LESSON 4 APRIL 18 – 24
NUNGZUI DINGIN SAPNA
SABBATH NITAK: TU KAAL SUNG SIM DING: Lk. 5: 1 – 11; 6: 12 – 16; 9: 1- 6; 10: 1- 24; 9: 23 – 25; Matt. 10: 5 – 15; 16: 24 – 28.
KAMNGAH: Tua ciangin Jesuh in a nungzuite kiangah, “ Mihing Tapa in tampi tak thuak ding a, upate, siampite, le Thukham hilh siate in amah nial ding uh hi. Amah “kithat ding a, a ni thum ni-in kihing kiksak ding hi,” a ci hi (Lk. 9. 22).
Nungzui cih kammal in ‘sangnaupang’ ‘thuhilhna zui’ cih khiatna nei hi. Lai Siangtho sungah nungzui cih kammal 250 vei bang kigelh hi. Nungzui mi-in lawpin, lungsim
thaksuakin, mite le Pasian tawh kizopna kip nei hi. A hihna khempeuh Khrih tungah ki-ap hi. Khrih’ thuhilhte le Ama nunzia tawh kituak a nungta lo mi in nungzui taktak hi lo hi. Nungzui mi khat hi ding sangin a lian zaw sapna om ding hiam?
Pasian in Ama nungzui dingin i mihing hihna bangbang tawh a hong samin, a ki-ap mite Ama nungzuihna-ah a kisam bangbang thupha zong pia pah hi. Kha Siangtho in lungsim ngaihsutna khempeuh phongthakin vantung pilna guan hi. Sitneilo-in Pasian tungah ki-ap mite, Kha Siangtho in makaih ding a, Pasian’ sawlna bangbang a mang zo dingin vangliatna tha zong guan hi. Thanemna khempeuh kikhelin a kip tha kiguan ding hi. Khrih tawh kizopna nei tawntung mi’zia le tong in Khrih’ lungsim puak bang nei-in, Khrih’ nunzia bangin nungta thei ding hi. Ellen G. White, The Desire of Ages, 251.
SUNDAYAPRIL 25 MI NGAH NASEP
Ngabengte in ngasa phul hun, ngasa tawm hun tel mahmah uh hi. Simon le Andrew in zan thapaai-in ngabeng uh hi. Lungkia-in a om laitakun, uphuai het lo thu za uh hi.“ Tui thukna lamah na gunkuang hot inla, na ngen tawh ngasa khuh in” (Lk. 5: 4). Simeon’ lungkiatzia Topa a dawnkikna tungtawnin kimu hi: “ Sia aw, tu zanthapai ngasa ka khuh uh hangin khat zong ka man kei uh hi. Ahi zongin khuh in, nong cihleh, ka khuh ding hi” (Aneu 5). Ngabengte ngamatzia ding a hilh hih lettama mipa in kua hiam? Simeon in nial nuam hi leh, nial thei hi.Ahi zongin Jesuh’ thuhilh a zak ngeite hang hi ding hiam, “khuh in hong ci na hihteh, ka khuh ding hi,” ci hi. Tua hi-in nungzui khat in Khrih’ Kammal bangin nungta ding hi. Andrew, John le James lawmtate in Khrih’ thupiak bangin a sep tak uh ciangin, zan tawntung a nasep uh a mawkna a suah hangin, zingsang khuavak ciang, ngasa tampi man uh hi. Thakhatthu-in Peter in Jesuh khe phungah kunin, mawhnei mi ka hih manin ka kiang panin kihem in, ci hi (aneu 8). Nungzui mi in mawhna tawh kidim ahihlam kiphawkkawmin, Pasian’ siantho-na a phawk mi ahi hi. Isaiah in a gen bangmahin Peter in zong pulaak thei hi.
(Isa. 6:5). Lk. 5: 1 – 11; Matt. 4: 18 – 22; Mk. 1:16 – 20 sim in. A lamdangtak mahmah ngasa a matna uh, Peter in a mawhthumna le Jesuh’ vangliatna, cihte ngaihsun in. Nungzui suahna dingin bang thu hong hilh hiam?
