LESSON 2 JULY 4 – 10
ABRAHAM: HOTKHIAT NASEM MASA PEN
SABBATH NITAK: TU KAAL SUNG SIM DING: Pian. 12: 1 – 3, 6; 14: 8 – 24; 18: 18, 19; Heb. 11: 8 – 19; Gal. 3:6;
KAMNGAH: Abraham ngaihsun un. Amah in Pasian uma, ama adingin tua mah thumaanna in kisimsak hi. Tua ciangin a umte Abraham tate suak cih theitel un. Pasian in upna hangin Gentile-te dik tangsak nuam cih Lai Siangtho in mukhol a, Abraham kiangah, nang tungtawnin minam khempeuh thupha kipia ding hi,” ci-in lungdamna thu na gen hi (Gal. 3: 6 -8).
Judaism, Khristian, le Islam cihte Abraham’ upna siksan hi. Abraham pen Pasian tungah a citak mi khat hi. Pasian in Abrham le a suan le khakte tungah thu thum pia hi (Gal. 3: 29). (1). Pasian Gam le Ama thuman ngah kikin tua thuman a kemcing ding (2). Abraham suan le khak tungtawnin Honpa hong piang ding (3). A citak Pasian’ sila le namdangte Topa a theih nadingun amaute tungah khuavak hi ding, ci-in thupia hi.Tu kaal sungin i sin ding thu in Abraham in Pasian’ sapna ngahin, namdangte tungah a maan Pasian, Honpa Pasian le Piangsak Pasian thu pulaak ding, gammial nasep a sem mi ahihzia i sin ding hi.
SUNDAY JULY 5
A KISAMKHIA ABRAHAM
Topa in Abram kiangah, “ Na gam, na mite le na pa’ innkuante nusia-in nang kong lah ding gamah pai in. Nang minam lianpi kong suaksak ding a, thupha kong pia ding hi; na min ka liansak dinga, nang, thupha khat na hi ding hi. Nang thupha hong piate, thupha ka pia dinga, nang hong hamsiat peuhmah ka hamsiat ding hi; nang tungtawnin leitunga minam khempeuh thupha kipia ding hi,” ci hi (Pian. 12: 1-3).
Abram, a kilamsang pa cihna panin Abraham, mi nam khempeuhte’ pa, tu hun Iraq, (Ur) gam panin khangkhia hi. A suan le khak, ngeina, biakna nusia-in a theih nai ngei loh gamah pai dingin kisamkhia hi. Abraham in Ur pan a paikhiat zawh kum 100 khit bang ciang thuman mite’pa hong suak hi. Hamsatna le zia-etna tuamtuamte lakah a nungta Pasian’ teci muanhuai, khuamial lakah khuavak hong suak hi.
Pian. 12: 1- 3 sim in. Na nuntakpih ding bang thulaigil na mu hiam? Bangci bangin Abraham thuak bangin nang zong na thuakkha thei hiam? Heb. 11: 8 – 10.
____________________________________________________
______________________________________________________________
Abraham in a pianna gam nusia dingin kisam khia a upna tawh paikhia hi. Up ngam huailo thute um ding, Pasian’ sawl bangbang a sem dingin kisawl hi. Thuman, citak ahih manin ama tungtawnin mi nam khempeuh in thupha ngah hi. Abraham a kizia-et bangin thu-um mimal khat ciat zongin zia-etna thuak hi. Lai Siangtho kammalte le nisim nuntakziate tungtawnin Pasian in hong hopih hi. Hauhna, minthanna, sanggam u le nau, beh le phung cihte i nusiat hun hong om kha ding hi. Eima deihna nial cihte kisam hi. Pasian in hong sam ahih leh, i nial ding tuamtuam om hi.
Pasian in Abraham kiangah thupha kongpiak theihna dingin na omna panin paikhia in, ci-in sawl hi. Hih thu in na nuntakna in bang thu hong hilh hiam?
MONDAY JULY 6
KUMPI’ TUNGAH ABRAHAM’ TECI PANNA
Lot in Abraham’sanggam khat hi-in, Abraham paipaina-ah zui den hi. Jordan zangkuam mun hoih a tel manin, Sodom khua mite’ gitlohnate lakah nungta kha hi (Pian. 13: 1 – 3). Abraham in tua mite’ khut sung panin honkhia hi (Pian. 14: 11 – 6); a nungciang vantungmi in honkhia hi (Pian. 19). Abraham in galte’ khut sung panin Lot a hotkhiat nadingin galkap 300 val bang tawh kuankhia hi. Abraham in kumpite tawh kido-in amaute that mang khin hi.
Pian. 14: 8 – 24 sim in. Bangci bangin Abraham’ gamtat in a nunzia, a up thu, Pasian a upna pulaak hiam?
