TU KAAL SUNG SIM DING: Matt. 5: 21 – 30; Pau. 6: 21, 23 – 24, 30 ; 7: 2,3, 26, 27.
KAMNGAH: “ Bang hang hiam cih leh thukham le a hilhnate pen a taang mahmah khuavak bang hi a, khalna le hilhnate pen nuntakna ding lampi hi (Pau. 6: 23).
Nupi khat in mohkangin a man ciang, a tapa nihte kiangah, ‘ka mohkan na ne peuhmah kei un,” ci-in vakkhiatsan hi. Thu a man’ kei uh leh gim tuak ding cih zong kivakkhak uh
hi. A nu paikhiat khit a sawt lo-in, “I nu hong thupiak pen sihna ding le hin nading tawh kisai hi kei” ci-in moh nek ding sawm uh hi. I nek hangin i nu in hong that ken teh!’ ci-in ne uh hi.
Paunak sung a kigelh thute in sihna thu le hinna thu tawh kisai hong limhilh mahmah hi. Khrih in zong tua bangin hong hilh hi (Matt. 5: 21- 30). Tu le tu-a i khensat thute in i tun nading mun, tawntung sihna ahih kei leh tawntung nunna hong tunpih ding hi. Tu ni-a i khensatnate bang zahin thupi hiam?
SUNDAY JAN. 11
NUNTAK PIH DING THUKHAM
Pau. 6: 21 le 7: 3 sim in. Koi bangin i nuntakna ah Pasian’ thupiakte kitangsapzia gentehna tuamtuamte in koi bangin hong theitel sak uh hiam?
____________________________________________________
__________________________________________________________________
Paunak sungah ‘lungtang’ in lungsim ngaihsutna khempeuh limcing hi. Lungtang tungah thukham gelh cih thu in, thukham panin lampial lo cih pulaak hi. Thukham tawh kizopna nei den cihna hi. Bang hang hiam cih leh thukham in mawhna pulaak hi (Rom.7:7). Pasian in suangpek tungah thukham a gelh bang mahin i lungtang tungah thukham gelh tawntung ding kisam hi (Pau. 7:3; Pai. 24:12).
Lungtang tungah thukham i cih ciangin puatham tawh thukham zuihna hi lo hi. I ngaihsutna khempeuh, i hihna khempeuh tawh ah thukham lenkip tawntung ding cihna hi. I sungah Khrih nungta,-in Ama vangliatna sungah a nungta thei ding ihi hi. Tua thute ‘ngawngah ok in’ cih thu in, tua thute nuntakpih ding cihna ahi hi. Nidang lai mite in manpha a sak nate, a ngawh ah ok uh hi. Nuntak nading huihdikin ngawng panin tuap ah pai suk ahih manin, lungtang pen nuntakna bulpi-in ngaihsun uh hi. Nuntakna (soul) cih kammal hong pai khiatna bulpi in ‘huihdiik,’ ‘ngawng’ cihna ahi hi. Khut in na lianpi sem hi, cih ngaihsutna tungtawnin Topa’ thupiakte “khut tungah khih” cih thu in Ama’ thupiak bangin nungta cihna pulaak hi. A lian, a neu na khat peuh peuh sepnate-ah Topa’ thupiak tawh kimakaihsak ding hong hilh hi (Lk. 16:10).
Jew, Muslimte in hih bangin gentehna, lim tuamtuam tawh a hong hilh thute limciina hi-in ci-in ngaihsun lo-in, a laimal bangbangin a taktakin ngaihsun uh hi. hi. Jew mite in taltang tung le khut tungah bulh ding bawl uh a, tua tungah Topa’ thupiakte gelh uh hi. Ahi zongin khut tung, taltang tung, cihte in bang pulaak hiam?
MONDAYJAN. 12 KHUAVAK LE NUNNA
Pau. 6: 23 sim in. Koi bangin thukham le khuavak in kizopna nei hiam?
_____________________________________________________
____________________________________________________________
Lai Siangtho in khua le Pasian’ kammal pulaakkhawm hi. “Na thu in ka paina lampi ah khuavak hi” (Late 119: 105). Hebrew mite in thukham le khuavak in kibatna nei hi, ci-in ngaihsun uh hi. Khuavak in pai nading lampi hong telsak mah bangin thukham in mawhna le thuman, thu hoih le thusia hong khentel theisak hi. Mi kim khat in thukham a nial uh hangin mawhna le thuman a theihtel theihna uh in thukham’makaihna mah hi veve hi.
Pasian’ thupiak a nial dingun thu kipia ta leh, Pasian’ thupiak a zui tinten veve kuate etteh ding om hiam? Mite in tua bang nunzia mawhsak phial mah ta le-uh, amau’ nunzia panin bang thu la ding na hiam? Pau. 6: 23; 7: 2 sim in. Bang hangin thukham in nunna tawh kizopna nei hiam?