________________________________________________________
____________________________________________________________
“Lau kei un. Tu a kipanin mi na huai ding uh hi” (Lk. 5: 10). Ngasa man ngabeng hihna panin mi ngah hihna thu-ah tampi kilamdang hi. Tua bang a pian nadingin, Topa tungah kipumpiak, na khempeuh ki-ap kul hi. Mihing in amah le amahin bangmah a septheihlohzia, mawhna tawh kidim ahihna phawkin, vangliatna ngah dingin upna tawh Khrih vazuanin, Khrih bekmah muan le suanin neih tawntung ding kisam mahmah hi. Nga bengte’ nunzia pen lauhuaina vive tawh kidim hi. Tuihual lauhuai-na, kivakkhop nading ngah thei, ngah lo thei, bangmah kigenkhol thei lo hi. Tua bangmahin Topa a ding mite sapna ah lawhcing ding maw, ahih kei leh, guaksuak ding maw, kuama magenkholh theih hi lo hi. Ahi zongin Topa in “ lau kei in,” ci-in kamciam hong pia khin hi. Nungzui hihna a baih hi lo hi; a nop hun a om bangmahin, hamsat hun zong om hi. Ahi zongin Khrih nungzui mi in, amah kia hi lo hi. “Lau kei in” ci-in kamciampiapa in a citak nungzui mi tawh a tawntungin hong omkhawm hi. Peter in mawhnei mi ahihna le Topa mai-ah mawhthumna ngaihsun in. Bangzahin mawh kisa hiam cih leh, a Topa nai-ah om nuam lo hi. Pasian tawh hong kigamlasak mawhna in bang tawh kisai mawhna hiam?
MONDAY APRIL 20
SAWM LE NIHTE TELNA
Ei le ei-in nungzui a suak thei ihi kei hi. Jesuh’ hong sapna, i dawnna siksan ihi hi. Jesuh in ama nungzui dingin Peter, Andrew, John le James, siahdong Matthew sam khin hi (Lk. 5: 11, 27 – 32). Luke in Nungzui sawm le nihte kitelkhiatzia hih bangin gen hi: Jesuh in Sabbath ni-in khut zaw mi khat a damsak manin Pharisee mite in Jesuh thah a sawm khit deuha thupiang hi, ci-in pulaak hi ( Lk. 6: 6
– 11). Khrih in Ama nasem ding mite makaih pantah kul ahihlam mukhol ahih manin ama nasem ding mi tel hi.
Lk. 6: 12 – 16; 9: 1- 6 sim in. Sawm le nihte kitelzia bang hong hilh hiam?
_________________________________________________________
_________________________________________________________
Mi tampi in Khrih zui uh hi. Nasepzia ding a hilh dingin mi tampi lak pan sawm le nih tel hi. Ahi zongin Khrih’ nasepin thuhilh ding bek hi lo hi. Leimong dongah a hong tatkhiatna pulaak ding le tangko dingin tatkhiat mite kipawlkhopna, pawlpi pankhia hi. Ama nasep a matut nadingin nungzuite banah midang kisam hi. Mi sawm le nih telkhia-in nungzui/ sawltakte ci-in minpia hi (Lk. 6: 13). Sawltak cih kammal in, nasep khat a sem ding, thupuak khat a va tangko ding sawlna ngah, ci-in khiatna nei hi. Luke sungah sawltak cih kammal guk vei kimu thei hi. Sawltakte’ Tangthu sungah 25 val kimu hi. Matthew le Mark in khat vei tuak zang uh hi.
Sawm le nihte in amau minliatna, mi hoihin kitheihna, hauhna le pilna siksanin kitel hi lo hi. Hihte tawh kizui-in telthamcing lo uh hi. Mite’ thupi ngaihsut loh, mi nautang vive hi lel uh hi. Ngabengte, siahdongte, biakna thu-ah guhgamh mite, mi lehhek thei cihte hi lel uh hi. Ahi zongin Khrih Kumpi le Ama gam aa dingin nungta ding uh in sapna ngah uh hi.
