"TEDIM LABU LEH, S.T Hau Go, LATE; !!
A Masa in S.T Hau Go, Zi pen Pi Luan Za Cing, hi cih hongtheisak masa ingh. Zomi te Pasian thu lam leh pilna lam ah khantoh na ding a, a han ciam mahmah hi a, zong Pasian thupha piak mahmah khat zong a hihi.
Tedim labu <1> na pen 1914 Kum in Sihzang pau a ki tei la Dawng=24 a pha, hongsuak hi. Tedim Labu <2> na 1918 Kum in La Dawng=100 a pha, Tedimpau in hongsuak aa, Tua Labu te ah a tei te Min ki gelhlo hi. Tedim Labu <3> na 1923 Ciang in La Dawng=283 a pha, labu Suak a, tua lai ah Cope topa, mah makai hi na pi'n a ma Mingelhlo in A huh mi 8te min, na kigelh hi. Tedim Labu <4> na, Tua Tedim Labu sung a Late, Eipau in a cihnop na ki tello lua a hih man in, S.T Hau Go in 1946 Kum, Pasian nasep hong ki pat ciang in, Kua masawl loh, Kua ma Guaihloh pi - in A ma thu in Labu hongpuah pha hi. Tua hun lai-in Biakna Ki pawlna cih bang Om nailo hi.
1948 Ciang in American Gam a pai ding hun tung aa, A vek in zosiang manlo in, Zawhsa tawh, zawhloh tawh khet ding in Yangon - a, ABIAM, ih cihte, ABM Press ah ap hi. Tua pen Tedim Labu=4na hi a, 1949 in hongsuak khia hi. Tua Labu=4na a bawl ciang in A kizang Late teipha in, A kisa ngeilo La pawlkhat la khia in , Tua mun ah a ma theih Lathak hon khat guang aa, A ma teithak a omlai teng a Bu monglam ah behlapna in nei a, a vekpi -in La=295 Ongpha hi.
S.T Hau Go in 1948-1950 sung A merican ah M.R.E vasin a, aman phet ciang in hongciah hi. Amah M.th Kum 3 Course sin nuam hi na pi- in Ih Sangmang te in a maukhuan ciah ma, a lap kik theihna ding deih uh a hih man in kum=2 Course ah M.R.E sin hi. A mah Lai SiangTho tei ding a ngimsa a hih man in Lai SiangTho tei na ding a-kisam a sak Systematic Theology, Greek, Hebrew cih te a ma thu in sin beh hi. 1950 kumbei ciang in American pan hong ciah hi.
ZOGAM Khamtung hong tung in Ih sangmangte lah a khuan a ciah hun uh cing ta, ahi man in amah guakbek in ZOGAM Khamtung bup van in Tedim Baptist Association, Falam Baptist Association, Hakha Baptist Association, Hualngo Baptist Association, Zomi Baptist Convention ci te hongphuan khia hi. ZBC Secretary sepna tawh ki cing lah lua in Latei ding peuh mah tawh sem manlo hi. Biakna Latei ding in 1957 ciang in ZBC Secretary pan tawp in Mandalay ah Tedim LaBu ka zawh bangteng zopak vet ning'' ci - in Tedim LaBu tei a, Zodek tak khet ding in LaDawng=109 zong ABM Presss ah puak khin ta hi. American a pai ma-a, Lathak a guante a-aw tawh ki tuak lo, a hih man in Kua mah in satheilo in Na ki zang lo lel hi. A mah American pan hong tun ciang in Sia, Vul Za Thang, Sia, Gin Khaw Thangte Khawngtawh ko Nupi-Papi, teng mah in Choir-a kasak uh leh a ngaih lam hong ki theikhia, a tua ciang in hong ki zangpan hi Ci.
