LESSON 9 MAY 23 – 29
JESUH, VANGLIAN PEN THUHILHPA
SABBATH NITAK: TU KAAL SUNG SIM DING: Lk. 8: 22 – 25; 4: 31– 37; 6: 20 – 49; 8: 19
– 21; 10: 25 – 37; Thkna. 6:5.
KAMNGAH: “ Amah in aana neite bangin thu gen ahih manin amaute in lamdang a sa mahmah uh hi.” Luke 4: 32.
Khrih in leitungah a hong pian lai-in mi khempeuh siat theihtawpin sia uh hi. Thuman thutak om lo, mun khempeuh zuau tawh kidim hi. Mihing in leitung nopsakna bek lunggulh hi. Nuntak
Pasian phawk lo uh ahih manun, mi khualna cih zong nei lo pah uh hi. Thuman, dikna, khat le khat kimuanngamna, kihehpih lainatna cihte bei mang hi. Duhhop huaihamin angsung ding bek ngaihsun uh hi. Khat le khat kithupisimna, kizahtakna, thanemte huh cihte om lo hi. Cimawh genthei mite mi-in ngaihsun lo uh hi; ganhing bangin bawl uh hi; vanzat khatin zang uh hi. Hauhna, liatna bek a hoih pen le mungtup lianpenin ngaihsun uh hi.Siatgamtatna, thu ngaihsut theihlohna, Pasian phawk lohna, cihte in amaute khuasakzia ahi hi. Ellen G. White, Education, 74, 75. Tua bang mite lakah Khrih nunzia le ama nasep i tel nading hong huh thei hi.
SUNDAY MAY 24
A VANGLIAN JESUH’ THUNEIHNA
Siavuan, laithei mi khat ahih mahbangin aana, thuneihna tawh kisai tel mahmah hi. Luke pen Greek mite’ thuthuk ngaihsutna le lai pilna, Roman mite’ thukham tuamtuam le gam sung ki-ukzia tawh kisai a siamna uh a tel mahmah mi khat hi. Paul tawh kithuahin zinkhawm kawikawi mi khat ahih mahbangin pawlpi le sawltakte’ thuneihna zong tel mahmah hi. Tua hi-in, mi khat, kumpi khat, khuapi khat, laihilhsiate in sangnaupangte’ tungah thuneihna cihte a tel mahmah mi khat hi. Luke in thuneihna, aanna tuamtuam om taleh, Khrih’ thuneihna demzo ding, Ama thuneihna sangin a lian zaw om lo hi, ci-in hong hilh hi.
Lettama nasem inn sung pan khangkhia-in, Galilee khuaneu khat pan khangkhia-in, leitung pilna, liatna, hauhna bangmah a neih loh hangin, Jesuh in Roman gam makaipipite, Jew laitheite’ hoihlohna pulaak ngamin, tualniam mite tawh zong kikhawl thei hi. Ama thuhilh a za mi khempeuh in thuhilhsiamsa-in, a hilh thute, lamdangsa mahmah uh hi (Lk. 4: 22). Nain khua meigong’ tanu a si hingsak kik a (Lk. 7: 11 – 17); khuazang khempeuhun lamdangsa-in “Pasian hong pai ta hi” ci uh hi (Lk. 7: 16.) Ama vangliatna in Nain khua bek kizel lo-in, Judea gam le mun tuamtuamah kizel hi.
Lk. 8: 22 – 25; 4: 31 – 37; 5: 24 – 26; 7: 49; 12: 8 sim in. Jesuh’ thuneihna bang pulaak uh hiam?
___________________________________________________________________
__________________________________________________________________
Luke in a lawm Theophilus a ding bek hi lo-in mi khempeuh a dingin, Khrih’ nasep, Ama thuneihna hong hilh hi. Mihingin hong piang Pasian’ thuneihna bangin kuamahin thunei lo hi.
Mi tampi in Pasian’ min suangin nasem uh hi. Pasian’ min suangin aana zang uh hi. Koi bangin tua bang thuneihnate Pasian’ piak hi le hi lo na khentel thei hiam?
