MUC

Print Friendly and PDF

Sunday, June 21, 2015

Sabbath School Lesson 3


LESSON 3   JULY 11 – 17

LAMETLOH PASIAN’ NASEM KHAT



SABBATH NITAK: TU KAAL SUNG SIM DING: 2Kum. 5; 2: 1- 15; Mk. 1: 40 – 45; Jn. 15: 5; Rom. 6: 1, 4 – 11.


KAMNGAH: Kamsangpa Elisha hun lai-in zong Israel gamah phak natna a vei tampi a om hi. Tua hi napi Syria mi Naaman bek longal a dang khat beek a kisiangsak kei hi. Luke 4: 27.

BC 970 – 560 sunga Israel mite’ nunzia, Elijah le Elisha nasepziate Kumpite sungah kimu thei hi. Elisha nasepzia le Topa Jesuh nasepzia kibatna tampi om hi. A nih tuakun,

misi thawhkiksakna, phak natna damsak, an tawmno khat tawh mi tampi gilvahsak uh hi.

Tu kaal sung i sin ding thu in: kuama phawk khak loh, Pasian nasemin zong mite’ ngaihsut khak loh numei no khat ii teci panna hangin hauhna, liatna tawh kidim, a kiphasak milim bia cimawh galkap mangpi Naaman in Pasian’ vangliatna a mu-in Pasian a theihna zia ahi hi. Paunamcin, mi namcinte lakah nasepzia le hotkhiatna hong pai zia cihte i sin ding hi.

SUNDAY JULY 12

“KISAP BANG MAH NEI LO AHI ZONGIN...”


Namaan in Aram kumpipa’ galkap mangpa ahi hi. Amah a pu mitmuhna ah mi lianpi hi-a a kisang koih mahmah hi, bang hang hiam cih leh Topa in ama tungtawnin Aram a gualzo sak hi. Amah galkap hang khat hi napi a phak hi (2Kum. 5: 1).

Syria, Aramean le mite’ tungah ukna nei Naaman in kumpi Aram’ pahtakna ngah hi. Bang hang hiam cih leh Naaman in biakna lam hi taleh, galdo vai ah hi ta leh, kumpipa’ thudotpi khat ahi hi. Tua banah Naaman pen mihau mahmah khat hi (aneu 5, 18).

A nawngkai mahmah kammal ‘ahi zongin,’ cih kammal khat hong lut a, tua in, Naaman vangliatna, minphatna galhanna khempeuh a susia natna khat nei citciat hi. A gualzawhna khempeuh guallelhna hong suak hi. Hih natna tungtawnin Pasian’ kamsang khat tawh hong kimu hi. Tua bangin a kimuhtheihna uh pen a nungta Pasian a bia numei no’ nunzia hi bilbel hi.

Mk. 1: 40 – 45; 2: 1- 12; Lk. 8: 41 – 56 sim in. Khrih in cina khempeuh damsak thei hi napi, mi bang zah kidamsak hiam? Bang thu hangin Khrih kiangah mite pai uh hiam?

____________________________________________________

_____________________________________________________________

Hamsatna, gentheih cimawhnate in Pasian hong lunggulhsak thei hi. Pumpi taksa gimna, lungsim gimna, gam sung buaina a kipan a lauhuai tuamtuamte in Pasian tawh hong kinaisak thei hi. Mimal in i tuah thute a kipan, zinling, tuiciin, huihpi a tuak mite in mihing sangin vanglian zaw khat om hi, cih phawk thei uh hi. Tua bang hamsatna a tuah uh ciang, Pasian kiang a zuan mi tampi om hi. Tua bang hunte ah pawlpi in nasemin, a mangthang mite tungah hotkhiatna thu tangko hi.

Naaman in leitung hauhna, liatna kisap bangmah nei lo mipa khat hi. Ahi zongin lamet bei mi khat hi. Koi bangin Naaman mah bangin, tuahpha-in, tuahsiatna tawh na nungta hiam? Tuahphatna le tuahsiatna in Topa tawh hong kinaisak hiam?

