Thumasa
Tua ciangin amaute kiangah Jesuh pai a, “Vantung le leitung thuneihna khempeuh kei hong kipia khin hi. Tua ahih manin pai unla, minamte khempeuh nungzui na suaksak un. Pa, Tapa le Kha Siangtho minin tuiphum un. Kong thupiakte khempeuh a zuih nadingun na hilh un. Hun bei dongin note a hong ompih tawntung ding kahihna thu phawk ta un,” a ci hi. Matt. 28: 18 – 20. Sihna pan a hingkik Khrih bia-in, mite Ama nungzui hi dingin a sam nasep mah a dang nasepte sangin thupi zaw hi. Nungzui sawm le khatte tung hi taleh, Nungzui John tungah thupiak in mite Khrih’ nungzui suak ding cih thupiak ahi hi.Vantungmi thumte’ thupuak le Khrih’ Sawlna Lianpi in hun nunung a eite’ thupuak ding ahi hi. Leitung mun khempeuhah tua Thu a puak dingin, Pasian in pawlpi hong sawl hi; sawlna ngah ihi hi. I masuan in Jesuh’ thumanna, eite aa ding a sep khempeuh (Jn. 3: 16), eite aa ding tu laitakin a sep thu (Rom. 8: 34), mailam hunah a sep lai ding thute (1Thes. 4: 16) tangko ding i hi hi.
Mission cih kammal in ‘na khat sem ding sawlna ngah,’ ‘a sem mi’ cih khiatna nei hi. Sep ding khat sem cihna hi. Lungdamna Thu va puak kawikawi dingin sawlna ngah cihna hi pah hi. Lungdamna Thu thei nailo mite in a theih nadingun Pasian in a zat lampite tu quarter sungin i sin ding hi. Pasian’ bawl na khempeuhte’ thubulpi in mawhneite a hong tat nading ahi hi. Tua hi-in tangtawng pek pan Pasian’ geelna bangin tangtungin, a mangthang mite tungah tua Lungdamna Thu a vapuak mite’ nunzia i sin toto ding hi.
Lungdamna Thu puak nasep in ei aa hi lo, Pasian aa hi. Pasian kiang pan hong pai thu hi. Pasian’ hong itna siksanin nasep ahi hi. Pasian’ vangliatna in tua nasep mahialsak hi. Pasian’ sawlna ah citakin, Topa’ na sepna tawh kisai i telzawk nadingin, a nuai-a thute in hong huh thei ding hi.
1.Pasian in mihing hong bawl a, deihtelna hong guan hi.
2. Adam le Eve in Pasian’ thu mang lo-in, tua deihtelna zang khial uh ahih manun, Paradise ah om suak ding kiphal lo hi.
3.Paradise i tun kiktheih nadingin Pasian in aana zang lo hi.
4. Eite sih tang dingin Khrih si a, Pa Pasian tawh kilemkik nadingin Pa Pasian in a Tapa hong sawl hi.
5. Mi khempeuh in tawntung nuntakna a ngah
nadingun amaute tungah tua hotkhiatna puak dingin sawlna ngah ihi hi. Pasian’ nasep i cih in, a hong kamciamte siksanin, Khrih in mi khempeuh aa ding a thuakna, tu laitaka a sep nate le a sep lai
dingte mite tungah vagen dingin a hong kisawl ahi hi. LESSON 1 JUNE 27 – July 3
HOTKHIAT NASEM PASIAN’ZIA
SABBATH NITAK: TU KAAL SUNG SIM DING: Pian. 1: 26 – 28; 2: 15 – 17; Jn. 3: 14, 15; 1Jn. 2: 16; 2Kor. 5: 21; Matt. 5: 13, 14.
KAMNGAH: En un mite’ tungah amah teci suaksakin mite makai le ukpa ka hisak ding hi. Isa. 55: 4.
