LESSON 9 | FEB. 21 – 27
SABBATH NITAK
TU KAAL SUNG SIM DING: Pau. 22 – 24; Pai. 22: 21- 27; Eph. 5: 20; Ezek. 33:8.
KAMNGAH: Thuman a kan dingin note hong sawlte’ tungah thuman bang hiam cih na genkik theih nadingun thuman na theih nading uh ka deihna ahi hi (Pau. 22: 21).
Paunak le Egypt mite’ zuih thu pawl khat in kibatpihna nei hi. Mite’ zuih a hoih thute mah siksanin Kha Siangtho in lamlak hi. Hih thu in, thuman thu hoih khat, mi khempeuh a ding
ahihna hong lak hi. Israel mite a ding thuhoihte namdangte a dingin zong thuhoih mah ahi hi. Tua hi kei leh, thu hoih kici thei lo ding hi. Thuman in mi khempeuh le mun khempeuh ah kizang ding ahi hi. Koi koi ah omin, kua mi bang mi hi tamah lehang, thuman pen mi khempeuh tungah hong kilang hi.
SUNDAY FEB. 22
THUMAN THEIHTELNA
Pau. 22: 17, 18. Koi bangin thuman thutakin hong huzaap thei hiam?
____________________________________________________
____________________________________________________________________
Thuman thutak theih nading thungaih masak kul hi (Pau. 22: 17). Lungsim tawh tua thute mitsuan ding kisam hi. Thuman theihnopna lungsim nei-in thumanin a gamtanuam lungsim tua bang mah zuihpah nopna lungsim kisam hi. A thu-in theihna kicing lo hi. Mi kimkhat in Lai Siangtho tel mahmah, thuman thei napi, nuntakpih lo uh hi. Tua bang thuman theihna pen theihtelna man taktak hi lo hi.
Thuman theihtelna taktakin nuntakna khempeuh tawh theihna, zuihna ahi hi. Pau. 22: 18 sunga ‘na sungah’ cih Hebrew kammalin, ‘gilpi sungah’ cihna hi. Puatham thutheihna hi lo-in, an i nek, hoih tak haizan dikdek khit ciang, taksa pumpi sung a kizelh mah bangin, thuman theihtelna zong, i nuntakna khempeuh a hong zelh kul hi. Tua bangin hong zeldikdek hileh, i lungsim, kampau, zia le tongin thuman thutak tawh kituak ding hi.
Pau. 22: 19 – 21 sung sim in. Thuman thutakin bang hong mutelsak hiam?
____________________________________________________
_________________________________________________________________
( 1) Upna (aneu 19). Pilna in a thu-in theihtelna ciang bek hi lo-in, Topa Pasian muan zawkna, Ama sung kiptintenna cihte hi.
( 2) Thuman theihtelna (aneu 21): Thuman a thei hi bek lo-in, bang hangin thuman kici hiam, bang hangin um ka hiam, cihte tel ding kisam hi. Upna i cih pen i tel zawhloh thu hi mah taleh, man mah hi, ci-in muanna ahi hi.
( 3) Sep ding maban (aneu 21). Thuman thutak a thei hi bek lo-in, mite tungah a hilh ding ihi hi. Tua dingin Topa’ sapna ngahte ihi hi.
Seventh-day Adventist (SDA) i hihna thubulpite ngaihsun lehang, bang hangin mite tungah tua thumante hilh lo-in om hithiat thei ding i hiam?
MONDAY FEB. 23 MIZAWNGTE’ NEIHSA SUT
Pau. 22:22, 23; 23: 10 sim in. I khialh khak loh nadingin bang hong kihilh hiam?
____________________________________________________
__________________________________________________________
Mihaute’ neihsa guksimna in mawhna hi-in, tua sangin mizawngte’ neihsa guksak, simmawhna cihte siahuai zaw mahmah hi. Cimawh ahih manun Pasian in amaute’ thumna ngailo-in om lo ding hi (Pai. 22: 21 – 27). David in Uriah’ zi a suhnopmanin, Uriah thatin, Nathan in mizawng khat ii neihna tuuno thatang hatna tawh kilaksak hi, ci-in gentehna tawh a thuhilh i phawk ding hi (2Sam. 12: 1 – 4). Mizawngte’ neihsa guksak hi bek lo-in, Pasian mahmah tungah mawhna hi (2Sam. 12: 13). Nang sangin a nei lo mite tung pan guktakna sangin guktakna sia-zaw om lo hi; meidawi gamtatna hi. Tua bang gamtatna Pasian in koihkhongin om ding hiam? Mihing in bang mah a cih kei zongin, Pasian in thukhen hamtang ding hi.
