LESSON 4 JULY 18 – 24
JONAH’ NUNZIA
SABBATH NITAK: TU KAAL SUNG SIM DING: Jonah 1 – 4; 2Kum. 14: 25; Isaiah 56: 7; 44: 8; Matt. 12: 40; Mang. 14: 6 – 12.
KAMNGAH: Tua ciangin Peter thugen kipan a, “Pasian in angvan tuam nei lo in minam khempeuh panin amah kihta-in a dik-a gamta mite khempeuh a sanna thu, amaan a hihna teltakin ka thei ta hi” (Sawl. 10: 34, 35).
Hebrew mi kamsangpa Jonah in ama nopsak paisanin a ut loh khat nasem kamsangpa hi. Amah pen Jeroboam II, BC 650 kim a a nungta kamsangpa hi (2Kum. 14: 25).
Thuciam Lui sungah namdang mite’ tungah nasem kamsang Jonah bek mah om hi. Minam khempeuh a Piangsak Pa Pasian in Ama teltuam mite bek in hotkhiatna ngah dingin ciangtan lo hi. Jonah in hih thu a telloh hangin, Isaiah, David cihte in namdangte kihotkhiatna limgen mahmah uh hi. Thuciam Thak sungah zong Jew mite in Gentile mite kihonkhia ding ahihna thu tel zo taktak lo uh hi.
Jonah in namdangte’ kiangah pai-in Pasian’ hotkhiatna thu puak dingin pai nuam lo hi (Jonah 4). Jonah in kineih khem mawkmawk lo-in a lungsim takpi genkhia hi. Ahi zongin Pasian in mi nam khempeuh a hotkhiatnopna theitelsak hi. Jonah’ nunzia in namdang tuamtuamte’ tungah hotkhiat nasepzia ding hong hilh hi.
SUNDAY JULY 19
A KHIAL KAMSANGPA
2Kum. 14: 25 sim in. Jonah thu bang hong hilh hiam? Jonah in bangci khuavak limcing hiam?
__________________________________________________________
__________________________________________________________
Jonah Bu sung simloh Thuciam Lui sungah 2Kum. 14: 25 sungah Jonah’ thu i mu thei hi. Syria-te in galzo-in Israel gam a laksak uh, Israel mite in ngah kik ding hi, ci-in Jonah in a gen manin Israelte lakah minphatna ngah hi.
Jonah in Gath Hepher khua mi khat hi. Hih mun in Israel khanglam Zebulun, Nazareth panin gamla lo khua khat hi. Cihnopna-ah, Jesuh le Jonah pen Galilee kamsang tuak hi-in, kum 650 kihal uh hi.
Jonah 1: 1 – 3, 9, 12; 3: 3 – 10; 2: 1- 9 sim in. Jonah’ nunzia, a sia, a pha, bang pulaak hiam?
__________________________________________________________
__________________________________________________________
Jonah Bu sungah a thanemna le a thangahna, a sepnopna, a langpanna, thuhilh ding a utna le thumanna cihte kigawmzau hi. Jonah pen Pasian’ tungah citak mi khat hi. Lawpna nei hi. Thunget a um mi khat hi. Ahi zongin lungsim ngaihsunna picing nei lo hi. Angsung thu thei hi. Thuhnopna lungsim nei hi. Jonah pen Topa’ sila khat hi napi (2Kum. 14: 25), a lungsim puakzia Pasian’ deihna tawh kituak lo hi. Bang bang siatna tawh kidim mah taleh, Pasian’ zat ding a ut nak leh, Pasian in tua bang mite zang thei veve hi.
Siatna lianpi nei napi, ahi zongin Pasian in a zat veve mi Lai Siangtho sungah na theih a om hiam? Pasian’ hong hotkhiatna thu tangko dingin Pasian in mi ginalote zong zang thei veve cih thu in lametna bang hong guan hiam?
MONDAY JULY 20
PASIAN NASEM HUN MASALAM
Pasian in Jonah kiangah Ninevehah pai in ci-in thupia hi. Thuciam Lui sungah mun dangte sangin Zionah pai ding sawlna tam om zaw hi. Pasian’ teel Judah mite in nam dangte a makaih ding Pasian in a geelkholhsaksa hi (Isa. 56: 7). Khrih nungzui ding mite etteh ding a matai Jonah in milim biakna tawh kidim, a gilo, siatna dim Ninevehah a va pai ding pen piangsa thei mahmah lo hi. Jonah in Pasian’ sawlna tawh kilehbulhin paikhia dingin hong kithawi hi. Pasian’ sawlna bangin a sem nuam lo Jonah in Pasian’ langpangpa hong suak hi.