Leitung in kisia khin hi. A siasak mihing hi. Mawhnei mi i hi hi. Siatna tawh kidimin, khialhna i pianpih hi. Bang zahin mihing khangto-in nate hoih semsem taleh, hun in siatna tawh kidim hi. I mailam hun zong tuhun sangin hong hoih zaw lo ding hi. Sisan luanna, gimna, dahna le kahna vive i phu kha ding hi.
Tawntung siatna tawh i kipelh thei hi. Bang hang hiam cihleh eite tang Khrih hong si hi. Ama sihna hangin sihna pan tatkhiatna, na khempeuh kipuahpha ding, na khempeuh a thakin kibawl pha ding hi, cih kamciam i nei hi. “A masa van le a masa lei mangthang a, tuipi lah om nawn lo ahih manin van thak le lei thak ka mu hi.” Mang. 21: 1.
Pasian in hong nawlkhin lo hi; ama kinloh mite i hi kei hi. Mihing kia hong nungtasak lo hi. Mihing in ei le ei-in i nungta zo kei hi. Eite sangin a vanglian zaw om hi. Tua hi-in leitung kipiansak ma-in, eite sep zawhloh ding, Pasian in a sep ding, geelkhol hi.
SUNDAY JUNE 28
PASIAN IN NUMEI LE PASAL PIANGSAK
“Koi pan a piang ka hiam? Lai Siangtho buppi in hih thu pulaak hi. I pianna thei himhim phot lehang, bang hang a nungta-a, koici nuntak ding, koi lam manawh cihte i theitel ding hi.
Pian. 1, 2 en inla, 1: 26 – 28 sim in. Mihing hong kipiansakna le a dang piansak nate kilamdanzia ngaihsun in. Bang in nate le mihing kilamdangsak hiam?
____________________________________________________________
____________________________________________________________
1. Piansak nate lak pan mihing kipiangsak nunung pen hi. Mihing in amah kipiansak ma-a kipiangsak nate’ hoihna mu thei, nate kemcing ding le nate’ thu a sin ding ahi hi.
2. Nate’ kipiansakzia le mihing kipiansakzia kibang lo hi. “Om hen,” ‘ piang hen’ ci-in thupiakna tawh nate hong piang hi. Mihing kipiansak nadingin Nam Thum gawm Pasian: Pa, Tapa le Kha Siangtho kikumin eima lim le meel suunin mihing bawl ni, citektek uh hi. Piancil 1, 2 sungah nate’ kipiansakzia kigelh hi mah taleh, a pulaak thu bulpi in, nate’ thu hi lo-in, mihing a hong kipiansakzia hi zaw hi.
3. Pasian in Ama lim le mel suunin numei le pasal bawl hi. Na dangte bangin thupiakna tawh a hong bawlziau ihi kei hi. Topa Pasian in “ka lim le meel in hih hi,” ci-in a hong hilh loh hangin, ‘lim le meel’ i cih in mihing in ama nuntak in Pasian’ zia le tong a latsak theihna hi ding hi, ci-in i um hi. Bang hang hiam cihleh, piansak nate in a neih loh uh, sia le pha khentel theihna mihing bek in nei hi. Vasa khat hoih mahmah, ahi zongin a sia, a pha khentel thei lo hi. Pasian in Ama lim le meel suunin mihing bawl cih thu in, mihing in a sia, a pha khentelna nei hi. Tua gamtat zia le tong in, Pasian’ zia le tong a pulaak hi.
4. Pasian’ ukzawhna limcing dingin mihing tungah tua ukna hong kipia hi. A hong kipia ukna in tavuan masuan nei ihihlam hong theisak hi. Lai Siangtho’ hong hilh mihing a hong kipiansakzia-in Pasian tawh kizopna nei dingin a hong bawl i hi-a tua dingin nungta i hi hi.
I nuntakna-ah Pasian i masak den ding bang zahin thupi mahmah hiam? Bang hangin mihing in Pasian lo-in nuntak picing lo hiam? Sawl. 17: 18.
