VANTUNG PAN HONG PAI PILNA
SABBATH NITAK
TU KAAL SUNG SIM DING: Pau. 8: 1- 36; 9: 1- 18; Matt. 16: 26.
KAMNGAH: Topa in kei hong piangsak maa pen a, tangtawnga ama sep lak pan a masa pen ka hi hi (Pau. 8: 22).
Pau. 1: 20, 22 in a gen mah bangin pilna in thuman thutak hi. Tua THUMAN THUTAK in Pasian sungah om
hi. Tua THUMAN THUTAK in thuman thutak kici khempeuh kipatkhiatna mun ahi hi.
Tu hunin mi tampi in thuman tutak pen a mun le mual, hun tawh kizui-in kikhelkhel hi, ci-in
ngaihsun uh hi. Mi khat a’ ding thuman pen midang khat a ding thuman lo thei hi, ci-in
ngaihsun uh hi. Ahi zongin tua bang pen Lai Siangtho tawh kituak lo hi. Mihing in a phawk a, a phawk kei zongin, thuman thutak in mi khempeuh a ding hi-in, kikhel ngei lo hi.
Pilate in zong Khrih kiangah “ Thuman thutak in bang hiam? ci-in dong hi (Jn. 18: 38). Khrih in ka thuhilh a za mite in thuman thutak thei ding uh hi. “ Kei in thuman thutak ka hi hi,” ci-in dawng hi
SUNDAY JAN. 18
PILNA IN HONG SAM
Pau. 8: 1- 21 sim in. Pilna in bangzahin manpha hiam?
____________________________________________________________
___________________________________________________________
Pilna in mi khempeuh hong sam hi. Pasian in mihing bawlin, Khrih in mimal khat ciat a dingin sihna hong thuak hi. Pasian in mi khempeuh tungah pilna, thuman thutak theihna, tatkhiatna hong pia hi. ‘Hong sam,’ ‘kiko,’ ‘thugen,’ ‘ka gen,’ cih kammalte in pilna’ hong sapna kammal ahi hi. Hih kammalte’ pulaak thu in pilna cih pen a kingah thei, a aw kiza thei hi, cih thu hong hilh hi. Nung kaal sunga i genkhitsa mah bangin, pilna in sihna le hinna thu hi-in, pilna a nial mite in sihna thuak ding a, pilna a nei mite siatna tawh kipelh ding uh hi. Pau. 8 sungah pilna in ciampel ngei, citak hi, cih thu giat vei bei pulaak hi. Thuhilhkikna 32: 4 sunga thute mah hong hilh kik hi. Pasian in na khempeuh a Piangsak Pa ahih manin thuman thutak khempeuh ama kiang pan hong pai ahi hi (Jn. 1: 1- 3).
Pau. 8: 10, 11 sim in. Pilna thu bang hong hilh hiam?
________________________________________________________________
________________________________________________________________
Mi tampi in khuamial le siatna sungah nungta uh hi. Mi tampi in lamet bei, lametna man lo tawh nungta uh hi. Bang hangin hih bangin lamet bei uh hiam cih leh, Khrih hong tatna, Ama hong kamciam nunna hoih cihte tawh nungta lo uh hi. Vantung Pasian theihtelna siksanin hih leitug hauhna liatnate tehkak ciangin, hih leitung nate gentham lo hi (Than. 2: 11 – 13).
Matt. 16: 26 sim in. Na’ nunzia bang hong lak hiam?
MONDAY JAN. 19
PILNA LE PIANSAKNA
Pau. 8: 22 – 31 sim in. Koi bangin pilna le piansakna kizom hiam?
____________________________________________________________
____________________________________________________________
Pilna le Topa in kizopna nei hi. Hih thu sungah Pian. 1-2 sung thute mah pulaak hi. Hih thu in, pilna bulpi Pasian in pilna tawh na khempeuh piangsak ahih leh, mihing a nuntakna ah pilna kisam mahmah zawkan hi, cih hong hilh hi. Pilna kipatkhiatna Topa (Yahweh) hi ci-in hong hilh hi (Thkna. 32:6; Pian. 4:1). A kipatcil pekin pilna om hi. Pian. 1:1 sungah a kipatcilin Pasian in vantung le leitung a piangsak hi, ci-in hong hilh a, Piancil sunga kipatna pen nate kipatkhiatna hi-in, Paunak sunga a gen kipatcilna in Pasian mahmah, Pasian’ nunzia a pulaak kammal ahi hi. Tua hi-in pilna pen Pasian’ zia le tong lakah kihel hi. Na khempeuh a om ma-in pilna om khin hi. A tawntung a om den ahi hi.
