LESSON 6 MAY 2 – 8
JESUH NASEPNA- AH KIHEL NUMEITE
SABBATH NITAK: TU KAAL SUNG SIM DING: Lk. 1: 39 – 55; 2: 36 – 38; 7: 11 – 17, 36 –
50; 8: 1 – 3; 18: 1 – 8; Rom. 10: 17.
.
KAMNGAH: Khrih Jesuh tawh na kipawl manun note khempeuh Pasian’tate na suahtheihna uh pen na upna hang uh ahi hi. Khrih sungah a kiphum note in Khrih’ pianzia a nei khinta na hi uh hi. Tua ahih manin Jew mi le Gentail mi, sila le sila ahi lo, numei le pasal cih bangin kideidanna om nawn lo a, note khempeuh Khrih tawh na kipawlna hangun pawlkhat hi-in a kibangkim na hi uh hi (Gal. 3: 26 – 28).
Luke Lai Siangtho pen “numeite’ thupuak Hotkhiatna Thu” a ci zong om hi. Bang hang hiam cih leh, Jesuh in numeite tawh kisai a gen thute a dangte sangin Luke in pulaak zaw hi. Hotkhiat
nasepna ah numei nasepna zong pulaak hi.
Tuhun mah bangin Khrih hunlai-in zong numei in nengniamna thuak hi. Jew pasal kim khat in, numei, Gentail mi le sila-in a suahkhak lohmanun, Pasian tungah lungdamko tawntung uh hi. Greek mite le Romante in numeite bangmah lo-in ngaihsun uh hi. Roman pasalte suan le khak neih nadingin zipi khat nei-in, gualnopna a dingin zi neu tampipi nei uh hi.
Tua bangin numeite kibawlzia lakah Jesuh in numeite tungah lungdamna thu, Abraham’ suan le khak ahihna pulaak hi (Lk. 13: 16). Numeite zong Pasian’ tate hi. Ama mai-ah pasalte mahbangin manpha hi, cih thu in, numeite a dingin bangzahin lungdamhuai! Tua bangmahin tuhunin zong numei, pasal i vekin Jesuh Khrih sungah sakhat, nam khat ihi hi.
SUNDAY MAY 3
JESUH HONG SUAH A MUAK NUMEITE
Khrih naungekin a hong pianlai-in a muak numeite’ lungdamzia: hotkhiatna a tangtun nading, a mite lamet a piciinna dingin Pasian’ Tapa in mihingin hong piang hi. Tua numeite in amau lungdamna thuthuk telzo lo uh hi. Amaute’ pulaak thu in a lamdang Pasian’ nasep, a upna uh ahi uh hi.
Elisabeth le Mary kihona, Lk. 1: 39 – 45 sim in. A thutheihna in ciangtannei taleh, koi bangin Elisabeth in a piang ding thu lianpi a theihtelzia pulaak hiam?
__________________________________________________
__________________________________________________________
Elisabeth in a pulaak khit ciangin, Mary in tua thute lungngai hi (Lk. 1: 46 – 55). Mary in kamsangte’ genkholh thute a telzia la-in sa hi. Mary in tua bang upna a nei manin Jesuh pianna’ nu dingin cingtaak hi. Mary’ lasak in Pasian tawh a kizopzia pulaak hi. Amah le Topa pumkhat ahihzia, ama upna in Abraham’ upna tawh upna khat ahihzia pulaak hi.
Lk. 2: 36 – 8 sim in. Kamsang Anna’ thu in bang thumanpha hong hilh hiam?
__________________________________________________
___________________________________________________________
Amaute’ lametna Jesuh in tangtungsak hi. Tua thupiang, meigongnu in nalamdang ahihna thei a, Honpa taktak hi, ci-in biakinn ah om mi khempeute zakin kiko hi. Amah pen lungdamna thu tangko masa penpen hong suak hi.
Tua numeite in a zakuh thu lamdang a sakdingzia ngaihsun in.Tua a lamdang thu tangko dingin sapna ngah eite in, koi bangin tua thu i sungah thaksuak thei ding hiam?
MONDAY MAY 4
NUMEITE LE JESUH’ DAMSAK NASEP
Nain khua a thupiang, Lk. 7: 11 – 17 sim in. Tua numei in bang mah neilo meigong, tu-in a tapa khat neihsun in sihsan hi. A dahpih mihonpi in sivui dingin hanmual zuanin pai uh hi. A tapa khat neih nusia ahih manin, meigong nu in a mailam thu ding a ngaihsut ciang, cimawh, genthei le lamet bei kisa mahmah hi.
