LESSON 10 MAY 30 – JUNE 5
NISIM NUNTAKNA SUNGAH KHRIH’ NUNG ZUI
SABBATH NITAK: Lk. 11: 8: 4 - 37 – 54; 12: 4 – 21, 35 – 53; 8: 4 – 15; 22: 24 – 27; Amos 6: 1; Lk.
KAMNGAH: Sawltakte in Topa kiangah, “ Ka upna uh hong khangsak in,” a ci uh hi (Lk. 17: 5).
Avanglian thuhilhpa ahih hangin, Khrih in mite theihngei loh thu bangmah phuankhia lo hi. Ama’ ngimna taktak in “ a mangthang mite zong ding le hon ding bek ngimna nei hi (Lk. 19: 10). Khrih
in Pasian’ zia le tong kilangsak dingin hong pai hi. Singlamteh tung a thuakna in mawhna siahuaizia, Pasian i muh tel nading hong hilh hi. Mihing in mawhna tawh kidim mah taleh, hotkhiat ngah theih nadingin mawhna’ thaman hong piaksak hi. Tua bangin a thuak manin mawhnei mi in tatkhiat mi hong suak hi.
Hih tatkhiat mite sungah kihel dingin sapna ngahte in gualtungtuan nading a sapna ngah hi lo-in, amaute a sampa Khrih tungah ciampel lo-in a kip tawntung ding uh hi zaw hi. Ama’ deih bangbang, Ama nungzuite’ mungtup hong suak pah hi. Khrih tung le ama nasepna ah citakna lo buang, hoihna le kicinna om thei lo hi.
SUNDAY MAY 31
PHARISEE’ NUNZIA PEL UN
Gospel sungah Pharisee tawh kisai mun 80 val, Luke sungah 25 vei bang kimu thei hi. Pharisee-te in thukham zuihna-ah thukham a laimal bang tektekin a zui ciatciat mite hi. Sadducee-te ahih leh, Pharisee-te bang lo-in, amau deih bangin thukham zang uh hi. Pharisee-te in hehpihna thu um napi-uh, thukham zuihna tawh dikna, honkhiatna kingah hi, ci-in thuhilh uh hi.
Lk. 11: 37 – 54 sim in. Khrih in bang thu hong vauhilh a, koi bangin tua thu tu-in zong kimu thei hiam? Koi bangin Khrih’ hilh a lauhuai thute tawh kipelh ding i hiam?
_________________________________________________________
__________________________________________________________________
Pharisee-te’ thuak ding gimnate in (Lk. 11: 42 – 54) tu ni ciang dongin, biakna man taktak a kipzia hong hilh hi. Gentehna-in, sawm-ah khat piakna pen na khempeuh Pasian’ kiang pan hong pai hi, cih lakna hi-a, ki-itna, thumaanna cihte kul nawn lo cihna hi lo hi.
Pasian’ itna le a thumaanna a nial Pharisee-te in kikhopna inn sungah mite’ pahtawi dingin a kiliansak mite hi (aneu 42, 43). Upna man nuntak pih uh hiam? Khrih in, a kimu thei gamtatna, pualam sianthona, zehtan tuamtuam zuihnate, biakna man i sak khak loh ding hong hilh hi (Gam. 19: 16; Lk. 11: 14). Pasian muhna ah a siangtho nate le thu nengno khat, zelhzau khak baih mahmah hi.
Khrih in laithei thukhamhilh siate thuak ding gimnate zong pulaak hi. Amau pilna le thukham theihnate siksanin, amau zuih loh thukham mite zui sakin, a zui lo mite gimpia uh hi (Lk. 11: 46). Tuate kawmkalah, Pharisee-te in a nungta lai kamsangte’ langpanin, a hi zongnin a sikhin kamsangte pahtawi uh hi. Pasian Tapa thahlup ding vaihawm uh hi. A sikhin kamsangte a pahtawi manun gimna thuak ding hi lo zaw-in, itna, hehpihna le Pasian’ thukhenna a nial manun, gimna thuak ding uh hi.