Tua hi-in pilna pen mihing sung panin a hong kipan tawm hi lo-in eite kiangah a hong kilangkhia hi zaw hi. Mihing in a sin thu, mihing tungah a hong kihilh thu ahi hi. Mihing in amah le amah kimakaih leh, khuamial sungah lampai hi ding a, ahi zongin, “Khrih in khuavak ka hi hi” ci-in tua khuavak eite hong piasawn hi (Jn. 1:9). Tua khuavak kisam lo kuamah om lo hi.
TUESDAY JAN. 20
PIANSAKNA SUNGAH NUAMNA
Pasian in nate a piansak khitsialin hoih hi, ci hi (Pian. 1:4, 10, 12, 18, 21, 25, 31). Mihing a bawl khit ciangin, “ hoih mahmah hi,” ci-in pulaak hi. “Hoih” cih Hebrew kammal in lungdamna le piansaknate tawh kizopna hanga nuamna pulaak kammal hi. Pasian in a piansak na khempeuh tawh a lungdamkhawm dingin tawlnga hi (Pian. 2: 1- 3). Hih tawlngak in Sabbath hi-in, thupha kipia hi. Paunak sungah pilna in piansakna sungah pilna dam hi, ci-in hong hilh hi.
Pau. 8: 30, 31 sim in. Bang hangin pilna in lungdam hiam?
________________________________________________________________
___________________________________________________________________
Pilna tawh kipiangsaknate’ hangin Pasian’ hong damna kilangsak hi. Pasian in ni khat khit ni khat nate a piansak khit, nisim a lungdamna banah, piansak nate pahtawina zong ahi hi. Pilna in mihingte lakah nuamsa hi (Pau. 8: 31). Pasian in na khempeuh a piansak khit, ni sagih ni Sabbath ni-in, mihingte tawh hong kikhawlkhawm hi. Hih bangin a piansak nasepna pan khawlin, lungdam kipakin a omna thubul in, mihing in Sabbath tawh kizopna nei-a nuam a sa ding hong deihna bulpi pen hi. Piangsak Pasian mah bangin, mihing in zong nisim nasepnate pan tawlnga-in nuamsa-in a om ding hong hilh hi. Gerhard G. Hasel, in Kenneth A. Strand, The Sabbath in Scripture and History (Washington DC: Review and Herald, 1982), 23.
Kol. 1: 15 – 17; 2: 3; Mang. 3: 14; Jn. 1: 1 – 14 sim in. Piansakna thu ah Khrih’ nasep bang pulaak hiam? Bang hangin Honpa le Tanpa hi, ci-in upna thu ah Piangsak Pa ahihna i theih ding thupi hiam?
WEDNESDAY JAN. 21
PILNA’ HONG KUT
Paunak 8 in pilna tawh a nungta mi’ nunzia, mimal tawh kisai thu hong hilh hi. Nate omma-in a om pilna thu, mihing’ ngaihsutna in ban zo lo hi. Ahi zongin mihing in thuman thutak a theihtel nadingin tua pilna in mihingte dinmun ah hong niamsukin, Khris tungtawnin a hong kipia tua pilna tawh kizopzia ding zong hong hilh hi.
Pau. 8: 32 – 36 sim in. Hinna le sihna thu bang pulaak hiam?
________________________________________________________________________
________________________________________________________________________
“Thupha ngah” cih kammal a khiatna in ‘nuamsa,’ ‘lungdam,’ cihna hi. Hih munah thupha ngahna tawh kisai-in a gen “ ka thugen hong ngai,’ ‘kong gente zui’ cih thu i mu hi (Aneu 32). David in zong hih bangin gen hi. “Topa’ ngeina sungah a gamta mite,’ ‘ Ama thuhilhnate a zui mite,’ ci-in pulaak (Late 119: 1-2). Hih thute in Topa’ thupiakte nuntakpih tawntung cih thu hong hilh hi. Thuman thutak theihna bek kicing lo hi. Nuntakpih ding kisam hi.Khris mahmah in zong Pasian’ thu za-in a zuite mite in thupha ngah ahi uh hi, ci hi (Lk. 11: 28). Thuma’n lohna le thukham palsatna hangin bang thupha kingah ding a hiam?
Khris’ nunzia in lungnopna’ bulpi hi, cih hong lak banah lungnopna ngah zia ding hong hilh hi. Lungnopna taktak a deih mite in lungnopna kingah theihna mun a zuat kul hi. A kicing Khris tungah ki-ap lo-in lungnopna kingah lo ding hi. Ellen G. White, My Life Today, 162.
Lungnopna om lo hi leh kilawm! Hahkatin lungnopna a zong mi in lungkiatna vive tuak kha thei zawsop hi. Bang hangin na khempeuh sangin Topa Pasian tungah citak ding thupi masa pen hiam? Lungnop zong masa zaw ding maw, Pasian’ gam zong masa zaw ding, koi hi leh, lungnopna kingah zaw ding hiam? Bang hang hiam?
