LESSON 11| JUNE 6 – 12
PASIAN’ GAM
SABBATH NITAK: TU KAAL SUNG SIM DING: Lk. 11: 2; 21: 34 – 36; 1: 32, 33; 18: 16 – 30; 17: 23, 24; Mang. 21: 1- 3.
KAMNGAH: Nisuahna le nitumna, leilu le leitaw lam panin mite hong pai-in Pasian’ Ukna sung sabuai kimah tukhawm ding uh hi. Lk. 13: 29.
Jesuh in Pasian’ Gam hilh masakin nei hi. Matthew sungah 50 vei, Mark sungah 26 vei,
Luke sungah 40 vei, John sungah 3 vei kimu thei hi. Pasian’ gam in Satan le siatna
khempeuh a beimang nadingin Khrih in mi khempeuh mawhna sung pan a hong tatkhiatna
thu ahi hi. Pasian’ gam in leitung kumpite’ gam tawh kibang lo hi. Bang hang hiam cihleh,
Pasian’ gam in leitung tawh kipawl lo hi. Pasian’ gam in mit tawh kimu thei vangliatnate hi lo
tawh nuntak khopna tungtawnin Pasian’ gam hong tung hi. Mihing’ nunzia in a kicing Khrih’
zia le tong a kilatsak ciangin, tua in, a lian penpen Pasian’ gam vangliatna ahi hi. Ellen G.
White, The Ministry of
Healing, 36.
SUNDAY JUNE 7
PASIAN’ GAM KILANGSAK THUTE
Pasian’ gam hong tungta hi, ci-in Khrih in Ama nasep tungtawnin pulaak hi. Khrih tungtawnin Pasian’gam hong kipan hi.
Lk. 11: 2 in Pasian’ gam bangci pulaakin, bang hangin thupi hiam?
___________________________________________________________________
_____________________________________________________________________
Pasian’gam i cih in, gilkial dangtakte in gilvahna mun, cimawh genthei-te nopsakna mun, a kinengniam mite in suahtakna ngahna mun bek hi lo hi. Pasian’ gam i cih in, hoihna kici khempeuh, gamtat khuahek hoih kici khempeuh in pulaak zo lo hi. Mihing Tapa in leitungah a hong nuntak lai-in tua vangliatna Gam tangko hi (Matt. 4: 42 – 44; 23 – 25).
Pasian’ gam kiphutin a kipatna le tua Gam ii mong, Luke 1: 32, 33 in bang pulaak hiam?
__________________________________________________________________
___________________________________________________________________
Pasian’ gam tawh kisai-in a hong hilh thunihte: (1). Kamsangte’ lamet Messiah in Sangpen Pa’ Tapa, Jesuh hi. (2). Ama gam bei ngei lo ding hi. A khiatna in, mihingin a hong suahna, a sihna, le sihna pan a thawhkikna tawh Satan’ langpanna susia gawpin, a kip tawntung ding Pasian’gam a hong phut hi. “Leitung gam teng i Topa gam le Ama Khrih gam suak zo a, amah in a tawntungin uk den ding hi” (Mang. 11: 15). Adam le Eve-te a khem zawh manin Satan in Khrih a zo khin kisa hi. Khrih in Satan’ zuau khemna a man lohna pulaak hi. Khrih in Ama sihna le sihna pan a thawhna tawh Satan’ dona khempeuh sumai mangin, Pasian’ gam hong kipanta hi, ci-in hong hilh hi.
Koi bangin Pasian’ gam tawh kituakin nungta ding na hiam? A thupi penpenah koi bangin na nuntakna in pulaak hiam? Bang in tu hun le a hong tung ding vanglian Pasian’ gam kilamdangsak hiam?
MONDAY JUNE 8
PASIAN’ GAM KILANGSAK THUTE:
A nuai-a te in Pasian’ gam mi suahna thu bang gen hiam?