Amaute thuak ding a nunung pen gimna in lauhuai mahmah hi. Amaute tungah muanna tawh kipia Pasian gam lut nading thuman thutak tawhtang nei napi, tua bangin nungta lo uh hi. Tua tawhtang hoih takin zangin Pasian gam sungah mite lutsak ding kimlai, a ut nuam mite khaktan uh hi.
MONDAY JUNE 1
PASIAN KIHTA UN
Adventist pawlpi’ upna le nuntakna ah thulaigil mahmah khat a hi, vantung mithumte lakah a masa vantung mi’ thupuak in “ Pasian kihta unla, amah minthan pia ta un” (Mang. 14: 7), ci hi. Pasian kihta un, i cih ciangin lau ding cihna hi lo hi. Pasian kihta cih ciangin, Pasian in kua hi-a, eite tung pan bang hong ngen hiam, cih theihtelna ahi hi. Pasian a kihtak mi in Pasian tungah ciampel lo, a kimu thei upna tawh nungta mi ahi hi. Tua bang nunna in, Pasian pen i ngaihsutna, gamtatna, mite tawh kizopna, i nuntakna buppi mahmah hong siangthosak le lam hong lakpa hi, ci-in theitel hi. Nungzui mi hihna pen Pasian kihtakna siksan hi. Tua bang mi in a kip tawntung munah a om mi ahi hi.
Lk. 12: 4 – 12 sim in. Khrih in kihtakna thu bang hong hilh hiam?
_________________________________________________________
________________________________________________________________
Luke in kua kihta ding, kua kihta lo ding hong hilh hi. Pumpi susia theite kihtak loh ding thupi hi. I tun nading tawntung nuntakna a susia thei Pasian, kihtak ding kisam mahmah hi. Ahi zongin i biak Pasian in van a leng gita nangawn a kem Pasian hi (Lk. 12: 6), i lutunga samzang khempeuh a pha zah nangawn a thei khin, itna, hehpihtheihna tawh kidim Pasian hi. Tua hi-in Ama mai-ah mimal khat ciat in manpha mahmah hi. Hih thu na tel nak leh, hih leitungah na lau, bangzah bei ding hiam?
_________________________________________________________
_________________________________________________________________
Lk. 12: 13 – 21 sim in. Khrih in bang hong vauhilh hiam?
__________________________________________________________
______________________________________________________________________
Khrih in unau nihte’ gamh luah thubuai, thu a khensak loh hangin, tua unaute in Thukham a sawmna thupiak a theih dingun hilh hi (Pai. 20: 17; Lk. 12: 15). Huaihamna, deihgawhna cihte in a tawntungin a kip thupiak ahi hi. Nuntakna i cih pen neih le lamhte hi lo hi. A hai mihaupa in hih leitungah nop a sak theih penpenin a nungta mipa hi. Amah bangin i nuntak loh ding kidop huai mahmah hi. Neih le lamh, sum le paai tampi neite in hih thu ngaihsut huai phadiak hi.
Leitung nate in kitangsapna tuamtuam hong sik theih uh hangin, lungnopna taktak hong pia thei lo uh hi. Tua ahih leh, bang hangin Khrih’ vauhilhnate (Lk. 12: 16 – 21) kitel khial zel hiam?
TUESDAY JUNE 2
VILIN KIGING DEN UN
Khrih’ nung a zui mi khempeuh in pilvang cihtakna cihte kisam hi. Tawntung gam a gal muh ding hi ta, thuman thutak lenin, a vanglian khuavak a nei, a thupi nasep a sem, a nungta lai eite in, cihtakna khahsuah lo-in, a zah tampi-in mainawt kul hi. Ellen G. White, 5T., 460, 461.
Lk. 12: 35 – 53 sim in. Khrih hong pai kik ding a ngakte tungah, a phadiakin nang a ding bang thupuak hong gen hiam?
