MIHOIHTE’ THUPHA NGAH
SABBATH NITAK
TU KAAL SUNG SIM DING: Pau. 10: 1- 14; 11 – 13; Matt. 19:19; Jn. 3: 16.
KAMNGAH: Mihoihte in thupha ngah a, migilote in thusia bekbek gen hi (Pau. 10: 6).
Hebrew laimal ‘zaddiq’ in ‘mihoih,’ ‘thuman,’ cih khiatna nei hi. Solomon paunakte in pilna ngah nading, thuman ngah nading vive hi (Pau. 1: 1-3). Paunak Thubu’ hong hilh thu in pilna in thumanna hi a, thumanna cih ciangin Topa’ thupiak bangin nuntakna, upna tawh nuntakna, Ama hong sawl bangin sepna ahi hi. Thumanna pen Pasian kiang pan i ngah letsong hi. Thumanna lang khat ah thuman lohna, haina cihte om hi. Pilna in thumanna hi. Haina in mawhna, gitlohna hi.
SUNDAY JAN. 25
THUMANNA IN NUNTAKBUPI HUAM
Pau. 10: 1- 7 sim in. Nunna le upna tawh kisai bang thu bulpi hong lak hiam?
_______________________________________________________________
________________________________________________________________
Tangthu khat ah gunkuang tunga tuang mi khat in a tutna nuai ah vangkhat bawl dingin a gunkuang suvang mawk hi. A lawmte in vangsak kei in. Khawl in ci-in a khohkhoh hang khawl nuam lo-in no tawh kisai kei, kei ma tutna hi, cihsan hi. Khial kisa lo hi. A hai vai mahmah khat hi. Hih mah tawh kibangin, mi gilote in ama gamtatna khial kisa lo-in, kei ma nunna kei ut bangin ka zang ding hi, ci uh hi. Midang tawh a kisai loh hangin, tua bang nunzia in a kim a paam a om mite huzaap hi.
Upna le gamtat khuahek in kizopna a neihzia Pau. 10: 3-5 in hong hilh hi. A hau mi khat a hauh manin thaman kipia ding hi lo, a thuman tungtawnin thaman ngah ding hi. Bang mah nei lo mi khat in bang mah a neih loh manin bang mah ngah lo ding hi tuan lo, a sia, a pha a sep bangbangin thaman kipia ding hi.
Pau. 10: 6 -7 sunga thu in, Khris’ gen mah bangin lunggulhna in nulepa mawhna mah hi. Muhdahna zong mi thatna mah hi, cih hong hilh hi. Lungsimtawng ah muhdahna koihcip cih zong a hoih hi lo hi. Ngaihsutna hoih lo khempeuh i gamtat in zui kha thei hi. I kampau in lak khia thei hi. Midang tawh kizopna hoih penpen in, ei le ei i ki-it bangin midangte itna hi (Siam. 19:18 le Matt. 19:19 enkak in). Thu hoih, na hoih khat mi tungah huzaap lianpi nei hi. Mi khempeuh in thusia, a hoih lo nate sangin thu hoih, a hoih nate mah deih zaw hi lo hiam?
Bang a thupi khensatna na nei hiam? Na kim na paam ah a hoihin huzaap ding maw, ahih kei leh, a sialamin huzaap zaw ding maw?
MONDAY JAN. 26
THUMAN MITE’ KAMPAU
Paunak Thubu in i muk, i leii cihte thupi takin ngaihsun hi. Pau. 10 – 29 sung ah ‘leii,’‘muk,’ ‘kampau,’ cih kammal 50 vei val bang om hi. A pulaak nop bulpi pen in kampau in, a sia ahi a, a pha ahi zongin na tampi semkhia thei hi. Leii pen zangsiam lehang, letsong hoih mahmah hi a, zangsiam kei leng siatna lianpi piangsak thei hi. Kampau in nunna piangsak thei, sihna zong piangsak thei hi.
Pau. 10: 11 – 14 sim in. Koi bangin pilna t awh kampau le haina tawh kampau kilamdang hiam?
___________________________________________________________________
___________________________________________________________________
Aneu 11 ah ‘nunna tuinak’cih thu in pilna manphatzia hong hilh hi. Nunna tuinak in Topa hi (Late 36:9). Biakbuk tawh kisai-in zong kamsang Ezekiel in zong gen hi (Eze. 47: 1, 2). Khris in tua nunna tuinak pen Kha Siangtho’ letsong hi ci-in pulaak hi (Jn. 4: 14). Tua hi-in thuman mite’ kampau in nunna piangsak hi, cih thu Topa Pasian mahmah tawh kizopna ahihzia hong thei sak hi. Hoih takin kampau keptheihna in kampau manphatna hi pah hi. Siatna piangsak, nunna kisia sak dingin zang lo-in a hoih thute bek muk le kam zat ding hong hilh hi.
