin namdangte in a nungta Pasian thei uh hi.
Haman in Jew mi khempeuh a suksiatna dingin bang siksan hiam? Tua bang lungsim puak in ngeina tuamtuamte huzaap hi, ci-in na ngaihsun hiam? Esther 3: 8 – 13; Sawl. 17: 26.
____________________________________________________________
_____________________________________________________________
Haman’ geelnate a kitheih ciangin Mordecai dahin kiselcip zo lo hi. Mordecai in a puansilh balkekin, ippi puan silhin, vut lakah tu pahin, a hingimna khempeuh sungkhia hi (Esther 4:1). Esther in zong Haman’ khialhnate kumpipa ko dingin kithawi hi. Kumpipa in a sap kei buang leh, ama kiangah kuamah pai lo ding hi, cih thukham om hi mah taleh, kumpipa’ sapna om lopi mah Esther in kumpipa tawh kimu dingin va pai hi. Persia thukham palsat Jew mite lakah a masa pen Esther mah hi pah hi. Kumpipa in Esther’ ngetna sang pahin, nitak an nekhawm dingin sam hi. Esther in Persia gam a om Jew mite’ hamsatna khempeuh kumpipa’ kiang vapulaak hi. Esther in amah le amah kiniamkhiatin, ama minphat nading ngaihsun lo-in, hangsan le pilvang takin mipih Jew mite’ aa ding thumsak hi ( Esther 5:8; 7:6).
Jew mite in lamet bei-in a om laitak un, Esther in a mite tawh anngawlin thungen a, a sep dingte sem pah ahih manin, Pasian in kumpinu Esther tungtawnin a mite honkhia hi.Thuciam Lui sunga hih bang numei nasep in, hamsatna i thuak ciang i kalsuan zia ding hong hilh uh ahi hi. Esther hun lai bangin mi nam bupin gimna i tuak kha kei zongin thu-um mi khat in na lianpi pi sem thei hi, cih hong phawksak hi. Ellen G. White, The SDA Bible Commentary, Vol. 3., 1140.
Esther 4:4 sim in. Mordecai in Esther kiangah a thugenin “ hih bang hun a kimang dingin kumpi inn sung tung a hihmel kua-in thei hiam? Hih thu in bang thulaigil siksan hiam?
WEDNESDAY AUG. 5
MORDECAI LE HAMAN
Koi bangin Esther in a mipihte honkhia thei hiam? Esther 5 – 8.
____________________________________________________
____________________________________________________________
Nih vei bang kumpipa’ pahtawi-na ankuangah hong pai Esther in a gennop thute pulaak khia ta hi. Kumpipa in Jew minam khempeuh kisuamsimna thu theikhia ta hi. Zahtakna man le amah leh mah kiliatsakna hong kidawkkhia ta hi. Thu hoihlo a geel mipa sihna thuak dingin thu kipia ta hi. Kumpipa’ inn sung thupiang khempeuh hong kidawkkhia ziazua ta hi. Jew minam Mordecai le Esther in amau omna mite’ gamtat khuahek ngeinate theitel uh hi. Tua banah Pasian’ kamciam a muanna tungtawnin amaute kihonkhia hi.
Mordecai in mite’ muhna ah mi thupi ahih loh hangin a up bangin nungta hi. Haman mai-ah kunin bia ding a kisawlsawl hangin Mordecai ut lo hi. Mordecai in a man lo thu khat tawh a upna kheksawm lo hi (Esther 3: 3 -5). Mite’ aa ding teci hoih mahmah suak hi.
Esther 6: 1- 3 sim in. Mordecai’ pianzia bang hong hilh hiam? Koi bangin Pasian’ mite in namdangte’ lakah khuavak teci hi thei ding hong hilh hiam?
____________________________________________________
______________________________________________________________
Mordecai in a nungta Pasian bia kawmkawm mahin, kumpite’ ukna nial lo-in, amaute’ tungah thuman veve hi. A hoihlo thute pulaak khia-in, gammi hoih khat hi thei veve hi. Mordecai’ thu a neng a tawngin i theih loh hangin, mite’ pahtawina deiha nasem hi lo hi. Mite’ pahtaak dinga nasem hi lo hi. Tua bang a sepna hangin Jew mite suakta thei ahih uh ciang, tua sangin hoih zaw om lo hi. “Caesar neihsa Caesar pia un. Pasian neihsa Pasian pia un,’ ci-in Khrih pulaak thu, Mordecai in nuntakpih hi. Matt. 22: 21.
