JAN. 3, 2015
LAMLAK AKSI
1959, Jan. 3 ni-in Alaska pyi-nee pen USA gam ii 49na pyine hong suak hi. Alaska pyi-nee pen USA gamah a gol penpen pyi-nee khat hi. Tai 1400 hi.
Hih Alaska pyi-nee ah tu-ma kum 80 hunlai, 1930 kim mite nunzia in nuntak hamsa mahmah hi. Humptulip tuikulh khuapi khat thu i za ding hi.
Moody le a innkuante in Alaska pyi-nee ah omin, amau’ khuasakna bulpi penin ngasa bengin tua tawh kivak uh hi. Moodyte innkuan pen mi guk pha uh hi. Humpitulip khua pan tai 2500 gamlatna Aleknagik tuikhulh khua khat hong tung uh hi. Aleknagik a khiatna in ‘lampi khial’ cih khiatna nei hi. Moodyte innkuan in hih tuikhulh ah tengin gunkuang neu no khat tawh nuntak nading zongin nunta uh hi. Moody le a tapa upa pen in Britol tuikhulh lam khawngah ngasa manin pai zelzel uh hi. Britol pen leitungah salmon ngasa san a tamna penpen mun hi.
Hih khua-ah a om zawh uh a sawt khatin, Moodyte innkuan sungah gentheihna khat hong tung hi. Dillingham khua lam manawhin a pai Moody le a tapate in tuihualpi khat tuak kha uh a, a gunkuanguh kibungin tuikia-in tua lai munah si uh hi. Moody’ zi le tapa nihi le tanu khat tawh bek hong hi ta uh hi.
Upna tawh a nungta Innkuan:
Pasian thu-um mi ahih mah bangun, Sabbath nisialin Moody’ zi a tate biakinnah kikhawm den uh hi. Moody’ zi in a tapate gel tawh ngabengin om uh hi. A tapa Llyod pen kum 14 pha-in, anau zaw pa Roland ahih leh kum 13 hi pan hi. Rolandte unau in a nu nasep huh theita uh ahih manin tangval mahmah kisa ta uh hi. Rolandte unau in sangkah kawmin ngabeng nasep sem uh hi.
Gol khit nungah sangkahtawm pan uh ahih manu, Tan 10 a tun ma-un, a lawmte sangin gol zaw uh ahih manun sangkah nuamsa nawn lo uh hi.
Roland in tu-in kum 20 bangkhinta hi. Sanginn khatah sanginn sung khempeuh khualumsak thei dingin meicihna ding nei khat lamin om hi. Zingsang tungmah in nasep kipan den hi. Hih a nasepna munah sangsia numei Jackie tawh hong kithei kha uh hi. Kum khat bang hong cinkhit ciangin kiteng uh hi. Aleknagik Buai ngei khatah hong teng uh hi.
A kiten khit uh a sawt lo-in Roland in pianna Alaska pyi-nee pan hong peem mite kiangah a Pasian thu kuppih zel hi. Roland in biakna sanginn khat lam ding hong kipan khia hi. Tua sang’ min dingin Mission School ci hi. Hih sangah Grade 1 pan Grade 8 ciang om hi. Gamlapi pek panin naupang honkhat sang hong kah uh hi. Sangnaupang hong tam pian ahih manin Roland in amaute tawh biakna piakhawm zel uh hi. Kikhop nading inn khat zong hong lamin Aleknagik khua –ah Adventist pawlpi masa pen hong suak hi.
Sangnaupangte tawh camp kawi pai zelzel uh hi. Roland in mantawm nono tawh kizuak innte lei-in naupang pantahna-in zang hi. Hihte pen kum 60 bang val khin ahih hangin tua innte hoih thei mahmahlai hi. Gun dung zui-in gunkuang tawh sangnaupangte paipih kawikawi-in thusinna zong neihpih hi. Khangno tampi in zu, za zangin, khangno kisia tampi kipuahpha thei uh hi. Camp Polaris ci-in mun khatah inn lamin hih inn pen khangno kimakaihna-in zang uh hi.
Gentheihna a thuak Rolandte innkuan in a lamdang takin Pasian nasem hong suak uh hi.
