MUC

Print Friendly and PDF

Friday, June 26, 2015

Sabbath School Lesson 13

LESSON 13 SEP. 19 – 25

MI KHEMPEUH IN A ZAKKUL TAKPI MAH HIAM?


SABBATH NITAK: TU KAAL SUNG SIM DING: Sawl. 4: 12; Late 87: 4 – 6; Jn. 10: 16; 14: 6; Rom. 2: 12 – 16; 1: 18.


KAMNGAH: Tu-in khanghun sawtpi sung a kiselcip thuthuk kilaakkhiatna tawh kizui-a ka hilh lungdamna-thu le Jesuh Khrih kitangkona tawh note hong kipsak zopa, tua thuthuk tu-in kilaak khin a, minam khempeuh in um-a a thu a man theih nadingun tawntung Pasian thupiakna tawh kamsangte’ laigelhte tungtawnin kitheisak khin hi. Jesuh Khrih tungtawnin tua a pil Pasian khat bek tungah minthanna om tawntung ta hen. Amen. Rome 16: 25 – 27.

Topa in Lungdamna Thu puak dingin mite hong zang hi. Mi tampi in Lungdamna thu, Jesuh Khrih’ nunzia, a hong itna thu thei kha lo-in leitung nusia uh hi. Thukhen Ni ciangin, koi bangin Pasian in Lungdamna thu a za ngei mite tungah thukhen ding hiam? Jesuh Khrih thei kha lo napi, hotkhiatna ngah veve a om diam?


Jesuh Khrih bek hotkhiatna lampi hi, ci-in i um hi. Ahi zongin mi kim khat in, biakna khempeuh kibang hi, ci uh hi. Jesuh Khrih bek mah in Pasian’ zia le tong kilangsak hi. A nungta Pasian bek mahin mi khempeuh hong it hi. Amah bek mahin mi khempeuh hong honkhia hi. Pasian pen a thuman Pasian hi. Topa Pasian’ lampi in thumaanin thutang hi (Mang. 15: 3).

SUNDAY SEP. 20

JESUH MIN SIMLOH A DANG OM LO


Khristian kim khat in Lungdamna thu a sang mite bek in hotkhiatna ngah ding hi, ci-in um uh hi. Hih mite’ ngaihsutna ah, Khristian biakna lo buang, biakna dangte in hotkhiatna ngah lo ding hi. Biakna dangte pen Pasian langpang biakna-in ngaihsun uh hi. Khristian suak lo peuhmah hotkhiatna ngah lo ding hi, ci-in um uh hi.
Mi kim khat in Khristian biakna sung pan amau pawlpi bekin hotkhiatna ngah dingin ngaihsun uh hi. Pawlpi dangte ahih leh, vantung Pasian gam tawh kituak lo hi, ci-in gen uh hi. Pawlpi tungtawnin hotkhiatna ngah dingin lamen uh hi. 1302 kumin Pope Boniface VIII in a laigelh Unam Sanctam sungah, Roman Pontiff ukna nuai-ah a om teng bekin hotkhiatna ngah ding hi, ci-in ngaihsun uh hi.

Sawl. 4: 12 sim in. Bang thu kigelh a, koi bangin na tel hiam?

____________________________________________________

__________________________________________________________

Lai Siangtho’ hong hilh kammalte kitel mahmah hi. Jesuh Khrih sung bekah hotkhiatna om hi.Jesuh Khrih simloh kuamah in hong honkhia thei lo hi. Lai Siangtho sungah ei hoihsak khat, ei deih khat guang mawk lo-in, Lai Siangtho in bang gen hiam, cih kankul hi.

Hi thu ngaihsun in: Innkang sung khatah meikhute hangin mi khat in khuaphawk nawn lo-in zato kipuak hi. Siavuan siamahte’ khoi-na tawh tua mi in khua phawk kik hi. Tua mi in amah a honkhia kua hiam, cih thei lo hi. Tua mah bangin Jesuh in mihingin hong pianma hi taleh, hong piankhit hi taleh, Jesuh Khrih’ thu a za ngei kha kei phial zongin, Khrih’ hang bekin hotkhiatna kingah ahi hi.

