LESSON 8 | FEB. 14 – 20
PIL KAMPAUTE
SABBATH NITAK
TU KAALSUNG SIM DING: Pau. 20, 21, 22; 1Kor. 12: 14 – 26; Jer. 9: 23, 24; Matt. 25: 35 – 40.
KAMNGAH: Mi khempeuh pen mi citakin kigen kim uh hi; ahi zongin a citak takpi ding mi kimuzo ding ahi hiam? Pau. 20: 6.
Kiim le paam in hong huzaap hi. Mihing in pianpih lungsimpuak khat kinei ciat hi. Ahi zongin innkuan sung kimakaihzia, theihna, muhna le sinnate tungtawnin hi taleh, pupa’ ngeina tuamtuamte tungtawnin gamtat luheek, zia le tong a
zuun toto ihi hi. Zakna le muhna in hong huzaap mahmah hi. Ahi zongin i muh, i zak theih khempeuh a hoih pen hi lo hi. Bang hang hiam cih leh i tenna leitung in siatna tawh kidim hi. Bang bang hi ta leh, eite a hong huh dingin Kha Siangtho hong kipia ding kamciam om khin banah, Topa’ kammal Lai Siangtho in hih leitung nate khempeuh sangin a hoih zaw, a manpha zaw thute hong hilh hi.
SUNDAY FEB. 15
EITE KHEMPEUH IN MIHING HIHNA KIBANG
Pau. 20: 12 sim in. Mihing’ manphatna tawh kisai bang hong hilh hiam?
_____________________________________________________
_____________________________________________________________________
Piansak a um lo mite in, nate amau thuthu-in piang hi, a cih uh hangin, Lai Sianghtho in tua bangin hong hilh lo a, nate Pasian’ hong bawl hi, ci-in hong hilh hi (Sawl. 17: 26).
Pasian’ bawl mihing ihih manin Ama mai-ah mihing khempeuh i kibang khin hi. I piankhiatna mah taleh, mi khat le khat kibatlohna, kilamdanna khat ciat i nei hi. A peng mite zong kibang khin lo hi. Paul in Corinthian khua mite kiangah a gen thu in, khat le khat i kibat lohnate hangin kikhenna, kilangneihna cihte nei lo-in, mihing in mihing khat mah a kitangsapzia pulaak hi. Mit in khut kiangah, nang kisam kei teh, ci lo hi. Tua bang mahin lu in zong khe kiangah kisam kei teh ci lo hi (1Kor. 12:21).
Pau. 20: 9 sim in. Bang in mihing khempeuh hong kikimsak hiam?
____________________________________________________
_________________________________________________________________
Siatna in mi khempeuh hong kikimsak hi. Mi khempeuh mawh hi. Si thei hi. Leitung hauhna, liat in, siatna le sihna panin hong suakta sak thei lo hi. Hih thu hangin lamet bei i hi kei hi; lungkiat ding hi lo hi. Bang hang hiam cih leh Khrh in singlamteh tungah mi khempeuh a’dingin hong si-in, sihna pan thokik hi. Bang bangin siatna tawh kidim mi hi kha mah taleng, nuntak tawntungna lampi hong kibawlsak khin hi. Pasian upna tungtawnin tua nunna i ngah hi. Mihing’ hoihna zia le tong in Pasian mai-ah midik hihna hong pia thei lo ahih leh, Pasian’ mai-ah midik ihih theihna in phiakkhong hehpihna taktak hi. Upna tawh diktanna kingah cih thu eite letkip thuman ahi hi. Thukhen hun ciangin mihing’ hoihna in nuntak tawntungna hong ngahsak thei lo ding hi. Ellen G. White, Faith and Works, 20.
Midangte sangin mawh lo zaw na kisa hiam? Ahih kei leh, a sia na hiam? Mi tawh kitehkak ding hi peuh mah lo hi. Singlamteh tawh kiteh dingte ihi hi. Tua in mi khempeuh i kibatna ahi hi.
MONDAY FEB. 16
NUNTAK SITTELNA
Midikte tawh kisai-in “Amaute sepna thaman in amaute zui ding hi” (Mang. 14: 13). Tua hun ciangin mimal khat ciat ii manneihzia hong kilang ding hi. Tu-in hauhna kiphatsakpih, pilna theihna kisaktheihpih, thahatna kisaktheih om kha ding hi. Ahi zongin Pasian’ mai-ah tua bangte bang hi hiam? Mihing’ gualzawhna, sepna khempeuh, Pasian’ mai-ah mannei het lo hi. Mi minthang, vang nei mahmah mi pawl khat, mite in bia uh hi. Mimawh ihihzia hihte pawl in hong lak hi.
Pau. 20:6; Jer. 9: 23, 24; Mark 9: 35 sim in. Pasian in bangte manphasa hiam?