MONDAY JULY 13

A KIPHAWKKHA LO TECI


2Kum. 5: 1-7 sim in. Bang thupiang kigelh hiam? Bang hangin Syrian kumpi in a sila numei’ thugen ngai dihdih hiam? Pasian in amaute bang hilh hiam?
____________________________________________________

______________________________________________________________

Numei no in Naaman inn sungah bangci gamtat cih i thei kei hi. Ahi zongin ama nunzia in Naaman le a innkuanpihte’ lungsim uk zo mahmah hi, cih kimu thei hi. Hauhna, liatna tawh kidim galkap mangpi khat in ama inn sunga sila numei no khat ii gen bangin kumpipa kiangah pai-in kumpipa’ phalna va ngen cih mawk! Tua banah kamsangpa a piak ding letsong honpi khat zong pulaak hi. Pasian in amaute’ tungah a pulaak nop khat om ahih lam i thei hi.

Pasian in sila numei no tungtawnin gitlohna tawh kidim Syrian kumpi gam suahtak nading le a nungta Pasian khat om hi, cih a theih nadinguh vaihawm hi. Bangzahin amaute ngongtat mah taleh, Samaria gam a Elisha tawh nasem hih numei no in kiniamkhiatin, ama nunzia in vanglian Pasian a upna kilangsak hi. Daniel le a lawmte mah bangin hih numei no in zong, a lauhuai ama thuak ding khempeuh Pasian’ min thanna piangsak hi. Pasian a um saltang numeino in a upna a hopsawn theih nadingin a nunna zang hi. Sila numeino’ gamtat zia le tong in milim bia-te aa dingin khuavak lianpi suak hi. Hih in neutung a kipan nu le pa’ thuhilhna in vanglian hi, cih zong hong theisak hi. Prophets and Kings, 245.

I upna, i nunzia tungtawnin mite in Khrih mu thei hi, cih na phawk hiam? Muanna tawh hong kipia thuman le khuavak na koici zat hiam? Israel kumpi in laikhak a ngah ciangin, a lungsim puak lamdang na sa hiam? Ama kampaute: Pasian ka hiam? Phak natna damsak thei ka hiam? Hih kammalte in tua natna pen siahuai mahmah ahih manin Pasian bek in damsak thei ding hi, cih pulaak hi. Kumpipa in damna ngah ding lunggulh hi. Damsak thei lo ding cih thei ahih manin paulap tuamtuam zong hi.

TUESDAY JULY 14

KAMSANG ELISHA


BC 900 kim a kamsangpa Elisha in kum 50 val sung bang a nasepte khen 18 bang pha ding hi. Ama nasep pen kamsangte sang tawh kisai, mihon tawh nasep hi phadiak hi. Kamsangpa in na lamdang tampi bawl hi. Kumpite le mi tampi in Elisha kiangah thudongin gamtang uh hi.

2Kum. 2: 1 – 15 sim in. Pasian in Elisha a sapna le ama nasepzia bang kigelh hiam?
____________________________________________________

_______________________________________________________________

Elisha in Pasian’sapna ngah takpi ahihlam amah le amahin kitheitel hi. Elijah tungah kipia sangin a tamzaw Kha Siangtho’ vangliatna ngen ahih manin, amah kia bek in bang mah sem thei lo ahihlam kiphawk hi. Khrih in, Kei in lenggahgui ka hi hi. Note in a hiangte na hi uh hi. Kei tawh kizom mi in gah tampi gah ding hi. Kei lo-in bangmah na sem zo kei ding uh hi, cih pen Elisha in zong thei hi, cih kilang hi (Jn. 15:5). Topa nasepna ah bang dinmun ah i om zongin huhna kisam den ihihlam phawk ding kisam hi.

Elisha in a nget vangliatna ngah hi. Elisha in Pasian’ sapna telcianin a sep dingte sem takpi hi. Kumpipa kiangah Israel gamah kamsang khat om hi, cih thei ta in, ci-in laulo-in pulaak ngam hi (2Kum. 5:8).