THURSDAY AUG. 6
GENTILE KIMKHAT JEW HONG SUAH CIANG
Esther 8 sim in. Gammial nasepna le thuman thutak aa ding teci hihna bang pulaak hiam?
______________________________________________________________
______________________________________________________________
Esther in Lungdamna thupuak tawh kisai nasepzia ding gen lo hi. Ahi zongin Lungdamna thupuak’ mungtup thute Esther in pulaak hi. “Namdangte in Jew suak uh hi (Esther 8: 17). Mi kim khat in, tua mite kikhel taktak a Jew mi suak hi lo ding hi, ci uh hi. Bang hang hiam cihleh kikhelna man taktak sungah kihtakna, lau-na om lo hi. A cil lai-in kikhelna bangmah a nei nai lopi mah, a nungsang ciangin Kha Siangtho in amaute’ sungah nasemin kikhel uh hi thei hi. Bang hang hiam cihleh a biak uh milimte le a nungta Pasian kilamdanna theitel uh hi.
Rom. 1: 18 – 20 sim in. Esther hun lai-a nam dang panin Jew mi suakte koi bang hi ding hi, ci-in na tel hiam?
____________________________________________________
______________________________________________________________
Jew mici bei nading banah amaute’ neihsa khempeuh zong suksiatsak dingin thu kipia hi (Esther 3: 13). Jew mite in a galte uh a thah uh ciang, galte’ neihsa khempeuh zong suksiatsak uh hi (Esther 8: 11). Ahi zongin Esther sungah Jew mite in nate susia lo hi, ci-in thum vei kigelh hi (Eshter 9: 10, 15, 16). Bang hangin susiatsak lo uh hi, ci-in hong kihilh loh hangin, angsung huaihamna hang, duhhopna hang hi lo hi, cih kimu thei hi.
Hotkhiatna thu i gen ciang, minphat nading sem hi lo-in, koi bangin mite in hotkhiatna thu bulpi telthei ding hiam? Bang hangin hih thu in thupi hiam?
FRIDAY AUG. 7
SIMBEH DING: Ahasurus in Jew mite langpanin a bawlsiat mah bangin “a beibang pawlpi” sunga om mite in langpan bawlsiatna thuak ding uh hi. Kumpipa’ kongkhakah a tu Pasian’ thupiak a zui Mordecai mah bangin a nungta Pasian a langpan mite in Pasian’ thupiak a zuite langpan uh hi. Pasian’ thukham kip tawntung hi, ci-in a lenkip tinten mite in, Pasian kihta lo-in Ama Sabbath a tuancilte in gimna thuak ding hi, ci-in tangko ahi uh hi. Ellen G. White, Prophets and Kings, 605.
KIKUP DING DOTNATE:
1. Jew mite kithah ding thupiak le ‘sapi ciamtehna nei lo mite kibawlsiat ding’ hih thu nih in kibatna bang om ding hiam?
2. Nidang lai Jew mite le Khristian masate in Esther in Lai Siangtho sungah hel dingin kilawm lo hi, ci-in ngaihsun uh hi. Bang hang hiam cihleh, Esther sungah Pasian cih kammal khat beekbeek kihel vet lo hi. Namdang kumpite’ min lah 190 val bang om bilbel hi. Anngawlna kigen a, thungetna, biakpiakna, biakbuk cihte kigelh lo hi. Mawhmaina, hehpihna cihte zong kimu kha lo hi. Ahi zongin Esthter in Pasian’ kammal Lai Siangtho mah hi, ci-in Lai Siangtho in kikoih hi. Pasian in mite’ lamet hethet lohpi-in a sia nate lak pan a hoih nate piangsak thei ahihzia koi bangin na mu thei hiam?
3. Pasian’ na sem napi, a nasep pulaak lo, amah kua mi cih zong kipulaak lo nasem na thuak ngei hiam? Khat veivei ciang, tua bang a kisap hun om thei mah hi lo hiam? Khristian biakna kiphal lo munte ah Pasian nasemte in tua bangin kilangtangin nasep loh ding uh kisam hi lo hiam? Mite theih ding nang le nang na kipulaak loh hangin, koi bangin na thu up, na thu zuih kimu thei veve ding hiam?