THURSDAY JAN. 22
PILNA MAW HAINA: KOI ZAW
Pilna’ hong kutna thu in pilna tel ding maw ahih kei leh hai-na koi zaw tel ding cih thu hi (Pau. 9). Pilna le haina pen kipawlkhawm thei lo hi (Pau. 9: 1-6, 13 – 18).
Pau. 9: 1-6 le Pau. 9: 13 –18 enkak in. Pilna le haina kilamdanna bulpi bang hiam?
____________________________________________________
_________________________________________________________________
Pilna vanglian hi. Nate piansakna ah kihel hi. Aneu 1-3 sungah pilna’ nasep nam 7 bang pulaak hi. Tua nam sagihte le piansak ni sagihte in kithuhual hi. Haina ahih leh kimanna nei lo hi. Bang mah thei lo napi a thei kineih hi. Bang mah man nei lo napi mannei in kingaihsun hi (Aneu 13). Pilna le haina in mi khempeuh sam mah taleh, a piak uh kibang lo hi (Aneu 4, 16). Pilna in ama bawlkholhsa an le tui nunna a ne dingin hong lui hi (aneu 5). Haina in tua bang hong pia lo hi. Haina in kiphasakin guktakna bek tawh nungta hi (aneu 17).
Pilna in haina a nial dingin hong hilh hi. Tua in nuntak nading lampi hi. Haina in bang mah nial ding hong hilh lo hi. Tua bangin nuntakna in sihna lampi hi. Paina lampi a tawn mite in thutheihna lampi a tawn uh hi-in, amaute in mainawtin nungta ding uh hi (Aneu 6). Haina lampi a tawn mite ahih leh, mainawt cih om lo-in thutheihtelna nei lo mite ahi uh hi (Aneu 18).
Pau. 9: 7 -9 sim in. Koi bangin a pil mi le a hai mi in pilna’ sapna dawng uh hiam? Bang thu in a pil mite pilsak semsemin a hai mite pillo sak hiam?
_________________________________________________________
Pilna lampi in kiniamkhiatna lampi hi. A pil mi pen kithuhilhna ngai-in kithuhilh thei mi ahi hi. Naupang bangin a khangto ding kisam ahihlam amah le amah a kitel mi ahi hi. Tua hi-in Khrih in naupangno na bat kei uh leh, Vantung Ki-ukna Gam ah na lut thei kei ding uh hi, ci hi ( Matt. 18; 3).
FRIDAY JAN. 23
SIMBEH DING: Vangliatna tawh kidim na khempeuh a bawl Pasian in amah kia-in nate bawl lo hi. Amah tawh a sem khawm, a geelna a tangtunpih ding a nuampih ding nei hi. “ A kipat cil-in Thu na om a, tua Thu, Pasian tawh na omkhawm a, tua Thu, Pasian ahi hi. A kipat cil a kipanin Thu le Pasian omkhawm hi (Jn. 1: 1,2). Khris, Thu (Pasian’ tapa neihsun) a tawntung a om PA tawh a omkhawm, PA tawh a nunzia kibang, ngimna kibang hi. PA tawh a omkhawm nasemkham Tapa ahi hi. Tapa in a kipat cil pan om ahih zia hih bangin pulaak hi: Tangtawng pek panin a om, na khempeuh a omma-in a om Thu ahi hi (Pau. 8: 22 – 31). Ellen G. White, Patriachs and Prophets, 34.
KIKUP DING DOTNATE:
1. Bang hangin piansak thu up ding pen pilna bulpi kici hiam? Bang hangin, Piangsak Pasian om lo, nate amau thuthu-in piangtawm hi, cih upna Lai Siangtho tawh kituak lo hiam?
2. Pilna in mihingte sung pan hong piangkhiatawm hi lo-hi, cih thu ngaihsun in. Pasian lamlahna lo-in mihing in theithei ngei lo ahihzia Lai Siangtho siksanin pulaak ding na nei hiam?
Gentehna-in singlamteh tungah Khris hong sihna thu, Kha Siangtho lamlahna lo-in bangci bangin um thei ding na hiam? Ni sagih Sabbath, Khris hong kum kik ding cih thute koi bangin um thei na hiam?
3. Koi bangin Pian. 1 sunga piansakna thute in siatna tawh nate kipiangkhawmsak lo ahihzia pulaak hiam? Piangsak Pa om lo-in nate in amau le amau thuthu-in hong piang hi, cih thute koi bangin na dawng ding hiam?
4. Pasian in a bawl nate a muh ciangin a lungdam hi, cih thu in koi bangin Sabbath in lungdamna piangsak hiam?