MONDAY MAY 25
A LIAN MAHMAH KHRIH’ THUHILH
Mualtung Thuhilhna (Matt. 5 – 7) pen Khristian biakna’ laigil hi, ci-in kiciamteh hi. Khrih in Nungzui sawm le nih a tel khit, a thuhilhna hi (Lk. 6: 13). Mualtung Thuhilhna pen “Sawm le Nihte tunga Thupiak” a ci zong om hi.
Lk. 6: 20 – 49 sunga thuhilhnate en lehang, thupha nam li le hamsiatna nam li banah Khristiante’ nunzia ding thuhilhna tawh kipan hi.
1. Khristiante in a thupha ngahna uh (Lk. 6: 20 – 22). Koi bangin zawnna, gilkialna, dahna, muhdah thuakna cihte in thupha ngahna suak thei hiam?
2. Thu-um mi khat in pampaihna thuak mah leh a lungdam theihna hang thute ngaihsun in (Lk. 6: 22, 23)
3. Bang hangin thu-um mi khat in siatna hong tun thei nate langpan kul hiam? Lk. 6: 24 – 26.
4. Thu-um mite sep hamtang ding thute (Lk. 6: 27 – 31).
Khrih’ thupiakte bangin mite buaipih thupiak dang om lo hi. I tungah hong kibawl ding i ut bangin mite tungah bawl ding cih thupiak sangin hamsa i sakzawk thupiak om lo hi. Hih thupiak in a hoihlam hi zaw hi. Sep loh ding, bawl loh ding thupiak hi zaw lo-in, sep ding bawl ding thupiak hi zaw hi. Na galte mudah kei in, cih sangin na galte it in cih hi zaw hi. A hong kibawl bangin thukkikna, ha khat tangin ha khat kithuk lo zaw-in, hoihna tawh thuk zawk ding hong hilh hi. Mahatma Gandhi in Khrih’ thupiak siksanin, siatna pen siatna tawh thuk lo zaw-in, dikna tawh thuk zawk ding cih siksanin, Britist’ ukna pan India in suahtakna ngah hi. Tua siksanin Martin Luther King, Jr. in zong mivom le mikang kideidanna vengsak hi. Itna omna munah, thupha nungta hi.
5. Khristian’ nunzia (Lk. 6: 37 – 42). Khrih’ hong hilh mawhmaisakna, piakkhiatna, etteh taakcing nunzia, lungduaina cihte ngaihsun in.
6. Gah nei Khristian’ nunzia (Lk. 6: 43 – 45)
7. Khristian thu-um mi in innlamte (Lk. 6: 48, 49).
TUESDAY MAY 26
INNKUAN THAK
Jesuh’ ma a thuhilh mipil hi taleh, Ama khit a thuhilh mipil tampi in kipumkhatna le itna limgen mahmah uh hi. Ahi zongin tuate itna in cilesa melpuakzia, pau, beh, biakna cihte siksanin ki-itna ahi hi. Ahi zongin Khrih in tua bangin hong khenkham na khempeuh sutat hi. Khrih in innkuan thak, kideidanna om lo innkuan hong hilh hi. Agape itna, it taak cinglopi-a hong it veve-na, nuntakna piakhia-in itna tungtawnin Khrih in innkuan thak bawl hi. Tua innkuan in piancil lai-a innkuan, Ama’ meel suunin a bawl innkuan ahih manin Ama mai-ah mi khempeuh kikim hi (Pian. 1: 26, 27).
Lk. 8: 19 – 21 sim in. Innkuan sungah sanggam u le nau, nu le pa, khat le khat kizopzia, ki-itna cihte neusehna hi lo-in, cilesa innkuan sangin, vantung innkuan manphasa zaw hi ( Eph. 3: 15). Khrih in cilesa innkuan sungah ki-itna sangin nungzui hihna –ah thu-um mite in innkuan khat ihihna mannei-sa zaw hi. Innkuan taktak sittelna in cilesa hi lo-in, Pasian’ deihna bangin nungta le nungta lo nunna tawh sittel zaw hi.
Khrih in khat le khat hong kigamlasak bang nate hong hepkhiatsak hiam?
