LESSON 2 APRIL 4 – 10
KHRIH’KITUIPHUMNA LE ZE-ET A THUAKNA
SABBATH NITAK: TU KAAL SUNG SIM DING: Lk. 3: 1- 14; 3: 21, 22; 4: 5 – 13; Rom. 6: 1 – 6; Isa. 14: 13, 14.
KAMNGAH: Vakhu lim nei-in Kha Siangtho ama tungah hong kumsuk hi. Tua laitakin vantung panin aw khat hong ging a, “Nang pen ka it ka Tapa na hi a, nangma tungah ka lungkim mahmah hi,” a ci hi (Luke 3: 22).
Luke in Jesuh le Johnte vanglian ahihna uh, amau hun sunga a dang thupiangte tungtawnin pulaak hi. Hihte a huzaap mipa leuleu ahih leh, gamsung ah omin minthang lua lo Tuiphumpa John hi. Amah pen Jesuh pai nading lamsial dingin Pasian in a teel mipa ahi hi. Pasian in Messiah thu tangko dingin mi thupi, minthangte teello-in, miniamte a teel zawk pen ngaihsut huai thu hi.
Tangthukante in Tuiphumpa John le Khris nasep kipan, a kituiphum hun pen AD 27, 28 kim hi ding hi, ci-in ciamteh uh hi. Luke in Khris’ nasepzia a banbanin a pulaakzia tu kaal sungin i sin ding hi.
SUNDAY APRIL 5
TOPA PAI NADING LAMPI SIAL UN!
Luke 3 sungah John ii nasep a thupitna, hotkhiatna thu tawh kisai nasep a sepna kidawk hi. John thuhilhte in mite nuam nading, kipaak nading hi lo hi.
Lk. 3: 1- 14 sung sim in. Luke in tua hun lai mite aa ding bek hi lo, tuhun eite a dingin zong bang thupi gen hiam? John ii gen thute lak pan bang thu na theitel hiam?
__________________________________________________
___________________________________________________________
Kisik cih pen a thu bek hi lo-in nunzia hi zaw hi. Kisik cih kammal in Greek kammal ‘metanois’ pan hong pai hi-in, “lungsim ngaihsutna kheel, a thakin nungta” cih khiatna nei hi. “Tuiphum” cih kammal in ‘tui sungah tumsuk, kidiahsuk cihna hi. John mapek in zong Jew mite in Gentile mite Jew upna sungah a lut ding uh ciang, tuiphumna tawh lutsak uh hi.
Tuiphumpa John in Jew mite kiangah tuiphumna thu tangko hi. Nunlui hoih lo khempeuh nusia-in a thak nunna tawh nungta ding banah Messiah hong pai nading amau mahmah kigingkhol dingin tangko ahi hi.Tua hi-in Tuiphumpa John’ nasep in mawhna nusiatna limcing, a thak nunna tawh a hong tung ding Messiah gamsung mi hihna limcing ahi hi. John’ nasep in tui tawh kiphumna hi. Ahi zongin ama nung a hong pai dingpa in Kha Siangtho le mei sungah hong phum ding hi, ci-in pulaak hi (Lk. 3: 16).Tua hi-in tuiphumna in a pualam pan kimu thei sunglam, nuntak kikhelna limcing hi. Tua kikhelna pen Kha Siangtho tungtawnin kikhelna ahi hi.
Rom. 6: 1- 6 sung sim in. Paulin tuiphumna thu pan bang thu hong hilh hiam?
_________________________________________________
__________________________________________________
Tui sung pan pusuahna le mawhna ah misi bangin, dikna thu ah nungta cih thu ngaihsun in. Koi bangin Khrih sungah nunna thak tawh a nungta na hiam? Na nuntak sungah bang in tui sungah phum kul hiam?
MONDAY APRIL 6
“NANG IN KA IT KA TAPA NA HI HI”
Luke 2: 41 – 50 sungah Joseph le Mary in Jerusalem ah Jesuh a mansuahna thu kigelh hi. Mary in a lunghimawhna hangin Jesuh a haat khak manin Jesuh’ dawnkikzia lamdang hi (aneu 48); Jesuh in amah le amah Pasian’ Tapa ahihna kiphawk hi. “ Bang hangin kei hong zong na hi uh hiam? Ka Pa’ inn sungah ka om ding lamtak thei lo na hi uh hiam? ci-in Jesuh’ dawnkikna Joseph le Mary in tel zo lo uh hi. A nungzuite tawh kum tampi sung kithuah uh hi napi, amau mahmah in zong, Jesuh in kua hi-a, bang nasem, bang semding cihte thei zo lo uh hi.