Pasian in a sap mite, amau hihna ciangciang, amau omzia zia pan mahin a sap ahi hi. Topa’ makaihna a zuih nak uh leh, Topa in siamna guan hi. Kicinna nei uh ahih manun telna ngah hi lo hi. Ahi zongin a kicinlohnate uh awlmawhlohna hi lo hi. Thuman thutak a zuihna tungtawnun Khrih’ hehpihna in amaute’ kicinlohnate panin Ama nunzia le tong neitheisak hi. Ellen G. White, The Desire of Ages, 294.
Kicinna nei khang! A kicing kuamah om kei mah! Kicinna lam manawha kaalsuan ihi hi. Zekai le a hat cih hi bek hi. A kicing lo ciat mah, koi bangin i hihna bangbang tawh nungta khawm i hiam?
TUESDAY APRIL 21
SAWLTAKTE A KISAWLKHIATNA
Lk. 9: 1 – 6; Matt. 10: 5 – 15 sim in. Khrih in amaute a sapna tungtawnin bang thumanpha na mu hiam?
_________________________________________________________
_________________________________________________________
Luke in tua bangin kisawlna thu-ah thu thum pulaak hi. Tuate in:
(1) Jesuh in Nungzui sawm le nihte sam hi (Lk. 9: 1). Khristian thu zuihna-ah ‘sam’ ‘sapna ngah’ cihte in thu-um mi khat ii tavuan hong hilh kammal hi. Mimal in sapna ngah ihih kul hi. A hong SAMPA’ sapna aw zak kul hi. Nasep matut zawhna dingin kipumkhatin sepkhopna, Topa’ thu mangin kipumpiakna cihte kisam hi.
(2) Jesuh in sawm le nihte vangliatna le ukna pia hi (Lk. 9: 1). Jesuh in a sap mite khutguak tawh paikhiasak ngei lo hi. Ei tha le tha tawh nasem dingin hong sam lo hi. Mihing’ siamna, ngeina, minthanna, hauhna, liatna cihte in ma hong tunpih zo lo hi.
“Hatna” cih Greek kammalin ‘dynamo’ hi-in a khiatna in khuavak’ phualpi, muallianpi khat suksia zo ding hatna tha ahi hi. Dawite zawh nading, a hong piak nasep matut zawh nadingin, Khrih in tua hatna hong pia khin hi. Jesuh in eite thahatna hi. Mihing in Pasian tawh a kop nak leh, thahatna ngah na hi hi. A hong sawl bangbang hong semzosak ding hi. A thupiak khempeuh matut nading tha tawh hong piakhawm pah hi. Ellen G. White, Christ’s Object Lessons, 333.
(3) Jesuh in sawm le nihte, Pasian’ gam le cinate damsak dingin sawlkhia hi (Lk. 9: 2). Thuhilhna le damsakna tonkhawm hi. Sawm le nihte in pumpi, lungsim le ngaihsutna cidamna thu tangko
dingin kisawl hi. Satan le mawhna ukcip nunna pan in Jesuh’ sianthosak nunna-ah kikheel ding kisam hi.
Khrih tungah ki-apin kipumpiakna bekin nungzui hihna hong kipsak hi.Tualo nate – kham le ngun, nu le pa, sanggam u le nau, sihna, hinna cihte in khaktan zo lo hi. Leitungah Khrih’ teci hi ding sim loh thupi dang om lo hi.
Na paina uh ah bang mah keng kei un” (Lk. 9: 3). Tuhun a ding bang thu hong hilh hiam?
WEDNESDAY APRIL 22
SAWMSAGIHTE KISAWL
Lk. 10: 1- 24 sim in. Satan le Khrih kidona sungah a mangthang mite hotkhiat nasep tawh kisai-in a kisawl sawmsagihte’ thu in bang hong hilh hiam?
_________________________________________________________
________________________________________________________
Khrih a hong nuntak lai-in Ama nungzui sawm le nihte bek hi lo hi. Judah tangin mi khat a tel ding uh ciangin Peter in thugen a, tua lai-ah nungzui 120 val pha uh hi (Sawl. 1: 15). Jesuh van a kah hunin Ama nungzui 500 sangin tawmzaw lo hi (1Kor. 15: 6). Jesuh in Galilee gam khua tuamtuam ah nasem ding a pai ma-in mi pawl khat telkhia-in amaute paikholsak hi.