Job in, Nitawp ni ciang Pasian’ thukhenna a thuak ding mite le hotkhiatna ngah ding mite pulaak hi (Job 19: 25). Tomno sung bek nopsak nading gamtatna in siatna tawh kipelh lo hi. Thuman lo-in nasepna, mite neihsa tawh hauhsawmna a kipan mithahna cihte in tawntung sihna hong tunpih ding hi. Tua bangin gamtat hoihlohna tawh nuam a sa mite in, a sawt lo-in gimthuak ding uh hi. Mizawngte tungah a khialh hi bek lo-in a vanglian Pasian tungah mawhna ahi hi.
England gam kipan mun tuamtuam ah mikim khat in “Pasian om lo hi. Na ut bangin nungta in. Nop nasak bangin om in,” ci-in tangko uh hi. Pasian om lo takpi hi leh, guta, mi that cihte bang hangin lunghimawh, lungkhamna tawh kipelh thei tuan lo uh hiam? Pasian muanna in, Pasian in thukhen ding hi, cih kamciam in, koi bangin siatnate lakah lungnopna hong nei theisak hiam?
TUESDAY FEB. 24
MIGILOTE’ NOPSAKNA ENG
Pau. 23: 17; 24: 1, 2; 24: 19, 20 in i khialhkhak loh nading bang hong hilh uh hiam?
__________________________________________________________________
__________________________________________________________________
Bang hangin mi kimkhat in migilote’ hauhna een-in nei uh hiam? A hauh khempeuh siatna tawh a hau hi sam lo hi. Thuman mahmah napi genthei-in i om ciang, mite’ nopsakna ha-za-in eenin kinei kha thei hi. Hih in ngaihsutna, muhna a toi man ahi hi. Ze-etna khat peuh kantan kei leng, a nuam ding tawh kibat hangin, a taktakin siatna hong tunpih ding hi gige hi. Tu le tu-in nopsaknate mitsuan lo-in tawntung kimang ding nopsaknate mitsuan ding thupi zaw hi.
Tham lo-in mawhna’ sia-na a thuakkha lo kua om hiam? Siatna tawh kipelh thei kuamah i om kei hi. I siatna khat kuama hong theih loh nadingin i selcip thei phial zongin, tua bang siatna in mawhna ahihlam i phawk kha kei phial zongin, siatna hangin gimnate ngaihsun in. Mawhna, siatna pen langpan kul hi; kih kul hi. A hoih lo nate hangin mihing in gimna thuak ihih manin siatna himhim nial ding kisam hi.
Mawhna in bangzah ciang siahuai hiam cih singlamteh tungah Khrih’ hong thuakna in pulaak hi. Tua theihna bek kicing lo hi. Siatna hong tunpih theih nate i pelh ding kisam zaw hi.
Mite’ nopsakna na engkha ngei hiam? Tua bang a hoihlo nate pan suahtak nading zatui hoih pen bang hi ding hiam? Eph. 5:20.
WEDNESDAYFEB. 25 I NEK I DAWN NATE
Nekna tawh mihing hong kize-et masa pen hi (Pian. 3:3). Nekloh ding ne, thuman lohna hangin sihna piang hi (Pian. 3: 1-7; Rom. 5:12).
Pau. 23: 29 – 35 sim in.Khamtheih zu thu bang hong hilh hiam?
___________________________________________________________
_________________________________________________________________
Zu in siatna tampi piangsak hi lo hiam? Khat vei zu dawnna in siatna lampi manawh hi pah hi. Zu’ siathuai-na ngaihsun lo-in, a sawt ciang zu lo-in om thei nawn lo zah dong hong tunpih hi. Zongsatna hoih lo zudawnna hangin siatna hi. Zuduhna, gawltanlahna hangin zu’siatna phawk lo uh hi. Zu in pumpi tungah gilpi natna, lungsim ngaihna susia cihte a kipan natna tuamtuam piangsak hi. Tua bang mite khuamial ukpa Dawimangpa in ukcip khin ahih manin khuamial thongkiatna panin suakta zo lo uh hi. Ellen G. White, The SDA Bible Commentary, Vol. 3., 1162.
Pau. 23: 1- 8 sim in. Bang hangin gawl’duhna ukzawh kul hiam?
____________________________________________________________
__________________________________________________________________
Solomon in annek sabuai tawh kisai gamtat zia le tong bek a hong hilh hi lo hi. I duh, i neknop, gongthakna cihte in hong khialsak thei hi, cihte zong hong hilh hi. Gawl ah temta khat koih, cih thugentehna in, nek le dawnin pumpi cidamna le nunna susia ahih manin kidop ding a hong ahi hi. Hebrew laimal ‘bin’ cih kammal in limtak ngaihsun ding cihna hi-in, nektheih tuamtuamte lak pan bang nate ne ding cih teelsiamna pulaak kammal hi. Tua kammal mah Solomon in Pasian kiangah a sia le a pha khentel theihna a ngetna ah kizang kammal ahi hi (1Kum. 3:9). Nek le dawnnate ah cilesa’ deihna nial a, a hoih nate teeltheihna kisam ahihzia hong hilh hi (Pau. 23: 3).
