LESSON 5| APRIL 25 – MAY 1
KHRIH IN SABBATH’ UKPA
SABBATH NITAK: TU KAAL SUNG SIM DING: Mk. 1: 21; 6: 2; Lk. 4: 17 – 19, 31- 37; 6: 1 – 11; 13: 10 – 16;
2Kor. 5: 17.
KAMNGAH: Tua ciangin Jesuh in, “Sabbath ni, mihingte’ phattuam nadingin kibawl hi a, mihing pen Sabbath ni a phattuam nadingin a kibawl hi lo hi. Tua ahih ciangin Mihing Tapa pen Sabbath ni nangawn a ukpa ahi hi,’ ci-in a thugen a khum hi. Mark 2: 27, 28.
Luke in Gentile tungah Sabbath a thupitna a pulaakzia manpha hi. Luke sungah Sabbath cih kammal 17 vei, Sawltakte Tangthu sungah 9 vei, Matthew sungah 9 vei, Mark sungah 10 vei, John sungah 9 vei kimu thei hi. Khrih in Jew, Gentile khenlo hi. Mite aa
Khrih in, Sabbath a kipzia pulaak tawntung hi. Amah mah in Sabbath piapa, Sabbath a sianthozia, a thuhilhnate tungtawnin pulaak den hi. Tua hun lai mite in Pasian’ zia le tong kilangsak ding sangin amau angsung deihna siksanin Khrih’ deihna tawh kituaklo-in Sabbath zangkhial uh hi. Khrih in tua bang khialhnate puahpha hi. Ellen G. White, Prophets and Kings, 183.
Kaal khat sunga ni masa ni tawlngak ding thupiak Lai Siangtho sungah kimu lo hi. Koi bangin Khrih in Sabbath zui, Ama hong hilh thute tu kaal sungin i sin ding hi.
SUNDAY APRIL 26
AMA’ NGEI BANGIN (Lk. 4: 16 – 30; Isa. 61: 1, 2)
“Sabbath ni ciangin a paingei bangin kikhopna inn-ah a pai hi” (Lk. 4: 16). Hih in Adventist thu-um hihna a pulaak kammal hoih khat hi; Pawlpi’ thupuak tangkona, Lai Siangtho sinpihnate ah Sabbath tawh kisai a kizang mun mahmah mun hi.
Jew mite in a kikhopna inn (synagogue) pen thupi takin ngaihsun uh hi. Saltangin a om sungun zong, kikhopna inn om nawn lo hi mah taleh, biakpiak nading le naupang pantah nadingin kikhopna inn lam uh hi. Jew innkuan 10 a phak nakleh, kikhopna inn lam thei hi, ci-in ngeina khat nei uh hi. Nazareth khua pan a khangkhia Jesuh in, a pianna khua ah a hawh kik masak penin zong Sabbath ni-in kikhopna inn ah pai hi.
Mk. 1: 21; 6: 2; Lk. 4: 16 – 30; 6: 6 – 11; 13: 10 – 16; 14: 1 – 5 sim in. Jesuh le Sabbath thu bang hong hilh hiam? Jesuh in Sabbath beisak hi, ahih keileh, Sabbath ni pen ni dang khat tawh kikhek hi, a kici hiam?
_________________________________________________________
___________________________________________________________
“ Ama ngeina bangin” (Lk. 4: 16) cih kammal in Luke bek mahin zang hi. Ama ngeina bangin kikhopna inn ah pai hi. Luke 22: 39 ah, a sih ding hun naita ahih manin a ngeina bangin Olives mualtungah pai-in thungen hi. Luke in, kikhop le thunget pen Topa’ ngeina hi, ci-in pulaak hi.
Jesuh in Sabbath ni-in kikhpna innah a pai mahbangin bang hangin Sabbath ni-in biakinnah kikhawm dingin pai i hiam? Bang hang hiam cihleh, khatna-ah: Pasian in mun khempeuhah om hi. Koi mun koi mun panin Pasian kibia thei hi. Ahi zongin thu-um mite tawh kikhopkhawmna mun ding kilam biakinn ah vapai-in Pasian biak ding pen piancil laipeka thupiak hi-in, Thukham Sawm ah zong kihel thupiak khat ahi hi. Nihna-ah: Pasian in Piangsakpa le Honpa hi, ci-in a kitheihkim nading ahi hi. Thumna-ah, kikhopkhawmna tungtawnin i nuam i dahna, i lunghimawhnate khat le khat kitheihpihna, kihuh theihna ding ahi hi.