1. Lk. 18: 16 – 30 ______________________________________
________________________________________________________________________
2. Lk. 12: 31 – 33 _______________________________________
__________________________________________________________________
3. Lk. 9: 59 – 62 ______________________________________
Pasian’ gam mi suahna in neih le lamh, minthanna, zaa neihna cihte tungah kinga lo hi. Tuate neih loh manin Pasian’ gam mi suak thei lo cih hi lo hi. Luke’ gen mah bangin Gospel sungah Pasian’ gam mi suah nadingin Khrih tungah sitnei lo-in nuntakna khempeuh ki-apna, naupangno in nu le pa a muan bangin Khrih bek muanna kisam hi. Hihte in Pasian’ gam sung a nungta mite’ neih ding zia le tong ahi hi. Khrih tawh hong kigamla sak thei na khempeuh sup ngam kisam hi. A taktakin Khrih in tua bangte zawhpih hi zaw hi. Jesuh in i nuntakna hong kal hi. I nuntakna ah Amah bek mah i masak penpen ding deih hi. Hih in manpha hi. Bang hang hiam cih leh, Ama hang bekin a nungta ihi hi. Tua hi-in, i nuntakna bup Amah i ap ding kisam hi.
Lk. 18: 29, 30 sim in. Jesuh in bang gen hiam? Bang hong kamciam hiam?
_________________________________________________________
________________________________________________________________________
Pasian’ gam aa dingin nu le pa, sanggam u le naute nusia ding maw? Jesuh in Amah a zui mi khempeuh in tua bangin a gamta dingin hong sawl lo hi. Ahi zongin Pasian’gam tawh hong kikhensak ding ahih leh, Khrih in tuate a nusia dingin hong sawl hi. Pasian’ gam aa dingin nusiat huai lo hiam? A kipia khia ding hong kal hi mah lo hiam?
Misi le misi kivui uh hen, cih thupiak ngaihsun in. Khrih nungzui suahna-ah, paulap neih loh dingzia bang hangin thupi hiam?
TUESDAY JUNE 9
PASIAN’ GAM: A OM KHIN LE A OM NAI LOHDEUH
Jesuh in Pasian’gam tangko dingin hong pai hi. Nazareth khua-ah a thuhilh masak penpen (Lk. 4: 16 – 21), Jesuh in Isaiah’ gen Messiah, kamsangte’ gen kumpi gam, amah mahin tangtungsakin, Pasian’ gam in mite sungah hong tung hi, ci-in tangko hi.
Luke in, Pasian’ gamin tu-in hong tung hi, ci-in pulaak hi. Pharisee-te in bang hunin Pasian’gam hong tung ding hiam, ci-in a dot uh ciangin, Jesuh in Pasian’ gam in note sungah hong khin hi,” ci-in dawng kik hi (Lk. 17: 21). Lai Siangtho dangdangte –ah ‘note lakah’ ci-in kigelh hi. Cihnopna-ah, Jesuh hong pai kawmin, a kumpi gam zong kipan pah hi. Ama kumpi gam in natna damsakna (Lk. 9: 11); lungdamna thu tangkona (Lk. 4: 16 – 19); mawhmai-na (Lk. 7: 48 – 50; 19: 9, 10), dawi gilote hawlkhiatna (Lk. 11: 20) cihte tawh kithuah hi. Jesuh in mimal khat sungah Ama gam hong phut hi. Tua gam in Ama’ zia le tong nei theisak hi. Pasian’ gam in mimal sung banah, dikna le hotkhiatna kilangsak pawlpi sungah zong hong om hi. Eite sunga om Pasian’ gam in hehpihna hang hi-in, mawhna tawh kidim lungtang, a langpang lungtangin Ama hong itna le Ama ukna nuai-ah kiniamkhiatsak hi. Ellen G. White, Thoughts from the Mount of Blessings, 108.
“Pasian Gam hong tung khin,” cih kammal in vangliatna tawh hong tung ding tua lametna hong guan hi. Vangliatna tawh hong tung ding Pasian’gam siatna om lo ding a, tua gamin lei thak hi ding hi. Tua vanglian Pasian’ gam in Khrih nih veina hong pai mateng hong tung lo ding hi.
Lk. 17: 23, 24; 21: 5 – 36 in, a hong tung ding vanglian Pasian’ gam bang hong hilh hiam?