_____________________________________________________
________________________________________________________________
Leitungah mawhna hong lut a kipan eite lamet nuntak tawntungna, thukham in hong pia thei lo ahih manin Khrih sungah upna tungtawn bekin tua nunna kingah hi. Thukham hong sawl bangin nungta-in, thukham’ deihna bulpite nuntakna ah a kimu ding thu ahi hi (Matt. 19:17; Mang. 14:12). Pasian’ thukham zui ihi hi. Bang hang hiam cih leh, kum tampi hun lai pekin Topa Pasian in Israel mite tungah “Keimah in note’ Topa Pasian ka hi hi” ci-in pulaak hi (Siam. 18:4). Pasian’ thukham le nunna in kizopna nei hi. Bang hang hiam cih leh, nunna kipatna in Pasian ahi hi. Tawntung nunna a ding hong kamciamte muanna i neih mah bangin nisim i nunna a dingin a hong kamciamte zong muan ding kisam hi.
Khrih in “kei in leitung’ khuavak ka hi hi. Kei hong zui mi in khuavak sungah lampai lo ding a, nunna khuavak sungah nungta ding hi, ci hi (Jn. 8: 12). Koi bangin hih thu na nuntakpih hiam?
TUESDAY JAN. 13
ZE-ETNA DO
I et khitsa om bang mahin, Kha Siangtho’ makaihna tawh kigelh Lai Siangtho sungah (Pau. 6: 23) khuavak le Pasian’ thukham in a kizom uh ahi hi. Aneu 24 ah khuavak le nunna’ vangliatna mah bangin, thukham in siatna panin a hong dal theihzia ding pulaak hi.
Pau. 6: 24 ah bang thuhilhna kimu thei hiam? Bang hong hilhkhol hiam?
____________________________________________________________________
____________________________________________________________________
Upna nei mi khat in ze-etna a tuah khak ciang, paulap nei-in a hoih lo na khat sem kha zel hi. Pasian’ min paulapin a hoih lo khat sepna in Pasian’ min zangkhai ngaihsutna hi banah kikhemna lian mahmah khat ahi hi. A hoih lo na khat peuh semin Pasian in kei hong ompih hi, a ci mi kiangah bang na gen ding hiam? Numei le pasal mawhna ah zong, a gamtatna khial a kisa lo mite tungah Pasian in bang pulaak hiam?
Tua bang numei hoihte’ pumpi taksa mel hoihna banah amau kampau in mite siatna sung tunpih hi. Awzol, kamneemna, biakna thute siksanin mawhzolnate’ hangin a siatlawh mi tampi om hi lo hiam? Solomon in hih bang siatnate i tuahma in hong hilh khin zo hi. Tua bang siat theihna tuamtuamte panin a hong dal ding, thukham hong kipia hi. Thukham’ hong gen bang a zui khempeuh in tua bang siatna tawh kipelh ding uh hi. Tua bangin siatna pel mite mipil le thu thei ci-in kithei hi. Pasian in ki-itna hi, ci-in siatna bawl ding mawhzolnate lauhuai mahmah hi.
Biakna ah zong khialhna khat, upna paulapin, khialhna-in ngaihsut khak lohnate ngaihsun pha kik in. Koi bangin lungsim khempeuh tawh Topa’ thukhamte zuihna in siatna tawh hong kipelhsak thei bek hiam?
WEDNESDAYJAN. 14
GU KEI IN
Solomon in numei le pasal mawh loh ding hong hilh khit ciang, guktak loh ding hong hilh hi (Pau. 6: 24 – 29; 30, 31). Guktakna le nulepa mawhna in Pasian’ thupiakte zuih lohna hi-in, thupiak a khial mi in a dang thupiakte zong lawhto hi. Pasian’ thukham hoihsak teng bek zui-in tua lote nawlkhitna in a lauhuai siatna lianpi ahi hi.
Pasian thu-um mi khat hi buang, mite’ zahtak, hoihna tawh kidim hi leh kilawm buangsam napi, Pasian’ thukhamte nialin a palsat mi’ nunzia sangin a siahuai zaw dang om lo hi. Hih bang nunzia in mi giote’ nunzia sangin sia huai zaw hi.
Pau. 6: 30, 31 sim in. Lamet bei nunzia tawh kisai bang thu pulaak hiam?
_____________________________________________________
_________________________________________________________________
Bang mah neihloh man, kitangsap manin guktakna in siatna mah hi. A gilkial manin nek ding a gu mi in siatna bawl mah hi veve hi. Nek ding nei lo-a a gu mi in a zah sagihin lawh kik ding hi. Siatna mawkmai sak lo ding cih hong hilh hi. Lam khat panin bang mah nei lo, nek ding kitangsam mite huh ding ci-in Lai Siangtho in hong gen hi. Nek ding nei-in gu nawn lo dingin deih hi (Thkna. 15: 7, 8).