Jonah 1: 3 – 17 sim in. Bang thumanpha nuntakpih ding na thei hiam?
___________________________________________________________
______________________________________________________________
Pasian in huihpi tungtawnin Jonah’ langpanna thuhilh hi. Kamsangpa in Pasian’ sawl a man loh hangin huih in Pasian’ sawlna mang hi (Mark 4: 41). Huihpi nungin Gentile mite in thungenin a om laitakun Jonah ihmu hithiat hi (Jonah 1: 14). Jonah in ama hangin huihpi nung hi, cih phawk hi. Na khempeuh a Piangsak Pasian pulaak thei bilbel hi. “ Kei in Hebrew mi khat ka hi hi,” cih thu in, a mi nam le a biakna pulaak hi. Tembawhawlte in ahih theihzahun huihpi lakpan suahtak ding hamciam uh hi. Hehpihna lungsim nei uh ahih manun, Jonah’ ngetna mangnuam pah lo uh hi (A lungkhauh kamsangpa in midangte a suahtak theih nadingun, amah le amah kipia ngam bilbel hi). Pasian’ sawl manglo kimlai mah, Pasian in Jonah tungtawnin tembaw sung a mite in a nungta Pasian thei-in, tembawhawlte in Pasian bia uh hi. Hih mite in Jonah’ mi ngah masa penpente hong suak hi.
Jonah’ suahtakzia a lamdan mah bangin tembaw kisia lo-in a suahtaak zong lamdang hi. Pasian in ngasa gol mahmah khat geelsa-in koih hi. Bang ngasa nam cih kithei lo hi. Ngasa gil sung pan Jonah suahtaklam i thei hi. Hih thute in Pasian in mi khempeuh itin, khoi-in, kemcing a, mi khempeuh honkhia nuam hi, cih hong hilh hi.
Bang bang ahi zong, na khempeuh Piangsak Pa, Pasian khat bek om hi (Isa. 44:8; 45: 5, 6). Mi khat peuh in na khat peuh a biak leh milim bia hi-in, khialhna lianpi hi. Pasian lo pasian khat tungah thunget pen zuaukhemna hi. Bang hangin hih thu, hotkhiat nasepna ah thupi mahmah hiam?
TUESDAY JULY 21
NGAPI’GIL SUNGAH
Ngapi’ gil sungah Jonah thuak ni thum in Khrih’ sihna le a thawhkikna limcing khol hi (Jonah 1: 17 – 2:10; Matt. 12: 40). Pasian in Jonah suahtak nadingin ngapi khat sawl hi. Tuipi tungah nasem mi kimkhat whale gilpi sung pan a suakta mi om hi.Ahi zongin Jonah suahtakna ahih leh a lamdang mahmah Pasian’ nasepna ahi hi. Pasian in mihingte’ nuntakna ah a tawntungin na lamdang bawl den hi.
Zan thum le sun thum cih kammal in nidanglai mite’ kampau khat hi-in, misite omna (sheol) manawhin pai hi, cihna limcing hi. Jonah thuakdan ngaihsun lehang, si khin takpi leh kilawm hi. Jonah in ngapi gil sung panin thunget kipan hi. Tembaw ukte in thungen lo Jonah thungen dingin sawl uh hi. Tu-in ngapi sungom lamet bei Jonah in thungenta hi. Cihmawh ciang bekin thungen ding hi lo-in, a tawntungin thu nget kisam hi. Jonah’ thunget a tomin lungdamkohna vive hi. A thunget khennga-in kimu thei hi.
(1). Thumasa, (2). A hingimna zia (3) Pasian’ huh ding ngetna (4) Pasian’ nasep pulaakna (5). Pasian’ tungah kamciam le ama hotna teci panna cihte kimu thei hi. Topa aw nong suahtaksak leh, ci-in a sep a bawl ding kamciam pia hi. Kua in tua bangin thungen ngei lo? Na kamciam bangin na sem takpi hiam?
Matt. 12: 40 sim in. Koi bangin Khrih in Jonah’thu pulaakin, Ama nuntakna ciing hiam? Jn. 2: 19 – 22.
