NUMEI LE ZU
SABBATH NITAK
TU KAAL SUNG SIM DING: Pau. 31; 8; Job 29: 15; 1Kor. 1: 21; Mang. 14: 13
KAMNGAH: “ Na thatang teng numei tungah beisak kei inla, na sum khempeuh numei tungah zang kei in. Numei in kumpipa siasak thei hi.Lemuel aw, ka thugen hong ngai in. Kumpite in zu nek huai lo a, mi ukte in khamtheihzu a duh ding hi lo hi.” Pau. 31: 3 -4.
Paunak in a thupatna ah pa ii thuhilhna tawh panin (Pau. 1: 1; 8: 4), nu ii thuhilhna tawh a thugen khawl hi (Pau. 31:1). Lemuel in Solomon min dang khat hi ding hi. Lemuel’ nu in Solomon’ nu hi ding hi. A nu
in kumpite pelh ding: zu le numei pulaak hi. Khensatna om lo pi-in numei le zu tawh kikhial lo ding hi. Kumpipa in a nunzia kidop mahmah ding kisapzia hih thunihte tungtawnin pulaak hi. Numei hoih in thupha ahih hangin zu in siatna hong tun pelmawh hi. Pa in tate pilna ngah theih nading lampi hilh a, nu in tua lampi pan lampial lo-in zuih ding hanthawn hi. Nu ii thuhilh na zuih
SUNDAY MARCH 22
ZU LE MIIHNG
Mun khatkhatte ah zu dawnna pen lawm le gual kikholhtheihna khatin zang uh hi. Mikim khatte in zu a dawn ding uh ciangin, zu hai tawikawmin khat le khat tungah ‘na khansau ta hen,” kici-in nuamsa mahmah uh a, a taktakin zu in khansauna susia ahihlam phawk lo uh hi. Cidam nadingin zu tawmtawm dawn ding hoih hi, ci-in kigen hi. Ahi zongin Lai Siangtho in tua bang thute in zuau thu hi, ci hi. Zu dawnna in siatna tawh hong kipelhsak lo hi.
Pau. 31: 4, 5, 8, 9 sim in. Koi bangin, kumpipa’ nasemte bek hi lo, Pasian thuzui mi khempeuh in nuntakpih ding hiam?
_____________________________________________________________
_____________________________________________________________
Job in mittaw mite a dingin mit, khebai mite a dingin khe ahi dingin ka nungta hi, ci hi (Job 29: 15). Tua bangmahin kumpipa le mi huh zo ding khempeuh in cimawh genthei mite huh ding kisam hi. Kuama thusimloh nawlkhin thuak mite a’ding i dinkul hun om ding hi.
Zu in mihing ngaihsutna khelthei hi. Zu in kumpi, makaite siasak hi. Makai khat in zu a dawn manin thutang tawh nasem thei lo a, a hoihnate mu thei lo hi. Zu in thusia khat thuhoihin musak, thuhoih khat thusia-in musak hi. Zu in a sia le a pha khentel theihna susia hi. Zu dawn kei un, cih thu in pilna hi a, mi khempeuh zuih ding ahi hi. Bang hang hiam cih leh, a siangthonate le a sianglo nate khentel theihna kisam hi, ci hi (Siam. 10: 9, 10).
Zu ii siatna a thei lo kua om ding hiam? Zu hangin khangno tampi kisia hi lo hiam? A dawn mite susia banah, midangte zong susia hi lo hiam?
MONDAY MARCH 23
SIHNA HONG TUNPIH ZU
Pau. 31: 6- 7 sim in. Koi bangin natel hiam?
_______________________________________________________
_______________________________________________________
Lai Siangtho in bang gen hiam cih ngaihsut lo hileng, Lemuel’ nu in khamtheihzu dawn ding phamawhsa lo hileh kilawm hi. Ahi zongin Lemuel’ nu ii gen thute tawh kituak lo banah (kumpipa in zu dawn kei hen, ci-in gen) Paunak sung a kigen thute tawh zong kitukalh hi. Paunak sungah zu dawn kei in, ci-in hong hilh hi.
Pumpi zawngkhal, a si ding mite, ama pumpi susia ding na khat pia lehang a hoih sangin kisia tektek zaw hi. Tua bang mahin a lungkia mi khat zu pia ci-in, tuiduh mahmah mi khat ci vapiak mah tawh kibang hi.