1.
|
Lk. 5: 27- 32
|
_______________________________
|
2.
|
Lk. 7: 1- 10
|
_______________________________
|
3. Lk. 14: 15 – 24 _______________________________
4. Lk. 17: 11 – 19 _______________________________
Khrih’ nasep le a hong pai-na, mawhmaisakna, ama hehpihna in kuamah nawlkin lo hi. Ama’ sapna aw a za mi khempeuh tua hehpihna hong pia hi. A beingei lo Ama hong itna in mi namcin sam hi.
Pawlpi sungah khat le khat kipawlkhopnate bang in huh hiam?
WEDNESDAY MAY 27
ITNA I CIH HONG HILHCIAN: SAMARITAN MIHOIH GENTEHNA (Khen 1 na )
Gospel lak pan Luke bek in a mangthang tapa le Samaritan mihoih’ thu pulaak hi (Lk. 10: 25 – 37). A mangthang tapa gentehna Pasian in mawhnei mite a hong itna pulaak hi. Samaritan gentehna ahih leh, deidan neilo-in khat le khat ki-itzia ding hong hilh hi. Khat le khat kikal kituamkhen lo-in, Khrih’ hong hilh bangin ‘vengte’ itna tawh it ding hong hilh hi. Mi khempeuh in Pasian’ tate ahih manin kuamah deidan lo-a it ding hong hilh hi.
Lk. 10: 25 – 28 sim in. Koi bangin Khristian’ nunzia le upna tonkhawm hiam?
1. Sia aw, tawntung nuntakna ka ngah nadingin bang sem ding ka hiam? (Lk. 10: 25). Thukhamhilh siapa in tawntung nuntakna lampi thei nuamin zong hi. Mawhna pan suakta-in, Pasian’ gam sung om ding sangin mihing in a ut zawk om lo ding hi. Ahi zongin thukhamhilh siapa mah bangin mi tampi in tawntung nuntakna pen gamtatna tawh kingah thei dingin ngaihsun uh hi. Tua bang mi in “mawhna’ thaman in sihna hi. Ahi zongin Pasian’ hong piak letsong in Khrih sungah tawntung nuntakna i ngah hi (Rom. 6: 23).
2. “Thukham ah bang kigelh hiam? Nang bang na ci ngaihsut hiam? (Aneu 26). Jesuh hun lai-in Jew laithei, thukhamhilh siate’ puan tungah thukham gelh uh hi.
Jesuh in sitnipa tungah Thuhilhkikna 6:5; Siam. 19:18 sunga kigelh thute dong hi. Sitnipa in tua thute ama puansilh tungah gelh napi, a lungtang tungah gelh lopi-in dawng hi. Khrih in a lian mahmah thuman a mu dingin sitnipa thu dong hi. Tawntung nuntakna cih pen thupiakte zuihna tawh kingah thei lo hi. Sitneilo itna tawh Pasian i it ding theihsak hi. Tua bangmahin ‘na vengte’ it in ci-in sawl hi. Ahi zongin sitnipa in theipipi-a a dong maw, thei lo-a a dong maw, Jesuh kiangah, “ kua in ka vengte hiam?
Hehpihna tawh a hong kihonkhia takpi ahihlam, koi bangin na gamtat in kilangsak hiam? Bangci bangin upna tawh dikna kingah hi, ci-in na kilangsak hiam?
THURSDAY MAY 28.
ITNA IH CIH HONG HILHCIAN: SAMARITAN MIHOIH GENTEHNA(khen 2 na)
“Ahi zongin tuapa amah le amah kidiktangsak nuam ahih manin Jesuh kiangah, “ Tua ahih leh ka vengte kua ahi hiam? ci-in a dong hi (Lk. 10: 29).
Jew thukham tellua kisa mahmah tua sitnipa in Jesuh’ dotna dawng thei kisa mahmah ngel ding hi. Siam. 19: 18 in, thukham lak pan a lian nihna thukham pulaak khin hi. Tua munah ‘vengte’ in nomau mipihte (tate) ci hi. Khrih in sitnipa kiang hi taleh, tua thu a za mite’ ngaihsutna sangin a zaai zaw thu pulaak hi.
Lk. 10: 30 – 37 sim in. Bang thulaigil hong hilh hiam? Mite tung i bawlzia ding hong hilh hiam?