___________________________________________________________
______________________________________________________________
Topa in ngasa khat sawlin, gun gei-ah luakhiasakin Jonah suakta hi (Jonah 2: 10). Pasian in tembawhawlte sep theihlohte sem hi. Khrih in sihna pan a thawhkhit ciang, mun khempeuhah pai dingin a nungzuite thupia hi. Tua bang mahin Jonah zong ngapi sung pan a suahtak khit ciangin Gentile mite lakah nasemin, lawhcing mahmah kamsang khat hong suak hi. Jonah’ hotkhiatngahna in Pasian’ hong hehpih hotkhiat pulaak hi. Niinbulom tawh kidim ngasa sung pan Jonah’ suahtakna in siatna tawh kidim Assyrian mite in sihna ding pan a suahtakna uh teci hong suak hi.
WEDNESDAY JULY 22
NINEVEH KHUAHUN
Jonah 3 sim in. Gammial nasepna le hotkhiat nasepna tawh kisai bang thu pulaak hiam?
____________________________________________________________
_____________________________________________________________
Jonah tungah a nihveina Topa’ thu tunga: Nineveh ah pai inla kong gen thu va tangko in” (Jonah 3: 1, 2). Hih munah a thupi gamtatna pulaak kammal nih om hi. Pasian in “pai in” ci hi. Jonah in Pasian’ sawl nial khin hi mah taleh, khat vei sawl veve lai hi. Pasian in Jonah tungah hun hoih khat vei pia lai hi. Hih thu in Khrih’ nasepzia hong hilh hi. Minamte a va zuan ding i hi hi. Thuciam Lui hun lai-in ahih leh, minamte in amaute zuan zaw uh hi.
Nihna ah: “tangko.” Lai Siangtho in tangko, genkhia cih tawh kisai tampi hong hilh hi. Lungdamna thu tangko ding kisapzia zong hong hilh hi. Jonah in Pasian’ piak thute a tangko ding ahi hi. I gen ding thute in Pasian aa ahi hi. Ei aa hi lo hi.
Pasian’ kiang panin thukhenna, kamciam, a lauhuai thute hong pai hi. Jonah’ thupuak in ni 40 khit ciangin Topa in thu hong khen ding a, Nineveh khuapi kisia ding hi (Jonah 3:4). Ahi zongin lametna, suahtakna, le hotkhiatna lampi om hi, ci-in zong tangko hi. Tua thu a um mi khempeuh siatna pan suakta ding hi. Tawntung Lungdamna Thu’ thulaigil in Pasian’ thukhenna tawh kisai hi (Mang. 14: 6 – 12). Lungdamna Thu le thukhenna tonkhawm hi. Mawhna, sihna cihte tawh kipelh nadingin Lungdamna Thu bek om hi. Thukhenna om lo-in hotkhiatna bucing lo hi. A nihin pulaak tuak ding kisam hi.
Thuman thutak tawh kituak lo hi ta mahleh, mi nih le thumte’ deihna zuihna hangin siatna tampi hong tung hi. Tua bang hi kei leh mite in tatkhiatna thu a tel nadingin a mun le mual, hun tawh kizui-in pulaak gensiam kisam a, ahi zongin a man lo thu tawh helhzau ding hi lo hi.
Jonah 3: 5 – 10 in bang thupiang pulaak hiam? Nineveh khua mite in a upna thu gamtatna in zuipah hi. Amaute’ upna hangin siatna tawh kipelh uh hi. Pasian in kamciam a hong piak mah bangin, a lauhuai vauhilhna zong hong gen hi. I ngah ding thupha, ahih kei leh siatna bang tungah kinga-in a tuak ding i hiam?
THURSDAY JULY 23
JONAH’ HEHNA
Kamsangpa in Pasian’ na sem ding a nawngkaisak, a dongtangsak nate in mun gamlatluatna, huihnung, ngasa, tembawhawlte, Nineveh khua mite hi lo hi. Amah mah hi zen hi. Nineveh khua mite’ thu upna le Jonah’ uplohzia, mite siat ding bek a ngaihsutnate kilamdang mahmah hi. Lai Siangtho sungah, Pasian in hehpihna nei, lungduai, thuak keikai, itna tawh kidim, siatna tawh kipelhsak cihte hangin a hehsuakin Pasian a mawhsak, Jonah bek mah hi.
