LESSON 1 | DEC. 27 – JAN. 2
PILNA’ HONG SAPNA
TU KAAL SUNG SIM DING: Pau. 1 -3; 11: 30; 13: 12; 15: 4; Pian. 1:1; Pai. 19: 16; 20: 20.
KAMNGAH: Topa zahtakna in pilna kipatna hi a, mihaite in pilna le thuhilhna don lo uh hi (Pau. 1:7).
Eden huan a kipan gimna khempeuh bulpi in maanlo deihtelna pan ahi hi. A kicing nopna i taan hi. Bang hang? Pasian’ gen thute ngailo-in zuau thu ngai zaw! A hoih le a hoih lo
kigawmzau ahih manin, mihing in thuman le thuman lo khentel thei lo uh hi” Ellen G. White, Education, 25.
Deihtel theihna tawh thu hoihte ding, Dwimangpa’ deihna nial dingte ihi hi. Nu le pa in tate thuhoih tawh pantah ding, siatna a lauhuai zia hilh ding, a hoih nate a tel theih nadingun hilh kul hi. Hih pen kisam mahmah hi. Bang hang hiam cih leh, tua deihtelna in tawntung sihna maw, ahih kei leh, tawntung nunna, khat zawzaw ah hong tunpih ding hi. Pau. 1-3 in hih thu hong hilh hi. Paunak Thubu’ deihna: pilna neihtheih nading a hong hilh khit ciangin (Pau. 1:2), Paunak ii mungtup Topa zahtakna in pilna kipatna hi, cih pulaak hi (Pau. 1:7). Tua khit ciangin pilna’ hong sapna za-in, siatna’ hong sapna nial ding hong hilh hi.
SUNDAY DEC. 28
PILNA’ KIPATNA
Pau. 1: 1-6 ii thulu in David’ tapa Solomon’ Paunakte le 1Kum. 3: 5–14 in kizopna nei hi, cih hong lak hi. Solomon in Pasian kiang panin pilna ngen hi, cih hong hilh hi. David’ tapa Solomon hi, cih hong hilh banah, ‘theihtelna,’ ‘pilna,’ ‘ khensiamna’ cihte in Solomon’ nunna pulaak hi. Hih thute in Paunak gelhpa a hong hilh banah, Paunak in Pasian kiang pan pilna ci-in hong hilh hi.
Pau. 1:7 sim in. Pilna i cih in bang hiam? Topa zahtakna i cih in bang hiam? Koi bangin hih nihte gel in kizopna nei hiam?
________________________________________________________________________________________________________________________________
____________________________________________________
Paunak sungah pilna pen Pasian theihtelna le Topa zahtakna tonkhawm hi. Pilna ngah theih nadingin Pasian biakna in a kisam mahmah ahihlam Paunak in hong lak hi. Paunak in Pasian biakna bulphuh thuhilhna ahi hi (Pau. 1:7; 31:30). Topa kihtakna le gimna thuak ding hanga launa bangmah kisai lo hi. Topa a kihta mi in, Topa in mun khempeuh le a tawntungin eite tawh a hong om khawm Topa hi, ci-in i tel ding kisam hi. Sinai mualah Topa a kilatlai-in mite in Topa a kihtak zia uh kimu thei hi ( Pai. 19: 16; 20: 20). Topa kihtakna in Ama thuciamte kiptakin len, Amah it, Ama tungah cihtak cihna hi (Thkna. 10: 12).
Topa kihtakna in pilna kipatna hi. Hih thu in, pilna pen kihtakna pan hong kipan khia hi, cih hong hilh hi. Hebrew kammalah ‘kipatna’ ( reshit) cih kammal in nate khempeuh kipiansakna a pulaak kammal hi (Pian. 1:1). Tua in bang hong hilh hiam cih leh, pilna in eite hong Piangsak Pasian in nunna hong pia PA, a thuman Pasian le Honkhia Pa cih hong theisak hi (Jn. 3: 16; Late 89: 14; Heb. 9: 12).
