Topa Pasian pen ei te thupha tampitak hong pia nuam bek hi lo in eite mahmah tawh hong tonkhawm nuam Pasian ahi hi. Topa in "Note in ka thukham zui - in ka thupiakna te mang in tuate na sep uh leh kei mah in note lak ah om in note, Pasian hi-in note in keima mite na hi ding uh hi" ci hi Siampi laibu=26;3-12, Hih Lai Siangtho munpen ei Mihingte in Pasian hongthupiakte mang in ih zuih zawh leh a mah in Eite Pasian hiding a, eite tawh hong omkhawm in ih paina peuh ah hongton khawm ding hi. Lai Siangtho lui leh Lai Siangtho thak sung ah Topa tawh a tonkhawm mi pawlkhat nuntakna a tom in en khawm pak ni.
1. Enoch; ---Piancil=5;21,
Enoch pen Pasian tawh Kum < 300 > sung ki khawl hi. Tua khit ciang Enoch ki mu nawnlo hi. Bang hang hiam cih leh Pasian in a mah la hi. Enoch pen Pasian tawh lawmta bang in om hi. Mihing hina pi'n Mihing ngeina bang si lo in Pasian tawh tonkhawm a hih man in ahing tang in Vantung ah kila tohi.
2. Noah;-----Piancil=6;9,
Noah pen Thuman mikhat hi a, a ma khang ah Paubaang lo hi. Noah pen Pasian tawh kikhawl hi. Tuicin tun hunlai - in Noah in a Innkuanpit te leh Ganhing nam kop khat ciat suahtakpih hi. Leitung ah Mihing leh Ganhing tu ni ciang dong a om theihna pen Noah in Pasian thupiakte zui a, Pasian tawh a tonkhop na hang ahi hi.
3. Abraham-Piancil=17;1,
Abraham tung ah Topa kilang a, ''Kei mah in Vanglian Pasian ka hi hi. ''Hoihtak in gamta in la, Paubang kei - in nangtawh Thuciamna ka bawl ding a, Nang tampi tak kong phasak ding hi'' ci hi. Abraham in a nuntak sung in Topa thupiakna te zui-in mang a, Topa tawh tonkhawm ahih man in Topa'n Abraham thupha pia in a suan a khakte zong pungsak in a kisimzolo zah dong in pungsak hi.
4. Moses;--Paikhiatna=3;11,
Moses pen Midiam gamsuang teng ah Kum <40 > a om sung in Topa tawh ki mu in tonkhawm uh a hih man in Topa'n a ma tungtawn in na lamdang tampi piangsak hi. Moses in Pasian mutel hi. Topa'n Moses pen lawmta bang in Hopih in Maitang ki tuah in thugenpih hi.
5. Nungzuipi te;
Lai Siangtho thaksung ih et ciang in Nungzuipi te zong Topa Zeisu tawh <kum 3 ½ > Sung bang asuk a to ah aki thuah mite ahih man un Topa Zeisu a telmuh na uh leh, atheih cian na te uh Midangte kiang ah gensawn kik thei uh a Bawlsiatna leh sihngamna te thuak in Zeisu in Topa hi ci-in hangsantak in Teci pang ngam uh hi.
Thu um mi ahi eite khempeuh in zong Topa tawh ih tonkhopna ah eima hoihsak thutawh khawl in ih tawlngakloh ding thupi hi. Ih paina lampi haksa in ih mai leh ih kiim ih pam ah sih theihna ding leh Ih Upna , ih lametna te hong tha nemsak thei ding vai tam phial mah tase leh Topa tawh tonkhawm ih hih man in Bang mah launa ding omlo hi. Nisim in ih paina leh ih om na khempeuh ah Topa tawh tonkhawmpeuh leng , a mah in eite hongcing hongkem bek hilo in lampi manhonglak ding a ih tuah haksatna leh buaina khempeuh zong hong Gualzawhpih laiding hi.
Enoch, Noah, Abraham,leh Moses te bang in eite in zong Topa muang in ama hongthupiak te zuih ding leh ih kalsuanna khempeuh ah Topa tawh a tonkhawmte ih hih dending thupi hi. Tua hi leh Topa in eite thupha hongpia bek hilo in eite hong ompih den ding a, ih sep ih bawlna ah matut daupaina ngah in Mi lawhcing te ih suak thei ding hi.
Topa thumang a, Topa tawh atomkhawm mite peuh mah Nuntakna te ih et ciang in Leitung ah sumleh paai nei venvan kei mahta se leh zong lungnuam in a taksa leh akha cidam a, asep a bawlna peuh ah lungkim in zong adaupai uh hi.