James 3: 2 – 12 sungah kampau tawh kisai a hong hilh thute zong en in. Pasian in kampauna tawh nate bawlin piangsak hi. A susia hi lo-in a puah, a kipsak kammal zat ding hong hilh hi.
Kampau’ vangliatzia ngaihsun in. Mite lungmuan nading, lungdamna ding, lamet guan kam na pau thei hi. A lang khat ah a susia, lamet beisak thei kampau zong na zang thei hi. Bangci bangin na muk le kam na uk hiam?
TUESDAY JAN. 27
MIDIKTE’ LAMET
Midikte thumanin gamta uh a, migilote amau’ hoih lohna in susia hi (Pau. 11:3). Hih thu tawh kisai-in bang thupiangte na phawk hiam? Bang thuman hong lak hiam? Bang thute-ah upna tawh kalsuan ding hong hilh hiam?
Pau. 11 sim in. A citak thuman mite’ ngah ding thu le mi gilote’ ngah ding bang thu hong hilh hiam?
__________________________________________________________________
__________________________________________________________________
Thuman mite in a ngah ding uh hamphatnate hangin citakin thuman lampi zui uh hi (2Kor. 4: 18). Amaute’ lamet thute in amaute kiniamkhiatsakin, thumanin, hehpihna nei uh hi. A lang khat ah migilote ahih leh, tu le tu a ding bekin nungta uh a, hih leitunga thaman ngah ding bek deihin, a kimu thei nate bek tawh lungkim uh hi. Midangte a ding ngaihsutna nei lo-in, amau a ding bekin nungta uh hi. Vanzuak kim khatin a vanzuakte uh tampipi a khotnop manun zuau gen uh hi. A taktakin ni dang ciang kuamah in tua vanzuakpa kiangah vanlei nawn lo ding uh hi (Pau. 11: 3, 18).
Khensatna khat peuh na neihte ngaihsun kik in. Tawntung a dingin na geel hiam? Tawntung a ding na khensat hiam?
WEDNESDAY JAN. 28
MIDIKTE’ THUMANNA
Thuman gen le zuau gen cih thu Pau. 12 ah koi bangin pulaak hiam? Thuman le zuau genna bangci pulaak hiam?
___________________________________________________
_________________________________________________________________
Pilna nei Sissela Bok in bang gen hiam cih leh “ thuman le zuau thu a khentel thei lo mi in siatna tuak pelmawh ding hi,” ci hi. Tua mah bangin St. Augustine in zong thuman lampi panin neuno khat a hoi khak leh, thuman hi ci-in a pulaak hangin, thuman taktak mah ahi diam cih lungngaih huai hi,” ci-in gen hi.
Ellen G. White in zong a genna ah: zuau thugenna Topa mai-ah siahuai hi. Tua vantung khuapi sungah siatna neuno khat beek lut thei lo ding hi. Zuau kimu lo ding hi. Thuman thutak kiptakin len in. Pulaak in. Nuntakpih in. Mihing hoihsak thu in siatna hong tunpih thei hi. Zuau genna tawh hamphatna kingah kha phial zongin siatna tawh kipelh lo ding hi. Kuamah in muang nawn lo ding hi. Zuau gen mi in midangte khem ahih banah amah le amah kikhem ahi hi. Amah mah in a siatna mu ding hi. Ellen G. White, My Life Today, 331.
Muk le kampau in na tampi sem thei hi, cih thu i gen ciangin zuau thugenna ah zong kampau mah kizang ahih manin kidop kul hi. Zuau phuah deih kua om hiam? Hih siatna tawh kisu kha lo kua om hiam? Zuau thugen nuntakpih mi in siatna sungah a nungta mi hi-in kisiatna tawh beimang ding hi. A za a ngai mite tungah siatna a tun mah bangin zuau gen mi in zong siatlawh hi. Siatna a hihlam kiphawk lo hi. Ahi zongin zuau genlam a kiphawk leh, Kha Siangtho in hopih hi. Zuau a lauhuai zia ngaihsun lo-in zuau gen, bangzahin lauhuai hiam?