JAN. 10, 2015
Alaska Conference of SDA pen 1901 kumin kipuah hi. Alaska pyi-nee in zaailua mahmah hi. Vanleng bek tawh kipai theihna mun, gunkuang bek tawh kipai theihna mun cihte tampi om hi.
2013 kumin Alaska ah Adventist thu-um mi 3842 bang om-in, biakinn 29 bang om hi.
Camp kibawlna khatah Travis zong hong pai-a, kuamah meltheih nei lo hi. Kum 12 a pha, Logan min nei khangno khat om a, phengphi mahmah khangno khat hi. Travis tawh hong kithuah uh thei bilbel hi. Travis in Lai Siangtho sim ni, a cih leh, Logan zong hong ut bilbel hi. Ahi zongin Logan in Lai Siangtho bu nei lo hi. A lawmte aa khat kawmin zan khatang nuai-ah a nihun Lai Siangtho sim uh hi. Piancil pan kipan sim toto uh a, Joseph tangthu a sim khak uh ciangin, lamdangsa-in theihnop tampi nei uh hi. Logan in gilo khangno khat ahih hangin Lai Siangtho a simthute hangin a lungsim puakzia tampi hong kikhel hi.
Tu-in Travis in Walla Walla University ah engineering sinin sangkah hi. 2011 kum a kipan khangno kipantahna Camp Polaris ah nasem hi. Khangno makaihna, thuhilhnate banah, khutna tuamtuam zong hilh hi.
Heather Ueeck in Alaska lamlianpi dung gei khat a om Delta Junction khuano pan a khangkhia numei no khat hi. Khangno ahih manin Heather in khuakhal sialin camp pai nuamsa mahmah hi. Heather in Camp sunga a tuah thute, nisim gamtatziate ciamteh tangtang hi. Amasa lamin, biakpiakna kinei, hai vai mahmah ci-in ciamteh hi. Kum hong paitoto-in camp sunga biakpiaknate mannei sa semsem hi.
Mukpuak le khuaimeivak tawh kimawlna khat in a lungsim sukha mahmah hi. Khuameivak vakin tua tungah mukphuak a koih tak ciangin mukpuak kitam hi. Tua le mukpuah sungah tui
Heather in hih thute a lawmte kiangah hilhsawn hi. A lawmte pen Adventist hi lo uh hi. Nu le pa in zong a thuhilh loh naupang, khangno ahih manun thumang lo uh hi. Heather in hih bang naupangnote pantahin Pasian kiang tunpih dingin lunggulh mahmah hi. Tua pen kei tavuan hi, ci ngiat hi. Thumanglo, phengphi khangno vive ahih manun lungduaina, thuakzawhna kisam mahmah hi. Pasian’ huhna tawh amaute pantah thei bilbel hi.
Khangno kipantahna Camp Polaris ah van tuamtuam kisam uh hi. Tuikhal laka om ganhing pawl khatin a puante uh suksiatsak zel ahih manin, vansenna ding cihte akipan, naupangte tuanna ding gunkuang neu cihte, tuilum suanna ding cihte kisam uh hi. 13th Sabbath School sumpi in Camp Polaris a kisam vante lei nadingin kizeek ding hi.
Ei SDA conference in Pr. Thang Sianghte’ innkuanin pawlpi hong piak aa inn uh, kizo siangnai lo ahih manin, tua munah kipaisak ding hi. Hih bangin a pia khia mite tungah i biak Pasian in thupha hong piaksak ta hen.
Topa’ hong piak sumte Ama minthan nading, Ama gamzai nadingin zat siam ciat ni.
JAN. 17, 2015
McKinley Mual pen Alaska pyi-nee lailamah omin, North America ah a sang penpen mual hi. A sannana pi 20320 bang sang hi.
Kum 8 ka phak lai-in Camp a om ciangin pai nuam mahmah napi, neu laulai ka hih manin ka pai ding hong kiphal lo hi.
Gunkuang neu khat tawh ka ute kha-in ka pai zel uh a, Camp pan hong kilehsak kik uh ciang, ka kap hi.