____________________________________________________
______________________________________________________________
Abraham in a zawh kumpite’ tungah Pasian’ vangliatna kilangsak hi. Lot a hotkhiatna-ah zong namdangte’ aa ding thupha hi ding a ngah sapna thu-ah citak hi. Jehovah bia-in mite aa ding thuman khuavak hi banah galmang mi khat ahi hi. Thuman pen guallel lo hi. Abraham in thuman kemcingin, a kinengniam mite suaktasak hi. Tua bangin thuman aa ding galhang ahihna, a kim a paam ah kizel hi. Galzo-in zawhna tawh a hong ciah ciangin, Sodom kumpipa in minphatna, pahtawina tawh Abraham muakin na deih bangbang gen in, kong pia ding hi, ci hi. Ahi zongin Abraham in salin a matte suakta sak ding simloh bangmah dang ngen lo hi. Leitung ngeina bang hi leh, galzote in hamphatna tampi ngah uh hi. Ahi zongin Abraham in galzawhna tungtawnin hauhna, meetna ngah sawm lo hi. Ama liatna ding bangmah ngaihsun lo hi. Amah tawh galdo mite’ ngah ding kilawmte pia zaw un, ci hi. Ellen G. White, Patriarchs and Prophets, 135.
Midang tawh na kizopzia en pha kik in. Upna thu aa dingin teci hoih na hi hiam?
TUESDAY JULY 7
UPNA THU-AH ETTEH DING
Abraham khialh ngei mah taleh, Pasian’ mi hi. Lai Siangtho in hotkhiatna ngah mite ihihzia, upna citak etteh dingin Abraham’ thu hong hilh hi (Pian. 15:6; Gal. 3:6)
Heb. 11: 8 – 19 sim in. Abraham’ upna tungtawnin Pasian aa dingin nungta thei, Ama aa ding nasep nei i hihlam na phawk hiam?
____________________________________________________
___________________________________________________________________
Pasian in Abraham a zat theih nadingin a masa penin ama omna panin paikhia dingin sawl hi. A nunzia lui khempeuh nusia dingin thupia hi. Pasian in nang le kei nuntakna ah zong Ama’ deihna le Ama thupiak tawh kituak lo nunna khempeuh nusia dingin hong sawl hi. (Heb. 11:8). Gammial nasemte in a sep nading mun, a pai nading mun thei buang uh hi. Ahi zongin Abraham in a pai nading mun thei lo hi.
Lungsim ngaihsutna khempeuh tawh Pasian’ tungah a nuntakna khempeuh a ki-ap mi in a mailam thu khempeuh lungmuanna taktak nei hi. A thei khol khat hileng, upna kisam lo ding hi. Bang mahmah theihkholh a om loh ciang bekin upna tawh kinungta thei hi pan hi.
Abraham in Pasian’ bawlsa khuapi lamen hi (Heb. 11:10).Hih lametna tawh nungta ahih manin a ngah ding nopsaknate hangin a phut khak hamsatna, zia-etnate cihthamsa lo-in kiptakin mainawt hi. Khapsa gamah pemta hi lo ding hi, cih theikhol hi. Ahi zongin hih leitungah khualzinmi, lengla ahihna kitel hi. Hih leitunga i nuntakna, leitung nate tu le tu-in manpha i sak hangin, tawmno sungin beimang lel ding hi, cih mukhol hi. Pasian’ sawlna bangin Abraham in Moriah mual tungah a tapa a piakna in a lian mahmah piakkhiatna hi.
Koi bangin upna tawh nungta na hihna kilang hiam? Bang zia-etna na tuak hiam? Bang nuamna na tuak hiam? Tu-a na thuak khak thute a theikhol hi lecin, tu a na nunzia tawh kilamdangin na nungta diam?
WEDNESDAY JULY 8
ABRAHAM: KHUALZIN MI
Abraham nunzia ngaihsun lehang a upna sungah Pasian’ vangliatna muanmawhna, lunghemna cihte kimu hi. Abraham’ pa le pute milim bia uh hi (Josh. 24:2). Hih thute hangin Pasian’ vangliatna muang zo taktak lo hi kha thei ding hi. Nih vei bang thuman thutak pulaak ngam lo, thulang gen (Pian. 12: 11 – 13; 20: 2). Sarah tawh ta na nei ding hi, ci-in a kigen ciang, Abraham in um lo-in nuihsan hi (Pian. 17: 17). Khial taleh, Pasian in Abraham zang veve a, Pasian’ zat mi hi dingin zong lunggulhna nei hi. Tua manin, Pasian in Abraham’ zia le tong puahpha hi. Pasian in bangci bangin puahpha hiam cihleh, mun khat pan mun khatah pemta mi-in koih a, a omomna munah puahpha pa le Pasian’ khuavak tangsak hi. Khualzin i cih pen pilsinna khat mah hi. Mite’ omzia, nunzia kithei-in kipuahphatna piangsak hi.
