LESSON 11 SEP. 5 – 11
PAUL: A PIANZIA LE SAPNA NGAH MIPA
SABBATH NITAK: TU KAAL SUNG SIM DING: Sawl. 9: 1 – 22; 26: 18; Gal. 2: 1- 17; Phil. 3:6; 1Kor. 15:10.
KAMNGAH: “ Ahi hangin Topa in Ananias kiangah, “Va pai in! Gentile-te le a kumpite uh le Israel mite mai-ah ka min a pua dinga ka vanzat dingin amah ka teelsa ahi hi. Kei min hangin bangzah tak thuak ding cih amah ka lak ding hi,” a ci hi. Sawltak 9: 15, 16.
Paul pen mi thupi mahmah khat hi. Paul ii minlui in Saul hi. Moses in Israel mihonpi’ makai hi. Tua mah bangin Paul zong pawlpi masate’ makaipi hi. Amaute gel kilamdanna: Israel mite in Pasian’ deihna thei-in, Pasian tawh kituakin a gamtat nadingun Moses in Gentile mite lak panin Israel mite paikhiatpih hi. Paul ahihleh, Gentile mite in tua bang mahin Pasian’ deihna thei-in, Ama deihna bangin a nuntak nadingun, Israel mite tunga kipia Topa’ kammal siksanin Paul in Gentile mite makaih hi. Lai Siangtho in thu-um mi masate sangin Paul’thu pulaak zaw hi. Ama nasepna hangin kum 2000 sung bang lungdamna thu kizom to suak thei hi. Mediterranean tuipi gei khuakim khua paama a nasepnaziate tuhun nasep zia dingin etteh takcing mahmah hi. Ngeina tuamtuamte le thukhamte in Jew mite ukcip ahih manin, mite in ngeina le mi namte tungah kipuak ding lungdamna thu kilamdanzia a telloh laitakin, Jew mite
ngeinate mah siksanin nuntak tawntungna thute tangko khia hi.
SUNDAY SEP. 6
TARSUS KHUA MI SAUL
Saul’ suahna khua pen Tarsus hi. Hih khua in Syria le Asia nitumna kikal, sumbawl khuazin mite nawknawkna khuapi khat ahi hi (Sawl 22: 3). Tarsus khua sungah minam tuamtuam tengin, nasepna phual lianpipi omin laisinna sang hoih tampi zong om hi. Tarsus khua in, Rome makai, thuhilh min thang mahmah Caesar’ suahna khua zong ahi hi.
Saul’ nu le pa in, Benjamin’ suan le khak panin a khangkhia, namdangte lak a kithehthang Jew mi hi. Aneu min pen Saul hi-in, a khiatna in ‘Pasian tungah ngen’ cihna hi (Sawl. 13: 9). Gentile mite tungah Lungdamna thu hilh a kipat khit ciangin, Saul panin Paul ci-in min kilaih hi. Paul cih min in Rome kumpi suan le khakte’ min khat hi. Paul’ zi thu i theih loh hangin, amah pen Pharisee mi khat ahih mah bangin zi nei ding hi. A sanggamnu i theih hangin (Sawl. 23: 16), Paul’ nu le pate’ thu bangmah i thei kei hi. Paul pen Roman gam mi khat hi (Sawl. 22: 25 – 28).
Kum 12 a phak maciang, Tarsus khua-ah laisinin, tua khit ciang rabbi Gamalliel’ khut nuai-ah laisin hi (Sawl. 22: 3). Jew pasalte mah bangin puanbuk bawl siamna sin hi (Sawl. 18: 3). I gensa bangmahin Paul pen Pharisee mi hi-in, Pharisee cih a khiatna in ‘tuam om’ ‘tang om’ cihna hi. Moses Thukhamte ngat takin hilhin zui hi. Tua hang mahin mite’ mawhsakna tuak uh hi. Paul in Pharisee ahihna siangtakin pulaak khia hi (Sawl. 23:6).
Paul in Pharisee ahihzah khatin, Jew mite le Gentile mite’ kiangah muibun takin Lungdamna Thu tangko thei hi. Tua bangin a thuhilhnate ah Paul in ngeina le a kikhel lo Pasian’ thuman khentelsiam hi.
I ngeina le Lungdamna thu kituak lo a om hiam? Upna khiam lo-in ngeina bangci zuih ding na hiam?
MONDAY SEP. 7
PAUL, MI CINGTAK
Mihing in omzia le lungsim puakzia a tuamtek i nei hi. Kim le paam, ngeina, khangguizui, theihna le sinnate hangin kilamdang zong hi kha thei hi. Zia le tong, gamtat khuahek i cih in, tuate khempeuh kigawm ahi hi.
Sawl. 9: 1; Phil. 3: 6, 8; 1Kor. 15: 9, 10; 1Tim. 1: 16; Gal. 1: 14; 2Kor. 11: 23 – 33 sim in. Paul in bangci mi hi-a, zia le tong bang nei hiam?