________________________________________________________________________
___________________________________________________________________________
Pasian thu-umte in thadah lo, om hithiat lo ding mite hi. Khrih hong paikik ding a hun i theih loh hang, hong pai kiktakpi ding ahih manin, i khuavakte tangsakin, kawnggakte gaksa-in om a, a kiging tawntung dingte ihi hi. Khrih hong pai kik ding thupha tawh na nunzia, na upna, na gamtat luheek kimakaihsak in. Ama tungah cihtakna, amah dawn dingin a kiging den mi in, a hoih nasem le gilo nasem kilamdanna ahi hi. Ka topa hong ciah hak lai inteh, a ci nasemte tungah Pasian in thukhen ding hi (Lk. 12: 45). Pasian in hun hoih hong piak leh nasep ding tavuan zong lian pah hi. Tua hi-in tam a ngah mite tung panin tampi mah kingen ding hi (aneu 48).
Zion nuam a sa mite in gimna thuak ding uh hi (Amos 6: 1). Hih in, nungzui mite pai-na lampi ding lamnuam hi lo hi, cih hong hilh hi. Paul in zong galvante silh un ci-in hong hilh hi (Eph. 6: 12). Khrih le Satan kidona sungah a nungta mite in Singlamteh tawh kinai tawntung hi. Upna kip in, Khrih’ singlamteh pua-in a tawp dong hong tunpih ding hi.
Tampi a kipiate tung panin tampi kingen kik ding hi; tampi a ki-apte tung panin a tamzaw kingen kik ding hi (Lk. 12: 48). Hih thu in, Seventh-day Adventist thu-um mi khat nahihna tawh kizui-in, bang hong hilh hiam?
WEDNESDAYJUNE 3
CINGTAK TECI DINGIN OM UN
Pa, Ta le Kha Siangtho in mihing kipiansakma, mihing a mawhma, leitung kipiansak ma nangawnin tatkhiatna thu koih khin uh hi (Eph. 1:4). Tua thu in singlamteh’bulpi mah hi. Mi khempeuh tungah kipuak ding Lungdamna Thu in tua thu mah hi. Tua thupuak dingin Pasian thu-um khempeuh in tavuan nei hi.
Topa’ thupiak in Jerusalem, Judea le Samaritan a kipan leimong dongah ama teci dingin hong sawl hi (Sawl. 1:8). Tua thupiak in Ama nungzui khempeuh in nasep thupi nei ihihlam hong hilh hi.
Khaici vawhpa le khaici gentehna in bang hong hilh hiam? Lk. 8: 4 – 15.
_____________________________________________________________________
_____________________________________________________________________
A citak teci in thaman bang ngah ding a, bang hun ciang a thaman sang ding hiam?
_____________________________________________________________________
_____________________________________________________________________
Sumtang thugentehna in teci hihna-ah cihtakna le tavuan neihzia bang hong hilh hiam?
________________________________________________________________
________________________________________________________________
A tunga thute in teci pang mi le upna neite mai-ah a lauhuai thute, sep ding nate le ngah ding thaman hong hilh hi. Thu-um mimal khat ciat in vantung tavuan piak i nei hi. Na ngah khempeuh ngaihsun lecin, nang tung pan hong kingen kikte cihtham hetlo hi.
THURSDAY JUNE 4
SILATE MAKAI HI-IN
Lk. 22: 24 – 27 sim in. Topa in nungzuite tawh a nunung pen Nitak An ne ding kithawi-in a om laitakun, Vantung Gam ah kua lian pen ding hiam, ci-in a nungzuite khat le khat ki-um uh hi. Koi bangin Khrih in amaute’ theihloh thu hilh in bang thu in amaute’ lametna tawh kilehbulh hiam?
