Nau meekkhiat(terminate) tungtang pen ngaihsutdan a tuam tuam tam khathei ding hi.Mi pawlkhatin khialhna lua in a ngaihsut lai tak un pawlkhat leu leu in mawhna in ngaihsun uh hi.Khristian citciat te zong i san dan kibang khol lo kha ding hi.Tua ahihmanin limtaka ngaihsut huai thu khat ahi hi.Zomi ten i bangci ngaihsut hiam? Laisiangtho mah siksan leeng hoih ding hi.
Laisiangtho sung ah Phinehasa zi in nau vei in na asak mah mah lam na gen hi.Numei pawlkhat in hih nau vei gimna a thuak nop loh man un nau phiat ziau ziau ngam mawk uh hi.Hih pen Pasian’ thu tawh kituak hetlo hi.Pasian in mihingte pung leh khangding banah leitung khempeuh a dimdingin hong deih hi.(Piancil 1:28).Pasian thupiak man nangin numei ten naupai gimna a thuak teta ngamuh kul mawk hi.
Piancil 3:16 sungah i pu Adam leh i pi Evi ten Pasian thupiak palsat khitnung un numei kiangah” Tua ciangin numei kiangah, “Naupaina-ah na gimna nakpi takin ka khangsak ding a, na a sapipi-in nau na nei ding hi” ci hi.Suan leh khak nei dingin numeileh pasal hong bawl hi.A pung a khang ding leh leitung a dim dinga hong cihna pen Eden huana singgah nekkhialh manin khelkik tuan lo hi.Ahizongin nausuah gimna thuak ding pen gen hi.Hi pen numei te Pasian in a hamsiatna ahi hi.
Pasal’ baw(sperm) leh numei a’(ovum) hong kigawm akipanin numei in naupai hong kipan hi.A suahkhiat nai loh hangin mihing mah hi mawk cih theih hi.Taksa hinna pen sisanah awm.Numei’ sula a awmlai pan mahin hinna nei ta hi.Tua pen hong khangto zelin kha 4 pawl pan aw hong nei ta hi.A pua lama gingte zong za thei ta hih tuak hi.Nu gil sung pana hong pai khiat ciang bekin Mihing cihna hi lo hi.A nu’ gilsunga a awmlai nangawnin hinna nei khin ahih manin Mihing mah hi mawk hi.
Tuicin tun khit nangawn ciangin note pungin khang unla, leitung khempeuh ah dim un a cih kammal pen Pasian in khel tuan lo hi.Sisan kisuah ding phal lo zawlai hi.Sisan suaksak te phu kila ding cizawlai hi.Gam khangto te ah nau lah deih buang nausuah gimna lah thuak nuam lo mi pawlkhat in naupang guk peuh va mawk uh hi.Tua manin Mihing nangawn kizuak in sumbawlna in kizang ta zen hi.Pasian in sisan manpha sa hi.Gan si pen Biakpiakna hi a Mihing si pen nuntakna ahi hi.Nau phiat pen naungek’ nuntakna laksak suak ahihman in mawhna lian khat hi.Nupa kithukim a phiat ahi phial zong un Pasian mai ah paulap zong thei lo ding uh hi.Siam tang ngei lo ding uh hi.Bang hang hiam cih leh tualthat ahih man un.
Late 127:3 ah “Tate pen pasian thupha hong piak hi ci hi.I gamh(gou) hong hi mawk uh hi.Tate pen nu leh Pa adingin Pasian’ letsong ahi hi.Pasian letsong a khawn khawnga hong piaksang nuam lo in mek khia mawk leeng pasian a lungkim lo ding hi.Mi deihsakna letsong i piak ciang hong sang nuam kei le uh nuam het lo hi.Pasian letsong i san noploh ciangin Pasian lungsim na hi.Pasian lungsim nat sak khak pen ei adingin pawi mah mah hi.Mithat te vantung gam tung lo ding uh hi.Gilsunga naungekno hinna nei saalkhiat pen mithahna khat mah ahi hi.