Tua a hih man in LaBu khat=1, Ih khet kik ciang in Tonic-Solfa tawh thuah ni ci, a ka gelsa uh hi a, Zodek tak in tua bang a-awtawh thuahsa, a Sample Copy zong ABM'' Press te in Ko kiang leh, Sia, Kam Khaw Thang kiang ah hongpuak khinta uh hi-napi'n Tua bangteng thei gegu mah in TBA-Ec tawmkhat in Bang mahsemlo cih Paulap in September-26-1958 , ni - in theih kholh lo in , La tei napan, Bingbak in tawpsak uh hi. A Mah a ki tawpsak khit ciang in LaBu leh Lai SiangTho tei ding in Sia, Kam Khaw Thang ki ap hi. Ci - in thu khen na nisim in kibawl thithe hi Ci. Sia, Kam Khaw Thang in Alui te puah hilo in, LaDawng=20, behlap in la Dawng=315, apha LaBu 1969 ciang in Tedim Baptist Christan Endevour Union -te ki ap leuleu a, 1974 ciang in Ongsuak khia hi. Tua sung ah zong a omsate ahi bangbang in ki guang aa, Choir ding a kitei te Pawlkhat guan beh hi. Tua pen a tung ah Tedim LaBu ki ci na pi'n ZBC Labu Ih cih pen hi. Tua ZBC labu sung a, late a ki teipha hilo in a maanlo pi mah in a hi bangbang in ki khen kik hi. Hi te khempeuh pen a kiteisa, apuah kik Reviesd- Edition hilo in, tawmbeh lap a, a khenkik Reprint bek ahi hi. Tua sung ah Tedim LaBu=4 nasung a, khempeuh, te Choir khawng a sak ding a S.T Hau Go, tei te mah zong guang uh a, ABM'' Press - te mah in khen uh hi. Tua Khitzawh kua mah in Latei ding vai peuh mah ki hawm nawnlo hi.
1975 Kum in S.T Hau Go Zato lum a, anop tuam deuh ciang in Latei ding mah hong genkik hi. ''Ke'n hih Lateipen zekai mahmah ding, Sumzong suakpaklo ding Sum tumnei hetlo ih hih teh Dictionary na patsa pen zomasa le hang kumkhat sung in Manding a, Tua khit teh Latei kikpan zaw leng'' ka ci hi. Ci, Aman Dictionary pen Manglai siam khat peuh in hih thei ding hi. Eimite in La tei thei tampi om a cih uh hang in Ke'n Latei thei ding Mi ka mu naikei hi. Zong Ompaklo ding hi. Ci - in A Zato lupna tung pan in Latei ding mah hong kipan teei teei hi. Ni dang a atei man nailoh te, Teipha in, athak hon khatbehlap in Ongtei a, LaDawng=504, apha Christian la, Tedim kam 1987 in Ongsuak khia hi. Labu=4 nasung a-aom teisa veve te na ngawnzong tawmtawm akhel om hi. Tua Christian Labu sung ah sum-meet zona, in aki neih theihloh na ding leh INTEGRITY=Thumaan, cihtak, ki ciatna, neih theih zawhna ding in Copy Right thu cingtak in, at hi. Hih pen kiphatsak na hilo in akammalte, theizaw lopi in kua mah in a khel themthum theih lohna ding Tedim Mite in Tedimkam mal maan taktawh PASIAN abiaktheih na ding adeihsakna Ih Mipihte a khualna mah ahi hi. Hih La=504 apha LaBu pen a meet la lo in Abeizahtawh kituak lian in Ks=50, in ki zuak hi.
X'ristian LaBu hongsuakbaih ta ding cih aki theih ciang in Pawltuamtuam pan Pawlkhat in Pawlpi mintawh ahi zong in, Mikhat mintawh ahizong in sumzon-na ahidiam? Minzon-na ahi diam? A phuakte cihna atel loh banvuah, Ih Tedim kammal na ngawn Bultel khol lopi - in S.T HauGo'' Teisa Kammalte Malkhat, malnih, khel a- A masapen Nunungsak- cih bang lel peuh tawh LaBu Ong bawl ciat uh hi. Hih LaBu thu ah S.T HauGo, in akhuaksi-a, Kei khut tawh kasep khiatsa vive a hih man in ka tel mahmah thu vive Onggen ka hihi. Tua hi a, Tedim kammal hita leh a la phuakte cihnopna mahmah hita leh Bultel khol lopi in S.T HauGo teisa kammalte tawmtawm khel in LaBu ki bawl zelzul a hih man in, Ih Late kisa khawmthwilo hi. Pawlkhat in ee, a cih ciang pawlkhat in aw, a sakhawm hi na pi ki banglo hi. Ka Pasal hi ci a, kaphat na hilo in A manglai hita leh, A Zolai hita leh U-HauGo, telzah a-atel ding tam hetlo ding in ka umhi. S.T HauGo in leitung min leh Vang, Sumleh pai, lamet na tawh asep hi lo in PASIAN ading leh Tedim mite a ding deihsakna tawh asepte tel thei sang thei tek leng ki hamphazaw dingin ka um hi ci-in Pi-in gen hi. kei zong Ih tedim laBu a suak masa mah Khumsa zungzung mai ingh.