_________________________________________________________________________
________________________________________________________________________
Makaihna tawh kisai Khrih’ hilh thu in tuamdang hi. Pharaoh, Nebuchadnezzar, Alexander, Julius Caesar, Genghis Khan cihte’ in mi tungah thuneihna, zaa nei uh hi. Leitung makaite in tua bangin mite tungah thu nei uh hi. Ahi zongin Khrih in, tua bangin mite tungah thu nei dingin thuhilh lo hi. “ Note tua bang na hi kei un. Tua sangsikin, note lakah a lianpen in a moipen bang hi dinga, a ukpen in nasempa bang hi ding hi” (Lk. 22: 26). Makai hihna tawh kisai leitung mite’ ngaihsutna tawh kilehbulh Khrih’ hilh thu in: “ note tua bang na hi kei uh hi. Note lakah a lian nuam peuhmah na nasem uh hi ding hi. Note lakah makai ahi nuam peuhmah na sila uh hi pelmawh ding hi. Mihing Tapa, midangte ama na a semsak dinga hong pai hi lo, midangte ading nasem ding le mi tampi tat nadingin ama nuntakna a pia dingin hong pai ahi hi, a ci hi” (Matt. 20: 22 – 28).
Mi tungah zaa neihna in lungkimna hong pia lo-a, sepna in hong lungkimsak hi. Makai khat ii thuneihna in aa zaa neihna hi lo-in, mite’ na a sepna hang hi zaw hi. Kumpi tokhom in kuamah khel zo lo hi. Singlamteh bekin kikhelna piangsak hi. Nuntak nadingin mawhna thu-ah sih phot kul hi (Jn. 12: 24).
Nungzuite lakah kua lian pen ding hiam ci-in amaute khat le khat kikum ciat uh hi (Lk. 9: 46 – 48). Nungzuite in leitung cilesa lungsim tawh kidimlai uh hi. A Topa in amaute’ lungsim tawng thute pholhkhia hi. Tua a genkhiat thu in, Khristian thu-um mi’ nuntakna-ah a thupi mahmah hi. “Note lakah a neu pen” cih pen leitung lungsim tawh kituak het lo hi.
Khrih’ lungsim puak le leitung lungsim puak kilehbulh mahmah hi. Koi bangin Khrih’ deih nunzia bangin nungta thei ding i hiam?
FRIDAY JUNE 5
SIMBEH DING: Lungsim puak kua aa hiam? Ngaihsutnate kua aa hiam? Kua it ding i hiam? Kua aa dingin na nuntakna zang ding na hiam? Khrih aa ihih leh, i lungsim ama neihsa hi pah hi. I nuntak, i lungsim ngaihsutna khempeuh Ama aa hi. Ama’ lim le meel i pua hi. Ama huu tawh a nungta ihi hi. Ama deih bang i sem hi. Na khempeuhah Amah i lungkimsak hi. Ellen G. White, Steps to Christ, 58.
Mawhna, siatna tawh kidim hih leitungah nuamna lian penpen, theihna lian pen in Topa’ na sepna bekin hong pia thei hi. Hih sangin kicing zaw, ciangtan om lo nopna lian pen, a hong tatkhiatna thu, i mu ding a, i tel zawh loh a lamdang thute kitelsiang ding hi. A vanglian lametna nei-in Khrih tawh a nungtakhawm tawntung ding ihi hi. Ellen G. White, Education, 309.
KIKUP DING DOTNATE:
1. Jesuh in mihau a kipan bang mah nei lote zong sam hi (Lk. 12: 20). Hau, milian khat hi-ta kei leng, Pasian muhna-ah bang in mihai hong suaksak thei hiam?
2. Pawl sungah, milian, mi minthang, mi huzaap zo cihte a om mah bangin, mi nautang, kuama theih khak loh mi zong kihel hi. Mi nawl khin, mi thupi a kisim kha lo mite in miliante tawh kibang ahihlam bangin phawksak thei ding hiam?
3. Pharisee-te i mawhsak kha phial ding hi. Ahi zongin amau bangin a nuntak kha i hih lohlam bangci kitel ding na hiam? Pharitee bang hi lo-in koi bangin thuman thutak aa dingin na nungta hiam? Bangci bangin thuman le zuau thu khentelin, lampi tanzau sangin lamneu tawn zaw ding na hiam?
4. Bangci bangin Khrih’ hong kumkik ding ngakin kiging tawntung ding na hiam? Koi bangin Ama hong pai kik ding awlmawh lohna tawh kipelh ding na hiam?
