MUC

Print Friendly and PDF

Monday, December 22, 2014

LESSON 6 | JAN. 31 – FEB. 6 A KIMU THEI LO NATE UPNA




Note: Hih website pan in na et peuhpeuh ataw ah +Share om dinga tua mek in Friendly Print pai le cin ki print thei pah hi.


LESSON 6JAN. 31 – FEB. 6

A KIMU THEI LO NATE UPNA

SABBTH NITAK

TU KAAL SUNG SIM DING: Pau. 14; 15; Dan. 7: 25; Mk. 12: 30, 31; Isa. 5: 20; Matt. 20: 26 – 28.

KAMNGAH: Mihingte in thuman lampi hi ci-in a ngaihsutte pen silna lampi hikha thei hi (Pau. 14: 12.



SUNDAY FEB. 1

A HAITE’ KIMUANNA

Pau. 14 sim in. Lai Siangtho in a hai mite’ thu bang pulaak hiam?

___________________________________________________________________

___________________________________________________________________

A haite kiphasakna tawh kampau uh hi (Pau. 14: 3). Ciangduai in thuhilh limciinna hi-in, a kiphasak mite in gim thuak pelmawh ding hi. Ahi zongin pilna nei mite ahih leh kip tawntung ding hi (Dan. 7:8). Mihaite in pilna deih lo uh hi (Pau. 14: 6- 9). Mihai in pilna a zon hangin deihna taktak nei lo ahih manin kithuhilhnate um thei lo hi. Mihai in amah bek pil kisa ahih manin, pilna ngah ngei lo ding hi. Thukham thudon peuhmah lo hi. Mawhna awlmawh hetlohna sangin siahuai zaw bang om ding hiam?





Mihai in a zak thu khempeuh um pahpah hi (Pau. 14: 15).Pilna thu kigente thutakin ngaihsun lo hi. Thuman le thuman lo khentel nawn lo hi. Mi tampi in Pasian’ thu zuih, thu up cihte naupang kikhemna hi; hai vai hi, ci-in ngaihsun uh hi. Piansak thu um lo uh hi. A taktakin a hai vai thute um zawsop uh hi.


Mihaite in thunung thuma ding bang mah ngaihsun lo-in gamta uh hi (Pau. 14: 16, 29). Mihai in pilna nei kisa ahih manin thu ngaihsun lo hi. Bang mah ngaihsun lo-in tatphuatphuat hi. Mihai in midangte nengniam hi (Pau. 14: 21, 31). Mite gimpia pia den hi. Hehbaih den hi. Mi zahtakna zong nei lo hi (Dan. 7: 25; 8: 11, 12).

 Midang’ hoihlohna i mu pahpah hi. Nang’ hoihlohnate ee leh na mu hiam? Pasian’ hehpihna na ngah nadingin mi’ hoihlohna muh ding kisam maw, ahih kei leh, nang hoihlohna muh ding kisam zaw hiam?

MONDAYFEB. 2          A PIL MITE’ KIHTAK

Pau. 14 sim in. A pil mite’ thu bang pulaak hiam?

____________________________________________________

________________________________________________________________________

A pilte in kampau kidawm uh hi. Pilna pen mihingte tung panin hong piangtawm hi lo hi, cih tel ahih manun pau lo-in om hithiat lel uh hi. A zak thu khat sittel uh hi. Mi’gen thute ngai-in, a zak uh thute tung panin pilna mah ngah uh hi. Pilna neite in pilna mah manphasa-in, thu theihbeh tawntung uh hi (Pau. 14:6, 18). A haite in theihna nei lo uh hi. Bang hang hiam cih leh, kithuhilh ding ut lo uh hi. Ahi zongin a pilte ahih leh theihna kibehlap hi. Bang hang hiam cih leh, amaute kiniamkhiat uh hi. Theihna le pilna thu ah khangtoto uh ahih manin nopsakna tawh kidim ding uh hi. Pilna in mihing sung pan a piangkhiatawm thei thu hi lo ahih manin, pilna zonkul hi. Tua bangin a zona tungtawnin pilna ngah uh hi.


A pilte kidawm kikemsiam uh hi (Pau. 14: 15). A pilte in mawhna le siatna phawk thei uh hi. Amau theihna, amau ngaihsutna bek muan le suanin nei lo uh hi. A sia, a pha sittel tawntung a, kantel hamtang uh hi. A zak thute zong kantel, sittel hamtangpah uh hi. A hoih lo a sia lak pan a hoih thute mukhia uh hi (1Thess. 5: 21).

A pilte lungnuam hithiat hi (Pau. 14: 29, 33). Bang hang hiam cih leh amau theihna suang lo-in tunglam pan Pasian kimakaihsak uh hi ( Pau. 14: 14). Pasian a muanna uh hangin amau le amau ki-uk zo thei uh a, tawldam mahmah uh hi (Isa. 30: 15). Topa a zahtak manun tua bang lungmuanna a nei thei uh ahi hi (Pau. 14: 26).