Thukham ultungsakte, thukham khutnuai-ah om mite ci-in, hong mawhsakte in, Sabbath ni-a Pasian’ thuphate ngah kha lo uh hi. Koi bangin Sabbath in suahtakna taktak hi zaw hiam?
MONDAY APRIL 27
SABBATH’ THUPUAK LE A DEIHNA
Kamsang Isaiah laizial a phel leh (Lk. 4: 17); Sabbath ni-in Pasian biak ding banah Pasian’ Kammal a ngai ding a hong kipia Sabbath hi. Ama’ kammal siksan lo nuntakna in siatna manawh hi. “Nangma tungah kong khialh loh nadingin ka lungsim sungah nangma thu ka khol hi” ci-in David in pulaak hi (Late 119: 11).
Lk. 4: 17 – 19 sim in. Jesuh in kua hi-in, eite a ding a sepnate siksanin, koibangin Luke’ gen thute na tel thei hiam? Koi bangin Topa in Honpa Messiah takpi mah hi, ci-in amah tawh na kikholhna tungtawnin na theitel hiam?
___________________________________________________________
Isaiah 61: 1, 2 a sim khit ciangin, Jesuh in “ Note’ zakin a hong kisim Lai Siangtho thu, tuni-in a hong tung hi,” a ci hi (Lk. 4: 21). “Tuni” cih kammal ciapteh huai hi. Jew mite’lametna ah, Pasian’ gam in amau mitmuhin, namdang mite’ nuainetna Judea leitang panin suahtakna ngah a, David kumpi tokhom kipsak pah dingin lamet uh hi. Ahi zongin Jesuh in Ama tungtawnin mite kiangah tua Kumpi Gam om khin ahihna thu, mawhna’ vangliatna susia-in, a kihencip mite in suahtakna ngah uh hi, ci-in thuhilh hi.
Messiah’ gen thute le Sabbath in kiptakin kizom ahihlam ngaihsun in. Sabbath in tawlngak ni hi; Khrih sungah tawlnga (Heb. 4: 1-4); Sabbath in Khrih’ hong piak suahtaakna, Ama sungah suahtaakna limcing hi (Rom. 6:6, 7); Sabbath in Pasian’ piansakna thu pulaak hi; Khrih sungah thaksuahna pulaak hi (2Kor. 5: 17; 15: 51 – 53). Khrih in a damsak ni, thupha a bawl ni, Sabbath tawh kituak khakphak hi lo-in, Sabbath ni mahmah a tua bang bawl ding a khensat ahi hi. Sabbath in Khrih sungah a hong kipia thuphate a hong phawksak thei ni ahi hi.
Koi bangin Sabbath in “Upna tawh hotkhiatna kingah hi, cih thu hong telsak thei hiam? Mihing’ hanciamna tawh midik hihsawm sangin, Khrih’hongsepsak thute um leng, ama sungah i tawldam zaw lo hiam?
TUESDAY APRIL 28
CAPERNAUM AH SABBATH NI-A DAMSAKNA
Nazareth khua mite in Jesuh a na nial manun, Jesuh in a nasep ngei-sa khua Capernaum ah hong pai hi ( Matt. 4: 13). Hih khua in Jesuh’ Galilee nasepna phualpi hong suak hi. Hih khua-ah Rome uliante’ lamh kikhopna inn khat om hi ( Lk. 7: 5). Sabbath ni hong tunsialin, Jesuh in ama ngeina bangin kikhopna inn ah pai hi. Sabbath ni-in thuhilh, cina damsak, thugen cih bangin na tampi sem hi. Bang thute hilh cih a kipulaak loh hangin, ama thuhilh a za a ngai mite in “Amah in aana neite bangin thu gen hi,” ci uh hi (Lk. 4: 32). Khrih’ thuhilhte in laithei mite’ thuhilh tawh kibang het lo hi. Lai Siangtho siksanin thuhilh a, a thuhilh khempeuh in thunei mahmah hi. Kician takin mawhna kilangsakin, mite’ lungsim pholhkhia-in, mawhna kisik dingin hilh den hi.
Lk. 4: 31 – 37 sim in. (1) Satan le Khrih kidona thu, (2) kha gilote’ thu, (3) Sabbath ii mungtup, (4) Pasian’ vangliatna cih tawh kisai a pulaak thu na tel hiam?