Pasian a it ding le a kihta dingin eite hong kihilh hi. Koi bangin na nuntakna ah hih thunihte na theitel hiam?
MONDAY DEC. 29.
A MAN TAKTAK PILNA
Pau. 1: 8 – 19 sim in. Pilna tawh kisai bang thute enkak hiam? Nu le pa bek a ding hi lo, Topa a kihta mi khempeuh a’dingin bang thu hong hilh hiam?
________________________________________________________________
________________________________________________________________
Innkuan sung, nu le pa kiang panin pilna kingah masa pen hi. Pilna pen thuhilhna, thukham ci-in hong hilh hi. Hebrew kammal ah ‘thukham’ cih kammal in (torah) a khiatna in ‘lamlak’ ‘ makaih’ cihna hi. Nu le pa in tate pen lampi man a hilh ding, a makaih ding kisam hi. A lang khat ah siatna, a hoih lo nate a piangsak thei lampi in haina lampi hi. “ Ka tapa aw” cih kammal in tapa bek a gen hi lo hi. Nu le pa nei lo ki om lo a, nu le pa thuhilhna a pulaak kammal ahi hi.
Innkuan in pil sinna kipatna thupi mahmah mun hi. Inn in laisinna sanginn masa penpen hi. Nu le pa in tate a’dingin sia masa penpente hi. Tua bang sanginn in tate a dingin a sia le a pha khentel theihna kipatna ahi hi. Innkuan sung pan mahin tate hoihtak kihilh kei leh, siatna manawh uh hi pah hi. Satan khut sung zuan hi pah hi. Satan tua bang mite khutzat in nei nuam pah hi. Ellen G. White, The Adventist Home, 182.
Inn pan kipantahna a hoih zia, tua kipantahna hangin phattuamna tampite in pulaak hi. Tua bang manphatnate kham le ngun sangin manpha zaw hi. Nidang lai mite in kham le ngunte gamh dingin koih uh hi. Tuate sangin pilna in man nei zaw hi. Tate tawh hun kizangte in ciangtan om lo-in man nei hi. Pilna in mihing nunzia hong puah hi. Pilna nei lote ahih leh mangthang ding uh hi (Pau. 1: 15).
Koi bangin ze-etna namcin kantan thei ding na hiam?
TUESDAY DEC. 30
PILNA’ HONG SAPNA
Pau. 1: 20, 21 sim in. Koi bangin pilna thu pulaak hiam? Bang hong hilh hiam?
____________________________________________________________
____________________________________________________
Mi hoih lote in simtat uh hi. A hoih lo nate geelgeel uh a, amau mah in tuak kha uh hi (Pau. 1: 11, 18) Ahi zongin pilna in hong sam hi (Pau. 1: 20, 21). A za kha lo om lo dingin pilna in khuasung kongzing ah mite zak dingin takpi-in pau hi, ci-in Solomon in pilna pen mihing tawh genteh hi.
Pau. 1: 22, 23 sim in. Pilna a nolh mite in bang tuak ding h hiam?
____________________________________________________
____________________________________________________________________
Pilna in kitangsap khat nei-a mite in nial hi lo-in, pilna a nial mite in amau siatna hanga nial uh hi zaw hi. Pilna deih lo, pilna thute’ mang nuam lo uh hi (Pau. 1: 25 le aneu 30 enkak in). Tua bang mite in pilna sangin amaute theihna kicing zaw sa uh hi. Pilna pen neu muh uh, cihtaak sa lo uh hi. Pilna a nial mite, a mawl takpi mah, theihna nei lo takpi mah hi pah uh hi (Pau. 1: 22 le aneu 29 en kak in). Pilna a nialte in, a nial thaman ngah pelmawh ding uh hi. Topa kihta ding thupiak a nial mite in amau le amau hoih kisa tawm mite hi uh a, amau’ hai-na mah sihpih ding uh hi (Pau. 1: 31). Vantung pilna a nial mite in thuman lo tangthu tuamtuamte tawh lungkim lel uh hi. Tua bang mite in Pasian le milim khek uh hi.