____________________________________________________
_______________________________________________________________
Paul pen upna kip nei pa, a lawp mahmah mi khat hi. A kikhelma-in Pasian aa ding ci-in mi bawlsia hi. Stephen kidenlup ding thapia pa hi (Sawl. 7: 58); numei, pasal tampi thongkhia mipa hi (Sawl. 8: 3). Sawltakte a thah sawmsawm den mi khat hi (Sawl. 9: 1)Pasian nasepna a dongtangsak mi pa hi (Sawl. 9: 2; Gal. 1: 13).
Siat gamtatna a hat mahmah bangin na hoih a hong sep tak ciang hamsatna khempeuh a nawktan zo mipa hong suak hi. A upna kip lo hi leh, tua bangin nungta thei lo ding hi. Khrih aa ding na khempeuh sumh ngam hi. Leitung na khempeuh niin bulom bangin ngaihsun hi. Paul in man nei le mannei lo nate khentel thei hi.
Paul pen a kiniamkhiat mi khat hi. Thu-um mi a bawlsiatnate phawkkik hi kha thei hi. Pasian’sapna ngah dingin amah le amah kilawm kisa lo hi. Pasian’ sianthona tawh ama nunzia a tehkak ciangin, a mawhna lianlua sa hi. Tua hangin Pasian tungah lungdamin, kiniamkhiatin, ki-ap hi.
Pasian’ vangliatna khuavak le Khrih’ sianthona in hong tan leh, mawhna, kihhuaina khempeuh kiselcip zo lo ding hi. Tua in siatna, hoihlohna khempeuh hong hepkhiatsakin, sianthona hong lunggulhsak thei hi. Ellen G. White, Steps to Christ, 29.
A kiphatsak lo kuamah om lo ding hi. Koi bangin Singlamteh in kiphatsakna veengsak thei hiam?
TUESDAY SEP. 8
SAUL PANIN PAUL
Sawl. 9: 1- 22 sungah Paul’ kikhelna kimu thei hi. Bangci-in ama kikhelna le Pasian nasem ding sapna a ngahna thu kizom hiam? Sawl. 26: 16 – 18.
______________________________________________________________
______________________________________________________________
Paul a kikhel a kipan Jew le Gentile mite’ tungah Lungdamna thugen dingin Pasian in sehkhol hi. Pasian’ na a sem dingin a kithawina-ah, a thaksuahna sangin a thupi zaw thudang bang mah om lo hi. A kikhelna thu, a thaksuahna thu mah a tangko ding thu hong suak hi. “ Tu-in tho inla, na khe-in ding in. Nang ka nasem ding le kei tawh kisai na muhsa teng le kong lah lai dingte ah teci dinga hong seh dingin na kiangah kong kilak hi” (Sawl. 24: 16). Paul in a theihloh thu, genlo hilh lo hi. A theih thu, a tel thute bek gen hi.Pasian’ deihna le Ama kammalte tawh kituakin nasem hi (Rom. 1: 1, 2)
Sawl. 26: 18 sim in. Paul’ nasepna hangin bang thu piang hiam?
_____________________________________________________________
______________________________________________________________
Paul’nasepna hangin a piang ding thuphate in:
1. Mite’ mit vaksak hi. Mite in Pasian a deihhuaizia, musak, theisakin, nuntakpih theihna
2. Khuamial panin khuavakna-ah: mawhna theihlohna pan mawhna theihtelna (Lk. 1: 78, 79)
3. Satan’ vangliatna pan Pasian’ vangliatna ah
4. Mawhmai ngahna. Mawhna pan suahtakna, damna, nuntakna.
5. Pasian’ sianthosak mite tawh kipawl theihna. Minam, pau, ngeina, numei le pasal kideidan lo-in Pasian’ innkuan khat hihna Bangci bangin Khrih tawh kizopna na nei hiam? Ama’ thu hong
hilh in, hong kici leh, koi bangin na dawng ding hiam?
WEDNESDAY SEP. 9
MITE LAKAH NASEM PAUL
Jerusalem a kipan Illyricum kimkot khempeuhah Lungdamna Thu kitangko khin hi (Rom. 15: 19). Hotkhiat nasepna-ah bang thute kimu thei hiam? 1Kor. 1: 23; 2: 2; Gal. 6: 14; Phil. 1: 15 – 18.
______________________________________________________________
______________________________________________________________
Paul nasepna panin a kilang mahmah thu khat in: koi koi-ah a pai zongin singlamteh tungah thahna thuak Khrih’ thu mah genpi-in nei hi. Hih in Pasian’ sapna ngahin tua sapna thu-ah a cihtakna kilang hi. Tuhunin zong i gen ding, i hilh ding thu, i sepna khempeuh ah eite tangin sihna thuak Khrih’ thu mah bulphuh ding kisam hi.
Paul in a thu bek gen hi lo hi. A paipai-na ah pawlpi phut hi. Kol. 1: 28 sim in. Paul in koi gen hi ding hiam? Hotkhiatna thuhilhna maw ahih kei leh, nungzui hihna maw?