_________________________________________________________
________________________________________________________________________
I tenna leitung ah gimna, buaina, dahna le hamsatna tawh kidim hi. Hihte in Khrih’ gen thute hong theisak hi. Mi kim khatin Pasian om takpi hi leh, leitungah siatna om lo ding hi, ci-in ngaihsun uh hi. Khrih in tuma kum 2000 laipekin hih bang ngaihsutna om ding ahihlam genkhol khin hi. Tu-in vanglian Pasian’gam hi mawk leh, Khrih in zuau puak hi ding hi. Na khempeuh a beina hong tung ding a, tua hun ciangin vanglian Pasian’ gam hi ding hi. Tua mateng, i thuak keikai ding hi.
WEDNESDAY JUNE 10
PASIAN’ GAM LE KHRIH NIH VEI HONG PAI-NA
Khrih in Pasian’ gam a genin, thunih pulaak hi. (1) Pasian in Khrih tungtawnin mawhna pan a hong hotkhiatna ahi hi (2). Ama geelsa om bangin, leithak ah amah tawh a nungta khawm tawntung ding pulaak hi (Mang. 21: 1-3). Khrih in mihingin a hong nuntaklai-in Pasian’ gam kipan hi. Ama sungah a om mi in tua hehpihna gam a nei hi (Eph. 1: 4 -9). Ama tatsa mi khempeuh la dingin Khrih a hong pai takciangin, vangliatna tawh kidim Pasian’gam a mu ding ihi hi. Tua gam lamen ihi hi (Eph. 1: 10; Titus 2: 13).Na khempeuh in Khrih tungah a a citak mite’ luah ding Pasian’ gam manawh ahi hi.
Khrih nih vei-na hong kum kik ding cih thu in a hong pai masak lai-a a tangko Lungdamna Thu’ mungtawp lian bel ahi hi. Singlamteh tung pan Satan le mawhna a zo Jesuh in a sawt lo-in, vanglian Pasian’gam phut dingin hong pai ta ding hi. Tua hun ciangin siatna khempeuh beimangsak ding a, leitung in lei thak hi ding hi.
Lk. 21: 34 – 36 sung thute nang ma kammalin pulaak in. Koi bangin na nuntakpih hiam? Jesuh nungzui takpi mah na hihlam na kitel hiam?
______________________________________________________________________
__________________________________________________________________________
Khrih hong pai ding a ngak mite in kiging den a, thungen tawntung ding kisam hi (Lk. 21: 36). Hehpih tawh kidim Pasian’ gam mi hi khinte in ngakin, vilin, thungenin a om tawntung ding uh ahi hi. A hong tung khin Pasian’ gam mi in a hong tung ding vanglian Pasian’ gam a hong tun mateng, Ama’ na semin, upna tawh nungta-in, tua gam teci takpi dingin sawlna ngah ihi hi. Khrih hong pai kik ding cih thu in, eite nuntakna a siangtho dingin hong kal hi.
THURSDAY JUNE 11
TECITE
Sawl. 1: 1-8 sim in. A thupi mahmah Pasian’ gam thu bang kipulaak hiam?
_________________________________________________________
_________________________________________________________
Luke in Pasian’ gam tawh kisai-in Gospel bu dangte’ gen tawh kizui-in pulaak a, tua thu in pawlpi kipatkhiatzia le a nasep ahi hi. Luke in Pasian’ gam tawh kisai thu thum pulaak hi.
1. Jesuh hong pai kik takpi ding ahihna: Sihna pan a thawh kikzawh le van a kahtoh kikal, ni 40 sungin, Topa in a sihma-a nungzuite tungah a gen Pasian’ gam tawh kisai thute mah hilh kik hi. Sihna le sihna pan thawhkikna in tua Gam kikhelsak lo hi. Sihna pan a thawh kik zawh ni 40 sungteng mah, Pasian’ gam thu tangko hi.