I pumpi kepcing ding Pasian in hong deih takpi hi, ci-in a um hia-a, Pau. 31: 6,7 in thu-um mite tungah kigen hi lo hi. Tua banah Paunak sungah “ a si dektek mite’ cih kammal in migilote a cihnopna kammal hi. “ Lungkham mite” cih kammal in a zawnna, kithuhilhna a manglo siatna tawh kidim mite cihna kammal ahi hi.
Satan le a pawlte in siatna i bawl theihtheihna ding lampi tuamtuam vaihawm tawntung uh hi. Pasian in mihingte nek le dawn dingin hong piak mehgah mehteh, an cihte ‘gu’ a suak dingin Satan in bawl hi. Gu in pumpi taksa, lungsim ngaihsutna khempeuh susia hi. Tua hi leh, Satan in ukzo pan hi. Zu hangin siatna kici khempeuh kikhial khin hi. Gong kidek zawhloh manin siatna in hong vukcip hi. Zu hangin siatna khat khit khat kibehlap hi. Ellen G. White, Temperance, 12.
TUESDAY MARCH 24
ZI HOIH
“Zi hoih pen suangmanpha sangin manphazaw pek a, ahi zongin zi hoih ngah ding haksa mahmah hi.”Pau. 31: 10.
Zi hoih a cih kuate hiam? Pasian a zahtak zi banah pilna tawh kidim zi hi ding hi. Zi hoih tawh kisai Pau. 1: 20 – 33; 3: 13 – 20; 4: 5 – 9 in zong pulaak hi. Pilna pen mihing bangin a gamtatna nei-in pulaak hi. Zi hoih in zong pilna tawh a nungta mi, nuntakna nuamsak hi.
Pau. 8 sunga pilna le zi hoih enkak in. Pilna’ manphatzia in zi hoih tawh kisai bang pulaak hiam?
__________________________________________________________
__________________________________________________________
Zi hoih in manpha-in, zi hoih neite hampha hi (Pau. 31:10; 8:35). Zi hoih in ngun le kham sangin manpha zaw hi (Pau. 31: 10;
8: 10, 11)
Zi hoih in a innkuan a dingin nasem hi (Pau. 31: 14; 8: 19) Zi hoih in pilna tawh kidim hi (Pau. 31: 26; 8: 1)
Zi hoih in mite’ pahtakna ngah hi ( Pau. 31: 28; 8: 34). Tuhunin theihna siamna khang mahmahin, i pu, i pate’ khang hun kithei kha ngeilo thute tu-in a kithei khia thu tampi om hi. Ahi zongin amau hun a mite a pil zawkna kimu tuan lo hi. Martin Luther King, Jr. in, “thauvui thautangte i makaih a, mihingte i makaih khial hi,” ci hi.
WEDNESDAY MARCH 25
NASEM ZI
Zi hoih khat ii neih zia le tong in, thadah lo, (Pau. 31), nasep hahkat, mawk om mawkmawk lo hi. Zi hai ahih leh bangmah sem lo, a thadah mi hi (Pau. 6:6; 24: 33, 34). Zi hoih ii nasep in tangzai mahmah hi. Biakna hahkat mi hi-in, inn sung nasep nusia lo hi. Lawptakin nasem hi (Pau. 31: 13). Upna thu ah citak zi hi napi, thunget hahkat zi, Lai Siangtho simhat zi ci-in kiciamteh lo bilbel hi. Martha bangmahin a sepna peuh ah kician, na hoih a sem hi, ci-in kiciamteh hi (Luke 10: 38 – 40)
Pau. 31: 12, 15, 18 sim in. Bang hangin zi in nasem tawntung hi ding hiam?
__________________________________________________________
____________________________________________________
Zi in khawl hun nei ngei lo hi. A nungta buppi, a sih mateng nasem hi (aneu 12). Zan hunsung nangawnin nasem hi (aneu 15, 18). Kizenin, a nasepna bangbang daupai lawhcing hi. A tavuan puak zo mahmah hi. Tua bang hi kei mawk leh, innkuan kisia ding hi.
Pau. 31: 20, 25 sim in. Tawmno hun sungin a sep bang nate pulaak hiam?
________________________________________________________
____________________________________________________
Nasepna khat peuh hanciamna, cihtakna kisam hi. I sep na khat peuhpeuh, a hoihna, a manphatna, hun in pulaak hi. Tu le tu-in a kidawkpah kei zongin, mailam hunah kilangkhia veve ding hi. Pilna tawh nasem i cih ciangin, mailam hun ngaihsun kawmin sepna ahi hi; tu le tu-a hamphatna ding bek ngaihsuna sepna hi lo hi.