Sihna pan a thawh khit, Jesuh in Emmaus khua lam manawhin a pai Nungzui nihte tawh kiho uh hi. A lawm khat in Jesuh pen Kamsang vanglian mahmah khat hi a, Pasian le mite khempeuh in a thugen le a nasepna ah vang nei mahmah khatin ngaihsun hi (Lk. 24: 19). Jesuh in kamsang sangin vanglian zaw tham hi. Amaute in Jesuh tel zo lo uh hi.
Matt. 3: 13 – 17; Jn. 1: 29 – 34; Lk. 3: 21, 22 cihte sim in. Jesuh’ tuikiphumna in bang pulaak hiam?
____________________________________________________
________________________________________________________
Khrih kituiphumin, “Jesuh in Pasian’ Tapa hi,” ci-in vantung in pulaak hi. Khrih in mawh kisik a tuikiphum hi lo hi. Mite zuih ding, etteh dingin kiphum hi (Matt. 3: 14, 15). Hih thu in thu thum kimu hi: ( 1 )En un, leitung’ mawhna puakia Pasian’ tuuno (Jn. 1: 29); ( 2): A nasepna dingin Kha Siangtho’ sathaunilhna ( 3 ): Jesuh in Pasian’ Tapa hi-in Pa in Tapa tungah a lungkim hi.
Mawhna nei het lo Pasian’ Tapa, na khempeuh Piangsak Pasian in, mihing hi lelte khut sungah kiniamkiatin tuikiphum hi, cih thu ngaihsun in. Hih in hotkhiatna thu tawh kisai hi-in, koi bangin ei le ei kiniamkhiat ding hong hilh hiam?
TUESDAY APRIL 7
“AN LE TUI BEK TAWH HI LO”
“Kha Siangtho tawh kidimin Jordan gun panin Jesuh hong ciahkik a, Kha Siangtho in gamlakah paipihin, Dawimangpa in ni sawmli sung a ze-et hi (Lk. 4: 1, 2). Pasian’ geelkholh nasep a sem dingin mihingin hong piang hi a, tuiphumna tungtawnin Kha Siangtho tawh kidimin, masuan sep ding khempeuh a ding ki-ap ding, gamdaih hun khat nei dingin gamlakah pai hi. Vantung panin Lucifer in Pasian a langpan a kipan, Khrih ii thuak ze-etna in Satan le Khrih, mawhna le dikna, kidona lianpi a dingin thupi mahmah hi. Khris in ni 40 sung bangmah ne lo-in om ahih manin pumpi taksa thazawm mahmahin, a sep ding nate hangin gimna thuakin a om laitak an ne dingin Satan in ze-et hi. Khrih in zo ding maw, Satan in lel zaw ding cih Satan in ngaihsun gige hi. Hih sia le pha kidona thupi lua mahmah ahihna vantung mite in zong thei uh ahih manin Khrih mahmah in do hi. Ellen G. White, The Desire of Ages, 116.
Satan in Khrih tungah a gen thu ngaihsun in: “ Pasian’ Tapa takpi na hihleh, hih suangte anlum suaksak in, ci-in thupia hi (Lk. 4: 3). Hih Satan’kammal in, vantungah ama sep sawm ngei, bang thu kidawk hiam?
_________________________________________________________
_______________________________________________________
A thupaipi in anlum vai hi masa lo hi. Ni 40 sung bangmah ne lo, gilkial mahmah ding cih thu ahih manin, ngasa antah bangin, anlum tawh ze-et mah hi. Jesuh in na khempeuh Piangsak Pa hi, cih pen Satan in thei hi. Bangmah a omlo panin nate piangsak thei Pa a’ dingin suangtum pen anlum suaksak ding cih pen hamsa hetlo ding hi. Satan’ do-na lianpi bel in, ‘ Pasian’ Tapa takpi na hihleh’ cih in Khrih a dingin ze-etna lianpen ahi hi. Tua ma ni 40 pawlin, Jesuh in Pasian’ tapa hi, ci-in vantung pan awging a, tu-in tua awging in Pasian kiang pan hi ding hiam cih muanmawh nading ze-etna hong suak hi. Pasian’ kammal muanmawhna in siat kipatna ahi hi. Vantung ah Satan in Jesuh’ thuneihna langpan hi. Tu-in zong langpan hi. Vantungah a langpanna sangin tu-in langpanna khauhpai zaw lai hi.