Mi tampi in Pasian’ zia le tongte hangin lungdam kipak zaw uh hi. Nineveh khua mite in siatna kidim ahih hangun, a mawhna uh kisik ahih manun Pasian in siatna tawh kipelhsak ahihlam a lungdam masa penpen ding Jonah hi napi, a gen bangin tangtung lo ding hita, kamsang zuau hong kici ding hi tah! ci-in Pasian’ hehpih itna hangin hehin a thangpaai mahmah hi. Tua khuapi sunga mite’ nuntak manphatna tel lo-in, ama min siat ding patauh cihtakin patau hi. A kisik mite Pasian in a hehpih manin Jonah lungdam het lo, nak heh mahmah zawsop hi. Ellen G. White, Prophets and Kings, 271.
Jonah 4: 10, 11 sim in. Mihing’ siatna tawh kilehbulh Pasian’ zia le tong bang pulaak hiam? Eite thu hong khen ding i lawmte (mihing) hi lo-in, Pasian ahih manin bang hangin nuam huai hiam?
___________________________________________________________
______________________________________________________________
Jonah 4 sungah Jonah a hehna nih vei kimu thei hi. Bang hang a heh hiam cih leh, Pasian in a gen bangin siatna tungsak lo-in mihing tul za khat valte siatna tawh kipelh sak hi. Jonah heh hi. Bang hang hiam cihleh a lu tunga zam lenggui keu hi. Ama aa ding bekin a nungta mi kipuahpha ta hen. Pasian in, mi khempeuhte’ Pa ahih manin Jonah in midangte zong sanggam bangin a ngaihsut na’ngin hilh hi. Pasian a langdo mite zong amah bangin Pasian’ it mihing ahihlam Jonah in a tel ding kisam hi. Lenggui khat sangin mihing tul za khat manpha zaw buang lo diam?
Topa in Jonah a tai-na ngaihsun kik in. Tua bang mahin Pasian in eite zong a hong hilhna a om kha hiam? Angsung hamphatna, mimal hamphatna bek ngaihsunin a mangthang mite awlmawh lo-in na om kha hiam?
FRIDAY AUG. 28
SIMBEH DING: Cornelius inn a kikhawm mite’ tungah Peter in a mangmat lamdang a sakziate pulaak hi. Peter in tua muna kikhawm Gentile le Jew mite Kha Siangtho in ompih hi, cih theitel hi.Jew mite’ tungah kipia Kha Siangtho mah, Gentile mite’ tungah zong kipia hi, ci-in teci pang hi. Peter in kuamah deidan lo-in nasem dingin Pasian in hilh khin hi. Paul le Barnabas in zong Gentile mite lakah tua bang buaina thuak uh hi. A hong hotkhiatna dingin, Khrih in kilamdanna khempeuh, mawhna kici khempeuh hong hepkhiatsak hi. Tua bangin Peter in thu a gen ciangin pawl sung buainate veengthei hi. Ellen G. White, The Acts of the Apostles, 193, 194.
KIKUP DING DOTNATE:
1. Peter’ mangmat siksanin mi kim khat in sa siang le sa sianglo, nek le dawn tawh kisai thupiakte, bei khin ta hi, ci uh hi. Peter’ mangmat in ngimna nei hi-a, tua ngimna Peter mahmah tungah
kihilh hi. Gentile (mi sianglo) le Jew (mi siang ) ci-in khen kei in, cih thu hi hi (Sawl. 10: 28). Tua hi-in Peter’ mangmat in nek le dawn thu tawh kisai a hilhna hi lo-in, Pasian in pau le ham, minam siksanin kuamah khentuam nei lo hi, ci-in a hong hilhna hi zaw hi. Bang hangin Peter’ mangmat in nek le dawn thu tawh kisai hi, ci uh hi ding hiam? Koi bangin Lai Siangtho simin theihtelsiamna kitangsapzia na phawk hiam?
2. Rom. 2: 14 – 16 limtakin ngaihsun in. Bangci-in pawlpi in hotkhiat nasep sem leh kilawm hiam? I thupuakte nuntak pih kei leng, bang hangin mite tungah va gen kul hiam?
3. Tuhunin kizang thei ding bang thute hong hilh hiam? Gentehna-in: (1) mimal nasep (2) Lungdamna Thu (3). Lai Siangtho (4). I mavuan (5). Jerusalema makaite khat le khat kizopzia uh cihte tawh kisai-in Sawl. 15: 1- 35 sim in. Tuhun aa dingin Jerusalem a kikupna etteh takcing hi.