___________________________________________________
__________________________________________________
Migilote in ‘mi khat’ suam uh hi. Bang hangin Khrih in tua mipa, kua mi kua-sa, bang nasem cih pulaak lo hi ding hiam?A huampi-in en lehang, bang hangin a pulaak loh thupi hiam? Siampi le Letive in tua a liam mipa mu napi, paulap tuamtuam hangin paisan uh hi kha ding hi. Nang le kei kidot ding in: biakna man i cih bang hiam? Koi bangin biakna man kilang hiam? Thkna. 10: 12, 13; Mikah 6:8; James 1: 27.
Jew le Samaritan khat le khat kilangneihin, kimuhdah uh hi. Jesuh hunin, amau kilangneihna lian semsem hi (Lk. 9: 51 – 54; Jn. 4:9). Tua hi-in Khrih in Samartitan a gen ciangin Jew mite a dingin langpanna suak hi. A taktakin Khrih in Jew le Samaritan mite kikaal kizopzia puahpha nuam hi.
Khrih in Samaritan mipa’ nasep limgen mahmah hi. A liam mipa la-in, a liamnate sathau nuhsak, tuamsak, giahbuk khatah puakin, a kisam sum pawl khat piathuah, kong pai kik ding hi, ci-in kamciam pia hi. A galte khat tungah tua bangin a gamtatna in ciangtan nei lo itna hi.
Siampipa le Levite mipa in hih mipa va huh leng, mite hong koi muh ding ci-in, paisan uh hi. Samaritan mipa in ahih leh, huh lo-in paisan mawk leng, hih mipa bang suak ding cih lunghimawh hi. Hih muhzia bang kilamdang hiam?
FRIDAY MAY 29
SIMBEH DING: Khrih’ nunzia le a thuhilhte in Pasian kiang pan hong pai, angsung zong lo itna, itna kicing kilangsak hi. Pasian in ama a ding bekin nungta lo hi. Leitung bawlin, a bawlsa na khempeuh kemcingin, a bawlsa nate a dingin nasem hi. Midik le migilote tungah a kibangin guahtui le nitang pia hi (Matt. 5: 45). Tua itna pulaak dingin Pasian in Tapa hong sawl hi. Jesuh in mi khempeuh’ etteh ding hi-in mite a ding hong nungta hi. Ama nuntakna khempeuh mite a ding vive-in hong nungta hi. Mi khempeuh’ sila hong suakin, mi khempeuh’ na sem hi. Tua hi-in Pasian’ thupiak bangin hong nungta-a, eite nunzia ding ama’ n u n z i a t a w h h o n g h i l h h i .
Jew cimawh mi khat hih bangin a don manin, Samaritan mipa’ gamtatin deidan nei lo itna man a hong hilh banah, bangmah in itna man daltan thei lo hi, cih zong hong lak hi. Ellen G. White, The Desire of Ages, 649.
Samaritan mi hoihpa thugentehna in a piang ngeilo tangthu mawkmawk hi lo hi. A piang taktak, ahi bang lianlianin a piang ngei khat hi. Khrih in hih thu a gen laitak mahin cimawhpa huh lo-in a paisuak siampite le Levite in zong za uh hi. Ellen G. White, The Desire of Ages, 499.
KIKUP DING DOTNATE:
1. Sunday ni-a dotna thupi en kik in. Pasian’ hong sawl bangbang, a hong sawl manin a sem ka hi hi, a ci mi na mu ngei hiam? Pasian in bang zangin hong hopih hiam? Lam khat pan, nang ut bang na sepnop manin Pasian’ thu bulphuh khak ding lauhuai hi lo hiam?
2. Lk. 6: 24 – 26 sunga kigelh gimna nam li-te en kik in. Khrih’ gen tua gimnate koi bangin na tel thei hiam? Leitung mahmahah a lauhuai nate tawh i kipelh nadingin, Khrih in bang hong vauhilh hiam?
3. Thuneihna i cih in bang hiam? Thuneihzia nam bangzah bang om hiam? Tua nam tuamtuamte lak pan koi in a tawntungin kimang thei ding hiam? Thuneihna khat le khat a hong kitukalh ciangin bang piang thei hiam?