Kum 9 ka phak ciangin Camp ah pai ding hong kiphal ta hi. Kum 16 ka phak dong, kumsialin ka pai den hi. Ka mangngilh theih loh thu khat om hi. Zankim khat giahbuk sungah ka lawmte in sikha thu genin zaknopsa thei mahmah uh hi. Tua leh sikha thu a gengen laitakun, buknawl khata lum ka lawmte khat in, lau lua ing, a kaang khat om ing, ci-in kei kiangah hong tai veva mawk hi.
Kei zong lau ka hih manin, Lai Siangtho sim ni, ka ci hi. Tua bangin Lai Siangtho ka sim laitakun ka lawmte in zong kote gel kiangah hong naih uh hi. Ka lawmte lah lau het lo uh lamdang kasa hi. Tua le ka lawm pa kiangah giakbuk pua lamah khuadak dih ni, ci-in ka pusuahpih hi. Ka gal uhah mualsang mahmahte enin, Elisha’ silapa in lau-in a om ciangin, Elisha in thungen a, Topa’ vantung mi in a cinna thu ka gen hi. Ka lawmpa zong a launa hong veng thei zawdeuh hi. Satan nasep ahihlam ka gen hi. Hih Camp a siate in lasa ding khawngin hong sawl zelzel uh hi.
Tu-in Pasian nasem in ka om a, hih bangin ka nuntak theih pen Camp Polaris ah ka pai zelzelna hang hi, ci-in ka thei hi. Camp Polaris kim a om mite in Pasian’ thuman thei nai lo uh hi. Hih Camp panin mi tampi’ nuntakna kikhel khin hi. Pasian’ gam kizelhna hi tawntung ta hen.
JAN. 24, 2015
Aleknagik khua mite in Debbie le Ken Reiswig pen Camp Numei, Camp Pasal ci-in minvawh uh hi. Bang hang hiam cihleh Camp Polaris a cing a kep zawh uh kum 20 bang val khin hi. Amaute gel pen Washington Pyi-nee pan hong pai uh hi. Aleknagik pawlpi ah zong makai-in kiseh zelzel hi.
Ken Reiswig in Camp ah kisam bangbang semin, Debbie in sumkem hi. Naupangte in Reiswigte’ omna innah hong hawh thei zel zel uh hi. Tua khua sung mite, nupa kitawng, innkuan thubuai a om ciangin, Reiswig le Debbie kiangah pai-in huhna ngen zel uh hi. Hih Camp Polaris ah kaal khat sung om nadingin sum dollar 200 bang piak kul hi. Khangno pawl khat, ut mahmah napi, a sum ding nei lo uh hi. Tua bang khangnote aa dingin Debbie in sumzonna khat neihpih hi. Mawtaw sawp, piteek, puteek kia beek a omte, huhin tua bangin sum zong uh a, a ngah sumte Camp sum dingin zang uh hi. Anchorage SDA pawlpi in zong Camp ah om nading sum nei lote aa dingin huhna piaksak zel uh hi. Camp pai nuam napi, sum nei lo, cihte a kipan, Camp Polaris ah kisil buk, dailen buk cihte zong behlap kul ahih manin, tu quarter 13thSabbath School sumpi, tua munah kipai sak ding hi.
Ei hih laimunah om SDAte in Pr. Thang Sianghte’ innkuan hong piak, innpi kizawhsiang nadingin kizeek ding hi. Topa’ hong piak sumte, Ama minthan nading, Ama gamzai nadingin, zatsiam ciat ni.
JAN 31, 2015
Alaska Conference sungah Camp thum bang om hi. Camp Polaris ah nurse semin ka om hi. Camp Polaris panin naupang khangno khuasuak tampi om khin hi. Naupangte in hih Camp Polaris nuamsa thei mahmah uh hi. Tangthu tuamtuam kigenin, la tuamtuam kihilh banah, kimawlna tuamtuam, gunkuang tawh pai kawikawina, mualtung kahpih cihte in hih Camp pai ding lawpsak mahmah hi.