Milim bia-te lakah a nungta Pasian bia mah kisa-in, milim bia mi tampi om hi. Tua mite in Lungdamna Thu a zak theih nading lampi omlo hi. Ahi zongin tua bang mite maimang lo ding hi. Pasian’ Thukham a zak ngei loh uh hang, a nungta Pasian khat om hi, ci-in Thukham Sawm nuntakpih uh hi. Kha Siangtho in amaute nunna khel ahihlam amaute’ nunzia-in pulaak hi. Tua bang mite pen Pasian’ tapa tanu kici ding hi. Ellen G. White, The Desire of Ages, 638.

MONDAY SEP. 21

BANGZAH THEIH KUL?


Khrih bek in mawhna sung pan hong honkhia hi. Mi kimkhat in hotkhiat ngah nadingin Khrih’ thu theih kul lo hi, ci uh hi. Tua bang mite in Khrih simlohin hotkhiat kingah thei hi, ci lo napi uh, Pasian in mi khat peuh tungah Khrih’ dikna pia thei hi, ci-in ngaihsun uh hi.

Khrih min za ngeilo, thei ngei lo, ahi zongin Kha Siangtho in amaute lungsimah hotkhiatna kitangsaplam phawksakin, mawhmai-na kisaplam theisakin, a theih a phawkna tungtawnin um uh ahih manin hotkhiatna ngah ding uh hi. Mi siangtho Job, Melchizedek cihte zong hih bang mite lakah kihel uh hi. A nuai-te in bang hong telsak hiam?


1.      Late 87: 4 – 6 ______________________________________

2.      John 10: 16 _______________________________________

3.      Sawl. 14: 17 _______________________________________

4.      Sawl. 17: 26 – 28 ___________________________________

5.      Rom. 2: 12 – 16 _____________________________________

Pasian in mimal’ gamtatna bangin thaman hong pia ding


hi.Topa’ min than nading, ama vangliatna le nuntak tawntungna a zong den mi tungah,Topa in nuntak tawntungna pia ding hi. (Rom. 2: 6,7). Paul’ pulaak thu in Khristian biakna sung hilo mi khat in ama tungah kilaak nuntakna thuguipite a zuih leh, nuntak tawntungna ngah ding hi. Pasian’ thukham tawh kituakin mihing in ngaihsutna nei-in, a sia le a pha khentel theihna zangin a sia hemkhia-in, a pha a zui mi, Lungdamna Thu za ngeilote tungah Pasian’ thukhenna a tuam khat hi ding hi. Hih bang mite in Kha Siangtho’ sapna za-in, Kha Siangtho tawh a nungta khawm mite ahi uh hi.

Thu-um hi ta leh, a um lo mi hi taleh, mi khat ii lungsim ngaihsutna theilo ihih manin amau tawh kisai-in thukhen pahpah ding kidop kul hi.

TUESDAY SEP. 22

“BIAKNA KHEMPEUH KIBANG”


Mi kim khat in “Mihing in bangbang umin zui taleh mi khempeuh in tawntung nuntakna ngah ding hi” ci-in um uh hi. “Lungdamna Thu za ngei ta kei leh, za-in um ta kei leh hotkhiatna ngah ding hi. Bang hang hiam cih leh, Pasian in mi khempeuh it hi,” ci uh hi. Pasian in mi khempeuh it ahih leh, bangci bangin a mangthang mi om ding a, kat le mei tawh kisiamang ding mite, kuate hi ding? Bangci-in Pasian in a it mi khat susia ding?

Mi khempeuh in nuntak tawntungna ngah ding hi, cih upna in leitung a om biakna khempeuh kibang hi, cih upna piangsak hi. A maan zaw, a hoih zaw biakna cih om lo hi, ci-in ngaihsun uh hi. Hih thu a um mite in, “biakna kici khempeuh in gamtat hoih, thuman, a hoih zaw nuntakna mah pulaak ciat uh hi.Tua hi-in upna khempeuh kibang hi. Bang bang biakna in Pasian kiang hong tunpih ding hi; biakna dangte tungah Khristian biakna i va gengen pen hai-vai lel hi,” ci-in ngaihsun uh hi. Hih bang upna tawh kisai Lai Siangtho in bang hong hilh hiam?