Koi bangin Satan in Pasian’ kammal muanmawhna ding hong ze-etna na nangzo thei hiam?
WEDNESDAY APRIL 8
“KEI HONG BIA IN”
Lk. 4: 5 – 8 sung sim in. Bang hangin Satan in amah kibia leh ut hiam? Bang lauhuai thu om hiam?
_________________________________________________________
_________________________________________________________
Pasian simloh biak ding om lo hi. Biakna in Pasian le piansak nate kilamdanna hong lak hi. Lucifer in Pasian a langpanna bulpi pen zong biakna thu mah hi. Lucifer’ ngimna Isaiah 14: 13, 14 sungah kimu thei hi. Satan in a ngaihsutna ah van sang pen ah kahto-in, aksite tungah ama tokhom koihin Sangpenpa bangin om ding mungtup nei hi. Pasian bek in a neih vangliatna langpan ding sangin langpanna lian zaw om lo hi.
Satan in Jesuh a ze-etzia en lehang vanglian Pasian langpanna kimu thei hi. Khrih in hotkhiat nasep semin, mawhnei mite Pasian kiang tunpih ding le Pasian ukna sung tunpih ding ahi hi. Satan in tua bang hun laitakin leitung nate zangin ze-et hi. Satan in mualdawngah Khrih paipih hi. Satan in Khrih kiangah hong bia lecin hih nate kong pia ding hi, ci-in pulaak hi (Lk. 4:7).
Satan in Khrih’ mungtup susia ding hanciam tawntung hi. Khrih in Satan mai-ah kunpak ziau hileh, Satan’ ngimna tangtung ding hi. Satan in vantung ah a zawhloh tu-in leitungah zawhsawm leuleu hi.
Khrih in Dawimangpa a dozia ngaihsun in. “ Ka nungpanin kihem khia in, Satan! Lk. 8: 8. Piangsakpa bek biak ding, tua in Ama a ding bekin hong nungtasak hi. Satan zawhzawh nading, Topa’ kammal mah Moses tungtawnin a pulaak thu in: Topa i Pasian khat bek hi. Na Topa Pasian it in….. zahtak in….., Ama na bek sem in (Thkna. 6: 4, 5, 13). Satan’ zuaukhemna le ze-etna upkhak loh nadingin upna tawh Pasian nungzui-a, Ama thu bangbangin nuntak ding kisam mahmah hi.
Thuman thutak, upna man panin, bang lo neng khat tawh lam kipial kha thei hi. Sabbath ni-in nasep, laivuanna, zakhan nading a tuamtuam sepna cihte in lam hong pialsak thei hi. Zuau phuak, upna selcipin, angsung le ei mimal hamphat nadingin na gamta ngei hiam?
THURSDAY APRIL 9
A GUALZO KHRIS
Satan in Khris a ze-etna tawh kisai-in Luke ii gen le Matthew in a pulaakzia uh a kibatlohna a hang i thei kei zongin, Satan in Khrih zozo lo hi, cih i up ding a nangawngkaina om lo hi. Mathew le Luke ii pulaak a thupi pen in Khrih in Satan zo hi, cih thu hi. Khris in mihing takpi hi; ei mah bangin ze-etna thuak mah taleh, mawhna nei lo hi (Heb. 4: 15). Khrih in, thungetna, vantung Pa Pasian tawh a a kip kizopna kip nei-in, Lai Siangtho tawh ze-etna khat khit khat zo-in, Pasian’ gam le Honpa’ ukna gam thu tangko hi.
Lk. 4: 9 – 13; Matt. 4: 5 -7 sim in. Khrih in Lai Siangtho siksanin ze-etna tungah gualzawhna ngah hi. Khrih in Lai Siangtho a thupi ngaihsut mah hiam, cih Satan in a ze-etna-in Lai Siangtho mah siksanin a thum vei-na ze-et hi. Khrih in koi bangin tua ze-etna do hiam?