Mang. 14: 13 ah tuhuna i sep nate mailam hunah i ngah ding hamphatna pulaak hi. “ Tu a kipanin Topa thu-ah a si mite mi hampha mahmah ahi hi, cihna gelh in, a ci hi. Tua ciangin Kha Siangtho in, “ Hi takpi hi. Amaute’ nasepna thaman in amaute zui ding ahih manin a nasep dimna panun tawlnga-in nuamsa-in om ding uh hi,” ci-in a dawng hi.
Na zi, naseppih numei, lawm, sia khat peuh, innkuanpih, numei hoih hi-in, nang a dingin a hongsepsak nate hangin koi bangin na lungdamna lak ding na hiam?
THURSDAY MARCH 26
ZI HOIH IN DEIHSAKNA NEI
Pau. 31: 26 – 31 sung sim in. Zi hoih khat ii omzia bang pulaak hiam? Kua kua hi taleng, bang hangin tua thute thupi mahmah hiam?
____________________________________________________________
____________________________________________________________
Tu quarter sunga i thusin bangmahin kampau in vanglian mahmah hi. Zi hoih i cih in a pil gamtat, zia le tong hoih nei ahihna kimu thei hi. Pilna i cih in i kampau mukpau cihte banah gamtat zia le tong kician neihna zong ahi hi. Zia le tong hoih in i kampau a makaih ciangin bangzahin kampau in vanglian mahmah hi.
Pau. 31: 30 sim in. A kimangngilh pahpah hi mah taleh a thupi mahmah bang thu hong hilh hiam?
___________________________________________________________
____________________________________________________________
Puatham melhoihna peuh hoihna-in kingaihsun kha zel hi. Lai Siangtho in tua bang hoihna in khemna hi, ci hi. Numei’ hoihna taktak in lungsim hoih, sunglam hoihna hi-in tua hoihnate gamtat zia le tong tawntungin kimu khia thei hi. Melhoihna beimang pak ding a, gamtat zia le tong hoih ahih leh, kip tawntung hi. Minthanna, melhoihna in sehnel tunga lai kigelh bang ding a, nuntak hoih, gamtat hoih ahih leh, maimang ngei lo ding hi. Ellen G. White, God’s Amazing Grace, 81.
Na nuntakna ah kipuahphat lai ding a om hiam? Picing nuntakna dingin thunget bel hi mah naven, bang sep khiat kul hiam?
FRIDAYMARCH 27
SIMBEH DING: Khamtheih zu lunggulhna panin zongsatna hoih lo tuamtuamte hong lunggulhsak manin, thu ngaihsut theihna khuak nasep susia hi. A siangtho le a niin, a hoih le hoih lo khentel theihna bei hi. Pasian zahtak lo Nadab le Abihu in , a siangtho lo mei tawh meihal biakna pia uh hi. Pasian kiang pan mei in amaute kangtum hi. Ellen G. White, 3T., 295.
Naupang le khangnote in Pasian zahtak zia ding a neutung pan mahun kisin uh hen. Lai Siangtho sunga thute sim uh hen. Paunak sim uh hen. Paunak sungah numei hoih in nasep hahkatin, siamgan-in a innkuante puansilh guan hi. Annek tuidawn ding vaihawmsak hi. Mi cimawh gentheite huhin kem hi. Inn sung 1vai kisam khempeuh amah mahin makaih hi. Tua bang numei in thadah mite’ an ne lo-in, kumpi’ an ne hi, cih thute sin uh hen. Pau. 31: 13, 15 – 17.
KIKUP DING DOTNATE:
1. Bang hangin zu peuhmah pelh ding in lampi man hi thei hiam? A tawp khakna ah khamtheihzu dawnna hangin bang hoihna piang peuh mah hiam? Zudawnna hangin siatnate ngaihsun in.
2. Theihna hau mahmah taleng, pilna kingah hi pah tuan lo hi. Pilna nei napi, bang mah thutheihna nei lohna sangin theihna hau mahmahin pilna neihloh pen lauhaui zaw hi lo hiam? Leitungah pilna nei lo, theihna bek hangin siatnate ngaihsun in.
3. Zi hoih ii nunzia ngaihsun pha in. Koici bangin numei, pasal thu-um a kua mapeuh in zi hoih ii zia le tongte nuntakpih thei ding hiam?
4. Paunak in nuntakpih theih ding thu tampi hong hilh hi. Upna, i zuih thute in a thu bekin theihna hi lo-in nuntakpih theih ding thute ahihlohzia hong hilh hi lo hiam? Nuntakpih ding thu le a thu in theihna kikhen thei ahih lohzia na phawk hiam?