__________________________________________________________________
_______________________________________________________________
Tawmvei sung khat le khat ki-itna cihte hi lo-in, nisimin a kip, a kho itna nei-in, na neuno khat tung nangawnah lungduai, citakna cihte manpha hi. Innkuanpihte a ding anhuai nasepna, cina luna khat khoi-in kem, nasepna khat peuhah citak kukkal cihte in upna maan kilangsak hi. Citak it na in tua bang gamtatnate ahi hi.
Tua bangmahin Pasian tawh kizopna ah zong citak itna kip kisam hi. Pasian a dingin ka nuntakna ka pia ngam hi; ka si ngam hi, cih sangin, Pasian a ding ka nungta ngam hi, cih theih ding thupi zaw hi. Pasian a dingin sihna a thuak mi khat sangin Pasian a’dingin a nungta mi siangtho khat in na hoih tampi sep ding hun zaw hi. “ A bei dongin a thuakzote in hotkhiatna ngah ding uh hi” (Matt. 24: 13).
Koi bangin lungduaina, hehpihna, mite huhnopna lungsim in Khrih’ zia le tong kilangsak hiam? Na’ supna ding hi kha phial mah taleh, Khrih’ zia le tong kilangsak ding, na lung tung zo taktak mah hiam?
TUESDAY FEB. 17
TOPA’ HUH DING NGAK
Pau. 20: 17; 21: 5 sim in. Nuntakpih ding bang thumanpha na mu hiam?
___________________________________________________________________
___________________________________________________________________
Guta mi in nasemte sangin a deih ngah zaw thei mah hi. Vanzuak mi pawl khat, a thuman mite sangin, thzuauphuahna tawh sum tampi ngah thei mah hi. Ahi zongin Lai Siangtho in tua bangin a gamta mite in gimthuak ding uh hi, ci hi (Pau. 20:21). A hun lopi-in nu le pa’ gamh deihna, nu le pa a samsia mite (Pau. 20:20) gamh ngah nadingin a nu le pa sih baih theih theih nading nasem cihte in gimthuak pelmawh ding hi. Khuavak kisukmitsak tawh kibang ding hi. Mi tung a samsiatna khempeuh ama tungah tung kik ding hi (Pau. 20:21).
Thukkikna tawh kisai-in mi dangte tung a thukkikte in siatna thuak ding uh hi (Pau. 20:22). Tua bangin thukkikna sangin Topa’ thukhenna ngak ding hong hilh hi. Tua in siatna a pelh hi pah hi. I tung hong kibawl siatnate thuk lo-in, Topa’ thukhen i ngak leh, amau tungah mei-am a koih tawh kibang hi, ci-in gentehna tawh hong hilh hi. Tua in ei hong bawlsiate nangawn zawhzawhna hi-in, siatna pen thuhoih tawh zawhna ahi hi (Rom. 12:21).
Bangci bangin Khris’ zia le tong kilangsak ding na hiam? Koi bangin siatna pen thuhoih tawh na zo hiam? Hih thu in i mihing’ pianzia tawh kilehbulh hiam? Bang hangin ‘kei’ cih lungsim sihsakna in Khris’ nunzia kilangsak hiam?
WEDNESDAY FEB. 18
A CIMAWH MITE HEHPIH ITNA
Mi khat ii gamtat zia le tong hoih i theihna bulpi pen in ama pilna le a upna thute tung pan hi masa lo zaw-in, mizawng, cimawh mite a huhna tungtawnin kilang zaw hi. Gamtat hoih i cih in, i neih nate sangin i piakkhiatna siksan hi. Na kiim le paam mite tungah na nunzia in na gamtatna a kilangsak suak hi. A cimawh mipa a huh Samaritan mipa in siampite sangin Pasian’ gam tawh kinai zaw hi (Luke 10: 26 – 37). Paunak in hih bang zia le tong hong hilh hi.
Tua bang gamtat zia le tong in na dangdangte sangin, biakna nei mi hihna sangin cimawh, genthei mite huhna manphasa zaw Pasian mah masakzawkna pan hong kipan ahi hi (Pau. 19:17; 21: 13). Genthei mite huhna, mi’ kitangsapnate kin cihte thudangte sangin deihhuai zaw hi. Tua bangin cimawh genthei mite tungah i bawl khempeuh, Pa Pasian tungah a bawl ihi hi. (Matt. 25: 35 – 40).
Matt. 25: 35 – 40 sung sim in. Khrih in cimawh mite tawh sakhat cikhat ahihzia bang pulaak hiam? Koi bangin, hih thu in, midang tungah gamtatzia ding hong hilh hiam?
____________________________________________________
____________________________________________________________________
Cimawh, mizawngte zong mihaute bangmahin Pasian’ bawlsa mite mah hi (Pau. 22:2). Pasian’ bawlsa i hih manin hau taleng zawng taleng, mi khempeuh a kibang ihi hi. Kuamah deidan lo-in mi khempeuh it ding ahi hi. Bang hang hiam cih leh Pasian in Ama lim le meel sunin a hong bawl ihi hi. Cimawh dongtuakte a huh mi in bangzahin mi hampha ahi hiam? I mihing pianzia ahih leh, huaiham angsung vive hi. Midangte a ding sangin eima a ding mah kinbelin i nei hi. Piakkhiatna in angsung huaihamna si sak thei hi. Khrih’ zia le tong kilangsak thei hi. Tua sangin a manpha zaw om diam?
