LESSON 2 | JANUARY 2 -9
BIL PANIN KHE DONG AH
SABBATH NITAK
TU KAAL SUNG SIM DING: Pau. 4 – 5; 6: 1- 19; 1Kum. 3:9; Matt. 13: 44; 1Kor. 10: 13.
KAMNGAH: Na khat peuh na sepna thu theitel in. Tua hi leh na sep peuhpeuh maavang ding hi. Siatna peelin a manin gamta inla, thuman lampi panin themcik zong pialkha kei in. Pau. 4: 26, 27.
I zak thute in i gamtat zia huzaap mahmah hi. Laisinna a kipan thutheihna pen zakna pan hi-in, nunzia hong huzaap, zakna le nunzia tuamkhen theih hi lo ahih manin, nunzia ding zakna thupi mahmah hi. Tua hi-in pilna in a bulpi ahi hi (Pau. 4:7). Bang zahin thuhilhsiam mah taleh, a za a ngaite in lungsim takpi tawh ngai kei
leh, tua thuhilhna in a mawkna suak ding hi.
Naupangte’ nungzang a kisat ciang bekin thungai uh ahih manin, Egypt mite bawl suangpek tung ah kisuai limte ah nungzang ah bil gol mahmah omsak uh hi. A sia, a pha theihna bek kicing lo hi. Koi bangin a pha nate tel ding cih i theih ding zong kisam hi. Pilna ngah nadingin hoihtakin thungaihna, thuhoih thute zuih kisam hi. A hong kihilh thute zui lehang siatna tawh hong kigamsak hi.
SUNDAY JAN. 4
NGAI UN!
Pau. 4 buppi sim in. Nuntak pih ding bang hong hilh hiam?
_______________________________________________________________
_________________________________________________________________
Pilna ngah nading thungaih kisam hi. Hebrew mite’ngaihsutna ah thu ngaihsut siamna, thutheihna pen khuak hi lo-in bil hi ci uh hi. Thutheihna pen zakna pan hi, cih hong hilh hi. Thungaihna thupi mahmah hi, cih hong hilh hi. Solomon in Pasian tung pan pilna a nget ciangin “kithuhilhna a za thei ding” a ngen ahi hi (1Kum. 3:9).
Pilna kipatna in thungaih ahi hi. Thungaihna tungtawnin pilna hong pai hi. Mihing sung pan pilna hong pai hi lo hi. Vantung’ makaihna om lo-in mihing hihna bek tawh vantung pilna kingah lo hi. Mihing in ama siamna, khuak ngaihsutna tawh pilna ngah thei lo hi. Pilna ngah nadingin mihing sangin a vanglian zaw kisam hi. Pilna a zong mi in lungsim khempeuh tawh a zon kul hi. Bang hang hiam cih leh, lungsim ngaihsutna thupi mahmah hi. Lungsim ngaihsutna in i nunzia hong uk hi. I gamtatna khempeuh lungsim ngaihsutna tawh kisai mahmah hi.
Matt. 13: 44; Jer.29: 13 sim in. Koi bangin hih nihte gel, pilna zonna-ah kizom uh hiam?
___________________________________________________________________
____________________________________________________________________
Pasian tawh kizopna ah i nuam theihna, dah theihna cihte thupi mahmah hi; neu ngaihsut khak ding hi lo hi. Hih in koi bangin a sia, a pha khentel theih nading hong huh thei hiam?
MONDAY JAN. 5.
NA INNKUAN KEMCING IN
Pilna lampi ah hamsatna pel lo kituak ding hi, cih phawk ding kisam hi (1Pet. 5:8). Hamsatna khempeuh, buaina khempeuh kipatna a tam zaw, innkuan sung pan mahin kipan hi.
Paunak 5 sim in. Bang a lauhuai kidop ding hong hilh hiam?
____________________________________________________________________
____________________________________________________________________
Ei mah le ei mah i kidop ding thupi penpen hi. Kampau kidop kul hi. I kampaute in i up thuman thutak tawh kituak, a kilawm kampau ahih kul hi. A dang kidop dingte in: mite tung pan hong pai siatnate ahi hi. Numei in pasal khialsak kha thei, pasal in numei khialsak kha thei ahih manin numei pasal thaangtatna namcin khempeuh pelh kul hi. Tua mawhna tawh na khialh loh nading kidop huai mahmah hi. Tua bangin khialhnate kampau, zolna aw neemte pan kipan hi. Tua bang khialhna a hong dal thei ding pilna’ hong hopihna na ngaih kul hi. Vantung pilna’ hong sapna aw na zui nak leh, tua bang mawhna na pelh thei ding hi.