Luke bek in sawm sagihte kisawlna thu gelh hi. Piancil 10 in Noah’ suan le khak sawm sagih, leitung minam khempeuh pulaak hi. Luke in minam khempeuh ngaihsunkawmin a gelh hi kha ding hi. Moses in ama nasep a huh ding upa 70 tel khia hi (Gam. 11: 16, 17, 24, 25). Sanhedrin sungah mi 70 om hi. Jesuh in hih sawm sagih tawh kisai bang deihna nei ci-in pulaak lo ahih manin, deihna khat nei hi ding hi, ci-in Jew mite’ ngaihsut bangin limciina nei hi lo hi. Ahi zongin a thupi khat ah, Jesuh in pawlpi makai ding a tel ciangin, khat le nih ii pilna, siamna bek siksan lo-in, siamna, theihna tuamtuam kigawmkhawm thei dingin mi tuamtuam tel hi, cih kimu hi.
A kisawlkhia sawm sagihte lungdam kipakin Khrih kiang hong tungkik uh hi. Amaute in “ nangma min tawh dawite ka hawlkhia uh hi,” ci-in Jesuh kiangah pulaak uh hi (Lk. 10: 17). Gupna thu tangko nasepna ah lawhcinna pen mihing’ sepna hang hi lo hi. Lawhcinna pen Pasian’ nasep hi-in, mihing pen Pasian’ khutzat hi. A lawhcingsak Pasian ahi hi. Jesuh’ vangliatna le Ama’min bekin nasep zo zosak hi.
Jesuh in sawm sagihte’ lawhcinna a muhzia ngaihsun dih ni. Khatna, nasep zawhna ah Satan kizawhna (Lk. 10: 18); nihna, nasepna ah kihel mite sepzawh nading vangliatna kamciam kipia (aneu 19); thumna, leitungah nasep gualzawhna hangin lungdam kipaak sangin vantungah min kigelh ahih manin lungdam ding hi zaw (aneu 20). Satan kiang pan a suakta mite hangin vantungah nopna om hi. Tawntung gam sung mi ding ngah sialin, Satan’ guallelh ding a pulaak hi pah hi.
Lk. 10: 24 sim kik in. Kamsangte le kumpite in mu nuamnapi, a muh khak loh thute bang hiam? Hih thu in bang hong hilh hiam?
THURSDAY APRIL 23
NUNGZUI SUAK DINGIN A HONG KALH THUTE
Socrates in Plato makaih hi. Gamaliel in Saul makaih hi. Biakna makai khat ciat in lungzui nei ciat hi. Tuate in Jesuh’ makaihna kibang lo hi. Bang hang hiam cihleh, midangte kimakaihna in mihing’pilna siamna bulphuh hi-in, Jesuh’ makaihna ahih leh, ama sepna le ama’ thu mah siksanin hi. Tua ahih manin, nungzui suahna in Jesuh’ hilh thute tung bek siksan hi lo-in, amah mah ii sep nate siksan hi. Tua hi-in Khrih in ama nungzui khempeuh amah tawh kibangin singlamteh pua-in Ama paipai-na a zui dingin hong sam hi. Calvary lampi a zui lo mi in Ama nungzui taktak hi thei lo hi.
Lk. 9: 23 – 25; Matt. 16: 24 – 28; Mk. 8: 34 – 36 sim in. “Khristian thu-um mi khat ihihna tawh kizui-in bang thu hong hilh hiam?