Ahi zongin hih Camp Polaris ah omna munte kisia ta hi. Huih nung leh, inn sung khempeuh niin mang hi. Khuavot mahmah ahih manin, kisil ciangin, tuilum tawh kisil kul hi. Tuilumsuanna
13th Sabbath School sumpi in tua kisam nate aa dingin kipuak ding hi. Ei hih teng a omte in ihih leh, Pr. Thang Sianghte’ innkuan hong piak innpi, kizawhsiang nadingin kizeek ding hi. Topa’ hong piak sumte Ama minthan nading le Ama gamzai nadingin zatsiam ciat ni.
FEB. 7, 2015
West Virginna gam, Bridgeport ah Adventist pawlpi khat bek om hi. Biakinn zong nei nailo uh ahih manun, Sabbath nisialin Presbyterian biakinn khatah kikhawm uh hi. Biakinn a neihnailoh uh hangin, thu-upna-ah kiptakin om uh hi. Hih pawlpi 2012 a kipan 2014 kum ciang, kum thum sung, khua sung Lai Siangtho sinna tawh kisai, inn khat khit inn khatah laihawmna nei uh hi. Hih nasepna panin inn 300 valin Lai Siangtho sinna nei uh hi. Pastor James Volpe le a pawlpi mi 30 in tua bangin hahkattakin nasem uh hi. Pastorpa naseppih pawl khat bang, khangno kum 20 gual vive hi.
Heather, kum 20 pha pan, inn khat khit inn khatah pai-in mite kiangah Lai Siangtho thusinna na deih uh hiam, ci-in dong kawikawi hi. Tua bangin a vak kawikawi, Lai Siangtho thusinna a nei khin nupi khat tawh hong kimu hi. Tua ma deuh kaal nih lai-in, nupi nu’ tapa gui-awka si, ahih manin Lai Siangtho sinna tawl khat ka kawl phot a, tu-in ka zom kik , ci-in Heather kiangah pulaak hi. Heather le kum 21 a pha pan, Angela in Lai Siangtho thusinna neihpi hi. Kum 22 a cingkhin Lee in laihawm dingte na gel khol cih bangin, Central Hill SDA pawlpi –in lawptakin nasem uh hi.
Mimal tawh kimu a Lai Siangtho sinpihna pen muibun mahmah nasep khat hi, ci-in Heather in mukhia hi.
Mountain View Conference in 2104 bekin Lai Siangtho thusinna a deih inn 10000 valte tungah laihawmna le thusinna nei thei uh hi. Pastor, Lai Siangtho thusinna a neihpih mite in na thungetsakna kisam uh hi. Tu 13thSabbath School sumpi in Mountain View Conference sunga nasep nadingin kizeek ding hi.
Ei hihteng a om SDAte in, Pr. Thang Sianghte’ innkuan in pawlpi hong piak innpi, kizawh siang nadingin kizang ding ahih manin Topa’ hong piak sumte Ama ‘ gam le lei aa dingin zatsiam ciat ni.
FEB. 14, 2015
Pastor Dan in pawl sungah thanem mite pantahnin upna thu-ah kiptakin a nuntak nadingun makaih den hi. Pastor Dan in cimeek khutsiamna nei hi. Amah pen Mountain View Conference, Elkins le Parson cih munte ah nasem hi. Laihilh nasep zong semin, Highland Adventist Sangah biology, chemistry cihte zong hilh hi. A zi Cheryl zong pilna nei khat hi-in muu-cuu sangsiapi sem hi. Tapa Jeremy nei uh a, Lai Siangtho, history, Math, cihte hilh hi.
Pastor Dan in Pasian nasep thupi hi, cih tel ahih manin sangnaupangte tawh kituahin kum khatin khat vei, zin kawikawi zel uh hi. Tua bangin zin uh a, Mexico, Panama, Honduras le Costa Rica cihte ah pai khin uh hi.
2014 sungin Costa Rica ah pai uh a, amau om laitak mahin biakinn khat lampih uh hi. Tua munah a taam sungun mun li bangah Pasian thu tangkona nei uh hi. Amau omna banah gamdang mun tuamtuam ah zong biakinn lam uh hi.