Na thumaanloh a nunung pen bang hun hiam? Zuau na gen ciang, bang na ngaihsun hiam?
THURSDAY JAN. 29
MIDIKTE’ THAMAN
Paunak Thubu in nunzia namnih, thuman le thuman lo, mipil le mihai, enkak tawntung hi. A taktakin mimal khat ciatin, pil gamtat le hai gamtat i nei ciat hi. Khrih simloh mihing mawhnei lo kuamah om lo hi. Mi khempeuh in Pasian mai-ah mawhna tawh kidim hi (Rom. 3: 23). Mi mawh ihih laitak mah nangawnin upna tawh eite in “Pasian in a hong hehpihna hangin Khrih Jesuh tawh hong tatkhiat manin amah tawh i kipawlthei kik hi” (Rom. 3: 24). A tawpkhakna ah mi khempeuh khennih bek kipha ding hi: hotkhiatna ngah mite le a mangthang ding mite ahi hi.
Jn. 3: 16 sim in. Mi khempeuh in a tel ding thu nihte in bang hiam?
_________________________________________________________________
__________________________________________________________________
Koi bangin Paunak 13 sungah thuman mite le mi gilote ngah ding thute i mu hiam?
___________________________________________________________
___________________________________________________________
Pilna nei mite ahih leh meivak tawh kigenteh a, migilote ahih leh meivak kisumit tawh kigenteh hi ( Pau. 13: 9). Pilna nei mi’ thaman in nuamna hi ding a, mi gilote’ ngah ding ahih leh siatna mah ngah ding uh hi (aneu 2, 25). Pilna nei mite in lametna nei tawntung uh a, mi gilote ngah ding a kikoih thuphate midangte tungah kipia ding hi (Pau. 13: 22). A hong hilh thu bulpi pen in upna tawh nunna le Topa’ thu a mang mite’ ngah ding thaman in mi gilote’ ngah ding thaman sangin deihhuai zaw le hoih zaw hi, cih hong hilh ahi hi.
Khrih a um mite in tawntung nuntakna ding hi ta kei leh, tu le tu-a kingah thei thuphate ngaihsun in.
FRIDAY JAN. 30
SIMBEH DING: “Khrih ka um hi,” ci-in pawlpi min sazian sungah min kikhum bek tawh kicing hi lo hi. Na nunna ah Khrih’ dikna, thuman a kimuh kei leh, bang bang i um a, bang bang i gen zongin a kimanna om lo hi. Ellen G. White, Christ’s Object Lessons, 312, 313.
Khemna lian pen in thu theihna hangin midik kisakna ahi hi. A thu-in theihna tawh midik hong hi sak thei lo hi. Khrih’ hun lai-in mawhna khuamial sahpi pen in biakna makaite’thuman a langpanna uh ahi hi. Tua bang lauhuaina tu ni dong om lai hi. Pasian thuzui ka hi, ci-in Lai Siangtho thu theihna tawh amau le amau midik kisa mi om hi. Tua bang mi in thuman thutak tawh nungta lo hi. “Thumaan ka thei hi,” cinapi, tua theihna in hehpihna, lungduaina, lungsim sianthona om tuan kei leh, ‘thuma ka thei hi,’ a ci mite in hamsiatna thuak ding hi. Amaute hangin leitung hamsia hi. Khrih tangko dikna Pasian’ deihna kilangsak hi ( Ellen G. White, The Desire of Ages, 309, 310).
KIKUP DING DOTNATE:
1. Koi bangin i khensatna khat peuh in mite tungah a sia, a pha tunthei hiam? Bang hangin hih thu kipelh thei lo hi. Adam le Evete’ khensatna, tu ni dong i tuak kha hi. I khensatna in bangci ciang hoihna, bangciang siatna piangsak thei hi, ci-in ngaihsun kha phial zongin, khensatna khat peuh in bang ciang huzaap nei thei ding cih i thei khol kei hi. Tua hi-in bang bang gimna i phukha ding hi phial zongin, bang hangin, Pasian le Ama’ thupiak siksanin a hoih nate tel zawk ding kisam hiam?
2. Paunak in midik le mi gilote limkhen mahmah hi. Paunak in bang thu in thuman hi-in, bang thu in thuman lo hi, cih thu hong hilh hi. Bang hangin mi khat peuh mi hai ci-in i ngaihsut ziauziau pah loh ding kisam hiam? Lam khat leuleu ah, thuman, midik ci-in i ngaihsut mite’ khemna na tuak zelze hiam?
