LESSON 7 | FEB. 7 – 13
THU UM MI LE KITOT KISELNATE
SABBATH NITAK
TU KAAL SUNG SIM DING: Pau. 17 – 19; 1Kor. 13: 5-7; Jn. 8: 1-11; Thkna. 24: 10 – 22.
KAMNGAH: Kitawng kawmkawmin pawipi sungah an nekna sangin lungnuam takin mohkeu themkhat nekna hoih zaw hi. Pau. 17: 1
Paunak in kineihkhemna deih lo hi. Leitung ah hauhin, lianin, i minthang nei phial
zongin kitot kiselna, buaina tawh kipelh kuamah om lo hi. Hauhna, liatna zonna hangin
buaina tam semsem hi. Egypt mite’ paunak khat ah: “lungkham a hauhna
sangin lungnuam a nekkhop neih hoih zaw hi,” ci hi.
Mihingte’ lungkhamna, lunghimawhna le buaina khempeuh’ bulpi in khat le khat kilemna masak zaw ding maw, ahih kei leh hauhna masak zaw ding maw, cih thunih tungah kinga hi (Pau. 17: 1). Bang zah neih le lamh cih thu sangin, kei kua ka hiam, cih ei le ei kitel ding thupi zaw hi. Hih thu in hauhna sangin lungnopna (shalom) lampi hi zaw hi.
SUNDAY FEB. 8
MAWHNA LE I LAWMTE
Pau. 17:9; 19: 11 sim in. A kisampha mahmah bang thu pulaak hiam? Koi bangin a khial mite tawh kizopna nei ding na hiam?
____________________________________________________
_____________________________________________________________________
Mi khat ii kicinlohna, khialhnate i pulaak kha pahpah hi. A hoihlohnate i pholak nuam pahpah hi. A gamtatzia pakta het lo napi hangin, a hoihlohnate i genthang kha pahpah zel hi. Kuamah gen siasia lo-in siatna piangsak thei thute pulaak ding hi lo hi. Na lawm khat a khialh khak ciang midang tung a khialhna a pulaak pahpah na hiam? Mi’ hoihlohnate pulaak, gensiat cihte in siatna piangsak hi. Lawm khat le khat zong kimudahsak hi. Siatna pholak kul lo hi. Siatna kimuh bawl ding cihna zong hi tuan lo hi. Paunak in mawhna gengen lo-in, mawhna maisakin itna nei dingin hong hilh hi (Late 85: 2; Neh. 4:5).
Pau. 17: 17 le 1Kor. 13:5 – 7 sim in. Koi bangin itna in mawhna maisak hiam?
____________________________________________________
________________________________________________________________
Kicinna nei i hih manin itna nei ihi kei hi. Kicinlohna theipi mahin i it thei hi. Itna bek in mawhna khuhcip zo hi. Kicinna nei kuamah om lo ahih manin mi’ mawhna i muh le eima mawhna zong hong kimu ding hi. A mawh, a khial khat a om leh, amah tawh kibangin dahin, a khialh kik loh nading i panpih thei hi. Tua bangin huh ding hi kei leh, lawm hihna bangmah man nei lo hi.
Siatna lianpi bawlkha-in hong kihehpihin, mawhna a hong kimaisak ngei hiam? Tua bang mahin mite tungah zong na bawlzia ding hong hilh hi lo hiam?
MONDAYFEB. 9
DIKTAT IN
Itna man taktak in mittaw lo hi. Itna in mawhna selcip i cih ciangin mawhna mu lo, thei lo cihna hi lo hi. Itna le thumanna tonkhawm hi. Hebrew laimalin “tsedeq” a khiatna in ‘itna’‘hehpih itna’ cihna hi. Itna man nei lopi thuman cih bang om lo hi. Thuman lopi itna nei cih zong om thei lo hi. Itna le thumaanna kikhen lo hi. Gentehna-in: bangmah nei lo mizawng khat hehpih huaisa-in thuman lopi in huhna pen thuman tawh kituak lo hi. A zawnman-a huhna ahih manin thuman langpang suak hi. Thuman le thutak a tonkhop bang mahin itna le hehpihna tawh zong a tonkhawm uh hi. Hih thu in pilna thu hi-in, Paunak’ hong hilh Topa’ Thukham thute hong theitelsak hi.
Pau. 17:10; 19: 25 sim in. Thuhilhna le tai-na kisapzia bang hong hilh hiam?