2. A hun ciang Jesuh in hong pai kik ding hi, cih ngak in. Sihna pan a thawh nungah, Nungzuite in lunghimawhin, Topa thudong uh hi: “ Topa aw, Israel tungah tuhunin kumpi gam ding kiksak ding na hiam” ci-in dong uh hi (Sawl. 1:6). Khrih in tua dotna dawng lo hi. Ahi zongin nungzuite’ ngaihsutna puahphatsak hi: Pasian pen Pasian hi; Ama ngaihsutna a kankhia ding mite ihi kei hi; Ama’ geelnate upmawhsansat ding hi lo hi, ama koih thute a pholak ding mihing’ nasep hi lo hi. Jesuh in, Vanglian Pasian’ gam a hong tun ding hun thei hi; a gel hunin mihingin hong piangin hehpihna gam a hong phut mah bangin, Vanglian Gam zong, Ama geelna bangbangin hong tung ding hi ( Sawl. 1:7; Matt. 24: 36; Gal. 4:4).
3. Jesuh’ Lungdamthu aa dingin Teci-in om in. Kamsangte’ genkholh bangin a tungkhin thute siksanin, vanglian gam hong tun hun ding, kingaihsun thei hi. Khrih nih vei hong pai hun ding hong kihilh lo hi. Ahi zongin vanglian gam hong tun mateng Ama na sem ding hong sawl hi (Lk. 19: 13). Mun khempeuh ah Lungdamna Thu aa ding teci hi dingin hong sawl hi (Sawl. 1:8). Kha Siangtho vangliatna na ngah ding uh hi, ci-in hong kamciam khin a, Khrih aa ding teci hi un, ci-in sawlna i ngah hi.
A citak Khrih nungzui kimkhat in Khrih’ nasepzia tawh kisai telkhial uh hi. Hi mah taleh, Khrih in ama nasem dingin amaute zang veve hi. Hih in, Pasian’ zat mi i suah nadingin, a hong gen thute theitel khin phot ding a masa pen kisam ahih lohzia hong lak hiam?
FRIDAY JUNE 12
SIMBEH DING: Vantung gam in nuntakna thu-ah a zawngkhal mite aa ding hi. Khrih’ hong hilh gam in, tawl khat sung bek a kip, hih leitung gam hi lo hi. Khrih’ tangko gam in itna, hehpihna, dikna tawh kidim gam hi. Messiah in a man nading gam le leitung kumpite’ gam a kilamdannate in Mihing Tapa ahihna hong phawksak hi. Ama gam sung teng ding mite in lungsim nem mi, Ama hang aa bawlsiatna thuak mi, lungsim zawngkhal mi ahi uh hi. Ellen G. White, Thoughts From the Mount of Blessing, 8.
Pasian in tu laitakin eite hong bawlpha hi. Eite kim khat in suangtum bangin i lungsim khauh lai hi. Ahi zongin, Pasian i muan ciangin, Ama deih bangin hong bawl ding hi. Kicinna lohna, mawhna khempeuh hong hepkhiatsak ding hi. Vangliatna, hoihna tawh kidim a hong tung ding Gam ah vantungmite tawh kumpi khempeuhte’ Kumpi tawh a nungta khawm dingin a kiging khol ihi hi. Sih theih nawnlohna gam tawh kituakin a nungta thei dingin lungsim le pumpi kipuahphat kisam hi. Ellen G. White, 2T., 355, 356.
KIKUP DING DOTNATE:
1. Stephen Weinberg in bang gen hiam cih leh, ‘leitung nate thu a kantel theite in, nate in khiatna nei lo tektek hi, ci-in pulaak hi. Mi kim khat in tua bangin a ngaihsun uh hangin, bang hangin nuntakna in man nei, khiatna nei hiam? Khrih nih vei hong pai kik ding a, vanglian gam hong tung ding cih thute in i nuntakna in man nei-in, khiatna nei ahihzia koi bangin na tel hiam?
2. Khang khat khit khang khat a om Pasian thu-um mite in amau nuntak hun sungin, Khrih hong pai ding lamen den uh hi. A hong pai hun ding ni le kha, a seh khol zong om hi. Ahi zongin Khrih hong pai nai lo hi. Bang hangin Khrih hong pai ding hunsehna in khialhna hiam?