Tu laitakin Pastor Dan le a pawlpi mite’ nasep masuan lian penpen in, Elkin khua sungah Lai Siangtho thusinna a nei nuam inn 80 val bang om hi. Tuate kiangah thusinna neihpih ding tavuan nei hi. Pawl khatte in amau inn ah vapai-in kikupna neih ding lunggulh uh hi. Kim khat leuleu in lai tawh kizopna deih uh hi. Tua bangin a sep nadingun, laidal laikung, lai-ip, lailuu a kipan kisamna tuamtuam nei uh hi.
Elkins pawlpi panin pawlpi mi nih in a veng khangno nih, Paul le Christie Brownte inn zangin khangnote pantahna nei uh hi. Sasiang le sasianglo a kipan nek loh dingte hilh uh hi. Paul le Brown in Sabbath ni ciang biakinnah kikhawm uh hi. Pathfinder ah kihelin khangnote tawh kikholh nuamsa mahmah hi. Hih khangnote gel, 2013, Nov. 13 ni-in SDA pawlpi-ah tui kiphum uh hi.
FEB. 21, 2015
Brayden in a kikholhpih a lawm Payton kiangah, “Ka ui si veh aw! Ui sivui ding, thu nong gen thei diam?, ci hi. Kum 12 a pha pan Payton in cikmahin tua bang, thu gen ngei lo hi. Ahi zongin, a lawmpa’ nget hi mawk ahih manin, kong pai kei dia, ci hi. Brayden in a ui si, inn nungah phum dingin geel a, a phum nading tokhin uh hi. Payton in ui sihvui-na ah thugenin, tua tawh hun man bawl uh hi.
Brayden in a inn nuamsa khol lo hi. Payton in a lawm Brayden kiangah hawhin, zangiak thei zel hi. Friday ni khat Payton’ sanggamte khat zong hong hawha amau teng thum zangiak khawm uh hi. Payton’ lupna neu pian hi mahta leh, a lungsim zaai mahmah hi. Mi tawh kikhol thei-in, pawl huai mahmah hi. A lawm’ pa Wyatt in amah le amah gui-awkin kithat hi. Wyat in kum
Tua bangin hun hong pai toto, kum thum bang hong cin tak ciang, Wyatte innkuan pen mundang ah peem ding cih thu hong om hi. A pai khiatma-in Wyat in hih bangin Payton laikhak hi.
“Kong it Payton le Stormy aw, na paima-un gennop khat nei ing. I kikholhma-in mi mangthang khat ka hi hi. Nang tawh kong kikholhma-in biakinn zong pai ngei keng. Nang tawh i kikholh a kipan, nang nuntak bangin a nungta dingin ka khensat hi. Ka pa hong susiatna hangin ka dah mahmah a, ahi zongin tha nong piak manin ka lungdam hi. Pasian’ hong ompihna ka phawk hi. Nangma tungtawnin Pasian’ hongpihna ka phawk hi. Lungnopna ka ngah hi. Khrih kiang hong tunpih nahih manin, ka lung dam hi, ci-in laikhak hi.
Brownte’ innkuan nasepna tungtawnin Brayden in Sabbath thuman mu thei hi. Brayden in Payton tawh kikhawlin, Brayden in a sangkahna nuamsa lo hi. A sangah mite gilo lua uh ahih man, mundang khatah kituah ding lunggulh hi. Payton in Highland Adventist sangah kah dingin gen hi. Tu-in Brown in Highland Adventist sangah laisin hi. Tua banah SDA pawlpi sung tuikiphum khin hi. Voksa cihte kipan SDA pawlpi’ zat loh dingte ne lo, zang lo-in a om manin, Brown’ innkuanpihte in lamdangsa uh hi. Tua bangin Brown in thuman thutak tawh nungta hi.
FEB. 28, 2015
Miranda Starr in West Virgina khua-a om Parkersburg Academy ah siapa hi. Hih sangah naupangnote Lai Siangtho tawh kipantah uh hi. Naupang ahih hangun, khat le khat kihehpihzia ding, ki-itzia ding cihte kihilh hi.