Sizui ding, khuanawl lam manawh a pai mihonpi in, khua sung lam manawh mihonpi khat mah tuak uh hi. Mihonpi mai-ah hankuang masa hi. Khua sung lam manawh mihonpi mai-ah vanglian Piangsakpa masa-in ama nung zui uh hi. A kituah uh ciangin, Jesuh in lamet bei, dahna tawh kidim meigong nu theipah hi. “Topa in tua meigongnu a muh ciangin khasiat mahmah a, “Kap nawn kei in,” ci-in hehnempah hi (Lk. 7: 13). Nuntakna’ bulpi, Topa’ kammal hi keileh, tua kammal in mannei lo hi; a khiatna om lo hi. “Kap nawn kei in” cih thupiak in dahna vengsak thei vangliatna tawh kidim hi. Jesuh zong pai-in hankuang lawngin, naupangpa tho dingin thupia hi. Siluang lawnna pen thukhun palsatna hi ( Gam. 19: 11 – 13). Ahi zongin tua thukhunte sangin Khrih’itna lian zaw hi. Thukham le thupiak tuamtuamte sangin mihing’ kitangsapte piak ding thupi zaw hi.
Nain khua mite in a lamdang mahmah thu mu bek lo-in, a lamdang thupuak zong za thei uh hi: Jesuh sungah numei, pasal kituamkoihna cihte om lo hi. Khrih omna peuhah sihna in guallel hi.
Lk. 8: 41, 42, 49 – 56 sim in. Jairus pen mi huzaap mahmah kikhopna inn cing, makai khat ahi hi. Sabbath ni sialin kua in thungen ding, kua in Lai Siangtho sim ding, kua in thuhilh ding cihte a seh makai khat hi. Huzaap nei ahih banah neih le lamh kicing nei makai khat zong hi. A tanu it mahmah ahih manin a tanu dam nading ngenin Jesuh kiang pai ding hamsa sa lo hi.
Khrih’kammal in meigong’ tanu le Jairus’ tanu sihna pan thokiksak hi. A tanu hingkik a mu nu le pa bangzahin lungdam ding uh! Pasian’ vangliatzia bang hong hilh uh hiam? Mihing’ theihna, pilnate in ciangtan nei ahihzia na phawk hiam? bangbang hamsatna na tuak ciangin, koi bangin Pasian’ hoihna le Ama vangliatna na muang ding hiam?
TUESDAY MAY 5
A LUNGDAM THEI & UPNA NEI NUMEI
Lk. 7: 36 – 50, Ama kiangah kilui an pen Jesuh in, mawhnei numei a dingin dikna ngahna an suak hi. Ulian makai, Pharisee Simon in anne dingin Jesuh sam hi. Anne ding hita, sabuai kimah kitu dimdiam, tua leh, khua sunga numei ginalo (numei paktat) khat Jesuh kiangah hong pai vingvengin, a mantam mahmah paknamtui sukhamin Jesuh’ lutung pan a khe dongah hong suung khia a, tua khit teh, a khitui tawh sawp khia kik hi.
Numei in Jesuh tungah a lungdamkohna in hih bangin a sem ahi hi. Jesuh in upna tawh numei nu’ gamtatna diksa hi. Hih thu in bang hong hilh hiam?
_________________________________________________________
_________________________________________________________
Mite’ muhna pan Mary in lamet bei numei hi mahta leh, Khrih’ muhna panin lamet bei lo hi; thupha bawl theihna, gamtat hoih a neihlam mu hi. Hotkhiat nasepna sungah kizang dingin mihing tungah septheihna kiguan hi. Mary in tuate zangkhia hi. Pasian’ hehpih itna tawh Mary in Pasian’ hoihna ngah hi. Han sung pan thokik Jesuh a mu masa pen Mary hi. Honpa hong thokik hi, ci-in tangko masa penpen Mary hong suak hi. Ellen G. White, The Desire of Ages, 568.
Gitna phalo-in i ngaihsut mite pen Pasian’ lunghimawh mite hi kha thei hi (Lk. 8: 43 – 48). Kum 12 tawntung natna numei no pen pumpi taksa, lungsim zawngkhal hi. Hi mah taleh, Jesuh’ thu a zak takciangin, lametna tawh kidim kik hi (Mk. 5: 27). Jesuh tawh a kimuh leh, bang thu za hiam? I thei kei hi. Numei nu in, Jesuh in cimawh gentheite kem hi; a phak mite damsak hi; tui panin lenggah tui piangsak hi; nawlkhin thuak mite tawh kikhawl hi, cih thute za hi. A zak bek tawh lungkim zo lo hi. Zakna in upna dong a tunpih kul hi (Rom. 10: 17). A upna in Jesuh’ puanmong lawhsak hi. Lametna, ngimna khat tawh a lawn hi-in, upna’ hang mah ahi hi. Khrih siksan upna hi. Tua bangin upna tawh a gamtat manin, Nuntakna Piapa in, ‘Na upna in hong damsak hi,” ci-in pulaak hi (Lk. 8: 48).