MONDAY JUNE 29
DEIH BANG TEEL THEI MIHING
Adam le Eve in sia le pha theihna singkung ne dingin, Pasian in sawl lo hi; zong dal lo hi (Pian. 2:9). Mihing in gamtat zia le tong a sia le a pha khenthei, teeltheihna nei hi, cih hong lak hi. Tua in Pasian’ lim le meel i neihna kilang hi. Ganhing in tua bang nei lo hi.
Pian. 2: 15 – 17 in deihteeltheihna thu bang hong hilh hiam?
____________________________________________________
_____________________________________________________________
Pasian in ni, kha, aksi, khuavak cihte bangin deihteeltheihna nei lo dingin mihing hong bawl lo hi. Hong bawl nuam hi leh, bawl thei hi. Tua nate in amau deihteelna tawh Pasian’ sawl a zui uh hi lo hi. Deihteelna nei lo-in a kipiansak bangin om lel uh hi. Ahi zongin piansak nate tawh kibang lo-in numei le pasal hong kipiangsak hi. Pasian in Amah mah aa dingin mihing hong bawl hi.
Aana tawh hi lo mihing’ deihteelna tawh Pasian a bia, a it ding hong deih hi. Tua lo-in, Pasian i itna om lo ding hi. Bang hang hiam cihleh, itna maan in sawl kul lo-a itna ahi hi. Mihing’ deihteeltheihna pen Pasian hong piak ahih manin Pasian in tua deihteeltheihna thupisim hi. Pasian in mihing’ deihtelnate khaktan lo hi.A hoih lo teel kha lehang, tua’ gah ki-at ding hi. Mihing in vanglian Pasian langpang dingin a khensat zawk manin siatna tawh kipelh lo hi.
Mihing in a deih bang teeltheihna tawh kisai phawk ding thu thum om hi.
1. Biakna Thu ah: na khempeuh a bawl thei Pasian in mihing deihna makaih lo hi lo hi.
2. Gamtat zia le tong: mihing in ama gamtat bangbangin a
gah at ding hi.
3. Leitung pilna: piansak nate bang lo-in, mihing in a deih bangin lungsim le pumpi kizopzia makaih theihna nei hi.
Tu nai-in khensatna khat peuh na nei hiam? Thuman thutak tawh kituakin khensatna ahi hiam? Khensat khialhna hangin i thuak khak gimna ngaihsun in.
TUESDAY JUNE 30
MAWH KIPATNA
Eve singah a muh ciangin nek dingin limci sa-a, a mit la lua, pilna zong ngah nuam ahih manin la-in ne hi. Amah tawh a omkhawm a pasal zong tawmkhat pia-a, a pasal in zong ne hi. A mit uh kihong a, guaktang ahihna uh a kithei tel uh hi; tua ciangin theiteh khuituah uh a amau le amau kituamna uh hi. Pian. 3: 6 -7.
Singgah tawmkhat nekna bek in mawhna hi lo hi. Ahi zongin a nekna uh tawh kisai i ngaihsut kul hi. Pasian’ lim le meel suunin kipiangsak Adam le Eve in deih bang teeltheihna kipia hi. Gilkialin singgah ne hi lo uh hi. Pasian’ thupiak tawh kituak lo hi, cih thei pipi mah amau deihteelna tawh a nek uh ahi hi. Amaute mah bangin eite zong Pasian’ deihna zui ding maw, eima’ deihna zui zaw ding, i tel thei hi. Ama thu zui dingin Pasian in aana tawh hong sawl lo hi. Mimal khat ciat in ama deih bang teltheihna hong guan hi. A tawp khakna-ah, i teel bangbang a gah i at ding hi.
Singgah a nekna hangun, Adam le Eve in Pasian pen kicinna taktak nei lo hi. Pasian’ ukna langpan hi, cih kilang hi. A ngah ding uh thaman in mi khempeuh tungah mawhna le sihna a hi hi. “ Tua ciangin Topa Pasian in amah a kilaknasa lei-tangah na sem dingin Eden huan pan amah hawlkhia hi. Mipa a hawlkhiat khit ciangin Eden huan nisuahna lam panga nuntakna singkung zuatna lampi cingsak a, cherub-te le nung le mai-a kilek den meikuang namsau a pangsak hi. Pian. 3: 23 , 24.
