Leitung khantohna tawh kizui in mun tuam tuamah kipai hi.Hih leitung i khualzinna gam ah kha lam sa lampi zui zel hi hang.Mihingte bukim nai lo i hih manin lam tuam tuamin haksat buaina ki tuak thei hi.Eima’ inn lum ah ki om den thei lo in mun tuam tuamah paikhiat hong kuul zel hi.Tuabang
hun ciangin haksat buaina nam tuam tuam ki tuakkha thei hi.Hih te mang pau in accidents kici hi.Liam leh bai a tuak khat peuh kihuh ding pen Pasian’ deihna leh i mawh puakna ahi hi.Liamna baina khat peuh tuah cianga ki kepzia ding nam tampi om hi.Tua te laka guh hekh kepdan gen dih ni.Guh hekh i cih pen vak khiat man beka om hi khin lo in Inn sung pan zong piang thei hi.Kawi mun kawi mun himahtaseleh, zato innpi tunpih ma a kikep/kikhawi dan a tomin First Aid a gensawm ihi hi.
hun ciangin haksat buaina nam tuam tuam ki tuakkha thei hi.Hih te mang pau in accidents kici hi.Liam leh bai a tuak khat peuh kihuh ding pen Pasian’ deihna leh i mawh puakna ahi hi.Liamna baina khat peuh tuah cianga ki kepzia ding nam tampi om hi.Tua te laka guh hekh kepdan gen dih ni.Guh hekh i cih pen vak khiat man beka om hi khin lo in Inn sung pan zong piang thei hi.Kawi mun kawi mun himahtaseleh, zato innpi tunpih ma a kikep/kikhawi dan a tomin First Aid a gensawm ihi hi.
Tuah siatna tuam tuam hangin guh hekh thei hi.Tuabanah taksa peng tuam tuam ten zong liam thuak thei hi.Guh hekh pen a tangpi thu in bawk hi.Pawlkhatin a tung teng na sa lo in a khaw nung ciang nasa saan uh hi.A thuak te adingin tangkha leh na sem sem hi.Tua ahihmanin pawm, kawi, zawn kuul zel hi.Phatuamngaihna tawh mite ahuh i hih mah bangin i mihin pihte natna a dawn i hih kawm manin dawp siam ding hoih hi.
A masa in na thuakpa in khua a phawk hiam, hopihna te a thei thei hiam cih telcian phawt ding.Khawphawk a hopih theih a hih leh i hilhna bang hong mang thei ding hi.Tua banah koilai mun na deuh hiam cih hong hilh meng meng thei ding hi.Khuaphawklo ahih leh bel a lauhthawnhuai dinmunah ding zong hi thei hi.A taksa koilai mun na deuh ahiam cih zong theih haksa mah mah ding hi.Tua ahihmanin a natna behlap ding peuhin ki gamtang kha thei hi.
A banah a liamma, sisan luanna om maw om lo cih limtaka et ding ahi hi.Tua in naak liam maw naak liam khollo cih ngaihsutna omsak ding hi.Sisan luang zah dinga liam ahih leh khuttuamna zat ding hoih hi.A hang pen natna tuam tuam a kilawhsawn thei tam ta hi.Khut tuamna zat pak ding a om kei phial leh zong Polythene zat theih ahi hi.Mi hehpih luat mana natna hoihlo ngahkhak ding zong lau huai veve hi.Liamma te puan siangtho tawh tuamsak bikbek ding ahi hi.Tua in sisan luang ding leh nin tuam tuam tu ding dal thei hi.
Na thuak pa pen dawmtakin Stretcher aihkeh kizawnna bawltawm ah koih ding ahi hi.A taksa a tang kawi kawi lo dingin a lupna ah khau tawh gak ding ahi hi.Damlo khuaphawk ahih naak leh bel a ma nopsakna pen dawt ding ahi hi.
Ngawng Guh Hekh:
Ngawng guh dek lama paisuk pen gen ihi hi.Ngawng guh sungah spinal cord om hi.Tua a kisiat kei leh kaamphat huai mah mah cihna hi. Tuadan damlo te pilvang taka kepsiam ding thupi mah mah hi.Limtakin a ihmut nang bawlsak a lupsak ding ahi hi.A ngawng a nawl tuakah a tat khak loh nangin puansia aihkeh lukhamin kam ding ahi hi.Lukham pen khapsak ding hi lo hi.Lukham sang bangin polythene sungah lei aihkeh sehnel thun hileh hoih zaw lai hi.Khauhzaw tham ahihmanin hoih vanglak hi.A lu pen a talah vial dingin a lupna tawh henkhawm ding.Tuamah bangin a khut a khe zong a tat loh nangin hen ding hoih hi.
Ngawng guh mah bangin nungzang guh leh guh dang hekh te zong tang taka sial a gakcip hoih hi.A taksa dang a tat manin a guh hekh pen na sem sem thei mawk hi.Tua ahihmanin a lu pan a khe dawng a tang theilo dinga hencip ding ahi hi.Dawm taka puak leh zawn ding ahi hi.
Ban Guh Hekh:
Guh hehna munh sisam zam a om leh om loh limtaka et masak phawt ding. Guh hekh pen teh(sing tawh tep) kuul zel in pilvan kuul mah mah hi.Bang hang hiam cih leh thagui kitah behlap thei aih ciang a. Khutdawh en siam a om leh khatin a ban pan a khut dawh na en hen la, tuapan a hehna ah dam dama khep a zan kik ding ahi hi.Thagui mang lo a kitangsak thei ahih leh hoih hi.A tehna ding vanzat pen puansiangtho tawh tuamsawn ding ahi hi.Ban guh pen liangko leh kiu kikala hekh ahih leh tua kikal ah tep ding.Tua khit ciang damlo in ama’ ban awk ta ding hi.
Kheguh hekh:
Hih zong ban guh hekh mah bangin a zakawn ah a tha gui ensiam a om leh a tha gui zansak ding ahi hi.A om kei leh lah teh ding hi mai hi.Khe pen khut tawh kibanglo in tuam dang pian hi.A tawnin pheipi pan siakmit dong teh ding ahi hi.Van zat ding deih bang a om nak leh kawng pan khepeek dong teh ding ahi hi.Tehna dingin sing pek , sing tumtawng leh kawllukhu kung khawng ki zang thei hi.Hih dana ki tep te a taksa mundang a tat hangin a hehna laitak tanglo hi.Tua in damlo a nat beh nang panin kipelhsak thei hi.Na thuakpa in khedap a bulh leh suahsak tek tek ding ahi hi.A khepi leh a kheme te thasaan sak thei leh hoihzaw hi.Tua in a khe muka sisan kicing khawm ding leh a hehna kim bawk ding phatuamsak thei hi.Ban guh hekh te zong a khut me te uh tatsak zel ding ahi hi.
Hih dan tuah siat na a om cianga i mawhpuakna pen damlo a manlang thei bang pen leh na thuaklo pen in zato ah puakzawh ding ahi hi.Sinna nei meel lo a guh hekh meek dam siam zong om kha thei hi.Ahizongin sinna nei sia vuan te kiang mah ah tut ding hoih zaw hi.