I kamin “tua nu, tua pa tua ci hi,” ci-in i genkhia kei phial mah taleh, i lungsim khatah tua bang ngaihsutna om thei hi. I lungsim in thukhen pahpah hi. Amau’ dinmun ah a om dingin kingaihsun inla, koi bangin mite tungah thu a khen lo dingin na om thei hiam?
WEDNESDAY MAY 6
JESUH’ NUNG ZUI NUMEI KIM KHAT
Lk. 10: 38 – 42; 8: 14 sim in. Nuntakpih ding a thupi mahmah bang thu pulaak hiam?
________________________________________________________
________________________________________________________
Innteek ahihna tawh kizui-in Martha in zindo nasem ahih manin buai mahmah hi (Lk. 10: 40). Ahi zongin Mary ahih leh, thungai-in Jesuh khephungah tu hi (Aneu 39). Manlah kisa lua mahmah ahih manin Martha in Jesuh kiangah a gimna va ko hi. Jesuh in Martha’ nasep mawhsak pah samlo hi. Ahi zongin a masak zawk ding hilh hi. Jesuh tawh kikholhkhopna in nungzui suahna-ah kisam masa penpen hi. Tua khit ciang, nek le dawnin zom ding hi.
Hotkhiatnasepna-ah limtak sep kul, lawptakin sep kul hi. Martha in nasep tampi nei hi. Ahi zongin Mary tawh Jesuh khephungah a tutkhop ding uh kisam masa hi. Khrih’ hehpihna ii sianthosak khit mite in lawptakin, citakin nasem uh hen! Tua bangin a nungta mi in na hoih a sem zo mi ahi hi. Ellen G. White, The Desire of Ages, 525.
Lk. 8: 1- 3; 23: 55, 56; 24: 1- 12 sim in. Khrih nasepnate-ah numeite kihelzia bang hong hilh hiam?
__________________________________________________
_____________________________________________________________________________________________________________________________________
Khrih in a Nungzui sawm le nihte tawh khua khat khit khua khatah pai-in thuhilh, thugenna pai kawikawi hi (Lk. 8: 1).
FRIDAY MAY 8
SIMBEH DING: Khrih in singlamteh tungah kikhaina a thuak laitakin a nu phawk hi; dahin a kap numeite in Khrih’ thawhkikna thu puak tangko masa pente hong suak uh hi. Amaute a dingin lawm hoih pen, amau kitangsap khempeuh a piapa Khrih ahi hi. Ellen G. White, The Adventist Home, 204.
Pasal’ sep ding a om bangmahin numei’ sep ding zong om hi. Ama a ding sepna-ah hamsatna a thuak uh hangin Topa in amaute zawhpih ding hi. Kha Siangtho kimakaihsakin, nasep tavuan a neihlam a kitel a nasem mi in a tawntungin amah le amah ki-uk zo mi ahi hi. Tua bangin ki-apna tawh nasem numeite tungah Topa in ama maipha tann ahih manin, pasal’ sep sangin tangzai zaw-in sem thei hi. Pasal’ sep theihloh numei septheih na tampi om hi. Pasal zawhlohna munte-ah, numei in gualzo takin sem thei hi. Khrih nasepna ah numei’ sep kisam mahmah hi. Ellen G. White, Evangelism, 464, 465.
KIKUP DING DOTNATE:
1. Luke a kipan Gospel sungte-ah Khrih’ thawhkikna thu kigelhnate ah khempeuhah numei’ dinmun tampi kihel hi. A um lo mi a om hangin, Khrih in sihna panin thokik takpi hi. Bang hangin Topa nasepna-ah numei thupi hiam? Mi kim khat in Jesuh’ thawk kikna pen zuau thu hi, ci uh hi. Zuau hi leh, banghangin mite’ thupitsak loh numeite in um uh hiam?
2. Numei a nengniamte kiangah mihing kipiansakna thu tawh kizui-in, Khrih in numei in Pasian mai-ah manpha hi, ci-in hilh hi. Amau zong Pasian’tate hi; Abraham’ suan le khak hi; Pasian mai-ah numei le pasal kibang (kikim) uh hi. Ahi zongin, kikim napi, kibang lo uh hi. Pasian mai-ah kilamdanna nei lo hi ci-in, tua kawm mah-in, numei le pasal kibatlohna koi bangin tel thei ding na hiam? Koi bangin hotkhiat nasepna-ah tua kibatlohnate in man nei hiam?