Virginia SDA conference in naupang pantahna dingin center Eagle Point nei uh hi. Hih munah Friday nisialin siate in naupangte paipih uh hi. Hih mun pen naupangnote nopsak theih dingin kibawl hi-a, naupangte simnop ding laibu tuamtuam, lim tuamtuam cihte kikoih hi. Mundang sang panin naupangnote zong hih munah hong pai uh a, naupangte khat le khat kitheihna mun hong suak hi. Ganhing nam tuamtuam, vasa nam tuamtuam cihte’ thu tampi theihlawh uh hi. Kum sialin, naupang etteh thamcingte pahtawina zong pia uh hi. Hih bangin naupangno tampi in phattuampih mahmah uh hi. Hih mun panin a khangkhia naupangte tu-in pawl sung pawl pua-ah makai lianpipi, a suak tampi om hi.
Virginia SDA Conference in hih bangin naupang pantah uh hi.
MARCH 7, 2015
Ka nu hong nusiatin kum 4 bek ka phapan hi. Tua hunin bangmah ka thei nai kei hi. Ahi zongin ka lungnoplam ka thei hi. Bangbangin ka hanciam zongin ka pa’ maipha ka mu ngei kei hi. Ka pa in hong itna tawm hi. Kum 9 ka phak ciangin inn pan ka paikhia-in sanggamte le ka lawmte’ innah ka om kawikawi hi. A sawt ciangin tagahkepna inn ah ka om hi.
Tua munah kum thum ka om hi. Ka lawm khat tawh ka kihoho uh leh, pa ki unau ka hihlam uh ka kithei uh hi. Amah pen basket ball kimawk uk mahmah hi. Tagahkepna inn pan ka paikhiat khit ciangin ka pa neu inn ah ka om hi. Khat veivei ciang, ka pa kiangah
Kei le kei-in nasemin sang ka kah hi. Sang ka man ciang, Air National Guard ah ka lut hi. Hih munah ka sep zawh kum nih khit ciangin tui galkap lamah ka lut hi. Sergent zaa ka ngah khit ciangin, zi ka nei hi. Nasem kahih manin innah tam ka om man kei hi. A sawt ciangin ka zi tawh ka kikhen uh hi. Ka nasepna nuam kasa kei hi. Ka lungkim thei lo hi. Ka thau tawi-in kei le kei kikaplum dingin guipi nawl lam khatah ka pai khia hi.
Suangtum gol khat tungah ka tu a, a beisa thute ka ngaihsun pha kik hi. Tua bangin ka tutlam palik khat in hong mu a, kei le kei kithat ding cih hong thei hi ding hi ven, hongsam hi. Ka dawng nuam kei a, hong pai ken, ci-in ka thau ka ngat hi. Tua leh ka lawmte, ka siate hong pai ngeingai uh hi. Na thau khia suk in, hong ci uh hi, ahi zongin ka khia nuam kei hi. A sawt ciang, ka pa hong pai hi. Ka pai hong pai ka muh ciangin, ka kam sung ngat in ka thau ka kek hi. Kei le kei ka kikap a, ahi zongin thauging lo hi. Suangtung pan khiasuk ka hih manin, tui sung ka tu suk hi. Tui sung pan hong kikaikhia hi. Tua leh hong velvel uh a, ka gil sungah thautang om mu uh hi. Ka pa in hong ciahsan, ka sep nei lo, innkuan nei lo-in ka om hi.
Hih thu a zom, mai Sabbath ni ciang, i za kik ding hi.
MARCH 14, 2015
Nung Sabbath, Mission News a zom:
Ni khat kei le kei kithah ding ka sawm kik hi. Zato hong kipuak mana, siavuante in lamet bei ta hi, ci-in pulaak uh hi. Dr. Nozaki in
ka liamte hong bawlsak khit ciangin, khua ka phawk kik hi. Ka khuadak kawikawi leh, ka gei-ah Lai Siangtho bu khat ka mu hi. En nuam lo-in, ka ihmutsan hi. Ka khanlawh kik ciangin, ka gei-ah Lai Siangtho bu khatmah ka mu kik hi. Tua zong ka sim tuan kei hi. Kaal nih khit ciangin zata pan ka tuak hi. Dr. Nozaki in Lai Siangtho sim dingin hong hanthawn hi. Ahi zongin ka simnoplohlam ka gen hi.