Ama kumpi’ inn tawh tehna-in cihtak het lo Elisha’ kongmai-ah galkapmangpipa le a zuite omzia ding ngaihsun in. Tampi kilamdang hi. Bangzahta-in kihtakhuai mah ta le-uh Elisha in amaute kihta het lo hi. Elisha in kamtai dingin a uliante sawl tuan lo-in, a nautangte khat sawl ziau hi. Gamlapi pan hong pai uh hi mah taleh, Jordan gunah pai dingin sawl hi. Elisha in a mawksawl hi sam lo-in, “damna na ngah ding hi,” ci-in kamciam hi. +A kiliansak galkapmangpipa in nasa mahmah ding hi. Tua ding mahin kamsang in a gen hi kha ding hi.

WEDNESDAY JULY 15

NAAMAN’ DAMNA


2Kum. 5: 11 – 14 sim in. Naaman tungah kihilh thu le ama theih ding bang thu om hiam? Nang le kei bang hong hilh hiam?
____________________________________________________
______________________________________________________________

Elisha in mitphial, aisan thei mite sep bangin sem hi leh, Naaman in nial hetlo ding hi. Naaman heh mahmah hi. Bang hang hiam cihleh, Elisha in hoih tak dawn lo hi. Tua banah a natna dam nading Jordan gunah pai dingin sawl hi. Naaman a heh ding mah hi. Elisha in aomna panin pusuakkhia-in galkapmangpipa dawn leh kilawm buang hi. Tham lo-in buantui tawh kidim Jordan gun sangin Damascus gam sungah tuisiang zaw tampi om hi. Ahi zongin Pasian in Naaman dam nadingin Elisha tungtawnin Israel gam sung Jordan gunah pai dingin thupia hi. Bang hang hiam cihleh, Pasian in Israel gamah Ama kamsang khat om hi, cih Naaman theihsak nuam hi.Pasian’ sawl bangin a gamtate Pasian in thupha pia ding hi, cih thu hong hilh hi.

Naaman’nungzuite in bang leh bang leh, Vantung Galkapmangpipa’ sawlna mang phot dih in, ci-in thum uh hi. Ama dam nading hi napi ama kiphatsakna lungtang in, a sila numeino khat ii sawlna bangin a gamtat ding, nam dang kamsang khat ii gen bangin a zuih ding, a tawpkhakna ah a nungzui silate’ sawl bangin a om ding haksa sa peuh mah hi. Ahi zongin dam ding bek lunggulh ngeungau zel hi. “Tua ciangin amah paisuk a Pasian mipa gen bangin Jordan ah sagih vei kipap-a a sa ngei bangin tangvalno bangin a siang hi” (2Kum. 5: 14). Naaman in damna a ngah nadingin a masa penpenin upna le thumanna kisam hi. Kiphatsakna a zawh ciangin Pasian’ deihna a zui mi ahihna buantui niin Jordan gun sungah sagih vei kipapna tawh pulaak hi. Tua ciangin damna ngah hi.

Rom. 6: 4 – 11 sim in. Naaman’ nunzia bang pulaak hiam? Bangci bangin Khrih sungah nunna thak tawh na nungta hiam?


THURSDAY JULY 16

THAKSUAK THU-UMMI


“Tu-in Israel sung longal leitung buppi ah Pasian om lo cih ka thei hi. Nong hehpihna-in na nasempa letsong hong sang in, a ci hi (2Kum. 5: 15). Hih thu in hotkhiatna ngahzia bang pulaak hiam? Mang. 14: 12; 1Jn. 5: 2,3; Rom. 6:1.

___________________________________________________________

______________________________________________________________

A phaknatna a dam khit teh Naaman in Damascus ah ciah pah vingveng nuam leh ciah thei hi. Ahi zongin nuamlua ahih manin a nungzuipa tawh kamsangpa kiangah vahawh phot uh hi. Tu-in Elisha tawh maitang kimu taktak uh hi. A nungta Pasian a thei nai lo mi khat in, Israelte’ Pasian in a vanglian Pasian hi, ci-in upna tawh pulaak hi. Lai Siangtho’ hong hilh thulaigil lianpen zong hih thu mah ahi hi. Naaman piangthak ahih manin Israelte’ Pasian tawh kipawl thei hi. Naamaan in Jordan gunah 7 vei kipapna thu in Pasian in nate piangsak hi cih thu zong pulaak hi.