Solomon in nulepa mawhna thu a genkhit ciangin, guktakna tawh kisai gen a, tua khit ciang, nulepa mawhna pulaak kik hi (Pau. 6: 32–35). Hih siatnate nih a kibatna om hi. Tua in bang hiam cih leh, ama a hi lo khat, ama a bangin zatna ahi hi. Guktakna pen kiloh kik thei a, nulepa mawhna ahih leh, tua bang hi lo ahih manin, siahuai mahmah hi. “Nulepa mawhna bawl kei in” cih thupiak in pumpi taksa tawh mawhna banah mawhpihnopna lungsim, ngaihsutna tawh vamawhpihnopna neihloh ding hong hilh hi. Mawhpihnopna lungsim tawh mi khat etna in mawhna hi, ci-in Khrih mahmah in zong hong hilh hi. Ellen G. White, Patriachs and Prophets, 308.
THURSDAY JAN. 15
SIHNA’HONG PHAWNG
Mi tampi in tawmvei sung nopsakna ding bek ngaihsunuh a, sihna thu phawk kha lo-in siatna bawlbawl uh hi. Tu hun leitung khuahun in nulepa mawhna pen mawhna taktakin ngaihsun nawn lo hi. Ahi zongin nulepa mawhna in mawhna hi a, “mawhna’ thaman in sihna hi” (Rom. 6: 23).
Pau. 7: 22, 23 sim in. Bang thu in nulepa mawhna a bawl mi khat, bangzahin lauhuaisak hiam?
______________________________________________________________________
______________________________________________________________________
Mawhzol numei a zui mi in ama nuntakna a siasak ahi hi. Thu ngaihsun lo mi ahi hi. Sagawhna ah kipaipih ganhing tawh kibang hi. Sabengpa’ thaang a awk vasa tawh kibang hi. Tua bang mi in a lauhuai-na mun ah om ahihlam kiphawk lo hi.
Pau. 7: 26, 27 sim in. Bang thu in mawhzol numei lauhuai sak hiam?
________________________________________________________________
_________________________________________________________________
Paunak sungah numei paktat in a pumpi taksa zualzang banah, pilna langpang mi, gitlohna tawh kidim hi, ci-in pulaak hi. Hong liamsak bek hi lo-in, sihna dong hong tun thei siatna ahi hi. Tua bang numei in a thahat mahmah mite zozo hi.
Paunak sung a”hankhuk” (sheol) cih kammal in tawntung siatna, man’thanna pulaak kammal hi. Tua bangin siatna zuite in Khrih’ hong piak tawntung nunna langdo ahih manun tawntung siatna tawh kipelh lo ding uh hi. Numei’ mawhzolna in tawntung sihna hong tunpih thei siatna ahi hi.
Nulepa mawhzolna hangin a puk makai tampi om hi. Na puk loh nadingin bang hangin kikem lo ding na hiam? Na puk loh nading bang bek in hong dal thei hiam?
FRIDAY JAN. 16
SIMBEH DING: Satan in ama’ mawhzolna a zui mite a piak ding leitung hamphatna tampi nei hi. Mi tampi in tua hamphatna iplah uh ahih manun vantung hamphatna nial uh hi. Siatna sungah nuntak sangin si zaw le-uh hoih zaw hi. Thuman lopi-in hauhna sangin bang mah neihloh hoih zaw hi. Zuaupuakin om hithiat sangin thumanna hang-in gentheihna deihhuai zaw hi. Ellen G. White, 4T., 495.
Siatna hong tunpih ding lawm le gual pel in. Kithuhilhna mang in. Pasian’ thukham palsat sangin Ama tungah thumanin a sihna deih huai zaw hi. Thuman tangko-in kipuahphatna ding thuhilh mi khempeuh in Pasian’ thuman thutak tawisang ding kisam hi. Ellen G. White, 5T., 147.
KIKUP DING DOTNATE:
1. Leitung siatna pel ci-in gamsimtham lakah ah tangguak va om cihte hi lo-in koi bangin siatna pel ding na hiam? Gamtat siksanin Topa’ maipha muh ding sawm lo zaw-in koi bangin Pasian’ thupiak zui mi na hi hiam?
2. Pai. 20: 1- 17 sim in. Koi bangin Thukham Sawm khat le khat kizom bilbial hiam? Bang thupiak khat zuih lohna in Thupiak khempeuh a zui lo mah hi veve hiam? (James 2: 11). Thupiak khat palsat manin a dang Thupiakte zong a khial gamtatna, Lai Siangtho sung ahi zong, na muh a om hiam?
3. Siatna pelh nading biakna in a hong hutzia ngaihsun in. Itna in siatna ding panin hong dal hi. Ahi zongin itna paulapin siatna bangzahin tam hiam? Koi bangin Thukham in i siat loh nading hong dal hiam?
4. Sunday ni-a thusinna ngaihsun in. Koi bangin nulepa mawhna limciinna le limciinna hi lo khentel thei ding i hiam?