A nungta Pasian biakna pen haivai lel a ci mite in, a taktakin, tua bang ngaihsutna mahmah zong hai-na ahihlam phawk lo uh hi. Leitung nate in nuntak kicinna guan thei lo hi. A hawmpi in a nungta uh ahi hi.
Pau. 1:33 sim in. Bang kamciam, bang lametna pulaak hiam? Koi bangin na nuntakna sungah tua kamciam na tuak hiam?
WEDNESDAY DEC. 31
PILNA’ HONG PIAK HAMPHATNA
Pau. 2: 1- 6 sim in. Topa kihta cih thu i tel nading bang pulaak hiam? Mihing in bang thu a khensat kul hiam?
____________________________________________________
___________________________________________________________________
A hong sawl thute nial thei, zui thei dingin i khensat thei hi. Pilna ngah nadingziate in: pilna hong sapna aw ngai-in za ding (Pau. 2: 1, 2); pilna ngah nadingin ngen ding (Pau. 2:3); a kiseelcip suangmanpha zon bang mahin pilna deihin zong ding kisam hi (Pau. 2:4).
Pau. 2: 6 -9 sim in. Thuman theihtel nading a kisam bang thu pulaak hiam? A um mi in pilna ngah nadingin Pasian in bang vaipuak nei hiam?
____________________________________________________
_____________________________________________________________
Aneu 6 ah “ Topa in pia hi,” cih kammal le Pasian theihtelna na ngah ding uh hi, cih thu ngaihsun in. Tatkhiatna mah bangin pilna zong Pasian’ hong piak khong ahi hi. Pilna hong guan Pasian hi. Pasian in tua pilna neite kemcingin siatna ding panin amaute huu hi.
Pau. 2: 10 – 22 sim in. Pilna om lo nuntakzia koi bang hiam?
____________________________________________________
______________________________________________________________________
Pilna in hoihlohna khempeuh beimangsak hi. Pilna nei mi in Pasian sungah a nuamsa mi hi ding hi (Pau. 2: 10). Tua in siat theih nading pan hong dal ( Pau. 2: 12), mawhzolna hong zo sak (Pau. 2: 16), thuman lampi ah hong paipih ding hi (Pau. 2: 20).
Pau. 2: 13, 17 sim in. Siatna kipatna bang hi a, koi lam manawh hiam?
____________________________________________________
__________________________________________________________________
Thuman lampi pan lampialna in siatna manawh hi pah hi. Mawh nei ihih manin, siatna bawl ding ihi kei hi. Siatna i cih ciang cihtak lohna hi. Satna tawh kibang khollo i cihte in siatna lianpi hong tun thei hi.
Pasian’ hong phal loh nuamsa-in sem teitei cih thu in bang pulaak hiam? Siatna pen siatna-in mu thei nawn lo cih thu in bang pulaak hiam?
THURSDAY JAN. 1
MANGNGILH KEI IN!
Pau. 3:7 sim in. Bang in amah le amah pil a kisatawm mite susia hiam?
__________________________________________________________
_______________________________________________________________
Amah le amah pil a kisatawm mite in pil nadingin Pasian kisam lo hi, ci-in ngaihsun uh hi. Tua in lamet bei-na hi.Mihaite in lamet nei zaw uh hi (Pau. 26: 12). Pilna i cih pen Topa tungah cihtakna hi. Pil i cih ciangin Topa’ thupiakte zui, (Pau. 3: 1); hehpihna le thuman thutak nei (Pau.3:3); Topa sungah muanna neihna hi (Pau. 3:5). Pilna in Topa tawh kizopna hong nei sak hi. I lungtang in Pasian tawh kizomin Ama deihna in a hong tuam ciangin, pilna tawh kidim ihi hi ( Pau. 3: 1, 3, 5).