Numei pasal mawhna a nial ding ban ah, tua bangin a hong khialsak thei ding munte ah i va pai loh ding zong kisam mahmah hi (Pau. 5: 10). Siatna hong pia thei nate va nehkha vet lo ding kisam hi (Pau. 5:8). Midang tungah tua bang mawhna tawh hong kipelhsak thei dingin na zi tung, na pasal tungah citakna, itna kisam hi ( Pau. 5:18). Pasian in hih leitungah nang a hong piak, tomkha sung na nuntak laiteng, na it na zi tawh a nuam theithei-in om in (Thna. 9:9). Nangma neihsa na zi , na pal hangin lungdam in. Nang a lopi neihsawm kei in.
1Kor. 10:13 sim in. Koi bangin a hong kipia kamciamte hangin siatna tawh kipelh thei ding na hiam?
TUESDAY JAN. 6
MI TAWH NA’KILAWTATNA KHOSAK IN
Paunak khat ah: “Topa aw, ka lawmte kiang pan hong dal in. Ka galte ahih leh, kei le kei in zo thei ning,” ci hi. Paunak in lawmte tawh kithuahzia ding hong hilh hi. Hebrew kammalin ‘lawm’ cih pen ‘vengte’cihna zong ahi hi. Vengte cih ciangin i innvengte bek hi lo, ei tawh kinai mi khat peuh cihna zong ahi hi. Vantung pilna in lawmte tawh kikholhzia thupi ngaihsun hi.
Pau. 6: 1-5 sim in. Solomon in bang a hoihlo thu pulaak hiam? Koi bangin tua siatna tawh kigamla thei ding i hiam? Nuntak pih dingin a kip tawntung thulaigil bang hong hilh hiam?
_______________________________________________________________
_______________________________________________________________
Moses Thukham in mi cimawh gentheite huh ding, sum leitawi ciangin a meet la lo ding, ci-in hong hilh hi (Pai. 22: 25). Pilna in sum leitawi piak huai le piak huai lo hong khen thei tel sak ding hi. Pilna in mi zawng khempeuh sum a pia ding hong hilh lo hi. Huhna piak nading, thuman thutak khentel theihna nawlkhin lo hi (Pai. 23: 2, 3). Huh piakna pen i huh theih, i huh zawh laisiah huh ding hi mah hi. Ahi zongin na piak huhna in siatna kibehlapna ahih loh ding thupi hi (Pau. 22: 27). Tua hi-in Paunak in gamtatzia ding hong hilh hi.
Paunak in kampau zatzia ding hong hilh hi. I huh zawh loh ding mi khat huh ding kamciam pia lo ding, ci hi. Kamciam pia-in tua kamciam hangin kisikna om thei hi. Ngimna hoih mahmah hangin kamciam na piak ding leh, hoih tak ngaihsun phot in. Tangtun loh ding kamciam kei in. I khialh khak leh zong kiniamkhiat takin mawhmai ding thum in.
Bangci bangin khat le khat kihuhna thupi hiam? Gal. 6: 2
WEDNESDAY JANUARY 7
NASEP CITAK IN
Pau. 6: 6 8 sim in. Miksite tung pan bang pilna kingah thei hiam?
___________________________________________________________________
___________________________________________________________________
Miksite pen nasep hahkat banah kuama sawl sawl kul lo-in amau sep ding ciat sem thei uh hi. Nasep hahkat i cih ciangin, a mailam khual cihna hi. Haksat hun, phalbi hun a ding kiging khol thei uh hi. Miksi in mailam hun a’ ding geelkholzia hong hilh uh hi. Nu le pa, sangnaupang, laihilhte a kipan a khang, a moi, mi khempeuh in mailam a ding ngaihsut kisam hi. Nasep khat peuh geelkhol lo pi-in sepna pen lawhcing zo hi. A bei thei lo tawntung hun a dingin kiginkholh ciangin, a bei thei hih leitung hun a ding sepna khempeuh in man nei thei bek hi. Ellen G. White, Education, 145.
Pau. 6:9 – 1 1 sim in. Mi thadahte’ tung pan, bang pilna kingah thei hiam?
__________________________________________________________________
__________________________________________________________________
Thadahte in miksi tung pan pilna ngah thei uh hi. “Thadahpa aw, miksite kiangah pai inla, amau’ nuntakzia va en in ( Pau. 6: 6). Miksite in na a sep hun sung mahin thadahpa ihmumu hi. Miksite in anzong hunin ankaikhawm uh a, thadahpa ahih leh, khutzep hithiat hi ( Bang mah sem lo cihna hi). Miksite in a mai lam uh a ding, amau pumpi sang a zah tampi a gik zaw na pua keeikaai uh a, thadahpa ahih leh, tu le tu a ding bekin nungta hi.