__________________________________________________________________
__________________________________________________________________
Pau. 17: 9 ah itna tawh mawhmaisak ding hong hilh hi. A piangziau thei thu hi lo hi. Mawhna ahih zia theihtelna, tua mawhna hangin thuhilhna, tai-na cihte itna siksan kul hi. Khauhtak thuhilhna kitangsam hi.
Jn. 8: 1- 11 sim in. Koici bangin Khris in a kilangtangna mawhna tawh kisai thuhilh hiam?
__________________________________________________________________
__________________________________________________________________
A paktat numei’ mawhna kimaisakna a hangin nuntak hoih, Khris kilangsak ding nunna a neih theih nadingin mawhmaina ngah ahi hi. Khris in mawhna a thukimpih hi lo-in, a mawhna kawk lo zaw-in, mawhna pan honkhia hi. Mite in tua numei mawhna pulaakin, zahpihin a om uh hangin Khris in tua numei hehpihin lametna guan hi. Mawh nei lo MIPA in mawhneite hong zongin, hong honkhia hi. A kineihkhem Phariseete in a nawlkhin mi ahih hangin, Khris in tua bang mite Ama kiang zuan dingin sam hi. Ellen G. White, The Desire of Ages, 462.
TUESDAY FEB. 10
KAMPAU TAWH KISAI
Pau. 18 sim in. Tua lak pan, bang thu limgen hiam? Pau ding a kilawm le kilawm lo tawh kisai-in bang thu hong hilh hiam?
_________________________________________________________________
__________________________________________________________________
Kampau ii vangliatna hong hilh hi. Mihaite’ kampau in a mawknapi ahih zia zong hong hilh hi. Limtak thungai masa lo-in i pau kha thei zel hi. Limtak ngaihsunin kampau hi lehang, kitot kisel cihte kipelh thei hi. Mi khat ii kampau i dawnkik ma-in hoihtak ngaihsun photin pau ding kisin in. Tua hi-in khat veivei dawn kik lohna zong a hoih penpen thu khat hong hi hi.
Pau. 18: 4 sim in. Bang hangin kampau le tuili genteh hiam?
____________________________________________________
______________________________________________________________________
Paunak sungah a tanglo tuili in pilna limcing hi (Pau. 20:5). Daih hithiatna, hauhna limcing hi. Kampau zang siam mite mipil hi-in, a pau uh ciangin ngaihsutna tak tawh kampau uh hi. Pilna, theihna tawh kampau hi lehang bang zahin manpha ding hiam?
Pau. 18:21 sim in. Bang a cihnopna hiam?
____________________________________________________
_____________________________________________________________________
Paunak in mihingte’ tuah ngei thute mah hong hilh hi. Kampau in vanglianin a sia piangsak thei, na hoih tampi zong piangsak thei hi; hinna le sihna nangawn hong tunpih thei hi. Tua hi-in bang zahin muk le kam zatzia kidop huai hiam?
Mi khat ii kampau-na in bangzah ciang hong na sak ngei hiam? Muk le kam tawh kisai bang hong hilh hiam? I gen kammalte kidop zia ding hong hilh hi lo hiam?
WEDNESDAY FEB. 11
TANGTHU KHAT PAN THUNIH
Pau. 18: 2 sim in. Bang hangin mihai in ngaihsun lo-in kampau hiam?
______________________________________________________________
_______________________________________________________________
Mihai in amah le amah thei kisa lua ahih manin ama ngaihsut bangbang gen khia pahpah hi. Mi tung pan bang mah theih sawm lo uh hi. Thungai nuam lo-in, pau bek thei hi. Mihai kampau bangin i pau khak loh ding kidop ding thupi mahmah hi. I ngaihsut thu khat thu hoihin i ngaihsut hangin, a nung ciangin, i khialhlam hong dawk thei zel hi. Tua hi-in ei ma theih khat suang bekbak lo-in kiniamkhiatin kampau ding kisam mahmah hi. Thuman hi, ci-in i pulaak thu khat a man lopi hi kha thei hi.
Pau. 18:17 sim in. Bang thupi hong hilh hiam?
____________________________________________________________________
____________________________________________________________________
Pasian sim loh mi khempeuh in ngaihsut kawmsa-in kampau kul hi. Pasian ahih leh, na khempeuh thei, mu-in, na khempeuh Ama sungah om khin hi (Pau. 15:3). Pasian theihna in ciangtan neilo hi. Mihing in i theih thute tel mahmah i kisak hangin, tua theihna in ciangtan nei hi. Hi mah taleh, theihna tam leh muhna zong zai zaw hi.
Na nuntakna ah thuman mahmahin na ngaihsut hi mah taleh, a nungsang ah thuman lo hi gige cih bang na tuak ngei hiam? Hih thu in mihing’ theihna khial thei ahihlam hong hilh hi lo hiam?