________________________________________________________
_________________________________________________________
Luke 4: 31 – 41 sungah Luke in Sabbath ni-a damsakna nam nga bang ciamteh hi (4: 38, 39; 6: 6 – 11; 13: 10 – 16; 14: 1 – 6). Khrih in ama nasep thubulpi, Nazareth khua-a a pulaak thu in: hencip mite suaktasak ding, a zawngkhal mite damsak ding, lunggim mite in lungdamna a ngah nadinguh ahi hi. Tu-in Capernaum khua-ah Sabbath ni-in kikhopna inn dimin, tuate lak pan dawivei mi khat Jesuh tawh hong kimuh tak ciang, dawi in Jesuh kiangah “ Nazareth khua mi Jesuh aw, kote hong nusia peuh in. Nang in kua hi, cih kong thei uh hi. Nang in Vanglian Siangtho Pasian na hi hi, ci-in pulaak hi ( Lk. 4: 34). Satan tawh kipawl dawite in vangliatna nei uh hi mah taleh, amaute sangin vanglian zaw Mihingin hong piang Honpa thei uh hi.
Koi bangin Lk. 4: 34 in Satan le Khrih kidona hong telsak hiam? Koi bangin tua kidona na tuak kha hiam? Koi bangin dawite tungah gualzawhna hong guan hiam?
WEDNESDAY APRIL 29
SABBATH’ TOPA
Lk. 6: 1- 11 sim in. Sabbath tawh kisai Khrih le Pharisee-te kihona thu nih kigelh hi. Khrih le a nungzuite in Sabbath le Thukham awlmawh lo hi, ci-in mawhsakna, koi bangin Khrih in dawngkik hiam?
________________________________________________________
____________________________________________________________
Mangbuhlei khat kantan laitak, Nungzuite in mangbuhvui zutin, khut tawh nuai-in ne uh hi. Ahi zongin Pharisee-te in mawhzong ahih manun Sabbath thupiak palsat hi, ci uh hi. Jesuh in Pharisee-te kiangah, David le a galkapte in gilkialin a om laitakin biakbuk sungah pai-in siampite bek nek ding a kikoih anlum a nek manun thupiak palsalin kiciamteh lo hi, ci-in dawng kik hi. Mite aa dingin Pharisee-te’ thukham in vangikpi suak hi. Sabbath in lungdamna ni ding kimlai hingim thuak ni-in bawl uh hi.
Lk. 6: 6 – 11 sim in. Sabbath tawh kisai bang thumanpha hong hilh hiam?
_________________________________________________________
__________________________________________________________
Lai Siangtho mundangte in zong hih damsakna pulaak hi. Ahi zongin Luke in mipa’ khuttaklam hi, ci teekteek hi. A khuttaklam zaw ahih manin a sep ding zahin nasem thei lo hi.Tua bangin Khrih in a damsak manin Pharisee-te in Sabbath ni teekteekin hih bangin a gamtat, thukham palsat hi, ci-in mawhsak dingin kithawi uh hi. Jesuh in amaute’ ngaihsutna thei ahih manin, Mihing Tapa in Sabbath’ Topa hi; “Sabbath piangsakpa hi; mawhna sukcip nunna pan a suaktasak ding hong pai hi,” ci-in pulaak hi. Sabbath ni-in thupha bawl ding hi a, honkhiat na sep ding hi zaw hi (Lk. 6: 9 – 11). Tua bangin Sabbath ni-in Jesuh in gamta hi.
Amau bawltawm thukhamte Pasian’thukham mahsa-in, thuman thutak thei lo-in mittawte bangin tua thukhamte in Pharisee-te mittawsak hi. Mihing’ bawl thute hangin Pharisee-te bang lo-in, koi bangin thuman mu thei ding na hiam?
THURSDAY APRIL 30
SABBATH: CINA MI KHAT LE GANHING KHAT
Luke beek in Sabbath ni-a damna ngah mi nihte’ thu pulaak hi (Lk. 13: 10 – 16; 14: 1 – 15). Khrih in tua damsaknate tungtawnin siampite le biakna makaite a thuhilhna, le Pharisee-te a dawnkikna hi, ci-in i thei hi. Bang hang hiam cihleh, Sabbath ni palsatpa ci-in Khrih mawhsak den uh ahih manin, tua bangin Khrih in Sabbath ni-in nalamdang bawl hi zaw hi.