Adam le Eve in Eden huan nusia ding hi ta uh hi. Ahi zongin hehpihna ngah lo hi lo uh hi. A langpang mite in nuntakna singgah a ne dingin kiphal lo hi. Nuntakna singgah ne kha le-uh, si lo-in mawhna tawh a nuntak ding uh Pasian in deih lo ahih manin, Adam le Eve a it manin huanpua ah omsak hi. Ahi zongin mihing tungah a lian mahmah siatna hong tung hi. Siatna, gimna tawh a tawntungin nungta ding hi leh, tua bang nunna a nuam diam?
Tuni thusin siksanin 1Jn. 2: 16 sim in. Koi bangin mawhna tawh kisai vauhilh thu om hiam? I nuntakna-ah tua bang ze-etna tektek mah tuak ding i hiam?
WEDNESDAY JULY 1
A HONG TAT NADING PASIAN’ MAPAT
Adam le Eve in nek loh ding singgah a nek manun a mangthang ding kimlai, Adam le Eve a zong Pasian hi-in, amau Pasian zong lo uh hi. Adam le Eve busim uh hi. Mawhnei taktak ahihna uh kilang hi. Amau a honkhia ding, amaute a zong Pasian kiang panin taikhia uh hi. Kha Siangtho in amaute sam lo hi leh, a tai mangthang ding suak hi. Tu-in zong Kha Siangtho’ sapna kin lo-in Pasian kiang pan a taikhia mi tampi om hi.Ahi zongin Pasian in Adam le Eve taisan lo hi. Pasian in Adam le Eve kiangah, ‘koi-ah om na hi uh hiam? ci-in a zon a kipan tuni dong hong samlai hi. A mangthang mite a hong zong masa penpen in Pasian mah hi.
Tehpih omlo Pasian’ letsong Ama Tapa a hong piak manin, huih in leitung a tuam bangin, Pasian’ hehpihna in leitung tuam hi. Tua hehpihna huih bangin a nuntakpihte in Jesuh Khrih sungah khangcing numei, pasal ahi uh hi. Ellen G. White, Steps to Christ, 68. A vanglian penpen hotkhiatna lian pen in mihing a hong piang Khrih’nunna hi. Satan susia ding, Pa’ zia le tong kilangsak ding, Satan’zuau pholak ding, Pasian’ thukham kizui zo thei hi, cih a hong lak dingin Khrih in leitungah na tampi sem hi mah taleh, mihing in Khrih a hong pianna bulpi pen in, tawntung sihna tawh hong kipelhsak ding, eite tangding singlamteh tungah sihna a hong thuakna ahi hi.
A nuai-a Lai Siangtho in Khrih’ sihna thu bang hong hilh hiam?
1. Jn. 3: 14, 15 ________________________________________
2. Isa. 53: 4 – 6 ________________________________________
3. 2Kor. 5: 21 ________________________________________
Mawhnei lo Khrih in eite’ tangdingin mawhnei hong suak hi. Pasian’ dikna sungah i om theih nadingin mawhna thaman sihna a hong thuak hi. Mawhnei eite’ mawhna khempeuh Aman la khia-in, mawh nei lo Khrih bang mahin mawhnei eite zong Pasian mai-ah mawhnei lo-in hong koih hi.
THURSDAY JULY2
NASEP LIMCING TUAMTUAMTE
Pasian in eite a hong it manin leitung mi khempeuh a hong hotkhiat nadingin Pa in Tapa hong sawl hi. John sung bekbekah Khrih’ tatkhiat nasep 40 vei val bang kigelh hi. Leitung tan dingin Pa in a sawl ahih mahbangin, tua tatkhiatna thu tangko dingin Khrih in a nungzui khempeuh hong sawl hi. (Jn. 20: 21). A mangthang khempeuh a hong hotkhiatna lampi, tua hotkhiatnasep (mission) kici hi.
Matt. 5: 13, 14 sim in. Bang limciinna kizang a, a khiatna in bang hiam?