__________________________________________________________
___________________________________________________________
Satan in, Jew mite a dingin a siangtho penpenna mun Jerusalem biakinn’ khumzangah Khrih paipih hi. Zion khuapi, Pasian in a mite tawh a tenkhopna mun in ze-etna mun hong suak hi. Khrih kiangah “Pasian’ Tapa takpi na hih leh,”cih ze-etna hong lut kik hi. Satan’ pulaak thu in: Pasian in ka Pa hi takpi hi, ci na hih leh, Ama’ na sem dingin hong pai takpi na hih leh, hih biakinn khum zang panin na tuaksuk hangin, Pasian in hong liamsak lo ding hi.” Satan in bang genbeh lai hiam cihleh, “ Amah in Ama vantung mite sawlin hong hon ding hi,” ci hi (Lk. 4: 10).
Satan in Lai Siangtho thei bilbel hi. Ahi zongin Satan in Lai Siangtho’ deihna a hi lopi-in pulaak hi. Satan’ ngimna ahih leh, Khrih in Pa Pasian ze-et ding deih hi. Daniel le a lawmte a hotkhiat bangmahin, Pasian in Ama’ na a sem mite lauhuai-na panin vantung mite in honkhia ding hi, cih kamciam om mah hi. Khris in Lai Siangtho mah siksanin Satan’ ze-etna na nial hi. Kuamah in Pasian ze-et ding ahih lohzia pulaak hi (Aneu 12). Pasian in ama deih bangbang a sem dingin Pasian tungah ki-ap ding cih pen ze-etna zawhzawhna lampi ahi hi.
Ze-etna tawh kisai Lai Siangtho’ hong hilh thupaipi lite in: (1) kuamah in ze-etna tawh kipelh thei lo hi, ( 2). Ze-etna i tuah ding Pasian in a phal leh, tua ze-etna zawhzawh nading le nialzawh nading lampi hong bawlkholhsak hi ( 3) ze-etna khat le khat kibang lo hi, (4) mihing in a zawhzawh loh ding ze-etna tuak lo hi ( 1Kor. 10: 13).
FRIDAY APRIL 10
SIMBEH DING: Joseph le Mary in thungetna le Pa Pasian tawh kizopna kip nei tawntungin, muanna tawh kipia a siangtho tavuan nei ahihna uh kitel uh hi leh, naupang Jesuh mansuah lo ding uh hi. A tavuan uh ni khat a phawk loh manun Honpa mangngilh uh hi. Ni khat mangngilh manin ni thum sung lungkhamna thuak uh hi. Eite zong tua bangmah ihi hi. Ni khat thungen lo-in nuntakna, kampau hoihlo zatna, mawk pauna cihte Honpa tawh nungta lo cihna hi pah a, Ama kiang tung kikin, a hong piak lungnopna i ngah kik nadingin lunggimna tawh nitampi i zon kul kha ding hi. Ellen G. White, The Desire of Ages, 83.
KIKUP DING DOTNATE:
1. Ze-etna i tuah leh, mawhna hi pah lo hi. Ze-etna in siangthona sungah a hong kipsak zaw hi. Ze-etna a thuak le ze-etna zui cih thunih kibang lo hi. Ze-etna tawh na kipelh nadingin na sep theih khempeuh sem in.
2. Thupiang khat i tel nadingin thupiang dang khat tungtawnin kitel thei hi.Lai Siangtho in vantung ah thu omziate, hih leitungah zong hong hilh hi. Lai Siangtho in Satan le Khrih, siatna le dikna, kido den ahihzia koi bangin hong hilh hiam?
3. Lai Siangtho sung koi munah, i tuahkhak ze-etnate a zo thei dingin kamciamte kimu thei hiam? Zawh nading kamciam om napi, banghangin ze-etna lelin puk kha pahpah i hiam?
4. Pasian’ kammal muanmawhna in ze-et i lelh nading kipatna masa pen ahi hi. Bang hang hi ding hiam?
5. Milim mai-ah pumpi i kuun pah kei zongin bangte in milim biakna mah tawh kibang hiam?
