Silngo kihel dawn dinga kibawlte zu(Alcohol) ahi hi.Zu pen nidanglai pek panin tudong mah in kidawn lai hi.Minam kimin zu ki dawn ciatin minam khangto te’ zudawn hoih(Quality) zaw deuh hi bek lel hi.Zu dawn a ki kham kham hangin a bei a mangthei ding dan hih tuak lo hi.
Na khat peuh peuh pen a hoihna leh a hoihlohna awm hi cih theih siam ding thupi mah mah hi.Zu in mawhna bangmah bawl thei lo in a zangte in a zatkhialh man ua mawhna hong piang hi zaw hi.A zang siam te adingin a hoihna pawlkhat awm ve ve sam hi.Ahizongin zatsiam ding bel haksa mah mah hi.Hai khat dawnte in hai nih dawn vet ning e ciin, hai nih dawn le uh a ban awmsak to lai lai uh hi.A tamlua na khempeuh pen a hoih bangmah awm ngei lo hi.Tua mah bangin zu zong tam dawn luat pen hoih lo hi.A hoih bekin dawn thei leeng si leh sa adingin a hoihna pawlkhat awm hi.Zang siam leeng cidam nangin hoih hi.Khawvawt gama awmte bangin zu dawn le uh a ciuh lum tuam hi.Zu in hong hangsan sak thei hi, tawmvei sung lungnopna hong neisak thei zen hi.Zu in kilawmtakna hoih piangsak thei lai hi.Nidanglai in i pule pa ten kiitna leh a dah a kapte hehnepna ding in na zang uh hi.
A zangsiam lote adingin zu pen siatna khempeuh mangpa suak thei mawk hi.Zu pen a dawn tungte in limsak luatna meel zong nei khollo uh hi.Mi enman peuh leh khangualbatna dana a ngaihsut khak man uh ahi hi.Ahizongin limsa tek tekin a tawpna ah ngawlzo nawn lo thei uh hi.Zu kham te in a kilawm a kituak bangmah awlmawh nawn se lo in mihai mah bang lel mawk uh hi.Tua ahih manin mite in nuihsanin, mi bat lohna haina nam khat hong hi mawk hi.
Zu dawn pen sum mawk bei na khat zong hi.Tuhun the a koi mun peuh ah zu tam man thei mah mah ta hi.Zu lei nangin sum tampi bei kul hi.Hih zu lei nanga a sum zat te uh innkuan sung kitangsapna lei nang khat peuh peuh a kizang hi zaw leh hoih ngel ding hi ven!Zu dawn mi khat in a dawnlo khat sangin sum khol theilo zaw hamtang hi.A muh masak sak uh zu manin pai zel ahih manin khol ding awm man ngeilo hi.Zu dawn innkuan pen khangto hak diak hi.Zu zuakte zong sum a muh mah mah sam uh hang hau paisuak ngei lo uh hi ei.Zu tawh hauhna in sawt ki mang lo hi.
Zu pen mimal,innkuan leh khuasungah buaina a piangsak thei den khat ahi hi.Zu dawn te in zu hong kham tak ciangun mi suk buainopna lungsim hong nei uh hi.Tua in buaina tampi piangsak thei hi.Zu kham te tawh kisuk khak loh ding hoih zaw hi.Zu khamte peuh tawh na kilai leh; zo lecin,’zukham hi ven zo sam mah lo dia’ hong kici dinga,zo kei lecin,’zu kham lawm lawm zolo’ hong kici ve ve ding hi.Thupi lo mah mah hi.Zu dawn den nupa kal leh innkuan sung pen nuam ngei lo hi.
Zu a ki nak kham leh zu man khang lel hi.Tua ahih manin kham tawh a beisak zawh ding dan hi lo hi.Tua ahih manin zu dawn dan siam ding hoih hi.Zu dawn mite theih dingin ah zu hoih(Quality) bek dawn ding thupi hi,tuhun the zusia tamlua hi.Zu dawn dan siam pen hoih mah maha, ahizongin dawn loh mah hoih zaw lai hi.