THURSDAY FEB. 19
SINNA TUNGTAWNIN PILNA
Hebrew kammalin pilna cih a khiatna in ‘kipan,’ ‘kithuhilh,’ci hi. Naupang khat pantahin thuhilhna pen mailam hun a dingin kipatna ahi hi (Pau. 22:6). Tua hi-in naupangte mailam kalsuanzia ding nu le pa, siate khut sungah kinga hi. Tu ni-in naupangte i hilh thute in mailam ah amaute a dingin huzaap lianpi nei hi.
Pau. 22:6 sim in. Bang zahin naupangte thuman tawh pantahin hilh ding thupi hiam?
____________________________________________________
__________________________________________________________________
Hebrew laimalin ‘hilh’ cih kammal in biakbuk ah ki-ap cihna hi (1Kum. 8: 63). Naupangte aneu tung mahin thuhilh pantah cih thu in Pasian tungah ap, hih leitung nuntak banah nuntak tawntungna lampi a hilh cihna hi. Nu le pa in a tawntung kimang ding nunna thute tate a hilh ding tavuan nei hi. Ellen G. White, Child Guidance, 38. Tua bang pilna in tawntung nuntakna dong hong tunpih pilna ahi hi. Paul in zong Timothy tungah “ Khrih upna hangin hotkhiatna a hong ngahsak thei ding pilna a hong pia Lai Siangtho pen na neutung a kipanin a theisa na hihna thu zong na theihsa thu mah ahi hi,” ci-in pulaak hi (2Tim. 3: 15).
Pau. 22: 8, 15 sim in. Bang thupaipi pulaak hiam?
_____________________________________________________
________________________________________________________________
Pilna le a kituh khaici kigenteh thei hi. Innkuan, khua sung om zia ding naupangte tungah kinga hi. Khaici hoihlo i tuh leh, gah hoih lo ding hi. Tua hi-in naupangte in aneu tung mahun thuman thutak tawh pantah hi leng, siatna tawh kigamla ding uh hi.
I gamtatzia in tate a kipan mite a’dingin thuhilhna lian mahmah ahi hi. Bangci bangin na tate in hong etteh uh hiam? Tate tungah bang gamh na nusiat hiam? Koi munte ah limhoih zaw na hi thei diam?
FRIDAY FEB. 20
SIMBEH DING: Tate a ding nu le pa in a citak etteh takcing hih ding kisam hi. Nisimin tua bangin a nungta nu le pa in tate’ nunzia kilamdamsak lo-in om lo ding hi. Nu le pa in cihtakna kisam hi. Hoihtakin tate hilh ding kisam hi. Tate a ding etteh thamcing na hih nadingin tate khem ngei kei in. Tate tungah thumanin citak in. Ellen G. White, Child Guidance, 151.
Nu le pa tampi in tate kitangsap silh le ten, an le tui pia-in sangkahsak peuh lehang i tavuan a khin hi, ci-in kingaihsun uh hi. A tate nuamtakin a om theih nading bek uh thupisak uh hi. Naupangte’ neih siamna tuamtuamte a khanpih ding uh hilh lo uh hi. Honpa deihna bangin a nungta ding hilh kha lo uh hi. Solomon in, ‘naupangte pai nading gen in. Tua hi leh, a teek ciang dong lampial nawn lo ding hi, ci lo hi. Naupangte pantah in. Tua hi leh, a teek dong lampi man pan lampial lo ding hi, cizaw hi. Ellen G. White, Child Guidance, 38.
KIKUP DING DOTNATE:
1. Pau. 2:6 sunga thute ngaihsun pha kik in. Bang hangin a hong gen nunziate nuntakpih ding thupi hiam? Nu le pa in hoihtakin tate pantah a om bang mahin siatna lam manawh veve tate zong om hi. Mihing in ama deihtel zangin nungta i hihlam ngaihsun in.
2. Wednesday ni-a dotna nunung pen en kik in. Ngah kik ding bangmah lamen lo-in mi huhna hangin lungkimna na ngahzia ngaihsun in. Bang hangin leitung hauhna nei napi, a nuntakzia bangin hehpih huai dinmun tungsak hi ding hiam?
3. Mihing khat ciat neih siamna, theihna, pilna, tuakkhak thute kibang lo hi. Ahi zongin mi khempeuh a hong kibangkimsak thu in singlamteh, kitangsam lo mihing om lo hi. Singlamteh mai-ah mi khempeuh kibang khin hi. Singlamteh in eite a hong kihotkhiatna hi-a, tua sangin a manpha zaw om lo hi.
Singlamteh in mi khempeuh i kibatna, i manphatna bang hong hilh hiam? Hih thu in, mite tawh kizopzia ding bang hong hilh hiam?