Lk. 13: 10 – 16; 14: 1- 6 sim in. Koi bangin Lai Siangtho’ hong hilh thuman thutakte pan lampial pahpah khazel i hiam?
__________________________________________________
________________________________________________________
Khebai numei nu in Pharisee-te’ nengniamna thuakden hi. Amah pen kum 18 bang cingkhin hi. Kum hitan sung gentheih a thuakna hangin mi a dongkholhsak, kimanna neilo numei ci-in mite’ simmawh thuak den hi. Amah le amahin hih natna pan dam thei lo hi.
Jesuh in tua numei nu a muhciangin, Ama kiang naih dingin numei nu sam hi. Khrih in hopihin, numei tungah a khut a ngakleh, thakhatin tua numei nu in damna ngah hi ( Lk. 13: 13). Kum 18 sung tawntung a thuak gimna khempeuh tu-in beisiang khin a, numei in Pasian’min phat hi. Bangci bang nunna tawh a nungta zongin, mimal khat ciat in Pasian’ mai-ah manpha hi.
Jesuh in Pharisee mi khat’ inn ah anne dingin Sabbath ni khat a pai laitakin lampi-ah cibawk (tui puak natna nei) mi khat mu-in damsak hi. Mawhna zong mite’ ngaihsutna Khrih in thei ahih manin amaute thudong hi. Sabbath ni-in damsak ding kilawm hi lo hiam (Aneu 30); mihing’ manphatna ngaihsunin, Sabbath ni-in na ganhing khatuh dum sungah khia leh kua in honpah lo-in om ding na hi uh hiam? ci-in dong hi (aneu 5). Kuamah in dawng thei lo hi. Jesuh in amaute’ thuman a kisakna, dik a kisakna kineihkhem ahihna pholaak hi. Bangzahin eite zong kidop huai hiam?
FRIDAY MAY 1
SIMBEH DING: Khrih in, a cimawh mi khat huh lo-in, a si ding mi khat hon lo-in a tawlnga ngei kei hi. Sabbath, tawlngak ni ding hi mahte leh, tua bangte sem dingin tawlnga lo hi. Cinate donkul, khoi kul, thu himawhte, seploh phamawh hi. Mi khat in tawldamna, suahtakna ngah thei ding hi napi, Sabbath ni hi, ci-in tua mite’ suahtak nading bangmah a sep kei leh, Sabbath palsat mah hi veve hi. Sabbath in mite a dingin kibawl hi; Pasian in Sabbath ni mahin hehpih gamtat nei dingin hong deih hi. Pasian in, Sabbath ni a hi-a, ni khat peuhpeuh ahi zongin seploh manin gimthuak ding nai khat sung nangawn hong awi lo hi. Ellen G. White, The Desire of Ages, 207.
Jew minam in namdangte tawh a kibatlohna uh ciamtehna dingin Sabbath simloh a dang bangmah kipia lo hi. Pasian a bia mi peuhmahin Sabbath in biakpiak ni ding ahi hi. Sabbath in Pasian simloh pasian dang bia lo, Amah tawh kizopna taktak nei hi, cih ciamtehna khat ahi hi. Sabbath siangtho takin a zui mite zong a siantho ding uh kisam hi. Upna tawh Khrih’ dikna le thumanna ngah ding kisam hi. Ellen G. White, The Desire of Ages, 283.
KIKUP DING DOTNATE:
1. Lai Siangtho in Sabbath le Jesuh thu a hong hilhte kician mahmah hi lo hiam? Tua hi napi, mi tul tamza tampi in piansak ni sagih Sabbath ni nialin langpang uh hi. Ni khat peuh Pasian biak ni dingin zang uh hi. Sabbath a zuite thukham tawh mi dik ngah ding hanciam, ci-in hong mawksak uh hi. Pasian’ kammal lungmuanna tawh zuih ding thupi mahmah hi lo hiam? Thuman lo thu khat siksanin mi tampi in khemna thuakin a siangtho Pasian’ thupiak nial uh hi. Mark 13: 22 in bang vauhilhna hong pia hiam?
2. Satan in Sabbath thuman a suksiatnopzia ngaihsun in. Israel makaite a zatzia, Sabbath thupiak pen vangikpi suah uh hi. Koi bangin Sabbath thuman telkhialna ding Satan in nasem hiam?
3. Jesuh in “Sabbath’ Topa hi” (Lk. 6:5). Thu-um mite aa dingin Sabbath tawh kisai bang lungsimpuakzia hong hilh hiam?