Zudawnna’ hangin siatna a thuak mite ngaihsun in. Tua bangte hangin kideek kidaamna kisapzia phawk thei-a, bang hangin zu (gu) tawh pumpi susia ding ihi hiam?
THURSDAY FEB. 26
SEP DING I MASUANTE
“Migilo pa khat pen si ding hi, ci-in kong gen ciangin amah a nuntak theih nadingin na hilh kei leh, tua mipa pen a mawhnei-in si ding a, ahi zongin ama sihna nang kong ngawh ding hi.” Eze. 33: 8.Hih in bang thuguipi hong hilh hiam? Koi bangin tua hilhna na mang hiam? Hun khat lai-in Nitumna gam khat ah nitak khat lampi ah migilote in nupi khat suam uh hi. Numei in tua bang a tuah laitakin huhna ngenin kiko hi. Mi tampi in za napi uh, kuamah in honkhia lo banah palikte sapsak lo uh hi.Kongkhak panin en lel mawk uh hi. Numei nu zong a sawt ciangin awng zo nawn lo-in tua mun ah si hi. Mi tampi in tua numei’ kikona za uh hi. Tua a za mite in numei sihna ding bangmah bawl lo uh hi napi, mi thatte mah tawh kibang uh hi. A honkhia thei ding kimlai bangmah sem lo uh ahih manun numei si hi.
Pau. 24: 11, 12, 23 – 28 sim in. A thupi bang hong hilh hiam?
______________________________________________________________
______________________________________________________________
Moses’ thukham ah a hoihlo nate thei napi tua siatna a pulaak kei leh, tua mi-in thukhenna tawh kipelh lo hi,” ci-in gen hi (Siam. 5:1). I pumpi in siatna i bawl loh hangin, mu-in, theihpih napi, pulaak lo-in tua siatna i imcip leh, siatna a gamte mite mah tawh kibangin a mawh mah ihi hi. Siatna a thukimpih cihna hi. Lamkhat leuleu ah, tua bangte ah thuman takin, ahi bang bang pulaak ding kisam hi (Pau. 24:26). I sepna bangbang, i pulaak bangbangin thu hong kikhen ding hi.
Siat gamtatna khat thei mu napi, awlmawh lo-in na om kha ngei hiam? Leitungah thuman lohna, gal kido, khat le khat kilangneihnate ee, bang na ci ngaihsut hiam? Hih bang siatnate a ven nading bang na sem thei hiam?
FRIDAY FEB. 27.
SIMBEH DING: “I kiim i paam om mite in hotkhiatna thu a theih ding uh kisam hi. Tua hi kei leh amaute kisia mang ding uh hi. Hih nasep nadingin hun mawk beisak kei in. Hotkhiatna thu pulaak ding maw, ahih kei leh nial ding teel theihna hong kipia khin zo hi. Khris’ nung zui nahihna a kilangsak dingin thu hong kipia khin hi. Sabbath thuman banah a dang thute zong nuntakpih ding kisam hi. Hih thu mi tampi in nawlkhin uh hi; kinlo-in citakin Khris ngak ding kinin nei lo uh hi.”Ellen G. White, 1T.,99.
“Na upna pulaak inla nuntakpih in. Pasian it ding kisin in. Khris in nang a’ hi cih pulaak in.Ama’ minsiang pahtawi in. Ama hoihnate gen in.A hong hehpihnate pulaak inla, a vangliat zong pulaak in.” Ellen G. White, Our High Calling, 20.
KIKUP DING DOTNATE:
1. Sunday ni-a dotnate enpha kik in. Na lawmte dawnna panin bang thu na mu thei hiam? Bang thu in upna thu ah hong picingsak thei hiam?
2. Khris in nang a dingin hong si hi, cih thu le ni khat ni ciang a si ding na hi hi, cih thunih ngaihsun in. Tuesday ni-a thusinna, mawhna tawh kisai-in nusiat ding bang thute na phawk hiam?
3. “Pasian om lo hi. Na ut bangbangin nungta in,” cih thu in bang dinmun hong tunpih thei ding hiam? Bangci bangin hih bang ngaihsutna hong om hi ding hiam? Koi bangin Satanin Pasian’ zia le tong i telkhialh dingin nasem hiam? Pasian om mah hi, i cih theihna thute tawh enkak in.