____________________________________________________
___________________________________________________________
Pasian thu-um mite, ci le khuavak tawh kigenteh hi. Ci in thu-um mite khat le khat kizopna kip, sung lam thu, pulaak hi. Khuavak ahih leh, nate kimu theisak bangmahin, thu-um mite in khuamial sunga om mite aa ding khuavak hi, cih hong hilh hi.
Pasian in Israel mite tunga thupiak bangin a nuntak ding uh lamen hi. Cidamna tawh kisai thukhamte zong kipia hi. Gentile mite aa ding khuavak, mite’ mit a la dingin a nuntak ding uh ahi hi (Isa. 49: 6). A cidamna uh, a nopsakna uh, Topa’ thupiakte le Sabbath thupiak tungah a cihtaknate in Pasian’ vangliatna, nate Piangsak Pa ahihna, a hong honkhia Pa ahihna kilangsak hi. Mi namdangte in Israel mite’ nopsakna a muh tak ciangun, amaute kiangah namdangte hong pai ding uh a, Pasian’ zia le tong mu ding uh hi. Khrih in Ama aa ding teci hong deih hi. Hih thu ci thugentehna tawh hong hilh hi. Pasian’ thu um mite in leitung huzaapin siatna a do dingin hong deih hi. Amah a um mite hangin Pasian a thei nailo mite in siatna a pelh ding uh ahi hi.
Koi bangin ci le khuavak na hi hiam? A mit dekdek khuavak na hi kha hiam? A alna bei dekdek ci na hi kha hiam? Na hih khak leh, bangci-in thaksuakin, kipuahpha ding na hiam?
FRIDAY JULY 3
SIMBEH DING: Mawhna sung pan tatkhiat nasep in, Pasian’ zia hi. Hih nasepna in Pa, Tapa le Kha Siangtho kikopin nasep ahi hi. Hotkhiat nasep in mihingin hong piang Khrih’ nasep lian bel ahi hi. Ama nuntakna le a hong sihna tawh mi khempeuh in hotkhiatna ngah thei ding lampi hong sialsak khin hi. Ama nungzui eite in, mi dangte in zong hih lungdamna thu a zasak dingin sawlna ngah mite ihi hi.
Khrih’ pawlpi in hotkhiat nasem dingin leitungah kipawlna ahi hi. A zawng, a hau, mi khempeuh in a hong tatkhiatna thu a zak nadingun pawlpi in ahih theihzahin nasem dingin Topa in a pawlpi tungah lametna nei hi. Gammialphu dingin mi khempeuh in sapna ngah lo hi. Ahi zongin mi khempeuh sep theih thu in, amaute aa ding thungetsakin, sum le paai tawh panpih thei hi. Ellen G. White,6T., 29.
KIKUP DING DOTNATE:
1. Na khempeuh’ kipatna ngaihsun in. Bang hangin tua thu in thupi hiam? Koi bangin i piankhiatna mun theihtelna in kei kua hi-a, ka nuntakna in bang mungtup nei cihte hong telsak hiam?
2. Pasian in deih bang teltheihna hong pia hi. Tua ahih leh itna nei dingin Pasian’ hong piansak ahih leh, mihing in siatna a bawl leh, itna le suahtakna hong pia ahih manin itna sungah a khangto dingin zong Topa in hong deih hi. Mihing in ama deihtelna tawh a hoih lo nate bawl dingin a khensat leh, Pasian in khaktan lo hi. Khaktan hi leh, itna khaktan hi. Koi bangin hih thu in itna, deihtelna, siatna hong theisak hiam?
3. Khrih a sihna pen tu ma kum 2000 val, Roman kumpi’ khut nuai, khuano khat a thupiang hi. Ahi zongin hih thupiang in mi khempeuh aa dingin tawntung thu tawh kikhenkhia thei lo hi. Khrih’ sihna a thei khin eite in hih thu a thei nai lote in a theih nadingin masuan nei hi lo na hiam? Kuamah in gen keileh, amau bangci bangin za ding uh hiam?