John sung sim in, hong ci hi. A sawt ciang, sim ka kipan hi. Lai Siangtho bu 6 bang ka nei hi. Ka sim ciangin, ka sim nuam tektek hi. Dr. Nozaki hong hawh zelzel hi. An limtak ne ding, Lai Siangtho sim ding cihte hong hanthawn den hi. Ka innkuanpihte in hong lunghimawhse lo, bang hangin hih pa in, hih bangin hong deihsak hi ding hiam, cih pen ka thei zo kei hi. Lamdang bang ka sa hi. Dr. Nozaki in Lai Siangtho thusinna hong neihpih den hi. Kikhop ding zong hong hanthawn zelzel bek lo-in, hong zawn tangtang hi. Tua bangin amah tawh ka kikholhna tungtawnin Khrih hong itna ka phawk thei hi. Ka kithah sawm hangin Pasian in, kei hong it veve cih ka phawk ciangin, Pasian tungah ka nuntakna ki-ap lo-in ka om thei nawn kei hi. Tu-in tui ka kiphum khin a, Adventist thu-um mi khatin, pawl sungah nuam kasa mahmah hi.
Khat veivei kei kia bek ka kisak hun om thei zel hi. Ahi zongin Pasian in hong nusia ngei loh ahihna ka phawk ciangin, ka lung hong nuam hi. Ka tanu tawh nuamtak ka om thei hi. Dr. Nozaki in ka zi tawh kiteng kik ding hong hanthawn den hi. Ama inn ah khat vei ka zi tawh hong samin, tua mun ah, ka zi tawh ka kiteng kik uh hi.
Kei pen kimawl uk mahmah mi khat ka hi hi. Sabbath nisialin kimawl ding ka lawmte hong zawn den uh hi. Kei aa dingin ze-etna lianpi khat hong suak hi. Ahi zongin ka nuntakna-ah Pasian mah thupi man ahihlam phawk ka hih manin, ka lawmte’ hong zolna ka mang kei hi. Adventist pawlpi mi, kimawl uk group khat
MARCH 21, 2015
Khat vei ka nasepna-ah Becky min nei numei khat hong lut vat hi. Ka muhphetin numei dangte tawh a kilamdanna ka mu thei pah hi. Zingbulh, bilbah cihte a kipan bang mah zangse lo hi mahta leh, etlawm veve kasa hi. Khedap khat deih ahih manin, ka lak hi. Golsa deuh pian, a dang khat vaikhak ding, ni thum khit ciang, hong dawp kik in, ka ci hi.
Ni thum khit ciang, hong dawp kik takpi a, ahi zongin ka khedap vaikhak hong tung nai lo hi. Ka vankhakte hong tun ciangin, ka khedap vaikhak om lo mawk hi. Ka vaikhakna mun ka phone pah hi. Ka vaikhaknate in zong hong khak thei pah uh hi. Becky pai kik hi. Ama kiangah, ka vaikhak hong tung thei nai kei, zingteh hong tung ding hi, zing ciang nong pai diam, ka cih leh, aw leh, hongci bilbel hi. Friday hi ta, khedap hong tung lo mawk. Becky kiangah bang dinga Saturday ni-a bulh ding deih na hiam, ci-in ka dot leh, biakinn ah organ thumm ka hih man a, kisam hing, hong ci hi. Khedap hong tung lo ahih manin Bekcy zong maikhingsa-in ciah kik hi. Ka tungah heh hetlo, lamdang ka sa hi. Tua leh, tawl khat khit ciang, khedap hong tung tatkak sam hi. Becky ka phone pah hi. Becky in Saturday ni tum khit ciang, hong la kik, hong ci hi. Lamdang ka sa hi. Khedap deih hong vai khakkhak, hong tun ciang lah, hong nunglak ning, hong ci. Bang thu hi peuh ma hiam, cih ka thei nuam hi.