Thadahna, geelkholhna neihlohna cihte a hoih lohzia i mu hi. Nuntakna i cih pen nasemsemin neih le lamh tampi neihnate sangin zai zaw hi. Koi bangin Sabbath tawlngak in, nasep hahkatna le tawlngakna hong hilh hiam?
THURSDAY JAN. 8
NANG LE NANG KIKEM IN
Innkuan sung hi taleh mi tawh kizopna le nasepsilbawlna susia thei nate a hong hilh khit ciangin, mi gilote’ nunzia zong hong hilh hi. Pau. 6: 12 – 15 le a neu 16 –19 sunga kigen thute in thunih, nunzia nih, hong hilh hi. Mi gilote’ gamtat in amau’ lungsim a pulaak hi pah hi.
Pau. 6: 14, 18 le Matt. 15: 19 sim in. Bang thu manpha hong hilh hiam?
______________________________________________________________
________________________________________________________________
Kimanna nei lo , thu ginalo a ngaihsunsun, a hoih lo thute a ngaihsunsun den mi, a gamtatna in zong zui pah hi. Pasian in tua bang gamtatna kihhuaisa hi. Ellen G. White, The Adventist Home, 334.
Pau. 6: 12 – 19 in siatna tawh kipelh nadingin bang hilhkhol hiam?
__________________________________________________________________
__________________________________________________________________
Gentehna tuamtuam tawh a hong hilhkholh thute in: gitlohna tawh a nungta mi in thadah mi’ nun bangin nungta hi. Mi thadahte le mi gilote tuam khen lo hi. A gilote thadah, a thadahte gilo, a nihun kibang hi. A nihun kithuhilh ding deih lo uh hi.Amau’ hoihsak lampi zui uh hi. Thadah mi in bang mah sem nuam lo hi. Gilo mi in ama ut bangin gamta a, kihilhna thudon lo hi. A nihun siatna tuak pelmawh ding uh hi. Gilo mi in midangte tungah siatna bawl banah amah le amah gim kipia a hi hi. Zuau gen mi in a gen zuau thu pai a sawnsawn, ama kiang tung kik a, ama zuau gen mah, thuman mahsa kha hi. Zuau genna in siatna piangsak hi. Zuau gen mi bek a siasak hi lo, midangte zong kisiasak hi.
Koi bangin mite’ siatna in hong susia hiam? Tua hi-in, bang hangin na gamtatna in midang khat ii natna ding, siatna ahi lo ding thupi hiam?
FRIDAY JAN.9
SIMBEH DING: Ellen G. White, “ Moral Standard” in The Adventist Home, 326 – 339; Ministry of Healing, 489 – 491; Education, 117 – 120.
Lai Siangtho i sim ciangin Topa’ thuman theihnopna lungsim tawh sim kul hi. Mihing hoihsak thute siksan ding hi lo a, Pasian’ gen thute i theihtel nadingin sim kul hi. Lungsim takpi tawh thuman thei nuamin Lai Siangtho a sim lo mi in, thuman thei lo ding a, gamtat zia le tong hoih nei zo lo ding hi. Laisim ding nisimin kibehlap den a, a hoih le a sia khentel thei-a sim i hih kei leh, siatna in hong vukcip ding hi. Tua bang lungsim in thuman khentel theihna nei nawn lo hi-a, lungsim ngaihsut hoih cihte zong nei zo nawn lo hi. Ellen G. White, Education, 189.
Miksite’omzia ngaihsun lehang citakna, siamna tawh kidim uh hi, cih kimu thei hi. A sep zawh uh neu no khat bek hi napi, citakna tawh a sepsep manin, na lianpipi sem zo uh hi. Solomon in a thadahte kiangah, miksite nunzia ettehin citak a nasem ding hanthawn hi. Thadah mite in amau pumpi banah a nunna uh susia ahi hi. Miksite in a nuntak nadingun kiging khol thei uh a, ganhingte sangin a manpha zaw mite lak pan, mi tampi in tawntung nuntakna dingin kiging khol lo mawk uh hi. Ellen G. White, Counsels to Parents, Teachers and Students, 190.
KIKUP DING DOTNATE:
1. Sup lawh kha phial thei mah taleh, koi bangin mite huh ding na hiam? “A lawmte a ding a nunna a pia itna sangin a lian zaw itna om lo hi” (Jn. 15: 13) cih thu ngaihsut kawmin tu kaal sung thusinnate en kik in.
2. Kim le paam piansaknate tung panin nuntak pih ding thute ngaihsun in.Mawhna, siatna tawh kidim ahih hangin, tua nate tung pan, nuntak pih ding thuman pha, bang hangin kimu thei veve hi ding hiam?
3. Pau. 6: 16 – 19 sunga kihilh siatna nam sagihte, bang hangin Pasian muhna ah sia hiam?