A pilte in hehpihna nei-in mi’ thuakgimnate theihpih lo-in om lo hi (Pau. 14: 21, 31). “ Topa na Pasian na it ding hi,’ cih thupiak le midangte zong na it ding hi, cih thupiak a tonkhawm thupiak ahi hi (Mark 12: 30, 31). Midangte a simmawh khat in Pasian zong a it lo hi pah hi. Koi bangin upna kimu khia thei hiam cih leh a cimawh genthei mite bawlzia-in pulaak hi.

Mi tampi in upna siksan lo-in, muhna siksanin thu-um mi hi uh hi. A kimu thei nate bek um-in Pasian’ kamciamte um lo uh hi. Muhna tawh kalsuan hi lo, upna tawh kalsuan cih a khiatna bang hi ding hiam? Koi bangin upna tawh nungta na hiam?

TUESDAY FEB. 3

“T OPA IN NA KHEMPEUH MU”

Topa’ mit in mun khempeuh mu a, misia, mipha hong encik kim hi (Pau. 15: 3). Hih thu in bang hong ngaihsunsak hiam? Bang hang hiam?

_________________________________________________________________

_________________________________________________________________

Paunak 15 ma-a sangin Pau. 15 nungsiah in Pasian tawh kisai thute limgen zaw hi. Pasian’ lamdanzia, Pasian in mun khempeuh mukim hi (Pau. 15: 3). Israel mite in Topa’ ompihna phawk thei uh ahih manun Topa zahtak uh hi. Topa a zahtak mite Topa in en tawntung hi (Late 33: 18). Tua bang mahin Job in zong Pasian in mun khempeuh a mu Pasian, a piang thu khempeuh a thei Pasian hi, ci-in pulaak hi (Job 28: 24). Hih thu hangin Job in “Topa zahtakna in pilna hi,” ci-in pulaak hi (Job 28:28).


Pasian in koikoi ah i om zongin, a sia, a pha, na khempeuh mu hi cih hong hilh hi. Solomon gen bang mahin pilna man in a sia le a pha hong khentel theisak hi ( 1Kum. 3:9). Tua bang theihtelna in a sia bawl lo-in a hoih nate bek sep ding hong phawksak hi. Bang hang hiam cih leh Pasian in i sepna khempeuh a hong mu hi. Kuamah in hong thei kei nangawn, ci-in siatna i bawl pen ei le ei kikhem ihi hi. “Pasian’ mai- ah seelcip theih ding bangmah om lo hi. Eite khempeuh i dinna ding pa’ mai-ah a kipiangsak na khempeuh a kiliah a ki-im thei om lo-in kimu sinsen hi” (Heb. 4: 13).

Pau. 15:3; Isa. 5: 20 le Heb. 5: 14 sim in. Thuman thutak kihelhzaugawp hun, thuman thutak kip tawntung lo, khat ii hoihsak khat a hoih pen hi pah hi, a kicih hunin a nungta eite in koi bangin a sia le a pha khentel thei ding i hiam? Bang hangin tua bang ngaihsut khialhnate lauhuai hiam?


WEDNESDAY FEB. 4

TOPA’ SUNG LUNGDAMNA


Pau. 15 sim in. Bang hangin nuamna pen a manpha mahmah neih le lamh lian pen hiam?

____________________________________________________

__________________________________________________________________

Lai Siangtho in gimna a thuak kha ngei lo dingin kam hong ciam lo hi. Khrih mahmah in ni khat sunga lungkhamna kicing hi, ci-in pulaak hi (Matt. 6: 34). Gimnate kawmkal ah a lungdam thei mi in hun hoih hun pha a ngah ahi hi (Pau. 15:15). Gimna, hamsatna, ze-etna hong pai ding hi. I khaam theih hi lo, bang hunin thuak kha ding cih zong i magenkhol thei kei hi. I septheih khat om a, tua in, koi bangin tua gimnate kantan thei ding cih khensatna i nei hi.


Pau. 15: 14, 23 sim in. Pasian in i nuam nadingin bang sem hiam?

_____________________________________________________

_____________________________________________________________________

Bang hangin nuam cih a gen kei zongin aneu 13 le 14 sungah ‘ a lungdam mi in thu theihtelna a nei mi hi,’ci-in hong hilh hi. Tua bang mite in mit tawh kimu thei nate sangin, kimu thei nailo thute upna nei hi. Tua ahi-in upna pen kisam mahmah hi. Pasian’ hong itna, Pasian om takpi ahihna theihtel ding kisam hi. Tua bang theihtelna in ze-et hamsatnate hong thuak zosak ding hi. Bang hang hiam cih leh amaute in Pasian’itna theitel uh hi.


Pau. 15: 23 sim in. Nuamna i cih pen na khat peuhpeuh ngahna tungpan hi lo-in, piakkhiatna tungtawnin kingah ahi hi. Kampau a kipan mi huhna tungtawnin hong pai thupha kua-in ngah kha ngei lo hiam? I gensa bang mahin kampau in na tampi sem hi. Siatna piangsak thei, na hoih zong piangsak thei hi.