Jn.3: 18; 14: 6; Mang. 7: 13, 14; 20: 14; 21: 8; Dan. 12:2; 2Thess. 2: 10.
___________________________________________________________

___________________________________________________________

Mi khempeuh in tawntung nunna ngah ding, biakna khempeuh kibang hi, cih pen Lai Siangtho tawh kilehbulh hi. Mi khempeuh in hotkhiatna sang lo hi; upna khat peuhpeuh tawh hotkhiatna kingah lo ding hi.


Khrih bek in hotkhiatna lampi hi, cih a nial mite tungah, koi bangin hotkhiatna thu na gen diam?(Jn. 14: 6).

WEDNESDAY      SEP. 23

MAWHNEITE IN HEHPIHNA KISAM


Pasian in leitungah a Tapa hong sawlna pen mawhsak a thukhen dingin a hong paisak hi lo-in, leitung mite honkhia dingin a hong paisak hizaw hi (Jn. 3: 17). Hih in mi khempeuh tungah lametna bang hong guan hiam? Koi bangin Lungdamna thupuak nasep nadingin tha hong guan hiam?

____________________________________________________

______________________________________________________

Mi khempeuh mawhnei mi hi (Rom. 3: 23). Pasian in mi khempeuh kisik ding, (Sawl. 17:30; 26: 20; 2Pet. 3:9), hotkhiatna ngah ding hong deih hi (1Tim. 2:4). Eden huan sunga kipan Pasian in mi khempeuh honkhia nuamin, mawhna suksiat nadingin nasem hi. Singlamteh tungah Khrih’sihna simloh, bang in Pasian’hongitna le mi khempeuh a hotkhiatnopna pulaak thei ding hiam? Ahi zongin Pasian a langpang veve mite kisia ding uh hi.

Pian. 6: 11 – 13; Rom. 1: 18; 1Thess. 2: 12; Mang. 21: 8; 22: 15 sim in.A lauhuai bang thu na mu hiam?

____________________________________________________

__________________________________________________________

Pasian in mi khempeuh it hi. Mi khempeuh in Pasian’ hehpihna kisam hi. Khrih tungtawnin Pasian’ hehpihna kilang hi. Hehpihna thu pulaak dingin nang le kei hong kisawl hi. Pawlpi in hotkhiatna thu tangko dingin Pasian’ khutzat ahi hi. Nasem ding le Lungdamna thu gen dingin pawlpi om ahi hi. A kipatcil a kipan, Pasian in tua dingin pawlpi koih hi. Khuamial sung pan khuavakna-ah a hong sap khit teh, Pasian’ vangliatna pulaak ding mite ihi hi. Pawlpi le nang le kei in Khrih’ hehpihna ngah hi-in, Ama itna le hehpih kilangsak dingte ihi hi. Eph. 3:10. Ellen G. White, The Acts of the Apostles, 9.

Koi bangin siatna tawh kidim leitungah Pasian’ vangliatna, itna kilangsak zaw thei ding na hiam? Tua bangin na nuntak theih nadingin na nuntakna sungah kikhel ding bang om hiam?


THURSDAY SEP. 24

NASEM DINGIN SAPNA


“Upna nei mite lakah na kasep ciangin amaute ka ngahzawh nadingin amaute mah bangin ka gamta hi. Tua ahih manin ahih theihna lam peuhpeuhah mite ka ngahzawh nadingin mi khempeuh’ ngeina ka zui hi. Hih bangin ka gamtatna pen amaute tungah Lungdamna Thu ka tuttheih nading le keima nasep hoihtakin ka septheih nading ka deihna ahi hi.” 1Kor. 9: 22, 23.

Paul in bang thulaigil pulaak hiam? Koi bangin i nuntakna-ah zangthei ding i hiam?