:Lai Siangtho sung a, Abraham leh David te, om dan enpak leng;
Abraham pen Pasian lawmpa thu upna ah Pa < Father of faith, Manglaipan,> ki ci hi. David pen Pasian lungsim tawh a ki tuak mipa ki ci hi. < James=2;23, Rome=4;11, Acts=13;22 > A piaksa tapa a ngenkik pa leh a tapa a pia ngampa kibang mah cih ding hi. Tua mah bang in a galte a ding a, anuntakna apia pa leh a galte a hi galkapmang pi pa a it pa zong a ki bang mah cih ding hi. Tua a hih man in Topa Zeisu in Van a om napa uh api cin a cingtak a hoihkim mah bang in note zong na picing un Matthew 5;48. ci hi.
Abraham in a tapa Isaac a piak na thu ih theihsa tek ahi hi. Pasian in sihna pan thokiksak na'n teh ci-in Abraham in um ahih na zong Lai Siangtho in honggen hi Hebrews=11;19. Hih Abraham upna in theihtel sitset na namkhat ahih na thu hong phawksak hi. Tua ahih man in Abraham in a tem a paai pan hong dokkhia in a khut hong likto ngam takpi hi. Abraham pen thu um mite pa a cihtakpi mah ahi hi. Picing ,cingtak taktak khat ahi hi.
David thu en leuleu ni. David nuntak na sung ah alam dang pha deuh thu= 2Samuel=3, na sung ah om hi. Kumpi Saul leh a tapa Jonathan a sih khit ciang in Galkap mangpi pa Abner kepna nuai ah Ishboshet in kumpi Saul tang in Israel gam teng uk hi. David pen Judah gamsungteng bek uk in om phot hi. Ishboshet in Abner pen a pa Saul zi neu khat ahi Rizpah tawh a muan mawh ciang in Abner heh mahmah a, David tawh thuciam na bawlding in a gam a aap ding in , va pai hi. David kiang pan a ciah khit phet in David' Galkap mangpi pa Joab zong giahphual pan hongtung lian hi. Abner hongpai na pi'n kumpi pa in bang mah cihlo cih a zak ciang in heh mahmah a, Abner khem in sam kik sak in that lum hi.
A galpa Saul galkap mang lian pen pa Si cileng hang David a lung dam mahmah ding in tuat uh hi. Abner Sih na hang in David in a mite kiang ah na puan uh balkek in IP pipuan ki khuh un la Abner sihna hang in kap un la, thum un ci mawk hi. A mahmah in han ah zui a, awng gawp in nakpi tak in Abner kah hi '' Mihai pa bang in Si lawmlawm na hi hiam? Abner aw. Na khut te hongki henlah hilo a, Na khete kol hongki bulh lah hi beek lo a, Migilo te mai ah Mikhat a puk bang in lah na puk ta zen aa, ci-in taam lo ngaungau hi. Sa thau a ki nilhsa kumpi ka hih hang in tu ni-in ka tha zawm mahmah hi ci hi.
Na galte na it in , hongsam siate thupha na pia in cih thu Topa Zeisu in a gen laitak in David leh Abner te thu a lungsim ah ompen leh ki lawm maw. David pen a ki neih cih bang peuh mah hilo in a sung ah Zeisu lungsim bang lungsim hoih a neih lam ki mu thei hi. Tua ahih man in Pasian in ka lungsim tawh a ki tuak mipa na ci ngiat hi.
Tua ahih man in Abraham bang in piak khiat ngamna tawh a kizom Upna, David bang in Galte na ngawn it takpit na ih neih ciang in Van a om ih pa a hoih kim bang a hoih a pi cing a cingtaak mite ih suak ding hi. Abraham upna in Thawhki na bulphuh hi cih ki mu hi. Tua Upna in tu hun leitung nuntakna en lo in hongpiang laiding vanthak leh leithak a lam et upna ahi hi. Eite in tua hun ciang in Topa tawh omkhawm dingte ih hihi. Tua bang upna ih neih ciang in Pasian mite thu -um mite Sanggam bang in hong ki -it sak a, Thu umlo mite zong < Ih galpa hi phial ta leh> Kha mangthang itna tawh hong itsak hi. Tua a hih man in Pasian in bang deih a, Bang ci leng Pasian thupha hong luang ding hiam? ci- in Zeisu totsa khekhap mantak tang tak in ih zuih zawh semsem na ding in Kha Siangtho in a tawntung in lam hong lak in hong ompih ciat ta hen . Amen.