_____________________________________________________________
_____________________________________________________________
Paul’ laikhakte in hotkhiatna thu bek hi lo-in, pawlpi tawh kisai thu zong kihel hi. Paul in a nasepnate ah, thuhilh bek hi lo-in, thu-umsa mite kemin khoi, pantah, khuatuahsak cihte kimu thei hi. Tua hi-in Paul’nasepna sung pan thu thum kimu thei hi: Jesuh’ thu tangko, pawlpi phut, thu-um mite pantah cihte kimu thei hi.
A nunung pen na teci panna ngaihsun in. Koi bangin Khrih na pulaak hiam? Bangci bangin Khrih bulphuh den ding na hiam?
THURSDAY SEP. 10
HOTKHIAT NASEP LE NGEINA TUAMTUAMTE
Ngeina tuamtuam om hi. ‘Kei’ ‘ nang’ ‘ko aa’ ‘no aa’ cih kammal te in ngei-na pulaak kammalin i zang hi. Greek mite in amau mi nam simloh namdangte nam niam, mi gilo-in (barbarian) ngaihsun uh hi.Jew mite in zong amau minam simloh, Gentile mi, ci-in ciamteh uh hi. Gentile mite lakah hotkhiatna thu a kizelh tak ciangin tampi in hotkhiatna thu um uh hi. Thu-um mi khangin buaina zong hong khang hi. Tua buaina bulpi pen Gentile mite in vunat lo-in pawl sungah lut thei ding hiam? cih thu ahi hi.
Gal. 2: 1-17 sim in. Bangci bangin hotkhiatna thupuak tawh kisai-in ngeina tuamtuamte in hamsasak hiam?
____________________________________________________
_____________________________________________________________
Antioch khua thu-um mite a tamzawte in Peter’ thu genna panin a kikhel Gentile mite hi. Peter in Kha Siangtho’lamlahna bangin hotkhiatna thu tangko hi. Peter in Gentile thu-um mite tawh buaina neilo hi. Ahi zongin Jerusalem pan Jew mimaite hong pai tak teh, a muan mahmah uh makai Peter in Gentile thu-um mite nawlkhin hi. Peter’ gamtatzia hangin Gentile-te in nasa uh hi. Gentile thu-um le Jew thu-um, khennih kisuah pah hi. Ellen G. White, The Acts of the Apsotles, 197, 198.
Paul le Peter in pupa ngeina tuamtuamte hangin pawl sung buainate lemtuah uh hi. Gentile-te in Jew minam suah kul lo-in pawl sungah om thei uh hi. Paul’ pianzia mahmah in hih thu limtak hong lak hi. Amah mah Pharisee hi ngei hi. Gamaliel’ khut sung pan a khangkhia, Roman biakna-ah a kip mahmah Roman mi panin kikhelin Khrih’ nungzui le ama Sawltak khat hong suak hi. Tua hi-in Paul in a kip tawntung thuman thu le ngeina tuamtuamte khentel mahmah hi.
Koi bangin a tawntungin a kip den ding thute le tawmvei sung kimang ngeina thute na khentel hiam?
FRIDAY SEP. 11
SIMBEH DING: A thanemte ka ngah theih nadingin a thanemte kiangah a thanem ka suak hi. Mi pawlkhat ka hotkhiat theih nadingin a hih theihna lamlamah mi khempeuh tungah na khempeuh ka suak hi. Lungdamna thuphate ah tanh ka neih theih nadingin lundamna-thu hangin hihte khempeuh ka sem hi. 1Kor. 9: 22, 23.
1Kor. 9: 19 – 23 sim in. A mun le a hun, tualkhua’ ngeina tawh kizui-in thuman kitangko ahihzia (contextualization) hong hilh hi. Mite’ nunzia, ngaihsutna le amau ngei-na tawh kituak, amau dinmun siksanin Lungdamna Thu hilh theih ding kisam mahmah hi. Amau ngeina nusia tuan lo-in Khrih’ hotkhiatna a san ding uh thupi mahmah hi.
Jerusalem khua kima om Jew mite in biakinnpi a muh sialun, nam dangte lak pan teltuam minam ahihna uh phawk den uh hi. Jew tampi in hotkhiatna thu um mi a hong suak a tam zawk semsem tak ciangin amau Jew ngeina a bei khak ding patauh uh ahih manin, amau ngeina zuih pih ding thukhun hangin pawl sung hong buai hi. Jew ngeina ultungsak nuam mipawl khat in makaite’ khensatna sang nuam lo uh hi. Ellen G. White, The Acts of the Apostles, 197.
KIKUP DING DOTNATE:
1. 1Kor. 9: 20 sim in. Koi bangin nam tuamtuamte lakah hotkhiatna thu tangko nasep huh thei ding hiam?
2. Paul in a beisa hunin bangzahin khialin, mawhna lianpi nei hi mah taleh, Pasian in tua mawhna khempeuh maisakin, Ama nasem dingin zang thei hi. Na mawhna kisikin, mawhmai ngahin, Khrih’dikna tawh Ama’ nasem ahi dingin koi bangin Paul’ nunzia in hong makaih hiam?