Naaman in upna maan pulaak hi. Amah le amahin a ngah ngei loh ding damna ngah hi. Elisha in letsongte a nialna thu in hotkhiatna pen Pasian’ hehpihna bek in hong ngahsak thei hi, cih pulaak hi (2Kum. 5: 16). Naaman lungdam ahih manin Elisha tungah letsong a piaknopna a lungsim in, a upna hanga a kipia damna hangin a nuamna kilangsak hi. Abraham in zong kumpipa’ letsong nial hi. Tua letsongte’ hangin Abraham ka hausak hi, a cih ding deih lo hi (Pian. 14: 23). Elisha in letsong sang leh, Naaman in a theih ding thumante thei lo kha thei ding hi, cih Elisha in mu hi. Damna pen Pasian’ sep hi-in, hehpihna tawh kingah ahi hi.

“Hih thu mikim in thei ta hen. Khrih Honpa-in a sang mi khempeuh in, amah a Ukpa in zong sang uh hen. Khrih in ka Kumpi hi, ci-in Ama thupiakte i zuih mateng Khrih in eite Honpa hi, ci-in muanna taktak a nei nai lo ihi hi. Pasian i muan takpi leh, tua muanna kimu thei ding hi. Eite in muanna cingtak i nei khin hi. Tua in a gamtang upna hi. Itna tawh gamtatna ahi hi. Ellen G. White, Faith and Works, 16.

Midangte’n hong en leh, Khrih in na sungah nungta takpi hi, ci-in Pasian na itna a mu ding uh hiam?

FRIDAY  JULY 17

SIMBEH DING: Naaman in damna a ngah zawh kum za tampi khit ciangin, Khrih Honpa-in a sang mi khempeuhte’ ettehin i thei hi. Elisha hun lai-in Israel gam sungah miphak tampi om hi. Ahi zongin Syrian minam Naaman bek in damna ngah hi (Lk. 4: 27). Israel mite in um lo uh ahih manin Pasian in amaute paisan hi. Pasian’ piak thupha a awlmawh lo Israelte ngah ding thuphate, a nungta Pasian a thei ngei lo mi khat in, ama kisap phawk thei-in, thuman pompah tingteng thei ahih manin Pasian’ maipha ngah mi hong suak hi. Ellen G. White, Prophets and Kings, 252, 253.


KIKUP DING DOTNATE:

1.    Naaman in damna a ngah khit zawh kum tampi, tuhun dong mite’ kikup thu hong suak hi. Naaman in a upna hih bangin pulaak hi “Topa tung longal pasian dangte tungah meihal biakna le biak piakna ka piak nawn loh nadingin laa kop khat puak khop leitang hong pia in,” ci-in Elisha kiangah ngen hi (2Kum. 5: 17). Tua bangin a nget khit ciangin, “ Ahi zongin Topa in hih na khatah na nasempa hong maisak hen; Rimmon biakinn ah ka pu tumin ka ban tungah kingamin a kun ciangin kei zong ka kun hi- Rimmon biakiinah kei zong ka kun ciangin Topa in hih thu hangin na nasempa hong maisak hen,” a ci hi (aneu 18). Elisha’ dawnkikna in bang thulaigil pulaak hiam? Missionary nasemte in gammial (Thuman a thei nai lo mite) ah nasemin mite in Thuman a hong muh tak uh ciang, thakhat in amau ngeinate nusia zo pah lo ahih manun, lungduai ding a kisapzia hong hilh hi.

2.    Leitung minthanna zui-in thuman lampi pan lampial Pasian’ tel Israel mite sangin Zarepha meigongnu le Syrian mi Naaman in a theih uh thuman amau nuntak hun sungtengin nuntakpih uh hi. Pasian’ tel mite sangin dik zaw uh hi. Ellen G. White, The Acts of Apostles, 416.

3.    Naaman in a gamtatna tawh a upna tungtawnin damna le hotkhiatna ngah hi. Upna le gamtatna kizopzia ngaihsun in. Upna le gamtatna kibang lo hi. Hotkhiat ngah nadingin kisam tuak hi, cih thu bang hangin theihtelna thupi mahmah hiam?

To get the latest update of me and my works

>> <<