THURSDAYFEB. 12 THUMAN IN
Kumpi khat in ama nasem dingin mi khat deih hi. Nasem ding sittelna khat bawl hi. Koi bangin sittel hiam cih leh, kua in zuau thu gen pen hiam cih tawh sittel hi. Kumpipa nasem ding a ut khempeuh in kumpipa kiangah hong pai-in zuau gen ciat uh hi. Ahi zongin kumpipa lungkim zahin kuamah in zuau gen zo lo uh hi. Tua leh kumpipa innpi sunga nasem khat kiangah kumpipa in bang hangin nang nasep hong ngen lo na hiam ci-in, a dot ciangin, tua mipa in bang hanga nasep siau lo ka hiam cih leh, cikmah hunin zuau gen ngei lo ka hih manin kei tawh kituak lo hi, ci-in dawng kik hi. Kumpipa in zuau gen ngei lo mipa nasep pia pah hi. Siatna tawh kidim mihing ihih manin zuau gen ding baihsa sa mahmah hi hang. Tua hi-in kampau kidop huai mahmah hi.
Pau. 19 sung sim in. Zuau genna tawh kisai bang thu hong hilh hiam?
____________________________________________________
_________________________________________________________________
Paunak Thubu in gamtat zia le tong hoih tampi hong hilh hi. Zuau genin mi lian, mihau hih ding sangin thumanin bangmah neihlohna in manpha zaw hi (Pau. 19:1, 22).
Pau. 19:9 sim in. Teci in bang na sem thei hiam?
_____________________________________________________________
____________________________________________________________________
Bang bang hi taleh, zuau in thu hoih hi ngei lo hi. Thukhenzum cihte ah zuaugen sia zaw kan hi. Kamciam pelhin zuau genna in siatna hi. Teci in thuman a gen ding ahi hi. Mihau pa’maipha ngah ding ki-ut ciat a, na a piak mi khempeuh ama lawm ahi hi (Pau. 19:6); mi khempeuh in a sanggam zawng pa uh mudah ciat ahih manin a lawmte in a taisatna a thu lamdang hi lo hi (Pau. 19:7). Thuman lo-in nasepna, golhguk tawh thuzawhna cihte hangin thuman panin lampial lo ding kisam hi.
Thuhilhkikna 24: 10 – 22 sung sim in. Bang thulaigil hong hilh hiam? Koi bangin tua thu nuntakpih ding na hiam?
FRIDAY FEB. 13
SIMBEH DING: Migensiatna, zuau genna cihte Satan’ khut zat lian mahmah khat hi. Zuau in khat le khat hong kitongsak, hong kimudahsak hi. Upna sittelna khat zong hi pah hi. Mi khat ii hoihlohna khat gensiat ding hamsa kisa lo hi. Thuman thutak langpangin a nial mite’ hoihlohna i kawk nuam pha diak hi. 4T., 195.
Nu le pa in midangte’ hoihlohna tate mai-ah a pulaak manin siatna hong tun ding kongkhak a hong tawh kibang hi. Nu le pa in tate mai-ah mi hoihlohnate gen lo ding hi. Innkuan sungah tua bang hoihlo thute hong tuntheihna kongvang khempeuh khaktan ding kisam hi. Mi gensiatna in a gente gamtat zia le tong susia hi. Mi gensiatna in Pasian’ min daisak hi. Midang tungah i bawl khempeuh Topa tungah a bawl ihihlam mangngilh kei in. Topa’ nasem mite gensiatna in Topa a gensia hi pah hi. 4T., 145.
KIKUP DING DOTNATE:
1. I it mi khat in siatna hong sep khak ciang dahin thuakhaksa hi. Amau’ khialhna i selcip nuam hi . Koi bangin hih bang dinmunte na kantan hiam? Ei zong hong kihehpihin i mawhna hong kimaisak mah bangin, amau’ zong hehpihin a mawhna uh maisak ding kisam hi. Ahi zingin hehpihna le mawhmaisakna in mawhna’ daan tawh hong kipelhsak hiam? Koi bangin hih thunih tonkhawm thei hiam?
2. Tu kaal sung thusinna mah bangin a telhak, hong lungbuaisak thu tampi om hi. I tel mahmah i thute nangawn, ei telna sangin na thuk zaw lai hi. Koi bangin lungsim kongkhak hongin pil gamtat thei ding i hiam?
I kamin zuau thu gen kei tase mah leh, koi bang zuau pulaak i hi kha zel hiam?