________________________________________________________
_________________________________________________________
Nungzui cih pen a kihonkhia mite le Honkhiapa kizopna hi. Hong kihonkhia ahih manin, Honpa zuih ding hi pah hi. Tua hi-in Paul in, Khrih tawh ka si khawm hi. Kei a nungta ka hi nawn kei hi. Ka sungah Khrih nungta hi” (Gal. 2: 20). Nungzui hihna –ah a kisam thu, Luke 9: 23 ah kigelh hi: “Mi khatpeuh in kei hong zuihnop leh ama deihna bangin gamta nawn loin (nial ding) nisimin a singlamteh pua-in hong zui ding hi.” Sawlna kammalte: ‘nial,’ ‘pua,’ ‘zui’ cihte ngaihsun in. Nial cih kammal ii khiatna, Peter in Jesuh a nialna sangin, a hong hilh thei zaw ding kammal dang om lo hi. Peter in, ‘ ken, Jesuh thei ngei keng,” ci mawk hi. Tua hi-in nungzui hihna ah zong eima deihna nial cihteh, ‘kei cih lungsim,’ neih ding hoih lo hi. Kei cih lungsim munah Khrih a nuntak pelmawh ding kisam hi (Gal. 2: 20). Nihna ah: nisimin singlamteh pua cih thu in, a tawntungin kei cih lungsim sihsakna nei tawntung ding hi pah hi. Thumna: Khrih’ nunzia le amah bek mah mitsuanin nungta ding ihi hi (Lk. 9: 57 – 62). Jesuh sangin masakzawk nei lo ding kisam hi. I nuntakna ah, lawm le gual kikholhnate-ah, nasepna-ah, biakpiaknate dongah, Amah bek mah thupisak, masak pen ding ci-in hong kal hi. A tawntungin Khrih tawh a sikhawm dingin hong sam hi. Nunlui si dingin hong sam ahi hi. Mimal deihna nial a, kei cih lungsim a sisak mi bekin Khrih nungzui thei bek ding hi. Dietrich Bonhoeffer, The Cost of Discipleship, 99.
Khrih nungzui a hi dingin bang hong kalkhia hiam? A hamsa thu ahih hangin bang hong hilh hiam?
FRIDAY APRIL 24
SIMBEH DING: Singlamteh in angsung, kei cih lungsim sisak thei hi. Singlamteh in Khrih’ puak vangik a pua dingin hong kisinsakna mun ahi hi. Khrih’ hakkol kisuan lo-in, Ama’ van pua lo-in, Ama nungzui ihi thei kei ding hi. I deihna le Pasian’ hong kalh thute a kihual kei leh, mihing’ deihna nial ding kisam lai hi.Tua bangin nialngamna in Khrih’ khekhap zuihna ahi hi. Ellen G. White, Sons and Daughters of God, 69.
KIKUP DING DOTNATE:
1. Wednesday ni-a, Lk. 10: 24 siksanin dotna enkik in. Kamsangte le kumpite in mu nuam napi, mu kha lo uh hi, cih thu, tuhun a dingin bang thute hi ding hiam? Genkholhna a tangtung thute maw? Amaute a dingin Dan. 2, 7,8 sunga genkholhnate a tangtung ding thu hi napi, tuhun a dingin a tangtunkhin suak hi. A dang bang na phawkkha hiam?
2. Leitung khempeuh ngah phialin, nuntak tawntungna taan lehang, bang phatuam ding hiam, cih thu ngaihsun in. Thu-um lo mite in leitung nate a it ding mah uh hi.Tua bek mah ngaihsuti nei uh hi. Tua simloh amau ngah ding bang dang om hiam? Thu-um mite in hih leitung nate kisia ding a, na khempeuh kibawl thak ding hi, ci-in upna neite in zong leitung hamphatna ding zongzong lai hi ve hang! Koi bangin hih bang a lauhuai panin kihem khia thei ding i hiam?
3. Luke 10: 17 – 20 sim in. Khrih’ min tawh dawite a hawlkhiatzawhna hangun a lungdamzia ding uh ngaihsun thei hi hang. Khrih in amaute a dawnkikzia ngaihsun in. Hotkhiat nasepna ah kihel mi khat ciat aa dingin a thupi bang hong lak hiam?
4. Khrih nungzui dingin kamsangte, sawltakte lo buang kipia ngam midang na phawkkhak a om hiam? Tua mite in nungzui a suah nadingun bang suplawh a, amaute bangin na sumh ngam ding hiam?