Israel mite in Jerusalem ah biakna pia dingin a zin kul uh hi. A khualzinna lampite, a giahna munte, a nek uh ante, nisa, khuadam cihte in amaute upna aa dingin zia-etna hi pahpah hi. Amaute’ biakpiakna, phatna la a sakte in, Pasian’ tapa tanu ahihna uh kilangsak hi. Abraham in a pianna Ur pan a sihna Hebron kikal sungah khua 15 bang nawk hi. Hih munte-ah biakna tau bawlin, thuman tangko hi.
Abraham in a nuai-a munte-ah bang bawl hiam?
Shechem gam Moreh (Pian. 12: 6, 7): _____________________
Hebron, Pian. 13: 18 – 14: 20 _____________________________
Mamre, Pian. 18: 1, 20 – 33 ______________________________
Moriah Mual, Pian. 22: 1- 14 _______________________________
THURSDAY JULY 9
ABRAHAM: AMA INN SUNGA TOPA’ NASEM
“Abraham pen a vanglian minam suak taktak dinga ama tungtawnin leitunga minam khempeuh thupha kipia ding hi. Ahang in, Topa in Abraham tunga a ciamsa thu a tunsak theih nadingin, ama nunga a tate le a innkuanpihte in thuman le thutanga gamtatna tawh Topa lampi a zuih nadingun amah ka teel zo hi, a ci hi (Pian. 18: 18 – 19). Hih thu in Topa’ nasepna tawh kisai bang hong hilh hiam?
____________________________________________________
______________________________________________________________
Pasian in a’ kammalte mite a hilh dingin Abraham sawl hi. Abraham pen mi khempeuhte’ pa dingin teel hi. Bang hang hiam cihleh Abraham in a inn sunga om khempeuh Topa’ thukham a hilh loh khat zong om lo hi. Ama thuhilh in vanglian hi. Bang hang hiam cihleh, a hilh bangin amah mah nungta pah hi. Abraham innkuan sungah mi tampi kihel hi-in, milim biakna pan a kikheel zong honpi om hi. Ellen G. White, Education, 187.
Hotkhiat nasep a lawhcin nadingin innkuanin mapan kul hi. Sawltakte hun lai-in pawlpi in innkuan siksanin nasem hi. Abraham in Topa’ thu sungah a innkuanpihte a nuntak nadingun pantah hi. Tua manin zong Pasian in Abraham sam hi. Thuman le a hoih nate sepna in deihna hi-in, Pasian’ deihna bangin innkuan kimakaihna zong hotkhiatnasep mah hi veve hi (Pau. 21; 3).
Abrahamte’ innkuan in Topa tungah citak ahihna uh bang in pulaak hiam? Heb. 11: 11, 20.
____________________________________________________
______________________________________________________________
Pasian’ kamsang innkuan hi napi Topa’ deihna bangin a nungta lo innkuan om hi. Ahi zongin Abrahamte innkuan in Topa’ lampi a zui innkuan hi. (Pian.18: 19)
Topa’ lampi zui cih thu in nang aa dingin bang pulaak hiam? Koi bangin kiptakin Topa’ lampi zui mi hi ding na hiam?
FRIDAY JULY 10
SIMBEH DING: Pasian in Abraham samin, thupha le pahtawi-na zong pia hi. Abraham in a paipaina-ah mite aa ding khuavak hi dingin nungta hi. Mite kiang pan kihemkhia lo hi. A kim a paam a kipan kumpite tawh zong kizopna nei-in mite’ zahtak dingin nungta hi. A thumanna, a dikna, a citaknate in mite’ muhna-ah Pasian’ zia le tong pulaak ahi hi.Mesopotamia, Canaan, Egypt, Sodom dongah Pasian’ sawl Abraham tungtawnin mite in a nungta Pasian mu thei uh hi. Ellen G. White, Patriarchs and Prophets, 368.
KIKUP DING DOTNATE:
1. Moriah mual tungah Abraham le Isaac patate’ gamtat in lungsim hong sukha thu le Topa tung a citak mite’ nunzia ahi hi. Topa a um lo mite in cikziathuai le ngongtatna-in ngaihsun uh hi. Pian. 22 sim kik in. Bang thumanpha na mu hiam? Singlamteh le mawhna’ siathuaizia bang hong hilh hiam? Upna takpi tawh a nungta mite’ nunzia in koi bang hiam? Bang hangin mi tampi in Abraham kipiakkhiatna mulkimna bekin ngaihsun uh hi ding hiam?
2. Pian. 12: 11 – 13 sim in. Pasian’ mipa Abraham in a uplahna in na nuntakna ah bang thute pelh ding hong hilh hiam?
3. Pian. 15:6 mi kimpialin a theih hi-in, bang thu hiam? Bang tawh kisai-in kigelh hiam? Koi bangin Thuciam Thak (Rom. 4:3; Gal. 3:6; James 2:23) ah kizang kik hiam? Upna, sepna le hotkhiatna thu bang pulaak hiam?
4. Biakna makai mi minthang mahmah napi, a innkuanpihte in Pasian thuzui lo om hi. Innkuanpihte in Topa thu a zuih dinguh makaih, hilh kisapzia na phawk thei hiam?