Pau. 3: 13 – 18 sim in. Pasian’ hong piakkhong pilna le bang tonkhawm hiam?
__________________________________________________________
_______________________________________________________________
Pilna, nuntakna, le cidamna tonkhawm hi (Pau. 3: 2, 8, 16, 18, 22). Pilna in nuntakna singkung tawh kibang hi (Pau. 3:18). Paunak in pilna hanga thuphate pulaak hi ( 11: 30; 13: 12; 15: 4). Nuntakna singkung in Eden huan hong phawksak hi. Pilna in tawntung nuntakna hong pia ding hi, ci-in kamciam ahih loh hangin, pilna in a manpha nuntakna, nuntakna kicing, Adam le Evete’nopsakna bangin nuamna hong hilh hi. Pasian tawh i nuntakkhop ciangin Eden nopna hong theisak hi. Tua tawntung nopna ngah kik ding lametna tawh hong nungta sak hi (Dan. 7: 18).
Pau. 3: 19, 20 sim in. Bang hangin pilna kisam pha mahmah hiam?
__________________________________________________________
_______________________________________________________________
Pilna le piansakna bang kisai hiam a ci om kha ding hi. Piansakna ah pilna zong om, pilna le nuntakna singkung in kizopna nei hi (aneu 18). Pasian in nate a piansakna ah pilna zang ahih leh, pilna i cih pen a kineuseh thei lo thu ahi hi. Pilna in van le lei, na khempeuh huam khin hi. Pilna in tawntung nuntakna thu tawh zong kisai hi. Nuntakna singkung in Eden Huan hong phawksak hi. Tua hi-in mipilte in a vanglian minthanna luah ding uh hi (Pau. 3: 35).
FRIDAY JAN. 2
SIMBEH DING: Ellen G. White, “ Hidden Treasure” in Christ’s Object Lesson, 111- 114; “A Blessing in the Home” in Messages to Young People, 334; “ Study of Physiology” in Education, 197; Ellen G. White’s Comments, in SDA Bible Comm. 1156, Vol. 3.
Khangnote in Lai Siangtho’ thubulpi a theih ding uh kisam pha mahmah hi. Tua thu in, Pasian in nuntakna bulpi ahi hi( Late 36:9). Pasian in na khempeuh bawl hi bek lo-in Ama sungah nuntakna khempeuh om hi. Ama nuntakna hangin nisa, guahtui, huih, annek tuidawn a kipan pumpi cidamna, thatang cihte i ngah hi. Ama nunna hang bekin a nungta thei ihi hi. Mawhna in na khempeuh a suksiat hangin Topa’ thupha in cidamna, lungnopna hong ngah sak hi. Ellen G. White, Education, 197, 198.
Mi pawl khat in Pasian thuzuihna in i nopsak nading hong ngawngkaisak hi; lungnop nading hong dal hi, ci uh hi. Ahi zongin pilna lampi a zui mite in Pasian biakna in hamphatna hi-a, tu-a nuntakna le a hong tung ding nuntakna sungah kisam hi. Nunna taktak ii nopna sungah a nungta mite ahi uh hi. Ellen G. White, The SDA Bible Commentary, Vol. 3., 1156.
KIKUP DING DOTNATE:
1. Bangin pilna le thutheihna kilamdangsak hiam? Bangci bangin mi khat in thutheih hau napi, pilna nei hi lo thei hiam?
2. Topa kihtakna cih thu ngaihsun in. Itna sungah lau-na om lo ahih leh, bangci bangin Pasian kihta kawmkawm mahin it thei veve ding i hiam? Koi bangin Topa kihtakna tawh kisai-in itna le mawhna hang a thukhenna kilelpuak lo-in a tonkhawm ahihlam na tel thei hiam?
3. Bang hangin ei le ei pil kisaktawmna in siatna hong tun thei hiam? Bang hangin i gamtatna khat hoih lo hi napi,mawh kisa lo cihte lauhuai hiam? Bangci bangin tua bang tawh kipelh thei ding na hiam?