Koi bangin Pasian in nang mahmah a hong itna na tel takpi hiam? Hih thuman na theihtel nadingin bang na kisam hiam? Pasian’ hong it takpi-na theitel lehang bang zahin i nunzia nuamin hoih mahmah ding hiam?

THURSDAYFEB. 5       
PASIAN’ VANGLIAN UKZAWHNA


Gelna tuamtuam i nei a, a tangtung lo tampi om hi. Khat veivei, i geelna sangin hoih zaw thei, sia zaw thei hi. Lai Siangtho in mihing’tavuan manphatzia le deihtel theihna a manphatzia hong hilh hi. Ahi zongin na khempeuh Pasian’khut sungah om hi ( Pau. 20: 24; 21: 31; Dan. 2, 7).


Pau. 16: 1 in bang thu hong hilh hiam? Koi bangin tua thu na theitel hiam?

____________________________________________________

________________________________________________________________

Mihing in bangbang a geel zongin na khempeuh Pasian’ khut sungah om hi. Geelkholhna a mawkna hi, cihna hi lo-in, upna tawh a nungta mi in na khempeuhah Pasian kimakaihsak, cihna hi (Pau. 16: 9). A tangtungsak Pasian hi (Pau. 16: 3). I ngimna a tangtun nadingin Pasian in na khempeuh sem thei hi (Pau. 16: 4, 7) I geel bangin a tangtun loh ciang, Pasian muan ding kisam hi. Ama tungah kipum ap ding hong deih hi. Tua bang hi leh, i ngimna bangin a pianloh hang, Ama hong makaihna i muang veve thei hi.


Pau. 16: 18, 19 sim in. Mihing in a lawhcin nadingin ngimna le geelna in bang dinmun nei hiam?
____________________________________________________

____________________________________________________________________

A kiphasak lo dingte ihi hi. Khris in kiliatsakna a lauhuai

zia hong hilh hi (Matt. 20: 26 – 28). Bang kiphatsakpih ding nei hiam? Mawhna’ kipatna, kiphatsakna bangzahin siahuai hiam? Eze. 18: 17.
____________________________________________________


___________________________________________________________________


Pau. 16: 33 sim in. Upmawhloh thupiangte (kaam/chance) in bang dinmun nei hiam?

____________________________________________________________________

Lai Siangtho sungah kaam cih bang om lo hi. Upmawh loh a piang nate a kipan na khempeuh Pasian uk khakloh khat beekbeek om lo hi.


“Pasian in leitung uk mah hi taleh, siatna tawh kidim leitung hi,” cih thu in i telzawh loh thute, bang hangin pianga, koi bangin piang thei hiam? cih hong theitelsak hiam?

FRIDAY FEB. 6

SIMBEH DING: Pasian’ thupiakte lo-in nopsakna kingah thei hi, ci-in Satan a tawntungin mawhzol den hi. Tua bangin vantungmite khem hi. Adam le Eve zong tua mah bangin khem leuleu hi. Tua bang mahin tu ni ciang dong mah, thumang lo dingin hong zol den hi. Satan in siatna lampi pen a deihhuai mahmah lampi-in hong musak hi. Ahi zongin hoih hi, ci-in mite ngaihsut lampi in siatna hong tunpih thei hi (Pau. 14: 12). Siatna lampi pan kihei-in thumaan lampi a zui mi in thupha ngah mi ahi hi. Ellen G. White, Patriachs and Prophets, 720.

Lungdamtheihna, Pasian’ min phatnate sangin pumpi cidamsak zatui dang om lo hi. Lungkimlohna, lunghimawhnate nusiat ding hi a, thungetna tawh kalsuan ding kisam hi. Vantung Pa Pasian’ inn lam a zuan mite in khakunkun a, dahna tawh nungta ding kilawm mawk ding hiam? Lungkim nei ngei lo, phun hi den keei, nuamna, nuihna cihte mawhna bangin a ngaihsun mite in biakna maan taktak a nei lo mite ahi hi. Ellen G. White, The Ministry of Healing, 251.

KIKUP DING DOTNATE:

1.     Mihing’ theihtelna kiciangtan hi, cih thu in bang hong hilh hi dinghiam?A kimu thei lo, a kilawng thei lo, a kiza thei lo hi mah taleh, a om veve thute ngaihsun in. Huih, radio wave cihte kimu thei lo, kilawng thei lo napi, a om takpi mah ahi hi. Tua bang thute in mihing’ thutheihna ciangtan nei ahihzia hong phawk sak hi lo hiam? Koi bangin tua bang nate in a kimu thei lo vantung mite a kipan vantung nate om takpi ahihna hong teltheisak hiam?

2.     Pasian in na khempeuh uk hi mah taleh, mihing in deihtel theihna nei hi, cih thu bang hangin i tel ding thupi mahmah hiam? Hih thute nih, kilangdo tawh kibang napi, koi bangin mihing deihtelna le Pasian ukna tonkhawm hiam? 

To get the latest update of me and my works

>> <<