____________________________________________________

_______________________________________________________

Hotkhiatna nei Pasian in mawhmaisakna thu tangko dingin Ama’pilna tawh mihing mah hong sawl hi. Pasian in numei, pasal kuamah deidan lo-in, vantung mite le Kha Siangtho tawh kopin, Ama nasem dingin mawhnei mite mah hong teel hi. Pasian in Israel tungah khuavak pia hi. Ahi zongin amaute in tua khuavak tangsak lo uh hi (Matt. 5:15). Thupha tampi ngah napi kuama tungah hawmkhia lo uh hi. Midangte pia lo-in, amau aa ding bekin nungta uh ahih manin siatna tuak uh hi. Pasian in ci bangin a aal dingin thu hong pia hi. “Pai-in, mite nungzui suak sak un,”ci-in thu hong pia hi (Matt. 28: 19; Mark 16: 15, 20: Sawl. 1:8). Ahi zongin Israelte mah bangin mihing’ kicinlohna in nasep susia zel hi.

Hotkhiat nasep a tuantualsak thei thute in “nasep ding geelkhol lo, mun kek lo, nasem ding le a kisam nate kicing lo, a nasep le a mi kituak lo, nasep kiphal lo cihte hi. Hotkhiat nasep pen a baih nasep hi lo hi. Satan in ahih theihzah sitlo-in nasem hi. Ahi zongin lungkiat ding hi lo hi. Bang hang hiam cih leh, Pasian in Ama kamciam tangtungsak ding hi. Topa in “ka kam pana pusuaksa ka kammal zong tua bang ahi hi; a hawmin kei kiangah hong kileh lo dinga ahi hangin ka deih bangin tungsakin ka sawlna ah lawhcing ding hi” ci hi (Isa. 55: 11).

FRIDAY SEP. 25

Thuciam Thak sungah “leitung buppi” (kosmos: Matt. 26: 13; Mk. 14:9; 16:15) cih kammal in ni, kha, aksi a kipan na khempeuh a huamin a genna kammal hi. Leitung mun khempeuh (oikoumene: Matt. 24:14) in mihingte tenna, omna mun pulaak kammal hi.
Thu-um mite aa dingin mun khempeuh cih kammal in koi ciang huam hiam? Nungzui masate’ hunin Cyprus, Lebanon, Syria, Turkey, Macedonia, Greece, Italy, cih gamte-ah lungdamna thu kizelsak uh hi. Saklam Russia gam (Scythia), khanglamgam Ethiopia, nisuahnalam India gam, nitumnalam Spain dongah kizelsak uh hi, cih kimu thei hi.

Pawlpi masate in mun khempeuhah Lungdamna Thu kizel khin hi, ci-in a um uh diam? Pentecost Ni-in Kha Siangtho kibua-in pawlpi hong kipan a, mi namkim, pau namkim in Pasian’ nasep hotkhiatna thu za thei uh hi (Sawl. 2: 5 – 11). Pawlpi din kipatcil a kipan pawlpi in leitung mun khempeuhah Lungdamna Thu puak ding nasep nei ahihlam kiphawk hi. Amau hunin tua bangin sem uh ahih leh, tuhunin bangzahin sep zawk kan ding kisam hiam?

KIKUP DING DOTNATE:

1.    Tuesday ni-a dotna tawh kisai-in, Khristian upna bekin hotkhiatna lampi hi, cih thu na lawmte tawh kikum in. Tua bang upna in kiphatsakpihna hong tun hilo hiam? Hi leh, hi lo ngaihsun in.

2.    Pentecost Ni a kipan, pawlpi in a nasepna mun ding, leitung mun khempeuh cih kammal theitel hi. Jesuh hong thupiak in zong “pai unla, minamte khempeuh nungzui suaksak un,’ cih thu hong pia hi (Matt. 28: 19). Khrih hong pai kik mateng hih thu in mannei ding hiam? Koi bangin Vantungmi Thumte’ thupuak (Mang. 14: 6 -12) le Lungdamna Thu puak tonkhawm hiam?

3.    Lungdamna Thu za ngei kei taleh, hotkhiatna ngah om veve ding ahih leh, bang hangin Lungdamna Thu puak ding kisam veve hi ding hiam? 

To get the latest update of me and my works

>> <<