Sai-ah hong pai ciangin ka kiho uh hi. Khristian tuaktuak hi napi, nang bang hang, Saturday ni-in kikhawm na hiam cih ka dong hi. Becky in Lai Siangtho sungah ni sagih ni, Saturday,
Becky in a biakinn uah, Mangmuhna Thusinna om ding hi, hong kikhawm in, ci-in hong zawn a, kei zong ka va pai hi. A kigen thute, Lai Siangtho tawh kituak ka sa peuhmah a, Sunday ni kikhop ka khawl sawm hi. Ka lawmte tawh zong ka kinial thei zel uh hi. Ahi zongin Lai Siangtho thuman zuih ding khensatna ka nei hi.
Ka vanzuakna-ah numei no khat ii tungtawnin Adventist thuman sungah a lut thei ka hi hi.
Mai Sabbath pen Sabbath 13-na hi ahih manin, sumpi i khiat ngei ii a zah thum i khiat ciat ding, i kihanthawn hi.
Mai Sabbath, Mission News gen ding mi nih seh in.
MARCH 28, 2015
Numei : Camp Polaris ah Adventist bangzah om hiam? Pasal : mipi ii 5 % bang, Adventist thu-um mi hi.
Numei : Bang zah bang Khristian pawlpi dang pan, SDA sung hong lut uh hiam?
Pasal : 60 % bang hinteh. Pupa biakna pan hong lut zong om. A lamdang mahmah thu in, mit in muh theihnate sangin muh theihloh tam zaw cih pen naupangnote nangawn in a theihtheih uh lamdangsa ing. Ahi zong, naupang khatin ka kikhop uah, vantung cih bang om kei, ci mawk hi. Bang hangin maw ci-in ka dot ciangin tua bangin hong hilh khat om hongci hi. Ama gen pen hi kasa mahmah hi.
Numei : Dawite’ thu um hi niteh maw?
Pasal : Numei no pawl khat ii gen za ngei mah veng aw, tua dante. Jesuh in dawite zo mang hi. Tua bang naupangte in Jesuh tawh kikhawl thei ding uh hi, cih thu zong ka gen hi. Tua bangin ka gen a kipan, amaute hoih takin ihmu thei pan uh hi.
Numei : Naupangte in Lai Siangtho a za nuam uh diam?
Pasal : Za nuam mah uh. Zanlupma-in Lai Siangtho ka simpih den hi. Naupangnote in Lai Siangtho thute za nuam thei thei uh hi. Numei : Up takpi dingin ka um hiam?
Pasal : Um takpi mah uh. Bang hang hiam cihleh, amau nunna –ah a hamsa thute thuak kha uh hi. A lawmte pawl khat zu dawnin gitlohna vive tawh kidim uh hi. Inn ah annek ding nei lo uh hi. Camp ah hong pai uh ciang, amau duh bangbang nektheih dingin kipia ahih man, inn sangin Camp mah nuamsa zaw uh hi.
Numei : Mite huh, puansilh ding neilote puan pia, mi khat lungnuamin a om dingin i bawlte Pasian i itna hi.
Pasal : Camp ah hong pai naupangno pawl khatte’ pate in zu khamin, a tate uh sat, vua, cihte hangin naupang tampi genthei uh hi. Inn-a a tuahkhak thute, Camp hong paitak ciangun, a lawmte uh kiangah a hamsatna ciatuh, tua bangin pulaak uh hi. Numei : Tua hi-in hih Camp Polaris pen mun thupi mahmah hong suak hi. Hih Camp in naupang, khangno tampite’ kipuahphatna mun lianpi khat hi. Hih Camp in kisap tuamtuam nei hi. Innkhaante behlap kul, lupna, le naupangte’ vanzat kisam tuamtuamte behlap kul hi. 13thSabbath School sumpi in Alaska pyi-nee a om Camp Palaris puahphatna dingin kizang ding hi.
Ei hihteng a om Conference in, Pr. Thang Siangh le a innkuan in pawlpi a hong piak uh innpi, kizawh siang nadingin kizeek ding hi. Tua hi-in Topa’ hong piak thuphate, Ama’ gam le lei a dingin itsik het lo-a, phaltakin i khiat ciat ding, i kihanthawn hi. Topa in thupha hong pia ta hen.
